Read Kono CHISƆSI 'A SƆ MƆƐ NU 9 Bible Online

CHISƆSI 'A SƆ MƆƐ NU 9 - Kono bible

CHISƆSI 'A SƆ MƆƐ NU 9

¹Chɛɛ a tima chɛ a, Sɔɔ ni wan tun ko ma gbaaenɛ sa‑a mɔɛ chɛ n ma, miin na‑a an kai fa Mansa Chisɔsi a. A sin, a toen fan ni to, a ni an fa. Mbɛ a ta‑a Chu n 'na tɛ mɔ wa chɛ tena,

²mbɛ a‑a a ɔ tisa, gboo be koe a a ma. Gboo nyɛndenɛ chɛ, ɛ kun fan a ni a wakoe ɔ yian, ya ɔ sɔɛ chɛ n na, Chu n 'na samun chɛ chenɛ n na, Damasikɔsi duu ɔ. A na‑a chɛ ma koe min na, a toen ni, ni a‑a mɔ ɔ mɔ tan, min‑na a sɔ chia chɛ fɛ, Chisɔsi‑a min yian ka a sɔ koe a a fɛ, a ni a bia. A ni ma mɔ kaima a, chɛ ma, musu wɛɛ, a ni na a a Chuusaɛn duu bu ɔ.

³A ni kɛn gbɛ ta‑a, mbɛ a gbɛn‑da Damasikɔsi duu ɔ ma. Mbɛ a ya kɔɔɛ a, man ba‑a a a bɛn, a ka banda a.

⁴A bea‑a wan duu ma, mbɛ a‑a mɔɛ kuiɛ a min, a ɔ, “Sɔɔ, Sɔɔ, fen mu e ko ma gbaaenɛ sa tena ka n ma?”

⁵Mbɛ Sɔɔ ɔ, “Nyɔn mu chɛ a?” Mbɛ a ɔ, “N fan mu, n fan Chisɔsi, e ko ma gbaaenɛ sa tena ka min ma.

⁶Chɛɛ i kɔɔ sɔ, i ni ta Damasikɔsi duu wa chɛ ɔ. Mɔɛ ɛ a ɔ yian‑da wan i a nɔ, e koe min ma.”

⁷Sɔɔ ni ka ta tena, an bɛ mɔɛ miin na, an bɛɛ na‑a sɔ wan, chɛɛ an ma bai tɛ ni a ma gbukuu wɛɛ. An bɛɛ na‑a mɔɛ chɛ kuiɛ a min fan, chɛɛ an nii ma an mɔɛ chɛ gbu yen ni an ya a.

⁸Mbɛ Sɔɔ‑a a kɔɔ sɔ duu ma, a‑a a ya a ka paden, chɛɛ a nii ma kaina kan kɔ kan yen ni to. Mbɛ an‑na a bia a boo ma, an ta‑a a a Damasikɔsi duu ɔ.

⁹A sin ni wan tee sawa ko a, a ee kaina yen. A tima chɛ sin gbɛɛ ɔ, a nii daun chɛ, n mbe ee baa, yii min ko ma.

¹⁰Mbɛ a yen ko gbɛ, Chisɔsi fɛ den dɔndɔ ni wan nɔ Damasikɔsi, min tɔ ni Ananiyasi. A na‑a ma wan yɔ a ni cho ɔ wan, mbɛ Mansa Chisɔsi‑a a chee, a ɔ, “Ananiyasi!” Mbɛ a dɔn‑da, a ɔ, “Mansa, n yen ko nɛ.”

¹¹Mbɛ Mansa Chisɔsi ɔ, “I ma bɛn, mbɛ i ta‑a dani chɛ a, an mbe min chee, an dɔ, Dani Tandenɛ. An dani chɛ a, chenɛ ɛ wan nɔ, min mu Chudasi ta a a. Tisa chɛ nɔ kamin dɔndɔ ko a, min tɔ mu Sɔɔ. A ka‑a Tasɔsi duu ɔ wan. A yen ko samunɛ chɛ‑a, sanche wɛɛ.

