Read Kono GBOO DOMI KO A 4 Bible Online

GBOO DOMI KO A 4 - Kono bible

GBOO DOMI KO A 4

¹A nyin gbɛ mmɔ ni bai sa, a si nn fan Chu n bɔ kɔnkɔɛ ma, nn bemba Ebeami, a na‑a miin dɔ yen.

²Ni Ebeami chɛ chɛ wai n fan na‑a a ma, mbɛ Yataa‑a a ya mɔ tandenɛ a, chɛ ni ma‑a yonkatɛ chia an na a boo ɔ mɔɛ n tena. Chɛɛ chia ee nɔ, ɛ yonka tɛ min na Yataa chen kɔɔ.

³Koe min na mu, Yataa 'a gboo‑a a fɔ wan, a ɔ, “Ebeami‑a a kai fa wan Yataa a. A sin, Yataa wɛɛ‑a a ya mɔ tandenɛ a a chen kɔɔ.”

⁴Mɔɛ min mbe wai chɛ pawa ko a, ɛ pawa an ma sɔn. Mɔɛ 'a pawa ma ma ni, yɔ wai nyima, chɛɛ fenɛ mu a a, mɔɛ chɛ ɛ wai chɛ min ko a.

⁵Chɛɛ mmɔ mɔɛ yen bɛ, a e na a chɛ chɛ wai n ya, mbɛ an fan mbe a ya mɔ tandenɛ a, a ni a kai fa Yataa a. Mbɛ Yataa ɛ a yii na chii wan, an mɔɛ chɛ‑a a kai fa min chɛ a a. Ni an mɔɛ na‑a ko yama ma boo ɔ boo, Yataa ɛ a fɔ wan, a ɔ, a ma ko yama ma ni. Yataa ɛ an mɔɛ chɛ ya ka wan mɔ tandenɛ a.

⁶Mansa Defidi wɛɛ na‑a bai dɔndɔ gbe chɛ an fɔ tima dɔndɔ a. A na‑a bai sa tima min na, a si mɔɛ ma, Yataa‑a min ya mɔ tandenɛ a, a ɔ, mɔ duaen ba mu, a mu min na, Yataa ma a yii na chii ni a chɛ chɛ wai an ma. Mansa Defidi ɔ,

⁷“Dua ɛ chɛ n ma, Yataa‑a a boo bɔ miin na ko yama maenɛ n dɔ, a‑a a ya ka miin na ko yama n na.

⁸Dua min mbe chɛ n ma, a koo, Mansa Yataa ee miin na ko yama n sa tena ɔ bɛn‑da.”

⁹Mansa Defidi na‑a bai sa ka a si dua min ma, a ee mɔɛ chɛ n dechee ko a, miin na kaminchaen mu. Chɛɛ ɛ wan chɛ n bɛɛ ko a, miin na ma kamincha ni. Mmɔ ban‑da a fɔ‑a, mbɛ Ebeami‑a a kai fa wan Yataa a, a sin, Yataa‑a a ya mɔ tandenɛ a a chen kɔɔ.

¹⁰Mmɔ ma a ya, mbɛ Yataa na‑a chɛ ma tima min na, mbɛ kai Ebeami a kaminchaen fan ni. A na‑a a ma pɛn, Ebeami a e na to kamincha‑a.

¹¹A gbakɔ ni gbɛ, Ebeami a kamincha‑a. A sin, a a kamincha koe chɛ, a ni tɔmɔsi an na, a ɔ yian koe a, mbɛ Yataa na‑a a ya pɛn mɔ tandenɛ a, a a e na to kamincha‑a. Chɛ sin na‑a ma, a ɔ yian koe a, mbɛ mɔɛ miin gbɛɛ an kai fa‑a Yataa a, mbɛ a‑a an ya mɔ tandenɛ n na a chen kɔɔ, an mɔɛ chɛ n mbe ma‑a dechee yɔ Ebeami 'a denɛ nu Yataa ta fɛ chia a. An mbe ma‑a wan ka Ebeami tena, an ni a fɔ an na ma kamincha nin bɛɛ.

¹²Ebeami sin fan mu mɔɛ chɛ n bɛɛ gbu fa a, mɔɛ miin na kaminchaen mu ka. Chɛ ma si ni an na kamincha koe chɛ an ma, chɛɛ a sien mu an tachɛ buɛ dɔndɔɛ an ma, an kai fa koe Yataa a. Mmɔ fa Ebeami a e na to kamincha‑a, a tachɛ buɛ ni ka wan gbɛ Yataa a.

¹³Yataa na‑a Ebeami too ɔ dia wan, an bɛ a cheeya n na, mbɛ ɛ dunya chɛ gbɛɛ ma‑a an ta a. Yataa na‑a tooɔdia chɛ chɛ Ebeami a, koe min na mu, a na‑a a kai fa wan Yataa a. Chɛɛ Ebeami na‑a bea min chɛ sawa chɛ fɛ, an ko a nii ma. Chɛ ko a, Yataa‑a a ya wan mɔ tandenɛ a a chen kɔɔ.

