Read Kono GBOO DOMI KO A 2 Bible Online

GBOO DOMI KO A 2 - Kono bible

GBOO DOMI KO A 2

¹Wo wan, wo wɛn mbe kaa a tɛ, a si wo bɔɛ n ma, wo ni ma mɔ kan kɔ kan na, wo ee che wo ka‑a ko yama ma koe a. Koe min na mu, bai ee ma‑a wo da a, min mbe wo kun bɔ‑a a ɔ. Ni wo‑a kaa a tɛ, a si mɔ dɔ mende n ma koe ko a, chɛɛ wo wɛɛ, wo e an ko dɔndɔ gbe chɛ ma, wo e ma‑a ka kaa a tɛ‑a, a si wo wandi an ma.

²Mmɔ gbɛɛ‑a a ɔ sɔn fan, mbɛ tea ɛ Yataa an boo ɔ, ni a‑a kaa a tɛ, a si mɔɛ chɛ n ma, miin mbe ko bonda chɛ n ma.

³Chɛɛ wo tana, wo e kaa tɛ mɔɛ n bakoe ma, a si koe miin ma koe ma, wo wɛɛ wo e an ko dɔndɔ gbe chɛ n fan ma. A ma ma wo yii ma, mbɛ Yataa ee kaa a tɛ‑a, a si wo wakoe ma.

⁴Wo e Yataa wakoe bia tena baa baa an na, koe min na mu, a chinchinden mu wo ma. A faa ma gbandi wo tɔɔya koe a a ya kɔɔɛ a, a sin mbe a faa bia wan wo a tima sɛsɛ ko a. A nyin wo ni a ɔ sɔn, mbɛ Yataa ɛ chinchin tena wan wo ma. Koe min na mu, ɛ chia yian tena wan wo a faachima ɔ, wo ni wo kan kɔ sɔ wo 'a ko yama n na.

⁵Chɛɛ wo faa a kɔɔen mu, wo too wɛɛ ɔ gbɛ. Chɛ ko a, wo 'a tɔɔya ma ɛ munda‑a wan, tee chɛ ma, tee min ma mɔɛ n mbe Yataa 'a faatɛ ɔ yen‑da. A sin, an mbe a ɔ gbɛ‑a wan, mbɛ ɛ tea kaa an na tɛ.

⁶Koe min na mu, an tee chɛ ma, mɔ ɔ mɔ na‑a wai chɛ buɛ min dɔ, Yataa ɛ a ma‑a wan, a ni a tɔnɔnɛ ma sɔn a buɛ ɔ.

⁷Mɔɛ dɔ nu, an mbe ko chɛndɛ an ma tima ɔ tima, an mbe Yataa 'a dua yanɛ a, a 'a tando, a basan kuɔ fɔ fɔɛ a, ɛ min be. An mɔɛ chɛ nu, Yataa ɛ an kuɔ fɔ fɔɛ be‑a wan an ma.

⁸Chɛɛ mɔɛ nu, miin toen mu dechee an fandi a, an sin ma to ni tea a, an mbe bea ko yama n fan fɛ. An mɔɛ chɛ n tana, Yataa faa ɛ tɛ‑a wan an ma yama yama, a ni an tɔɔ.

⁹Ko ma gbaaenɛ ɛ ma‑a wan nɔ, a basan tɔɔya a, mɔɛ chɛ n gbɛɛ ko a, miin mbe ko yama chɛ n ma. Chɛ ɛ ma‑a wan Chu mɔɛ n na, a ni ma mɔɛ chɛ n bɛɛ a, miin ma Chu mɔɛ n na.

¹⁰Chɛɛ mɔɛ chɛ n gbɛɛ, miin mbe ko chɛndɛ ma, Yataa ɛ a ma‑a wan, an ni a 'a dua ma sɔn, a 'a tando, a basan a 'a faachima a. Chɛ ɛ chɛ‑a wan Chu mɔɛ n ye, a ni chɛ mɔɛ chɛ n bɛɛ ye, miin ma Chu mɔɛ n na.

¹¹Koe min na mu, Yataa ee a 'a mɔɛ n tɛ bɔ, ɛ ma a 'a kaa a tɛ‑a.

¹²Mɔɛ miin ma Chu mɔɛ n na, sawa chɛ ee an boo ɔ, min na‑a be Mosisi ma. Chɛɛ ni an mɔɛ chɛ n‑na ko yama ma, Yataa ɛ an tɔɔya‑a wan, a ee ma‑a wɛɛ sawa chɛ ta fɛ chia a. Chu mɔɛ n sin, Mosisi na‑a sawa chɛ a ben miin tena, ni an‑na ko yama ma, Yataa ɛ sawa chɛ an ya‑a, mbɛ a‑a kaa a tɛ an bakoe ma, an ni tɔɔya.

¹³An ma a fɔ ni, mbɛ sawa chɛ, a a min koe dechee an mbe a ma, mɔɛ ni ma mɔ tandenɛ a Yataa tena. Chɛɛ mɔɛ min mbe a a min‑da, mbɛ a tachɛ‑a a a chɛndɛ chɛ, Yataa ɛ an ya‑a mɔ tandenɛ a.

¹⁴Mɔɛ miin ma Chu mɔɛ n na, sawa chɛ nii an boo ɔ. Chɛɛ tima ɔ tima ko a, ni an‑na koe chɛ n ma an kun ma a a, miin nyin an ma koe a sawa chɛ ta fɛ chia a, a nyin an ko a. An‑na a ɔ yian fan ka, mbɛ Mosisi nii ma sawa chɛ a ben nin bɛɛ an tena, chɛɛ an‑na ko chɛndɛ tɛ bɔɛ sɔn fan ko yama a.

