Read Kono GBOO SAA KƆYINDI KO A 1 Bible Online

GBOO SAA KƆYINDI KO A 1 - Kono bible

GBOO SAA KƆYINDI KO A 1

¹N fan Pɔɔ, n fan mbe gboo chɛ nyɛn tena wo tena, nn fea Sositɛnesi a, mmɔ suun ma nyɔɛ Chasi ɔ. Yataa wandi gbu, an dɔn‑da, a boo sɔ koe a n ma, n ni ma Chisɔsi Chasi 'a sɔ mɔɛ a.

²Nn mbe gboo chɛ nyɛn tena, wo wan tena, wo wɛn mbe Yataa 'a chɔchi ɔ, Kɔyindi duu ɔ. Yataa na‑a wo wɛn chee, wo ni ma tenchen a ko a. Yataa‑a wo ma a ta mɔɛ n na, koe min na mu, a‑a wo ma mɔ dɔndɔɛ a Chisɔsi Chasi a. A‑a a ma ka wan mɔɛ n gbɛɛ a, miin mbe Mansa Chisɔsi tɔɛ chee tena, mmɔ 'a mansa, ni an 'na mansa, an baun koe a.

³Mmɔ Fa Yataa, an fea Mansa Chisɔsi Chasi a, an 'na dua ni ma wo ma, a basan an 'na faachima a.

⁴N mbe Yataa wai bɔ tena wan wo ko a, tima ɔ tima. A sien mu koadia deman chɛ an ma, a‑a min chɛ wo a, wo wɛn mu mɔ dɔndɔɛ a Chisɔsi Chasi a.

⁵Wo ma min chɛ‑a mɔ dɔndɔɛ a, wo bɛ a a, a‑a wo kɔ wan chia a, a chenama ɔ. A‑a wo kɔ wan chia a, bai gbɛɛ ɔ, wo e min sa. A yɛ to, yiimatɛ kan kɔ kan ko a.

⁶Chɛ‑a a ɔ yian fan ka, mbɛ nn‑na bai min fɔ wo ye, a si Chisɔsi Chasi ma, mbɛ wo boo a sien mu a kɔɔ chɛndɛ chɛ.

⁷Chɛ ko a, Yataa Nyina ɛ dua kan kɔ kan min mbe, koe n ma koe a, wo‑a an ma sɔn, wo e ta‑a mmɔ 'a mansa Chisɔsi Chasi yɛ tima ma kɔn‑da.

⁸Ɛ wo 'a danaya n dɔ gbɛa‑a wan, aan a sɔ tee danka chɛ ma. Ɛ a ma‑a wan, mabɔ kan kɔ kan mbe ee ma‑a wo ma, an tee wa chɛ ma, mmɔ 'a mansa Chisɔsi Chasi ɛ na‑a to tima min na.

⁹Yataa ee a da a kuiɛ yɔn. A wan‑na wo chee, ma koe a dia nyɔncha wa chɛ ɔ, wo bɛ a 'a denɛ a, Chisɔsi Chasi, mmɔ 'a mansa.

¹⁰N suun ma nyɔɛ nu Chasi ɔ, n mbe wo disa tena, mmɔ 'a mansa Chisɔsi Chasi tɔɛ ɔ, kuiɛ dɔndɔya ni ma wo tɛ. Wo sɛmbɛ wo nyɔn kɔɔsa bia koe a. Wo dɔn wo nyɔn ye, wo yiima ni ma dɔndɔ gbe, a ɔ ma du du.

¹¹Koe min na mu, n suun ma nyɔɛ nu Chasi ɔ, n‑na a a min, mbɛ bɛn mbe ee wo tɛ, an fɛ mu n mbe koɔ tena ka wo tena. Mɔɛ dɔ nu Kowɛ 'a chenɛ a, an ban‑da a ɔ yian‑da n na.

¹²N mbe min fɔ tena wo ye, an nɛ. Mbɛ wo gbɛɛ, wo da a kuiɛ ee kaina dɔndɔ. Wo dɔ n mbe a fɔ wan, wo ɔ, “Pɔɔ fɛ mɔɛ mu n na.” Mbɛ wo dɔ n‑na a fɔ, wo ɔ, “N mbe Apɔdɔsi an fɛ,” dɔ n dɔ, “Pita,” dɔ n sin dɔ, “Chasi fɛ mɔɛ chɛndɛ mu n na.”

¹³Chasi chɛ dɔndɔ gbe, a ɔ ee che du‑a kaina sɛsɛ. N fan Pɔɔ ma a a, an na‑a min gbangban kɔn gbengbandenɛ ma, wo ko a. Wo dɔndɔ wɛɛ ee nɔ, yii na‑a chɛ min kunɛ ɔ, Pɔɔ tɔɛ ɔ.

¹⁴Yataa ɛn wai, n ma yii chɛ ni wo dɔndɔ wɛɛ kunɛ ɔ, Yataa chia a. N‑na a chɛ dechee Kisipɔsi an kunɛ ɔ, an fea Kayɔsi a.

¹⁵Wo dɔndɔ wɛɛ ma na a fɔ, mbɛ yii chɛ‑a wo kunɛ ɔ, n tɔɛ an dɔ, wo ni bea n fɛ.

¹⁶(A puin‑da gbɛ n yii ma, mbɛ n na‑a yii chɛ wan Sitɛfanasi kunɛ ɔ, a basan a 'a chen na mɔɛ n na. Chɛɛ a ma to ni n yii ma, n ni yii chɛ mɔ dɔ mende kan kɔ kan kunɛ ɔ to).

