Read Kono GBOO DOMI KO A 15 Bible Online

GBOO DOMI KO A 15 - Kono bible

GBOO DOMI KO A 15

¹Mmɔ gbɛɛ, mmɔ wɛn 'na danaya Yataa a, a ɔ gbɛ gbechen, mmɔ faa ma gbaa dechee mmɔ wandi an deman koe a. Chɛɛ mmɔ mɔɛ chɛ n deman, miin 'na Chisian danaya ɔ ma gbɛ.

²A nyin mmɔ ni chɛ an ma. Koe min na di an ye, min mu an faa ma koe a, mmɔ an koe chɛ an chɛ mmɔ bɔ Chisianɛ n ye. Chɛ an mbe a ma‑a, an 'na fiienɛ ee ma‑a.

³Koe min na mu, Chisɔsi wandi gbu wɛɛ, a nii a wandi faa ma koe n fan ma. Yataa 'a gboo‑a a fɔ, a si a ma, a ɔ, “Main chɛ, mɔɛ n‑na min chɛ Yataa a, an‑na a chɛ ka n fan na.”

⁴Koe min na mu, bai miin gbɛɛ mbe Yataa 'a gboo ɔ, an nyɛnden mu mmɔ wan ko a, mmɔ kan koe a. Koe min na mu, gboo chɛ ɛ mmɔ faa ma nande wan, mbɛ mmɔ‑a mmɔ faa bia gban Yataa 'a wai ɔ, yiinatɛ ni ma mmɔ ɔ.

⁵Yataa an mbe mmɔ faa ma nande, a sin fan mbe a ma to mmɔ ɛ mmɔ faa bia. Chɛ an fɛ mu, Yataa ni a ma wo ni sɔ Chasi chen gba ɔ, faachima ni ma wo ɔ wo nyɔn ko a.

⁶Chɛ ɛ a ma‑a wan, wo yiima ni ma kaina dɔndɔɛ, wo kuiɛ ni ma dɔndɔ, wo ni tando be Yataa ma. A wan mu mmɔ 'a mansa Chisɔsi Chasi fa a, ni a 'a Yataa.[7]

⁷Wo wo boo si wo nyɔn kɔɔ, yɔ Chasi‑a a boo si buɛ min dɔ wo kɔɔ. Chɛ an mbe a ma‑a mɔɛ n ni tando be Yataa ma.

⁸A ni ma wo yii ma, mbɛ Chisɔsi Chasi na‑a na dunya chɛ ɔ, ma koe an na yɔnɛ a Chu mɔɛ n ko a. A na‑a chɛ ma, koe an dɔ yian koe an na, mbɛ Yataa tanden mu. An ni a ɔ yen, Yataa na‑a tooɔdia min chɛ an bemba n ta bemba n na, a ni bɔ a a.

⁹A ni a ma to, mɔɛ chɛ n bɛɛ miin ma Chu mɔ a, an ni Yataa tando a 'a chinchimaya ko a. A nyɛnden mu ka wan Yataa 'a gboo ɔ, mbɛ, “Chɛ an fɛ mu, n mbe tando be‑a i tɔɛ ma, mɔɛ chɛ n tɛ ɔ, miin ma Chu mɔ a, n mbe i tɔɛ sa‑a wan si a.”

¹⁰Gboo chɛ na‑a a fɔ wan to, a ɔ, “Chu mɔ ma wo wɛn na, wo buɔdia bɔ. Wo a bɔ, wo bɛ Yataa 'a mɔɛ n na, Chu mɔɛ chɛ nu.”

¹¹A ɔ te to, “Wo wɛn ma Chu mɔ a, wo tando be Mansa Yataa ma. Mɔɛ gbɛɛ dunya ɔ, wo a tando.”