¹²A sin na‑a koe ɔ yen fan, yɔ a ni cho ɔ wan. A na‑a mɔ dɔndɔ yen fan, min tɔ mu Ananiyasi. Ananiyasi chɛ na‑a wan, mbɛ a don‑da chen chɛ a, ɛ ka kaina min. Mbɛ a‑a a boo bun a ma, min mbe a ma, a ni kaina yen to.”

¹³Chɛɛ Ananiyasi ɔ, “Mansa, mɔ sɛsɛ n‑na kamin chɛ wakoe ɔ yian fan n na. A‑a ko ma gbaaenɛ miin sa i 'a mɔɛ n ma Chuusaɛn, a koo.

¹⁴Mbɛ a sin gbu na‑a ka wan gbɛ Damasikɔsi, gboo nyɛndenɛ a a boo ɔ. Gboo chɛ sin, a‑a gbasaya be wan a ma, a ka Chu n tɛ mɔɛ nu Yataa a, an 'na mansa n tena, mɔɛ n gbɛɛ bia koe a, miin mbe i fai tena.”

¹⁵Chɛɛ Mansa Chisɔsi‑a a fɔ wan a ye, a ɔ, “Ta, mɔna chɛ mu, n‑na n boo sɔ min ma, wai chɛ koe a n ko a. A ni n bakoe ɔ yian mɔɛ n na, miin ma Chu mɔɛ n na, a basan mansa n na, an bɛ Isɔɛɛ mɔɛ n na.

¹⁶A sin, n mbe a ɔ yian‑da wan a a gbɛ, a wɛɛ, ɛ mɔnɛ min nyɔn sima ɔ bia‑a n ko a.”

¹⁷Mbɛ Ananiyasi ta‑a, a don‑da chen chɛ a, Sɔɔ ni min na. Mbɛ a‑a a boo bun a ma, a‑a samunɛ chɛ. A ɔ, “Sɔɔ, n suun ma nyɔɛ Mansa Chisɔsi ɔ, a wandi gbu, an‑na n sɔ ka i tena. An na‑a bɔ ka i ya a, chia chɛ a, kɛn i ni na tena nɛ duu chɛ ɔ. A‑a n sɔ, min mbe a ma, i ni kaina yen to. A yɛ to, Yataa Nyina ni bea i fɛ gban.”

¹⁸Mbɛ Ananiyasi‑a bai chɛ fɔ kɛn, a ya kɔɔɛ a, fenɛ bea‑a, a bɔ Sɔɔ ya a yɔ nyɛ wɔnbɔɛ, mbɛ a‑a kaina yen to. Mbɛ a‑a a kɔɔ sɔ, a sɔ‑a, mbɛ Ananiyasi‑a yii chɛ a kunɛ ɔ, Yataa chia a.

¹⁹Mbɛ a‑a daunɛ chɛ kɛn, a fanka yɛ‑a wan to a ɔ. Sɔɔ ya chɛ a ka‑a kɛn, a ni wan Damasikɔsi, an bɛ Chisɔsi fɛ denɛ n na, tee kuunden ko a.

²⁰A nii ma tima yayi ni, chɛɛ a ta‑a wan dɔndɔ gbe Chu n 'na samun chɛ chenɛ n na. Mbɛ a bun‑da bai sa‑a, a si Chisɔsi ma, a ɔ, Yataa 'a denɛ an nɛ.

²¹Mbɛ mɔɛ miin gbɛɛ‑a a da a kuiɛ chɛ a min ka, an na fii‑a wan. Mbɛ an dɔ, “Wuo, kamin chɛ an ni mɔɛ n fa pan Chuusaɛn, miin ni kamin chɛ fai, min mu Chisɔsi a. An ma chɛ a? A gbu sin, a na‑a nɛ ka mɔɛ chɛ n fan gbu bia koe a, ta koe a an na Chu n tɛ mɔɛ nu Yataa a, an 'na mansa n tena. Ae?”

