Read Kono GBOO DOMI KO A 8 Bible Online

GBOO DOMI KO A 8 - Kono bible

GBOO DOMI KO A 8

¹Chɛ an fɛ mu sanche chɛ ɔ, ni mɔ ɔ mɔ ma‑a mɔ dɔndɔɛ a Chisɔsi Chasi a, Yataa ee kaa a tɛ‑a a wakoe ma, a ni tɔɔ.

²A mu min na, Chisɔsi Chasi 'a gbasaya ɔ, mmɔ kunɛ bɔ‑a ko yama 'a gbasaya ɔ, min mbe na saya a. Yataa Nyina min mbe fɔɛ chɛndɛ be, an‑na a ma chɛ ma‑a.

³Mmɔ ɛ koe miin ma, mɔgbuya ɔ min ma nyin, an na‑a a ma wan, sawa chɛ ma kun ni mmɔ kun ka‑a. Chɛɛ Yataa na‑a dɔbɛn dɔ gbɛɛ chɛ wan, mmɔ kun ka koe a. A na‑a a 'a denɛ a na wan dunya chɛ ɔ, mɔgbuya ɔ. A na‑a a 'a den chɛ ma wan yasi a mmɔ 'a ko yama n ko a. A na‑a chɛ ma, kaa an na tɛ koe a, a si mmɔ 'a ko yama n ma.

⁴Yataa na‑a chɛ ma, min mbe a ma, sawa na‑a a fɔ buɛ min dɔ mmɔ tan koe a a tena, mmɔ ɛ a ma‑a wan ka chɛndɛ chɛ. Mmɔ gbɛɛ, mmɔ wɛn mbe tachɛ Yataa Nyina gbee a, mmɔ ɛ a ma‑a ka wan. Chɛɛ mmɔ ee na‑a tachɛ‑a gbee a, mɔgbuya ɔ min ma nyin.

⁵Mɔɛ chɛ min mbe fɔɛ ɔ, mɔgbuya ɔ min ma nyin, ɛ koe n fan ma dechee, miin na di a ye. A yiima gbɛɛ ɛ ma gbasaya an kɔɔ, mɔgbuya ɔ min ma nyin. Chɛɛ mɔɛ chɛ nu fɔɛ ɔ, miin mbe koe ma, min na di Yataa Nyina ye, an yiima gbɛɛ ɛ ma Nyina chɛ 'a gbasaya an kɔɔ.

⁶Mɔɛ yii ma ma koe a, gbasaya kɔɔ, mɔgbuya ɔ min ma nyin, ɛ na saya an na. Chɛɛ mɔɛ yii ma ma koe a Yataa Nyina 'a gbasaya kɔɔ, ɛ na kuɔ fɔ fɔɛ an na, a basan faachima a.

⁷A sin fan fɛ mu, mɔɛ min yiima ɛ gbasaya kɔɔ mɔgbuya ɔ min ma nyin, Yataa chɛɛ ma nyɔɛ mu a a. Koe min na mu, a mɔɛ chɛ ma kun ni ma koe a Yataa 'a sawa kɔɔ. A gbu sin, a ee che ma‑a a kɔɔ.

⁸Mɔɛ miin mbe koe n ma gbasaya kɔɔ, mɔgbuya ɔ min ma nyin, an mbe ee che Yataa faa ma koe n ma‑a.

⁹Ni Yataa Nyina gbu ɛ wan wo fɛ, wo ee koe n ma mɔgbuya ɔ, miin ma nyin. Chɛɛ Yataa Nyina ɛ koe miin fɔ wo ye, an ma koe a, wo e an fan ma. Chasi Nyina ee mɔɛ min fɛ, a mɔɛ chɛ ee Chasi an ko a.

¹⁰Chɛɛ ni Chasi ma‑a wo wɛn fɛ, ɛ a ma wan, wo ni ma fɔɛ ɔ. Chɛ ɛ ma‑a wan wo a, wo gboo ɛ fa‑a wɛɛ boo ɔ boo, wo 'a ko yama boo ɔ. Chasi sin mbe chɛ ma‑a wan wo ko a, koe min na mu, wo ya‑a mɔ tandenɛ a Yataa tena.

