Read Kono GBOO DOMI KO A 5 Bible Online

GBOO DOMI KO A 5 - Kono bible

GBOO DOMI KO A 5

¹Chɛ an fɛ mu, mmɔ ya‑a mɔ tandenɛ n na, mmɔ 'a danaya ko a Yataa a. Chɛ an‑na a fɔ gbɛ, mmɔ 'a mansa Chisɔsi Chasi‑a a ma, mmɔ ɛ faachima ɔ Yataa a.

²Mmɔ 'a danaya chɛ ko a Yataa a, Chasi‑a a ma, mmɔ boo kun‑da Yataa 'a koadia deman chɛ ma, min mbe ka mmɔ ko a sanche. Mmɔ ɛ buɔdia bɔ wan gbɛ sanche, koe min na mu, mmɔ yii na tɛen fan mu gbɛ, mbɛ Yataa sɔnɛ dɔ ɛ ma‑a wan mmɔ ɔ ya ɔ ma.

³Chɛ dechee ma, chɛɛ mmɔ buɔdia bɔ mmɔ 'a tɔɔya n dɔ. Koe min na mu, mmɔ‑a a ɔ sɔn fan, mbɛ tɔɔya an mbe na faabia a mmɔ tena.

⁴Mmɔ sin mbe mmɔ faa bia min chɛ, ɛ a ma wan, mmɔ yiima ni kɔɔ mmɔ 'a koe a dan buɛ ɔ. Chɛ sin mbe a ma wan mmɔ yii na tɛenɛ ni ma Yataa ma.

⁵Yiinatɛ chɛ mmɔ ɔ, a ee ma fania a, koe min na mu, Yataa 'a koadia koo mmɔ faa an dɔ. Yataa Nyina, min mbe mmɔ fɛ, Yataa wandi‑a min be mmɔ ma, an‑na koadia chɛ chɛ mmɔ ɔ.

⁶Tima min na mmɔ nii che basan‑da mmɔ wandi ma, Chasi fa‑a wan mmɔ ko a, mmɔ ko yama ma mɔɛ chɛ nu. Yataa na‑a tima min yian, a fa‑a a tima chɛ an na.

⁷A ɔ gbɛ ka, mɔɛ ni dɔn fa koe a mɔɛ ko a, min tanden mu sawa bia ɔ. Chɛɛ mɔɛ dɔ n mbe kun fan an fɔɛ be‑a mɔɛ ko a, min mu mɔ chɛndɛ wa a fɔɛ ɔ.

⁸Chɛɛ Yataa‑a a ɔ yian fan mmɔ a, mbɛ a toen mu mmɔ a kaka. Koe min na mu, mmɔ to‑a mmɔ 'a ko yama n fan dɔ, mbɛ Chasi fa‑a mmɔ ko a.

⁹A wii min sin bɔn‑da, an‑na mmɔ ya sanche gbɛ mɔ tandenɛ n na Yataa chen kɔɔ. Ni Chasi ɛ kun fan a ni chɛ ma mmɔ ko a, mmɔ ni dan a a, mbɛ ɛ mmɔ kun bɔ‑a wan Yataa 'a faatɛ ɔ.

¹⁰Mmɔ ni Yataa chɛɛ ma nyɔɛ n fan na, chɛɛ a 'a denɛ Chisɔsi 'a saya‑a a ma, a‑a mmɔ ma gbɛ a dia nyɔɛ n na. Mmɔ ma‑a ka gbɛ buɛ min dɔ sanche Yataa dia nyɔɛ n na, bauncha ɛ gbɛ mmɔ wan ko a, koe min na mu, Chasi ɛ fɔɛ ɔ.

¹¹Chɛɛ chɛ dechee ma, a mu min na, mmɔ 'a mansa Chisɔsi Chasi an‑na a ma, mmɔ bu ɔ dia‑a Yataa ko a. An‑na a ma gbɛ sanche, Yataa ma‑a mmɔ dia nyɔɛ a.

¹²Mɔ dɔndɔ gbe an‑na a ma, ko yama don‑da dunya chɛ ɔ. A 'a ko yama maen chɛ sin na‑a saya an na a boo ɔ. Chɛ‑a a ma wan, saya fasan‑da dunya gbɛɛ ɔ, a mu min na, mɔ gbu gbɛɛ ma‑a ko yama ma mɔɛ a.