¹²Yataa 'a gbonka chɛ mɔɛ Aisaya na‑a a fɔ wan to, a ɔ, mɔ dɔndɔ ɛ bɔ‑a wan kai Chɛsi 'a dambi ɔ. A ɔ, Yataa ɛ a mɔɛ chɛ ma‑a wan, a ɔ, a ni ma mansa a, a ɔ, mɔɛ chɛ n ko a, miin ma ka Chu mɔ a. A ɔ, an sin mbe an yii na tɛ‑a wan a ma gbae.

¹³Yataa, min‑na yiinatɛ chɛ be, a ni buɔdia be wo ma. Yataa, a ni faachima be wo ma. A ni koe chɛ n ma wo ye, koe min na mu, wo kai faen mu an na. Yiinatɛ chɛ ma ni mun‑da wo ɔ kaka, Yataa Nyina 'a gbasaya ɔ.

¹⁴N bɔ Chisianɛ nu, n fandi gbu wɛɛ danden fan mu a a, mbɛ mɔ chɛndɛ wa mu wo wɛɛ gbu a. Wo‑a wo boo nyima tɛ bɔɛ sɔn fan wo manɛ a chɛndɛ chɛ. Wo‑a a ɔ sɔn fan, wo e dasi be buɛ min dɔ wo nyɔn ma.

¹⁵Chɛɛ gboo chɛ ɔ, n ma ko ɔ ko ɔ nun ni wo ma, a si koe dɔ n ma, wo na‑a miin na min tee. Yataa 'a dua an na‑a a ma, n‑na n faa gbɛa bai chɛ n fɔ koe a.

¹⁶A‑a a boo sɔ wan n ma, ma koe a Chisɔsi Chasi 'a wai chɛ mɔɛ a, mɔɛ chɛ n ko a, miin ma ka Chu mɔ a. N mbe wai chɛ wan an ye, yɔ Yataa 'a tɛ mɔɛ. N mbe Yataa 'a sakana bai sa wan an tena. Chɛ ɛ ma, min mbe a ma, Yataa ni a boo si an kɔɔ, yɔ yasi miin mbe tenchen a ko a. An ni ma yasi chɛ a, Yataa Nyina wandi gbu‑a min be tenchen a ma.

¹⁷Chɛ an‑na a fɔ, n mbe Chisɔsi Chasi a sɛ, chia ɔ chia a, min sien mu Yataa ma.

¹⁸N mbe ee chian ɛnden bɛɛ a, bai sa koe a, a si Chasi chɛ chɛ wai n fan ma dechee. Chisɔsi‑a a ma wan, mɔɛ miin ma ka Chu mɔ a, n‑na a ma an na kooya be Yataa ma. Chɛ bɔ‑a n da a bai n fan dɔ, a basan n chɛ chɛ wai n na.

¹⁹A yɛ to, a bɔ‑a to koe n tɔmɔsi gbau gbau n dɔ, a basan kamaya koe wa n na, n‑na miin ma. A sin, Yataa Nyina‑a gbasaya be n ma koe chɛ n gbɛɛ ma koe a. A sin chia chɛ a mu, Yataa 'a sakana bai chɛndɛ chɛ a si Chasi ma, n‑na a sa wan kan kɔ kan, a ka Chuusaɛn duu ɔ, a ta Idiikɔn chɛnyɛ ɔ.

²⁰Tima ɔ tima ko a, n toen mu ko dɔndɔ gbe an ma koe a. An koe chɛ mu Chisɔsi 'a sakana bai chɛndɛ chɛ sa koe an na, kaina kan kɔ kan mɔɛ n tena miin nii ma a min ni tee. Koe min na mu, n ma to ni, mɔ dɔ mende 'a wai min kuu sɔ, n ni an na ban.

²¹Yataa 'a gboo wɛɛ‑a a fɔ wan, a si Chisɔsi ma, a ɔ, “A nii ma a fɔ ni miin ye wɛ, an mbe a yen‑da wan. Chɛ n bɛɛ, miin nii ma a wakoe a min ni, an mbe a wakoe ɔ gbɛ‑a wan.”