¹¹Yataa Nyina, min‑na a ma, Chisɔsi Chasi‑a a kɔɔ sɔ a ka saya ɔ, ɛ wan wo fɛ. A Nyina chɛ sin, min‑na chɛ ma ka, ɛ fɔɛ be‑a wan wo ma, wo wɛn mbe fa ka. Ɛ chɛ ma‑a wan, yɔ a na‑a a ma buɛ min dɔ dechee Chasi a.

¹²N suun ma nyɔɛ nu Chasi ɔ, chɛ an fɛ mu gbɛ, Yataa Nyina ɛ min fɔ mmɔ ye a ma koe a, mmɔ a ma. Mmɔ ma koe chɛ n ma, mmɔ 'a mɔgbuya ɔ min ma nyin.

¹³Koe min na mu, ni wo ma‑a an gbasaya chɛ kɔɔ, wo e na‑a wan fa‑a kuɔ fɔ ko a. Chɛɛ ni Yataa Nyina chɛ‑a a ma, wo sɛmbɛ‑a fion an ko yama n na, wo e kuɔ fɔ fɔɛ ma sɔn‑da wan.

¹⁴Yataa Nyina ɛ chia yian mɔɛ miin na, an fan mu Yataa 'a denɛ n na.

¹⁵A mu min na, Yataa‑a a Nyina min be wo ma, ma koe a wo fɛ, a ee wo ma yɔnɛ n na, a ni a ma chiandia ni ma wo ɔ. Chɛɛ min mbe ma, Yataa Nyina ɛ wo ma Yataa 'a denɛ n fan na. A sin Yataa Nyina chɛ ɛ a ma‑a wan, wo ni Yataa chee, wo ɔ, wo fa.

¹⁶Yataa Nyina chɛ, an sa‑a mmɔ ta nyina n kaa a, a fɔ koe a, mbɛ Yataa 'a denɛ n mu mmɔ a.

¹⁷Mmɔ mu ka buɛ min dɔ a 'a denɛ n na, a‑a dua miin sa tena ɔ bɛn a 'a mɔɛ n ko a, mmɔ wan ta ɛ ma an na. A na‑a min sa tena ɔ bɛn Chasi wɛɛ ko a, ɛ ma‑a wan to mmɔ ta a. Mmɔ na‑a Chasi 'a tɔɔya ɔ bia wan, mmɔ ɛ a 'a basɔmaya wɛɛ dɔ sɔn‑da wan ya ɔ ma.

¹⁸Sanche, mmɔ ɛ mɔnɛ ɔ bia tena. Chɛɛ n danden mu a a chɛndɛ chɛ, mbɛ mmɔ ɛ ka mɔnɛ min dɔ bia tena sanche, a a ma kan ni basɔmaya chɛ a, Yataa ɛ min be‑a mmɔ ma ya ɔ ma.

¹⁹Yataa‑a fenɛ miin gbɛɛ a dan, an gbɛɛ ɛ wan gbɛ makɔnɛ chɛ‑a nyaka, nyaka, tima chɛ ko a, tima min na Yataa ɛ a 'a denɛ n yian‑da.

²⁰A mu min na, Yataa‑a fenɛ miin gbɛɛ nyan, a‑a an baa yɔn ka wan. Yataa 'a fen nyanden chɛ nu, an fandi nii ma to ni an baa ni yɔn, chɛɛ Yataa toen ni a ma koe a ka wan. Chɛɛ a na‑a chɛ wɛɛ ma, koe ni wan nɔ a yii na tɛen ni min ma.

²¹A wan Yataa na‑a a ɔ sɔn, mbɛ tee dɔndɔ ɛ che‑a wan, a‑a fenɛ miin nyan ka, a ni an kun ka, an ma na tui to. A sin, an tee chɛ ma, Yataa 'a den chɛ n mbe ma‑a wan buɔdia ɔ, kamaya kun ka chɛ boo ɔ.

