Read Kono GBOO DOMI KO A 9 Bible Online

GBOO DOMI KO A 9 - Kono bible

GBOO DOMI KO A 9

¹N mbe ka tea bai an fɔ tena. N mbe ee fania fɔ tena, a mu min na, Chasi an ta mu n na. N 'na yiinachii gbu wɛɛ, an fea Yataa Nyina a, ɛ min 'na gbasaya kɔɔ, an dɔnden fan mu n 'na tea chɛ ma.

²N 'na chinchincha koo, mɔnɛ wɛɛ ee ban n faa ɔ.

³Chɛ ɛ ma tena n na, n suun ma nyɔɛ n fan ko a, Chu mɔɛ nu, n chɛnyɛ mɔɛ nu. Ni chɛ ɛ ma wan demanɛ a an tena, ɛ ma wan n 'na yiinachii ɔ, n fandi gbu, Yataa ni n danka, mbɛ nn fea tɛ du‑a Chasi a, an ko a.

⁴An mu Isɔɛɛ[2] mɔɛ n fan na, Yataa‑a a boo sɔ miin ma, a ɔ, a ta mɔɛ mu an na. A na‑a an ma wan a 'a denɛ n na, mbɛ a‑a a ɔ yian an na, a kamayaen mu buɛ min dɔ. A na‑a a 'a dɔbɛnɛ n chɛ wan an na, mbɛ a‑a a 'a sawa wɛɛ be Mosisi ma an ko a. Yataa na‑a a ɔ yian fan to an na, an mbe a fai buɛ min dɔ teaya ɔ. Yataa na‑a tooɔdia sɛsɛ chɛ wan an na.

⁵An bɔ kɔnkɔɛ nu, baa ni wan an ma kaka Yataa tena. A sin, Chasi 'a mɔgbuya ta fɛ chia a, a wɛɛ danka‑a bɔ‑a an 'na dambi dɔndɔ gbe chɛ an dɔ. Mɔɛ n gbɛɛ ni tando be a ma kuɔ fɔ ko a. An mu Yataa a fen kɔ fen ko a dunya chɛ ɔ. A ni ma ka.

⁶Chɛ ma a yian ni gbɛ, mbɛ Yataa na‑a an too ɔ dia koe miin chɛ koe a an ye, a ma an chɛ ni. Koe min na mu, a ma ma ni, mbɛ Isɔɛɛ mɔɛ n gbɛɛ mu mɔɛ n fan na, miin‑na Yataa sɔn. An dɔ n ma a sɔn.

⁷A ka chɛ gbu ma, a ma ma ni to, mbɛ Ebeami cheeya n gbɛɛ, an mu Yataa 'a denɛ n chɛndɛ chɛndɛ an fan na. Yataa na‑a a fɔ wan Ebeami ye, a ɔ, “I 'a denɛ Aisaki cheeya nu dechee, an fan mbe ya‑a i cheeya chɛndɛ chɛndɛ n na.”

⁸Chɛ‑a a ɔ yian fan, mbɛ denɛ miin suun‑da mɔgbuya ta fɛ chia a, an fan ma Yataa 'a denɛ chɛndɛ chɛndɛ n na. Chɛɛ mɔɔ dechee cheeya chɛ nu, Yataa na‑a a too ɔ dia denɛ miin na, an fan yaen mu Yataa 'a denɛ chɛndɛ chɛndɛ n na.

⁹Yataa ni an tooɔdia chɛ chɛ tena tima min na, a na‑a bai chɛ n fan fɔ, a ɔ, “Tima chɛ kɔɔ, min dɔ bɛnden mu, n mbe yɛ‑a wan nɛ, a sin Seda ɛ den kaienɛ suun‑da wan.”

¹⁰A sin nii ma danka ni chɛ ma. Debɛka 'a fɛn kaima fea nu, an fa ni Aisaki an na, mmɔ bɔ kɔnkɔɛ.