¹³Yataa e na to sawa chɛ be‑a Mosisi ma tima min na, mɔɛ n ni wan gbɛ ko yama ma‑a dunya ɔ. Chɛɛ ni sawa ee kaina min, Yataa ee mɔ ɔ mɔ 'a ko yama sa tena ɔ bɛn.

¹⁴Chɛɛ a ka Adami ta tima ma, a ta Mosisi ta ma, saya 'a gbasaya ɛ wan mɔɛ gbɛɛ kun ma dunya ɔ. Mɔɛ chɛ n bɛɛ kun ma, miin gbu nii ma ko yama chɛ ma ni, Yataa da a kuiɛ yɔn koe a, yɔ Adami na‑a min ma. Chia dɔ n na, Adami chɛ bɔen fan ni mɔɛ chɛ a, mɔɛ n ya ni min ya ɔ na koe a dunya ɔ.

¹⁵Chɛɛ mɔ fea chɛ n ni dama. Koe min na mu, Yataa 'a koadia demanɛ, a ee ka yɔ Adami 'a ko yama maenɛ. Tea gbu mu a a, mbɛ mɔ sɛsɛ faen mu mɔ dɔndɔ gbe chɛ 'a ko yama maenɛ ko a. Chɛɛ Yataa ɛ a 'a koadia demanɛ chɛ chia min na a koo kaka. A sin chia chɛ a mu, a 'a ko chɛndɛ chɛen mu mɔ gbu gbɛɛ ko a, gbama gbama a. Chɛ maen mu mɔ dɔndɔ gbe a ko chɛndɛ ma an dɔ, Chisɔsi Chasi.

¹⁶Yataa ɛ ko chɛndɛ min ma, an fea Adami 'a ko yama a, tɛ bɔɛ ɛ wan an ma. Adami na‑a ko yama ma kɛn, Yataa na‑a kaa a tɛ wan a ma, mbɛ ko yama mu. Chɛɛ mɔ sɛsɛ‑a ko yama ma kɛn sɛsɛ, Yataa 'a koadia demanɛ ɔ, a‑a an ya mɔ tandenɛ n na.

¹⁷Tea gbu mu a a, mbɛ mɔ dɔndɔ gbe 'a ko yama maenɛ, an‑na a ma, saya 'a gbasaya kun‑da dunya ma, mɔ dɔndɔ gbe wakoe. Chɛɛ chɛ ma che ni koe chɛ ɔ, mɔ dɔndɔɛ chɛ wɛɛ, Chisɔsi Chasi, a‑a min ma. Mɔɛ n gbɛɛ, Yataa ɛ a 'a koadia demanɛ yian miin na, a ɔ benden ba a, mbɛ a‑a an ya mɔ tandenɛ n na. An mbe gbasaya sɔn‑da wan fɔɛ ɔ Chisɔsi a, a si kun koe a ko yama ma an fea saya a.

¹⁸Chɛ an fɛ mu gbɛ, mɔ dɔndɔɛ 'a ko yama‑a mɔ gbu gbɛɛ ma ko yama ma mɔɛ n na. Mbɛ mɔɛ dɔndɔ wɛɛ, a 'a tea wai Yataa tena, a‑a mɔ gbu gbɛɛ kun ka, mbɛ a‑a fɔɛ be an ma.

¹⁹Adami dɔndɔ gbe na‑a Yataa da a kuiɛ bɔ wan a ɔ, min na‑a a ma, mɔ sɛsɛ ma‑a ko yama ma mɔɛ n na. A ma‑a ka wan to, Chisɔsi dɔndɔ gbe dechee, an‑na Yataa da a kuiɛ a min, min‑na a ma, Yataa ɛ a a tun‑da wan mɔ sɛsɛ ya koe a mɔ tandenɛ n na.

²⁰Yataa na‑a sawa a, min mbe a ma, mɔ gbu ni ko yama kun ma sa. Chɛɛ mɔɛ n 'na ko yama kun ma ɛ chɛ buɛ min dɔ, Yataa 'a koadia demanɛ wɛɛ, a ma ɛ munda ka wan.

²¹N da a bai kunɛ a bia koe a, ko yama‑a gbasaya ɔ yian buɛ min dɔ saya ɔ, Yataa 'a koadia demanɛ a ta gbasaya wɛɛ ɔ, mmɔ ya‑a ka wan mɔ tandenɛ n na a chen kɔɔ. Chɛ‑a a ma wan, mmɔ‑a kuɔ fɔ fɔɛ ma sɔn, mmɔ 'a mansa Chisɔsi Chasi‑a min be.