²²A mu min na, mmɔ gbɛɛ‑a a ɔ sɔn fan, mbɛ a ka suun ma, aan sanche chɛ ɔ, Yataa‑a fenɛ miin gbɛɛ nyan, an mbe kuun tena wan pinia an dɔ. An mbe wan dechee yɔ musu bu ɔ tɛ buɛ min dɔ, a e na to a suun‑da.

²³Chɛɛ chɛ ee ma fen chɛ n dechee a, Yataa‑a miin nyan. Mmɔ wɛɛ, Yataa Nyina pɛn be‑a mmɔ ma. Chɛ sin ma‑a wɛɛ ka mmɔ ye, mmɔ ɛ kuun tena wan tun mmɔ faa ɔ. Mmɔ ɛ wan chɛ a, mmɔ ɛ ta‑a Yataa ma kɔn‑da, a ni mmɔ ma fion a 'a denɛ n na, gboo nama ɔ ya ɔ ma.

²⁴Koe min na mu, a ka mmɔ 'a bauncha ma sɔn tima ma, yiinatɛ chɛ an mbe mmɔ ɔ. Chɛɛ mmɔ yii na tɛen mu fenɛ min ma, ni mmɔ‑a a yen gbɛ, mbɛ mmɔ yii ee che to ma‑a a kɔ. Koe min na mu, mɔ yii ee che ma‑a fenɛ kɔ, mmɔ ban‑da min yen‑da.

²⁵Chɛɛ ni mmɔ yii ma‑a fenɛ kɔ, mmɔ ma min yen nin bɛ, mmɔ ɛ mmɔ faa bia wan a ma kɔnɛ a.

²⁶Yataa Nyina wɛɛ, ɛ na ka wan, a chia dɔndɔ gbe chɛ a, mbɛ a‑a mmɔ deman, mmɔ ɔ gbɛa koe a danaya ɔ Yataa a. Koe min na mu, mmɔ gbu ma a ɔ sɔn, mmɔ ɛ samunɛ chɛ buɛ min dɔ. Yataa Nyina wandi an mbe samunɛ chɛ mmɔ ko a. Ɛ samunɛ chɛ chɛ mmɔ ko a kuunɛ an dɔ, mmɔ ee kun min dɔ yian‑da.

²⁷Yataa sin gbu, a‑a a ɔ sɔn fan, koe miin mbe mmɔ faa n dɔ. Chɛ an fɛ mu, ɛ a Nyina chɛ yii ma sɔn fan. A mu min na, Yataa Nyina chɛ ɛ a disa tena wan mmɔ ko a, a 'a mɔɛ nu. A Nyina chɛ sin mbe samunɛ chɛ tena koe chɛ an ko a, Yataa toen mu min na an ko a.

²⁸Mmɔ‑a a ɔ sɔn fan, mbɛ ko ɔ ko kan kɔ kan dɔ, mɔɛ miin toen mu Yataa a, a wɛɛ, ɛ wai chɛndɛ n fan chɛ an ko a. An mɔɛ chɛ nu, an fan cheeen mu, a 'a dɔbɛnɛ ta fɛ chia a.

²⁹An mɔɛ chɛ nu, Yataa na‑a an sɔn pɛn chɛndɛ chɛ, mbɛ a‑a a boo sɔ an ma. An mbe ma‑a wan gbɛ yɔ a 'a denɛ Chisɔsi. A 'a den chɛ ɛ ma‑a gbɛ denɛ saa an na, den sɛsɛ wa chɛ n ya ɔ.

³⁰Chɛ an‑na a fɔ, Yataa‑a a boo sɔ ka miin ma, a‑a an chee. A sin‑na miin chee ka, a‑a an ya mɔ tandenɛ n na a wandi tena. Mɔɛ chɛ n sin ɛ miin ya mɔ tandenɛ n na, ɛ a ma‑a wan an ni a 'a basɔmaya dɔ ma sɔn.