¹¹Chɛɛ an fɛn chɛ nu, an nii na to suun‑da, an dɔndɔ e na to koe ma‑a min nyin, chɛ ma, min ma nyin, Yataa na‑a koɔ wan Debɛka tena. Chɛ ɛ a ɔ yian fan, mbɛ Yataa ɛ koe ma, a ta chia an na.

¹²Yataa ee koe ma mmɔ sɔn chɛndɛ ko a, a ee a ma mmɔ sɔn yama ko a. A na‑a a fɔ wan Debɛka ye to, mbɛ a 'a den kaienɛ chenama, a ɔ, an mbe ma‑a a dɔ kaima kɔɔ.

¹³Chɛ ɛ wan dechee yɔ Yataa na‑a min fɔ a 'a gboo ɔ, a ɔ, a‑a a boo sɔ Chekɔpi ma, a ɔ, mbɛ a ban‑da Isɔ sin dɔ.

¹⁴Mmɔ ɛ fen fɔ‑a gbɛ? Mmɔ ee kun to a fɔ‑a, mbɛ Yataa ma tea ni.

¹⁵Koe min na mu, a na‑a a fɔ wan Mosisi ye, a ɔ, ɛ koadia yian‑da dechee mɔɛ chɛ an na, a toen mu a ni a yian min na. Mbɛ a‑a chinchincha yian mɔɛ chɛ a, a toen mu a yian koe min na.

¹⁶Chɛ an fɛ mu gbɛ, a gbɛɛ mu dechee Yataa 'a chinchimaya an na. Chɛɛ mmɔ 'a faagbaa ee Yataa 'a chinchincha be mmɔ ma, mmɔ chɛ koe wɛɛ ee a be mmɔ ma.

¹⁷Koe min na mu, a nyɛnden fan mu Yataa 'a gboo ɔ, mbɛ Yataa na‑a Fɛdo ma Ichipi mansa a koe n fan ko a. A na‑a a ma mansa a, a ɔ yian koe an na, a wan Yataa gbasayaen mu buɛ min dɔ. A yɛ to, min mbe a ma, dunya gbɛɛ ni a wan Yataa 'a gbasaya chɛ ɔ yen.

¹⁸Chɛ an‑na a fɔ, Yataa ɛ chinchin fan mɔ ɔ mɔ ma, a toen mu a ni chinchin min ma. A sin to, ni a toen mu a ni a ma mɔ ɔ mɔ too ɔ ni gbɛa, ɛ a ma wan.

¹⁹Chɛ ko a, wo dɔndɔ ɛ a fɔ‑a wan, a ɔ, mbɛ ni Yataa ɛ a ma ka wan, mbɛ a wan Yataa ee kun to, a ni a tɛ si mɔ ɔ mɔ ma. A ɔ, mɔ ɔ mɔ ee che a kunɛ bɔ‑a koe chɛ kɔɔ, a wan Yataa toen mu min ni ma.

²⁰Chɛɛ n dia nyɔɛ nu, mɔ ɔ mɔ ma wo a, Yataa ɔ tisa koe a. Koe min na mu, fenɛ min nyan‑da, a ee a fɔ a nyan mɔɛ ma, a ɔ, “Fen mu i‑a n nyan buɛ chɛ ɔ?”

²¹Boo da nyan mɔɛ dɔndɔ yen ko, a ɛ dia a wandi an ye, ɛ a 'a boo a wai buɛ min dɔ. A ɛ da fea nyan fan boo dɔndɔɛ ɔ. A sin, a da dɔndɔɛ ɛ ma wan wai chɛ koe a tee ɔ tee ko a. Mbɛ dɔndɔɛ ma‑a nɔ tenchen, bɛn chenama ko a.

²²Yataa‑a koe min ma, a wɛɛ ɛ ka wan. A toen ni a ni a ɔ yian, a faa ɛ tɛ buɛ min dɔ. A yɛ to, an ni a ɔ sɔn, a gbasayaen mu buɛ min dɔ. Chɛɛ chɛ gbɛɛ ɔ, a na‑a a faa bia wan mɔɛ chɛ n na, a ni na tena miin tɔɔya‑a, miin ma bɛndenɛ ni gbɛ kasaa koe a.