²²Wai chɛ n koo n boo ɔ, a chɛ koe a. An mbe a ma tena, tima sɛsɛ ko a, ni n toen mu n ni che wo ma, n mbe ee kun.

²³Chɛɛ sanche gbɛ, wai min ni n boo ɔ a chɛ koe a nɛ ta‑a, n ban‑da a chɛ‑a gbae. A sin‑na san sɛsɛ ya, kɛn wo yen sɔɛ‑a n bia.

²⁴Chɛ an fɛ mu, n toen mu n ni na gbɛ, n ni wo yen. N mbe ma‑a ta‑a Sipen chɛnyɛ ɔ, n mbe ben‑da wan wo tena chia a, n ni wo yen. Ni n‑na tima ɛnden ya wo tena, buɔdia ɔ, mbɛ wo basan‑da n ma ben koe a Sipen chɛnyɛ ɔ.

²⁵N ni chɛ gbɛɛ fɔ wɛɛ, chɛɛ n mbe gbɛ sanche chia a ta koe a Chuusaɛn duu ɔ wan. N mbe ta tena nɔ Yataa 'a mɔɛ n 'na wai an dɔ.

²⁶Koe min na mu, chɔchi mɔɛ chɛ nu Masidonia chɛnyɛ ɔ, an bɛ Akaya chɛnyɛ ɔ nɛnɛ n bɛɛ a, an‑na an boo fenɛ a bɔ faaɔgbɛ ɔ. An toen mu an ni chɛ n deman, miin yakɔɔtawaen mu Yataa 'a mɔɛ n tɛ ɔ Chuusaɛn duu ɔ.

²⁷An fandi gbu an si‑a, an‑na an yii na chii chɛ ma koe a. Chɛɛ tea gbu ko a, a gbu dinden fan mu an ma a ma koe a ka. Koe min na mu, Yataa‑a dua min chɛ Chu mɔɛ n na, an na‑a a du wan, an‑na mɔɛ chɛ n kɔ miin nii ma Chu mɔ a. Chɛ an fɛ mu, ni Yataa‑a boo fenɛ be an bɛɛ ma, an mbe Chu mɔɛ n bɛɛ kɔ wan.

²⁸N‑na an kɔpɔɛ chɛ ma kain fan, n sin mbe ka an be‑a an ma. Ni n ban‑da a be‑a an ma gbae, n mbe na‑a wan. N mbe bɔ‑a wo tena chia wan, mbɛ n ta‑a Sipen.

²⁹N mbe na‑a wan, mbɛ n‑na a ma, wo‑a dua da faenɛ ma sɔn gban. Dua chɛ, Chisɔsi Chasi ɛ min be.

³⁰N suun ma nyɔɛ nu Chasi ɔ, mmɔ 'a mansa Chisɔsi Chasi an ta mu mmɔ a. A sin, Yataa Nyina‑a koadia chɛ mmɔ ɔ mmɔ nyɔn ko a. Chɛ an fɛ mu, n mbe wo disa tena, mmɔ ni chɛɛ chɛ chɛ. Wo Yataa fai n ko a.

³¹Wo samunɛ chɛ n ko a, min mbe a ma, mɔɛ miin ma dan ni ka Chisɔsi Chasi a Chudia chɛnyɛ ɔ, an ma na ko yama ma n na. A yɛ to, Yataa 'a mɔɛ miin mbe Chuusaɛn duu ɔ, n mbe demanɛ min chɛ‑a an na, an bu ɔ ni dia a ko a.

³²Chɛ ni a ma, Yataa 'a gbasaya ɔ, n ni na‑a wo tena, n bu ɔ diaenɛ ni ma. Ni n sin‑na wo tan, n mbe ma‑a wan faachima ɔ.

³³Yataa min mbe faachima be mmɔ ma, a boo ni ma wo kɔɔ. A ni ma ka.