³¹A si koe chɛ n gbɛɛ ma, mmɔ‑a miin dɔ sɔn ka, mmɔ ɛ kun chɛ an fɔ‑a, mbɛ ni Yataa ɛ mmɔ ko a, mmɔ chɛɛ ma nyɔ kan kɔ kan mbe ee kun mmɔ ma.

³²Yataa ma a boo a ben ni a wandi gbu 'a denɛ wɛɛ kɔ, a kunɛ bɔ koe a tɔɔya ɔ. Chɛɛ a‑a Chisɔsi be wan yasi a mɔ gbu gbɛɛ ko a. Ni ɛ chɛ ma wan mmɔ ko a, ɛ kun fan a ni fen kɔ fen be mmɔ ma gbama gbama a, a faa gbɛɛ a.

³³Mɔ ee nɔ min mbe kunɛ si chɛ n kun ma, Yataa‑a a boo sɔ ka a 'a mɔɛ miin ma. Yataa wandi ban‑da a fɔ‑a, mbɛ mɔ chɛndɛ mu an na.

³⁴Mɔ ɔ mɔ ee nɔ min mbe kaa a tɛ, a si an mɔɛ chɛ n tɔɔya koe ma. Chisɔsi Chasi an fa‑a mmɔ ko a, chɛ ma, an kɔɔ sɔ‑a a ka saya ɔ, mbɛ a yɛ‑a to fɔɛ ɔ. A sin, ɛ si ɔ kaina ma bɛndenɛ Yataa boo nyima ɔ. Ɛ wan tun koɔ‑a Yataa tena mmɔ ko a.

³⁵Ko ɔ ko ee nɔ, min mbe a ma, mmɔ ko sɔɔ ni bɔ Chasi ɔ. Ko yawaenɛ ee kun chɛ ma‑a, yakɔɔtawa ee a ma, mɔɛ n mbe ko ma gbaaenɛ min sa mmɔ ma, a nan fan mbe ee a ma. A yɛ to, kɔnkɔ ee a ma, mmɔ yɔn koe ee a ma, ko yama ma chiandenɛ ee a ma, saya wɛɛ ee kun a ma‑a, mmɔ ko sɔɔ ni bɔ Chisɔsi ɔ.

³⁶Yɔ Yataa 'a gboo‑a a fɔ buɛ min dɔ, a ɔ, “I wan Yataa ko a, nn mbe wan saya ma chianɛ kɔɔ tee ɔ tee a, nn mbe wan gbɛ dechee yɔ sa miin mbe sɔ ɔ yuu a, fa koe a.”

³⁷Chɛɛ koe chɛ n gbɛɛ ni mmɔ tan bɛɛ, a wɛn toen mu mmɔ a, an mbe mmɔ kunɛ bɔ‑a an dɔ fion.

³⁸N danden fan mu a a chɛndɛ chɛ, mbɛ ko ɔ ko ee che a ma‑a, mmɔ sɔɔ ni bɔ Chasi ɔ. Mmɔ ni fa wan, mmɔ ni ma fɔɛ ɔ wan, mmɔ ko a di wan a ye. Maeka n ni ma, ni nyina yama nu, a basan gbasaya gbɛɛ n na, an mbe ee che mmɔ ko sɔɔ bɔ‑a a ɔ. A sin to, koe min gbɛɛ ɛ ma tena sanche chɛ ɔ, a basan koe n na, miin mbe na tena ma‑a ya ɔ ma, an bɛɛ ee che chɛ ma‑a.

³⁹Fen mbe ee nɔ banda wɛɛ a pechenden, fen mbe ee nɔ yii wa kɔɔ wɛɛ pɔɔ, min mbe mmɔ ko sɔɔ bɔ Chasi ɔ. Fen kɔ fen mbe ee nɔ, Yataa‑a min gbɛɛ nyan, min mbe kun‑da chɛ ma koe a kuɔ fɔ. Yataa 'a koadia chɛ, mmɔ‑a min ma sɔn mmɔ 'a mansa Chisɔsi Chasi a, fen kɔ fen mbe ee a yɔn.