Read Kono GBOO DOMI KO A 12 Bible Online

GBOO DOMI KO A 12 - Kono bible

GBOO DOMI KO A 12

¹N bɔ Chisianɛ nu, Yataa 'a chinchincha koo mmɔ tena. Chɛ an fɛ mu, n mbe wo disa tena, min mbe a ma, wo ni wo wandi be a 'a wai ko a. Wo ni ma tenchen an ko a. Wo wo fɔɛ gbɛɛ be a ma, wo ni ma yasi a a ko a, min mbe na faachima a a tena. Chia chɛndɛ gbu sin mu chɛ an na, Yataa fai koe a.

²Wo ma a a tun koe n ma koe a, dunya chɛ ɔ mɔɛ n mbe miin ma. Chɛɛ wo faa an dɔ, Yataa ni wo mun, mbɛ a‑a yiima nama chɛndɛ chɛndɛ be wo ma. A tima chɛ a mu, wo e kun‑da wo ni a ɔ sɔn, Yataa toen mu koe miin na. Wo ni a ɔ sɔn, koe miin nyin Yataa tena, a yɛ to, mabɔ ee miin ma, an sin mbe a faa chima wan.

³N‑na a ɔ sɔn fan, Yataa‑a min chɛ n ye, koe min na mu a chinchin‑da wan n ma. Chɛ an fɛ mu, n mbe chɛ fɔ tena wo gbɛɛ ye, mbɛ wo ma wo wandi a sɛ, a ni ben wo e buɛ min dɔ. Chɛɛ wo e min ma, wo tea yiinachii chɛ, a si wo wandi ma. A sin, wo yiinachii chɛ, Yataa‑a min chɛ wo ye, a mu min na, wo‑a wo kai fa a a.

⁴Chɛ ɛ wan yɔ mɔ gbu gboo, mmɔ sɔna n da a koo a ma. Mmɔ sɔna chɛ n sin gbɛɛ mbe wai chɛ dama dama.

⁵A chia dɔndɔ gbe chɛ a, mmɔ kɔkoo wɛɛ ka boo ɔ boo Chisiancha chɛ ɔ, mmɔ ma‑a gbɛ mɔ dɔndɔ a mmɔ bɛ Chasi a. A yɛ to, mmɔ‑a tun tunden fan mu, mmɔ nyɔn na.

⁶Chɛ an‑na a fɔ, Yataa‑a koadia demanɛ chɛ mmɔ a. A‑a mmɔ gbɛɛ kɔ wan mmɔ ta chia n na. Mmɔ wɛn, Yataa‑a mmɔ kɔ a 'a bai sa koe a mɔɛ n tena, mmɔ a sa danaya ɔ min nyɔn sima ɛ mmɔ ɔ.

⁷Ni Yataa‑a yiimatɛ chɛ mmɔ ɔ, basan koe an na mɔ dɔ gbɛɛ n ma, mmɔ basan an ma chɛndɛ chɛ. Ni an kan koe mu, mmɔ an kan chɛndɛ chɛ.

⁸Ni an faa ma nande koe mu chɛndɛ chɛ, mmɔ a ma ka. Mɔ ɔ mɔ min mbe mɔ dɔ gbɛɛ n deman‑da, a ni an deman a faa gbɛɛ a. Ni mɔ ɔ mɔ ma‑a gbasaya ɔ, a mɔɛ chɛ ni wai chɛ chɛndɛ chɛ. A sin, ko chɛndɛ ma faa ɛ mɔɛ min dɔ, a mɔɛ chɛ ma a ya kɔɔɛ sisi, ni a ma‑a an ko chɛndɛ ma‑a mɔɛ n na.

⁹Ni i bɔɛ ko a dia‑a i ye, a ko a ni dia i ye i faa gbɛɛ a. Wo ma to ko yama a, chɛɛ wo ko chɛndɛ ma an bia wo boo fea a.

¹⁰Wo to wo nyɔn na chɛndɛ chɛ wo faa gbɛɛ a, yɔ mɔɛ ɛ to buɛ min dɔ a suun ma nyɔɛ n na. A sin, wo ma bɛndenɛ ni ma basɔmaya be koe a wo nyɔn ma, tima ɔ tima ko a.

¹¹Wo ma ma gboo ɔ fa tɔɛ n na, wo wai chɛ wo sɔɛ gbɛɛ a. Wo wo wandi be Mansa Yataa ma, wo ni a 'a wai chɛ wo faa gbɛɛ a.

¹²Wo ma buɔdia ɔ, tima ɔ tima ko a. Koe min na mu, wo yii na tɛ tena ɛ wan. Ni yakɔɔtawa‑a wo tan, wo wo faa bia. A sin, wo samunɛ chɛ tima ɔ tima ko a.

¹³Ni Yataa 'a mɔɛ n ma‑a yakɔɔtawa ɔ, an kɔ i boo fenɛ dɔ ɔ. Ni ben sonda na‑a i waa tima ɔ tima ko a, i boo si a kɔɔ i 'a chenɛ a.

¹⁴Ni mɔɛ n‑na ko ma gbaaenɛ sa wo ma, wo Yataa ɔ tisa, a ni an dua. Wo a ma ka wan gbu. Wo a ɔ tisa, a ni an dua, chɛɛ wo ma a ɔ tisa, a ni an danka.

¹⁵Mɔɛ miin mbe buɔdia ɔ, wo bɛ ni an buɔdia bɔ an na. Mbɛ miin mbe chinchin di chɛ‑a, wo‑a an kan dɔ bia.

¹⁶Wo wo boo a si wo nyɔn kɔɔ chɛndɛ chɛ. Wo ma ma dɔpanda tɔɛ n na. Baa ee ka mɔɛ miin ma, wo an ma wo dia nyɔɛ n na. Wo ma wo ta mansaencha a sɛ kaka.

¹⁷Ni mɔɛ n‑na ko yama ma wo a, wo ma wo ta a yɛ ko yama a. Chɛɛ wo butuin chɛ, wo ni koe n ma, miin ma ɛ kawa mɔ ɔ mɔ ya a.

¹⁸Wo ta nan gbu, wo butuin chɛ chia ɔ chia a, wo ni ma faachima ɔ mɔ ɔ mɔ a.

¹⁹N dia nyɔɛ nu, ni mɔɛ n‑na ko yama ma wo a, wo ma wo ta a yɛ an ma. Chɛɛ wo e min ma, wo an to nɔ, Yataa wandi ni kaa a tɛ. Koe min na mu, a nyɛnden fan mu a 'a gboo ɔ, mbɛ a wan Yataa ɛ ta ɔ nyɔnɛ chɛ‑a wan, ko yama chɛ n ko a, an‑na miin ma.

²⁰Chɛ an fɛ mu, yɔ Yataa 'a gboo chɛ‑a a fɔ buɛ min dɔ, wo e a ma ka wan. A ɔ, “Ni kɔnkɔɛ ma‑a wo ko don ma nyɔɛ n na, wo daun fenɛ be an ma. Ni an kanɛ n na gbaaenɛ ma‑a, wo min yii be an ma. Koe min na mu, wo e ma‑a chɛ ma‑a, wo e ma‑a ka an mɔɛ chɛ n na mau‑a wan kaka.”[6]

²¹Ko yama ni ma i a boo ɔ boo, chɛ ma a ma, i wɛɛ ni ko yama ma. Chɛɛ ko chɛndɛ an ma, i chɛɛ ma nyɔɛ n bɛɛ a.