²²Yataa‑a gbasaya be wan Sɔɔ ma, a 'a Yataa bai sa ɔ. Chɛ‑a a ma wan, ni a‑a a ɔ yian mɔɛ n na, mbɛ Chisɔsi an mu kunka mansa a, dɔ tisa nii ma nɔ. A da a bai kɔ ni gbɛɛ buɛ min dɔ, Chu mɔɛ miin ni Damasikɔsi, an nii che bai ɔ bai sa‑a.

²³Tee sɛsɛ bendenɛ gbakɔ, Chu mɔɛ n bɛn‑da wan kaina dɔndɔ, mbɛ an‑na a ɔ bɛn Sɔɔ fa koe a,

²⁴chɛɛ mɔɛ n‑na an 'na dɔbɛn chɛ kɔɔ yian fan Sɔɔ a. Su ɔ tee a, mɔɛ n ni wan Sɔɔ ma kɔn tena, a fa koe a. Kanda wa chɛ min tindandenɛ ni duu wa chɛ a, an ni wan sɔ ɔ a da gbɛɛ ma kɔn‑da.

²⁵Chɛɛ su dɔndɔ ɔ, Sɔɔ fɛ mɔɛ n‑na a si wan tɛngbɛ ɔ, mbɛ an‑na a a ben sonɛ a, min ni kanda wa chɛ ma. An‑na a a yii wan, a che duu ma.[11]

²⁶Sɔɔ ta‑a wan Chuusaɛn, mbɛ a ta‑a Chisɔsi fɛ denɛ n tena. A toen ni an ni sa an kaa a. Chɛɛ an nii ma dan ni a a, mbɛ a wan Sɔɔ wɛɛ mu gbɛ an dɔndɔ an na. A sin, an gbɛɛ chiandenɛ ni a wan Sɔɔ gbu ma.

²⁷Chɛɛ Banabasi basan‑da wan Sɔɔ ma, a yian koe a Chisɔsi 'a sɔ mɔɛ chɛ n na. A‑a a ɔ yian fan an na, Mansa Chisɔsi bɔ‑a buɛ min dɔ Sɔɔ ya a, kɛn a ni ta tena Damasikɔsi. A yɛ to, Mansa Chisɔsi koɔ‑a buɛ min dɔ a tena. Banabasi yɛ‑a wan to, a‑a a ɔ yian, Sɔɔ na‑a Yataa bai sa buɛ min dɔ faagbɛa a, mɔɛ n tena Damasikɔsi, a si Chisɔsi ma.

²⁸Chɛ ko a, an dɔn‑da wan, an bɛ ni ma Sɔɔ a. A ka gbɛ a tee chɛ gbu sin ma, a ben ben‑da Chuusaɛn gbɛɛ ɔ, ɛ ta‑a bai sa‑a, a si Mansa Chisɔsi ma, faagbɛa wandi a.

²⁹A‑a bai sa wan Chu mɔɛ chɛ n bɛɛ tena, miin ni Kiisi koɛ fɔ ka. An ni ma bai ɔ, a ni sɔ wan an kanɛ ɔ kaka. Chɛ an fɛ ni, an toen ni, an ni a fa.

³⁰Sɔɔ suun ma nyɔɛ chɛ nu Chasi ɔ, an‑na koe chɛ kɔɔ sɔn kɛn, an yii‑a wan Sɔɔ a Sisayea duu ɔ, mbɛ an‑na a a ta Tasɔsi duu ɔ.

³¹Mbɛ a ka gbɛ a tima chɛ ma, faachima yɛ‑a wan to mɔɛ chɛ n ma, chɔchi n gbɛɛ ɔ. A ka Chudia chɛnyɛ ɔ, a ta Kadidi, ni Samayia chɛnyɛ ɔ. Yataa Nyina basan‑da wan an ma, an dɔ gbɛa koe a. A sin, an ma munda‑a wan kaka, a mu min na, an gbɛɛ ni basɔmaya wa be wan Mansa Chisɔsi ma.

³²Tima che‑a wan, Pita ni ben ben Chisɔsi fɛ mɔɛ chɛ n kun ma. Tima dɔndɔ a, a ta‑a wan Yataa 'a mɔɛ n kɔndɔn‑da, miin ni si ɔ Dida duu ɔ.