²³Mbɛ a sin to, a toen ni a ni a ɔ yian, mbɛ a 'a basɔmaya danka ee. Yataa na‑a mɔɛ miin ya a 'a chinchimaya sɔn koe a, a na‑a a yian fan an na.

²⁴Koe min na mu, a na‑a mɔɛ miin chee, an mu mmɔ wan na. A nii ma mmɔ wan Chu mɔɛ n dechee an chee ni, chɛɛ mmɔ dɔ n bɛɛ, mmɔ wɛn ma Chu mɔ a, a na‑a mmɔ wɛɛ chee wan.

²⁵A mu min na, kai Wosea 'a gboo ɔ, Yataa na‑a a fɔ wan, mbɛ ɛ mɔɛ n chee‑a wan a 'a mɔɛ n na, mɔɛ miin nii ma tee a 'a mɔɛ n na. A ɔ, a nii ma to ni miin na tee, ɛ an chee wan a 'a mɔɛ n na, a toen mu miin na.

²⁶A ɔ, a sin, an kaina chɛ gbu, Yataa na‑a a fɔ kaina an ye, mbɛ a 'a mɔ ma an na, a ɔ, a wan Yataa ɛ a fɔ‑a to an kaina dɔndɔ gbe chɛ wan an ye, a ɔ, a wan Yataa min mbe ee fa kuɔ fɔ ko a, a ɔ, a 'a denɛ mu an na.

²⁷A sin to, kai Aisaya na‑a bai chɛ an fɔ a si Isɔɛɛ mɔɛ n ma, a ɔ, mbɛ Isɔɛɛ mɔɛ n kɔ ni koa wɛɛ, yɔ tɛ kuu mɛsɛ mɛsɛ yii da a, a ɔ, chɛɛ chɛ gbɛɛ ɔ, an mɔ kuundenɛ dechee, a ɔ, an fan mbe bauncha ma sɔn‑da.

²⁸A ɔ, ya ma kai fisɔɛ ɔ mu, Mansa Yataa ɛ na‑a kaa a tɛ‑a mɔɛ gbɛɛ wakoe ma dunya ɔ.

²⁹Ɛ wan dechee yɔ Aisaya na‑a a fɔ buɛ min dɔ suun, mbɛ ni Yataa Mansa Wa nii ma an bɔ kɔnkɔɛ dɔn to ni suun, an ni ma‑a wan yɔ duu wa chɛ nu, Sɔdɔn an fea Komoa a, an dɔ mɔɛ nu.[3]

³⁰Nn mbe bai chɛ an fɔ tena, a si mɔɛ chɛ n ma, miin nii ma Chu mɔ n na. An nii butuin chɛ tena, an ni ma mɔ tandenɛ n na Yataa tena. Chɛɛ an‑na an kai fa wan Yataa a. Chɛ ko a, Yataa‑a a ma wan an tan‑da a tena.

³¹Chɛɛ Isɔɛɛ mɔɛ chɛ n tana, Yataa na‑a a boo sɔ ka miin ma, ma koe a a ta mɔɛ n na, an nii ma ma ni mɔ tandenɛ n na Yataa tena. Chɛ ma‑a wɛɛ, an ni bea tena sawa n fan fɛ, tan koe a Yataa tena.

³²Fen na‑a a ma, an nii ma tan ni Yataa tena? Koe min na mu, an yii faen ni an chɛ chɛ wai n fan ma, an yii na nii ma tɛ ni an kai fa buɛ ma Yataa a. An na‑a nama wan sen chɛ ma, sen chɛ min mbe a ma ka, mɔɛ n mbe bea.

³³Yataa 'a gboo na‑a bai sa a si an sen chɛ an ma, a ɔ, “A yen ko, n 'na senɛ si Sayɔn[4] duu ɔ, mɔɛ n mbe an chenɛ n na tu‑a min na, an sen chɛ, mɔɛ n mbe nama‑a min ma, mbɛ an bea‑a. Chɛɛ mɔ ɔ mɔ, i wɛn mbe i kai fa‑a a a, i mɔɛ chɛ ee che‑a mau‑a.”