¹⁷Koe min na mu, Chasi ma n sɔ ni, yii an chɛ koe a mɔɛ n kunɛ ɔ. A‑a n sɔ, n ni sakana bai chɛndɛ chɛ ɔ yian mɔɛ n na. N sin mbe ee a ɔ yian tena, mɔ gbu 'a yiimatɛ an na, daɔdiaya a. Ni n‑na chɛ ma, ɛ ma‑a wan, yɔ Chasi‑a saya min chɛ kɔn gbengbandenɛ ma, gbasaya ban‑da a ɔ.

¹⁸A mu min na, sakana bai chɛ a si Chisɔsi Chasi fa koe ma kɔn gbengbanden chɛ ma, a mu wooya bai an na mɔɛ dɔ n tena. Chɛ nu, miin mbe ee na‑a bauncha ma sɔn‑da. Chɛɛ mmɔ wɛn mbe bauncha chia ma, bai chɛ mu Yataa 'a gbasaya an na.

¹⁹A nyɛnden fan mu Yataa 'a gboo ɔ, mbɛ Yataa ɔ te, ɛ yiimatɛ tɔɛ chɛ nu, an 'na yiimatɛ ɔ yɔn‑da wan. A sin, an 'na ko sɔnɛ gbɛɛ, a ee a ya a fen kɔ fen na.

²⁰Yataa‑a a ɔ yian, mbɛ dunya chɛ ɔ yiimatɛ, tɔnɔn mbe ee a ɔ. Mɔɛ yiima ni tɛ wɛɛ dunya chɛ ɔ, chɛ ee che a ma‑a Yataa sɔn mɔɛ a. A ni Chu n 'na sawa sɔn boo ɔ boo, chɛ wɛɛ ee a ma Yataa sɔn mɔɛ a. A ni ma wɛɛ mɔɛ a, min kosan koɔ‑a, chɛ nan fan gbu wɛɛ ee a ma, a ni ma Yataa sɔn mɔɛ a.

²¹Yataa yiima tɛen ba mu, an‑na a ma, a‑a a ma mɔɛ n 'na yiimatɛ ee che a ma‑a, an ni a ɔ gbɛ a gbu ɛ ka ma. A‑a chɛ ma, min mbe a ma, mɔɛ chɛ n ni bauncha ma sɔn. Mɔɛ chɛ nu, miin mbe an kai fa‑a a a, ni an‑na wooya sakana bai chɛ a min, nn mbe min dɔ yian.

²²Chu mɔɛ n tana, an toen mu kamaya koe n fan dɔ yen koe a, dan koe a a a. Mɔɛ chɛ n sin, miin ma Chu mɔ a, an mbe dan fan a a, ni an ta yiimatɛ‑a a fɔ an ye, mbɛ tea mu.

²³Chɛɛ nn‑na a ɔ yian fan, mbɛ mɔɛ n na‑a kunka mansa fa wan, kɔn gbengbandenɛ ma. Chu mɔɛ n tana, an mbe chɛ ya mainɛ an na. Chɛ n sin, miin ma Chu mɔ a, an mbe a ya dechee wooya bai an na.

²⁴Chɛɛ mɔɛ dɔ n‑na a ɔ sɔn fan, mbɛ Chasi chɛ, an mu Yataa 'a gbasaya a, an mu a 'a yiimatɛ a. Mɔɛ chɛ nu, Yataa‑a miin chee bauncha ma sɔn koe a. An ni ma Chu mɔ a, an ma ma Chu mɔ a, an‑na chɛ ɔ sɔn fan.

²⁵Yataa 'a dɔbɛn chɛ, min yaen mu ka wooya a, yiimatɛ koo a ɔ, a ben mɔ gbu 'a yiimatɛ a sɛnden kan kɔ kan ma. Yataa 'a gboo ɔ fa nan fan gbu wɛɛ, a benden mu mɔ gbu 'a gbasaya ma.

²⁶N suun ma nyɔɛ nu Chasi ɔ, a ni ma wo yii ma, dunya ta yiinachii ɔ, wo sɛsɛ an nii ma yiimatɛ tɔɛ a, Yataa na‑a wo chee tima min na. Wo sɛsɛ, an nii ma wo ya ni gbasaya tɔ a, an ma wo ya ni nyan tɔ a.

²⁷Chɛɛ Yataa‑a a a wii wan a ma, fenɛ n ya koe a fen chɛndɛ a, miin ma dunya ya a fen fen na. A‑a chɛ ma, min mbe a ma, dunya ɔ yiimatɛ tɔɛ n ni mau. Mbɛ mɔɛ chɛ nu, gbasaya nii miin ye dunya ɔ, a‑a an ma mɔɛ a, gbasaya tɔɛ n na mau koe a.

²⁸Mɔɛ n gbɔsɔ ma fenɛ miin ko a, an ma miin ya ni fen fen na, Yataa‑a an fen chɛ n fan ya. A‑a an ya, a ma koe a, fenɛ miin yaen ni tɔnɔnɛ a dunya ɔ, a ni ma fen fufafuu n na.

²⁹Chɛ ni a ma, mɔ gbu kan kɔ kan mbe ee yonka tɛ Yataa chen kɔɔ.

³⁰A wan Yataa dɔndɔ gbe, a wan‑na a ma, wo ma‑a mɔ dɔndɔɛ a Chisɔsi Chasi a. Ni mmɔ‑a a fɔ, yiimatɛ ɛ mmɔ ɔ, Chasi mu. Ni mmɔ‑a a fɔ, mmɔ tanden mu, a wan mu. A‑a mmɔ kun bɔ mmɔ 'a ko yama n dɔ, mmɔ ma‑a Yataa 'a mɔɛ n na.

³¹Chɛ an‑na a fɔ, a nyɛnden fan mu Yataa 'a gboo ɔ, mbɛ mɔɛ min toen mu a ni yonka tɛ, a ni a tɛ koe a ma dechee, Mansa Yataa‑a min chɛ a ko a.