³³An duu chɛ ɔ, kamin dɔndɔ ni wan nɔ, min tɔ ni Ainɛasi. A namaaenɛ ni. A sin, san sɛin ko a, a nii ma che ni puin‑da a sa sofa gbu a.

³⁴Mbɛ Pita‑a a fɔ a ye, a ɔ, “Ainɛasi, Chisɔsi Chasi‑a i baun. I kɔɔ sɔ, i ni i 'a sofa ɔ bɛn.” A ya kɔɔɛ a, Ainɛasi‑a a kɔɔ sɔ.

³⁵Mɔɛ gbɛɛ, miin ni ka Dida duu chɛ ɔ, an fea Saon na, an‑na kamin chɛ yen fan tachɛ a. Mbɛ an gbɛɛ‑a an ya a mun, Mansa Chisɔsi ma, a tima chɛ a gbɛ.

³⁶Chɔpa duu wɛɛ ɔ, musu dɔndɔ ni wan nɔ, min tɔ ni Tabita. A na‑a a kai fa wan Chisɔsi a. Kiisi mɔɛ n ni a chee, an dɔ, Dɔkasi, min fasaien ni dɔmba. A 'a fɔɛ gbɛɛ ɔ, a ni wai nyima wa an chɛ, a ɛ basan yɔn tɔɛ n bɛɛ ma.

³⁷Tima che‑a wan gbɛ, a gbandi‑a, mbɛ a fa‑a. An‑na a su koe chɛ wan, an‑na a ma bɛn, mbɛ an‑na a sa dumu dɔndɔ ɔ, a 'a banda a chenɛ a.

³⁸Chɔpa ɔ nii ma yansan Dida a. Mbɛ Chisɔsi fɛ mɔɛ nu Chɔpa, an‑na a a min kɛn, mbɛ Pita ɛ Dida, an‑na mɔ fea n sɔ wan a tena. An dɔ, a dimu, a ni na bui chɛ a nɔ an tena, Chɔpa.

³⁹Mbɛ Pita‑a a ma bɛn, an bɛ ta‑a mɔ fea chɛ n na. An‑na a fo kɛn, mɔɛ chɛ n‑na Pita ya wan, mbɛ an sɛ‑a a a banda chenɛ chɛ dumu chɛ ɔ. Fuinya musu n gbɛɛ, an tindan‑da wan Pita a, an mbe di chɛ‑a fiko fiko. An mbe ta‑a to koa n yian‑da Pita a, Dɔkasi na‑a miin nyan, a ni kɛn fɔɛ ɔ.

⁴⁰Mbɛ Pita‑a an gbɛɛ a bɔ dumu gbu ɔ, mbɛ a‑a a kumbai gbangban, a‑a samunɛ chɛ. Mbɛ a‑a a ya a mun su chɛ ma, mbɛ a‑a a fɔ, a ɔ, “Tabita, i kɔɔ sɔ.” Mbɛ a ya kɔɔɛ a, Tabita‑a a ya a ka. A sin‑na Pita yen kɛn, a‑a a kɔɔ sɔ wan, mbɛ a si‑a.

⁴¹Mbɛ Pita‑a a bia a boo ma, mbɛ a basan‑da a ma, a kɔɔ sɔ koe a, a ni sɔ. Mbɛ Pita‑a mɔɛ chɛ n gbɛɛ chee, miin na‑a an kai fa ka Chisɔsi a, a basan fuinya musu chɛ n na, mbɛ a‑a musu chɛ a yɛ an ma, a fɔɛ ɛ a sun da a.

⁴²Mɔɛ n gbɛɛ Chɔpa duu ɔ, an‑na koe chɛ a min fan, a si musu chɛ ma. Chɛ‑a a ma wan to, mɔ sɛsɛ n‑na an kai fa Mansa Chisɔsi a.

⁴³Pita ni wan Chɔpa tee sɛsɛ ko a, kamin dɔndɔ a sondaya a, min tɔ ni Saimɔn. Saimɔn chɛ ni kanche an na.