¹⁵An sɔnɛ n fan mbe a ɔ yian, mbɛ sawa‑a miin fɔ, a nyɛndenɛ mu an faa an dɔ. An 'na yiinachii wɛɛ ɔ, chɛ ɔ yianden fan mu, mbɛ tea mu. Tima dɔ a, an 'na yiinachii, an mbe a fɔ an ye, mbɛ an‑na koe min ma, a ma nyin a ma koe a. Tima dɔ a, an yiima ɛ a fɔ wan an ye, mbɛ an‑na ko chɛndɛ an ma.

¹⁶Chɛ an fɛ mu, koe chɛ n gbɛɛ ɛ ma‑a wan tee chɛ ma, Yataa ɛ a ma‑a tee min na Chisɔsi Chasi ni kaa tɛ koe ma, miin mbe nun dɔ mɔɛ n yiima ɔ. N mbe bai chɛ an fɔ tena mɔɛ n ye, sakana bai chɛndɛ chɛ ɔ, n mbe min dɔ yian ka.

¹⁷Chɛɛ wo tana, wo wɛn yii na koen mu, mbɛ Chu mɔɛ mu wo a, wo yii faen mu Yataa 'a sawa chɛ an ma, Mosisi na‑a min na ben wo tena. A sin, wo e yonka tɛ tena wan, mbɛ Yataa faa ma mɔɛ n mu wo a.

¹⁸Wo e a fɔ wan to, mbɛ wo‑a a ɔ sɔn fan, Yataa toen mu koe miin na, a ma koe a. A sin, wo ɔ, sawa ban‑da wo kan‑da ko chɛndɛ n ma, wo e miin ma.

¹⁹Wo danden fan mu a a, mbɛ wo wan mbe chia yian ya te tɔɛ n na. A yɛ to, mbɛ wo wan mu manɛ a chɛ n ko a, miin mbe pimbi pimbi ɔ.

²⁰A sin to, wo wan mbe chɛ n sɔ chia ma, miin kunɛ ɔ banden mu, wo e mɔɛ n kan to miin yiima ma kɔɔ ni. Wo danden fan mu a a, mbɛ wo‑a ko ɔ ko sɔn fan chɛndɛ chɛ. A yɛ to, wo da a kuiɛ ma bɔ chia ee, koe min na mu, sawa chɛ ɛ wo boo ɔ, Mosisi na‑a min na ben wo tena.

²¹Wo sin, a yen ko, wo e mɔ dɔ mende n kan, a gbu nyin wo ni wo wandi kan. Wo e a fɔ wan mɔɛ n ye, mbɛ an ma kanka chɛ, chɛɛ wo wandi sin mbe a chɛ wan.

²²Wo e a fɔ wan mɔɛ n ye, wo ɔ, an ma waa ma basan mɔɛ a, an mbe ee fuu ɔ min na, chɛɛ wo wandi sin mbe a ma wan. Wo ma to ni mɔɛ n ni fenɛ n fai, miin ma Yataa a, chɛɛ wo e fenɛ n ya wan kaina chɛ nu, an mbe fen chɛ n fai kaina min.

²³Wo e yonka tɛ, mbɛ Yataa 'a sawa ɛ wo boo ɔ, chɛɛ wo e Yataa a mau tena wan, wo e ma ka an sawa yɔnɛ min chɛ‑a.

²⁴Ɛ wan dechee yɔ Yataa 'a gboo‑a a fɔ buɛ min dɔ, a ɔ, “Wo wan Chu mɔɛ chɛ n fan mbe a ma tena, mɔɛ miin ma Chu mɔɛ n na, an mbe baa bɔ Yataa ma.”

²⁵Mɔɛ a kamincha[1] chɛ, Yataa boo ɛ wan a kɔɔ, ni a mɔɛ chɛ ɛ tachɛ tena wan Yataa 'a sawa chɛ n na. Chɛɛ ni a mɔɛ chɛ ɛ sawa chɛ yɔn tena wan, mbɛ a ni fisa wɛɛ ni a a nii ma kamincha nin bɛɛ.

²⁶Chɛɛ ni mɔɛ min ma Chu mɔ a, a sin na ma kamincha ni, a tachɛ‑a sawa chɛ gbee a, Yataa ɛ a boo a si wan a kɔɔ, yɔ mɔɛ min na kaminchaen mu.

²⁷A gbu sin, mɔɛ chɛ n yen bɛ, an na ma kamincha nin bɛɛ ka boo ɔ boo, chɛɛ an mbe tachɛ wan sawa chɛ n na chɛndɛ. Chɛ ɛ a ɔ yian‑da wan, mbɛ wo wan Chu nu, wo wɛn na kaminchaen mu bɛɛ, Yataa 'a sawa ɛ wo boo ɔ, mbɛ wo e sawa chɛ yɔn tena wan. Yataa sin mbe kaa a tɛ‑a wan wo wakoe ma.

²⁸Ni an‑na mɔɛ a kamincha, chɛ ma a ɔ yian ni, mbɛ a ma‑a Chu mɔɛ chɛndɛ chɛndɛ a. Mbɛ a a kamincha chɛ sin, a ma dechee gboo ma nɛn chɛ an na, dunya ta manda chɛ.

²⁹A ee ka, Chu mɔɛ mu a faa an na, min mbe a bu ɔ. Yataa Nyina an mbe a ma, mɔɛ ni a faa gbɛɛ be Yataa ma, chɛɛ sawa nyɛnden fan mbe ee a ma chɛ ni ma. An mɔɛ chɛ, ɛ a 'a tando sɔn‑da wan Yataa a, ni mɔ gbu ma a tando nin bɛɛ.