¹⁴Mmɔ a ya wɛ, mbɛ Yataa na‑a tooɔdia min chɛ, a ni be dechee chɛ n fan ma, miin mbe a sɔ sawa chɛ fɛ. Ni chɛ na‑a ma, mbɛ tɔnɔn mbe ee a ɔ mɔɛ kai fa koe a Yataa a. A sin, a fɔ koe a to, mbɛ Yataa‑a tooɔdia chɛ wan, bai ma fanka ɛ min na.

¹⁵Yataa faa ɛ tɛ wan, ni mɔɛ‑a a 'a sawa yɔn, a na‑a min be Mosisi ma. Chɛɛ ni sawa kan kɔ kan mbe ee kaina min, sawa yɔn mbe ee ma nɔ.

¹⁶Chɛ an fɛ mu, Yataa 'a tooɔdia chɛ, a kuu si‑a danaya an ma, Ebeami na‑a min chɛ a a. Yataa 'a tooɔdia chɛ ma fen dɔ mende a, chɛɛ a mu wai nyima chɛ an na, a na‑a min chɛ Ebeami cheeya n na. Cheeya chɛ nu, an ma dechee chɛ n fan na, miin boo a sien mu Mosisi 'a sawa n kɔɔ. Chɛɛ an mu wan chɛ n bɛɛ a, miin danden mu Yataa a, yɔ Ebeami na‑a dan buɛ min dɔ a a. Koe min na mu, mmɔ gbɛɛ bemba n ta bemba mu Ebeami an na, danaya ko a Yataa a.

¹⁷Chɛ fɔen fan mu Yataa 'a gboo wɛɛ ɔ, mbɛ a wan Yataa 'a gbasaya ɔ, mɔ sɛsɛ dunya ɔ, Ebeami an mu an bemba n ta bemba a. A sin, a wan Yataa Mansa ko a, a 'a tooɔdia chɛ baa ɛ wan a ma. Ebeami sin na‑a dan Yataa an na. Yataa an mbe a ma mɔɛ min fa‑a, a ni yɛ to fɔɛ ɔ. A da a kuiɛ to, an mbe a ma, fenɛ miin nii dunya chɛ ɔ tee, a ni bɔ a ɔ.

¹⁸Ebeami na‑a dan fan Yataa a tima chɛ a, tima min na, a yii nii sɔ ɔ fen kɔ fen ma. Chɛ ko a, a ma‑a wan fa a mɔ sɛsɛ ko a dunya ɔ. A sin nyɛnden mu ka wan Yataa 'a gboo ɔ, mbɛ a cheeya n mbe kɔkoa‑a wan dunya ɔ.

¹⁹A tima chɛ a, Ebeami suun sanɛ ni gbɛ san chɛmɛ dɔndɔɛ an gbain tena. A gboo ɔ ni gbɛ buɛ min dɔ, a ni gbɛ faa chia ma wan. A 'a musu Seda wɛɛ, gbandayaen fan ni. Chɛ gbɛɛ ni wan Ebeami yii ma. Chɛɛ chɛ gbɛɛ ɔ, a 'a danaya Yataa a, a kɔ ni gbɛ wan tun.

²⁰A yiima nii fea, a si tooɔdia chɛ ma, Yataa na‑a min chɛ a a. Chɛɛ a sɔ‑a wan gban a 'a danaya ɔ Yataa ko a. A 'a danaya chɛ sin‑na gbasaya fa wan a gboo a, Yataa tando koe a.

²¹A dandenɛ ni a a chɛndɛ chɛ, mbɛ Yataa‑a tooɔdia min chɛ a a, mbɛ ɛ a ma‑a wan.

²²Chɛ ko a, Yataa‑a a ya wan mɔ tandenɛ a a chen kɔɔ.

²³Bai chɛ sin, min nyɛnden mu, mbɛ Yataa‑a Ebeami ya wan mɔ tandenɛ a, a ee a wan Ebeami dɔndɔ gbe an ko a.

²⁴Chɛɛ a nyɛnden fan mu mmɔ wɛɛ ko a, mmɔ wɛn kai faen mu Yataa a, min‑na mmɔ 'a mansa Chisɔsi kɔɔ sɔ saya ɔ. Ɛ mmɔ wɛɛ ya a wan mɔ tandenɛ n na.

²⁵Chisɔsi be‑a wan, fa koe a mmɔ 'a ko yama n ko a. A sin, a kɔɔ sɔ‑a wan, a ka saya ɔ, min mbe a ma, Yataa ni mmɔ ya mɔ tandenɛ n na.