Read Kono GBOO DOMI KO A 13 Bible Online

GBOO DOMI KO A 13 - Kono bible

GBOO DOMI KO A 13

¹Mɔ ɔ mɔ ni kooya be mɔɛ chɛ n ma, miin mu ka ya ɔ sɔɛ n na. Koe min na mu, mɔ ɔ mɔ ee gbasaya ma sɔn, ni Yataa ma dɔn ni a ye. A sin, mɔɛ miin mbe gbasaya ɔ ka, Yataa an‑na a be an ma.

²Chɛ an fɛ mu, mɔ ɔ mɔ min mbe ban‑da kooya be koe a ya ɔ sɔɛ ma, a mɔɛ chɛ‑a Yataa 'a dɔbɛnɛ an kɔɔsa bia ka. Mɔɛ min sin mbe chɛ ma‑a, ɛ na‑a gbɛmbo an na a wandi kun ma.

³Koe min na mu, ko chɛndɛ ma mɔ ee chian ya ɔ sɔɛ n ma. Chɛɛ ko yama ma mɔɛ n fan mbe chian ya ɔ sɔɛ n ma. Ni i ma to ni chianɛ ni ma i ɔ ya ɔ sɔɛ n ko a, mbɛ ko chɛndɛ ma. Chɛ an mbe a ma an ni i tando.

⁴Koe min na mu, ya ɔ sɔɛ mu Yataa 'a yɔnɛ an na, min mbe wai chɛ koe a i ko a, i ni baka. Chɛɛ ni i‑a ko yama ma, chian ya ɔ sɔɛ ma. Koe min na mu, gbasaya ɛ wan a boo ɔ i tɔɔya koe a. Yataa 'a yɔnɛ mu ya ɔ sɔɛ kan kɔ kan na, an fan mbe a 'a kaa a tɛ, an ni ko yama ma mɔɛ n tɔɔ.

⁵Chɛ an fɛ mu, wo ya ɔ sɔɛ n da a kuiɛ a min. Wo tɔɔya koe dechee ma a ma, wo ni an da a kuiɛ a min. Chɛɛ wo yiima wandi gbu ni a fɔ wo ye, mbɛ a nyin fan wo ni a ma ka.

⁶A chia dɔndɔ gbe chɛ a, wo wo 'a pawa n bɛɛ chɛ. Koe min na mu, a nyin kɔmende wai chɛ mɔɛ n ni an 'na pawa ma sɔn. Chɛ an mbe a ma, an gboo ɔ ee fa‑a wai chɛ chɛ koe a, Yataa‑a an sɔ min chɛ a.

⁷Ni mɔɛ n ta ma‑a wo ma, wo a be an ma. Ni chɛnyɛ pawa kan kɔ kan mbe wan nɔ, wo ma min chɛ nin bɛ, wo a chɛ. A sin to, ya ɔ sɔɛ n gbɛɛ, wo basɔmaya be an ma, a basan kooya a.

⁸Mɔ ɔ mɔ 'a kuiɛ ma to wo ma kuɔ fɔ. Kuiɛ min mbe ma dechee wo ma, an nɛ koadia a. Koadia ni ma wo faa n dɔ, wo nyɔn ko a. Mɔ ɔ mɔ min mbe to‑a a fian mɔ gbu a, a mɔɛ chɛ don‑da ka sawa chɛ n gbɛɛ fan kɔɔ, Yataa 'a sawa chɛ nu.

⁹Yataa‑a sawa miin be Mosisi ma, an dɔ, wo ma waa ma basan mɔɛ a, wo ee fuu ɔ min na. A yɛ to, wo ma mɔ fa, ni sawa ma min fɔ ni. A sin, wo ma kanka chɛ, wo sin ma kawa mɔ dɔ mende n boo fenɛ n ma, an ma koe a wo ta n na. Sawa chɛ n gbɛɛ, an basan dɔ mende n na, an kuiɛ bɛnden mu sawa kun dɔndɔɛ chɛ an ma, mbɛ wo ni to wo 'a mɔɛ n na, yɔ wo toen mu buɛ min dɔ wo wandi n na.

¹⁰Mɔ ɔ mɔ min toen mu a fian mɔ gbu n na, a ee ko yama ma an na. Chɛ an fɛ mu, mmɔ to koe mmɔ nyɔn na, an mu sawa gbu gbɛɛ kun tɛ a.

¹¹N‑na koe miin fɔ ka wo ye, an ma koe a, wo an ma. Koe min na mu, wo‑a tima sɔn fan sanche, mmɔ ɛ tima min kɔɔ. Tima an nɛ gbɛ, wo ni kunɛ chinɔɛ ɔ, wo e min dɔ. Koe min na mu, tima min na mmɔ ɛ bauncha ma sɔn‑da, an tima chɛ ɔ ma yansan to mmɔ a. A gbɛnden mu gbɛ, a ni ben tima saa ma, tima min na mmɔ‑a mmɔ kai fa Chisɔsi a.

¹²Banda ɔ ka tena wan gbɛ, a ɔ ma yansan to tee bɔ‑a. A nyin fan mmɔ ni sɛmbɛ koe chɛ n ma koe a, pimbi ɔ ko yama chɛ nu. Mbɛ mmɔ‑a butuin chɛ feanka chɛ n ya, mmɔ ɛ butuinɛ chɛ‑a miin na tee a den.

¹³Mmɔ a kuu sɔ tachɛ‑a chɛndɛ chɛ mmɔ wandi a, fɔɛ ɔ. Wo a ma yɔ mɔɛ nu miin mbe koe n na tachɛ tena chɛndɛ tee a. A yɛ to, wo ma wo boo chɛ gbɛ min kɔmpini ɔ, a basan ko tɛ gbɛɛ a. A sin, wo ma butuin chɛ, wo sin ma too wo nyɔn na.

¹⁴Chɛɛ wo e min ma, wo to mmɔ 'a mansa Chisɔsi Chasi kɔ, a ni butuinɛ chɛ wo ko a. Wo sɛmbɛ wo yiima a ta koe a wo faa ma koe yama chɛ n tena, bea koe a an fɛ.