Read Kono GBOO SAA KƆYINDI KO A 10 Bible Online

GBOO SAA KƆYINDI KO A 10 - Kono bible

GBOO SAA KƆYINDI KO A 10

¹N suun ma nyɔɛ nu Chasi ɔ, wo wo yii na chii, koe miin ma‑a suun mmɔ 'a mɔɛ n na. Yataa‑a an bɔ kɛn Ichipi chɛnyɛ ɔ, a‑a banda gbii a tachɛ wan an kun ma, an kun ma fɛn koe a. A sin, an‑na kɔ yii wa chɛ tɛ wan. Yataa‑a a du wan fea a, mbɛ an ben‑da.

²An to‑a banda gbii chɛ an kɔɔ, kɔ yii chɛ ɔ, mbɛ yii chɛ‑a an gbɛɛ kunɛ ɔ Yataa chia a, an ma koe mɔ dɔndɔɛ a Mosisi a.

³An sin gbɛɛ‑a kamaya daun fen dɔndɔ gbe chɛ daun fan.

⁴Mbɛ an gbɛɛ yɛ‑a, an‑na kamaya yii dɔndɔ gbe chɛ min. Koe min na mu, kamaya senɛ min ni an fɛ an tachɛ chɛ ɔ, an yii chɛ bɔ‑a an dɔ, an na‑a min min ka. An sen chɛ sin ni Chasi an na.

⁵Chɛɛ chɛ gbɛɛ ɔ, Yataa faa nii ma chima ni an sɛsɛ a. Chɛ sin‑na a ma wan, a‑a an sɛsɛ kasaa an fuinɛ ma.

⁶Koe chɛ n ma‑a, ma koe a dasi an na mmɔ tena. An ni a ma, mmɔ ma mmɔ faa chɛ koe n ma koe ɔ, miin yau, yɔ an na‑a miin ma.

⁷Ni chɛ ma, mmɔ ni fenɛ n fai, miin ma Yataa a, yɔ an dɔ n ni a ma buɛ min dɔ. A sin nyɛnden mu ka wan Yataa 'a gboo ɔ. A ɔ, an‑na buɔdia bɔ wan, a ɔ, daun ba chɛ a, a ɔ, a basan gbɛ minɛ a. A ɔ, an‑na tɔmbɔɛ don fan, a ɔ, an mbe ta‑a fɔɛ yama 'a tachɛ a.

⁸Mmɔ ma mmɔ boo chɛ waa ma basan yama ɔ, yɔ an dɔ n ni a ma buɛ min dɔ. An‑na a ma, an mɔ wu bi fea kun ma sawa an fa‑a tee dɔndɔɛ a.

⁹Mmɔ ma Chasi yiima yan, a ɔ yen koe a, ni ko yama yuu mu mmɔ ɛ miin ma, mbɛ a‑a mmɔ tɔɔya. An dɔ n‑na a yiima yan ka wan, mbɛ ka n‑na an chin, an fa‑a.

¹⁰Wo sin gbu ma gbonyɛ wɛɛ chɛ. An dɔ n‑na a ma ka wan to, mbɛ kasaa chɛ maeka na‑a, a‑a an kasaa.

¹¹Koe chɛ gbɛɛ miin ma‑a ka, an‑na a ɔ yian fan, koe min mbe ma mɔɛ a, ni i wɛɛ i‑a ko dɔndɔ gbe chɛ an ma, mɔɛ chɛ n‑na miin ma. Chɛ an‑na a fɔ, mɔɛ n‑na a nyɛn Yataa 'a gboo ɔ, ma koe a dasi a mmɔ ko a. A mu min na, mmɔ ɛ ka tee min kɔɔ, a ɔ ma yansan to mbɛ dunya ban‑da.

¹²Chɛ an fɛ mu, ni ɛ wan mɔ ɔ mɔ 'a yiinachii ɔ, mbɛ ɛ wan sɔ ɔ gban Yataa ko a, a mɔɛ chɛ ni a kun ma fɛn, min mbe a ma, a wɛɛ ma na bea.

¹³Dɔsiman kan kɔ kan mbe ee wo tan, min sima ma mɔ gbu tan nin bɛ. Chɛɛ Yataa ee a da a kuiɛ yɔn, a sin mbe ee dɔn dɔsimanɛ ni na mɔ gbu tena, i 'a danaya ɔ ma gbɛ min dɔ bia koe a. Ni dɔsimanɛ na‑a i tena tima min na, a tima dɔndɔ gbe chɛ kɔɔ, ɛ chia yian‑da wan e kun buɛ min dɔ, i ni bɔ a ɔ. Ɛ i ɔ gbɛa‑a wan a ɔ bia koe a.

¹⁴Chɛ an fɛ mu, n dia nyɔɛ nu, wo ma wo boo chɛ fenɛ n fai koe ɔ, miin ma Yataa a.

¹⁵Yiimatɛ tɔɛ mu wo a, chɛ an fɛ mu, n mbe koɔ tena wo tena. Wo ni bai chɛ tɛnsɛ wo yii ma, n mbe ka min fɔ‑a wo ye.

¹⁶Ni mmɔ ma‑a Mansa Chisɔsi 'a tebu chɛ ma, a yɛ to, ni mmɔ ma‑a gbɛ min‑da kɔpu chɛ ɔ, mmɔ‑a Yataa fai min dua koe a, mmɔ ɛ ma ka Chasi wii an ma sɔn‑da kuiɛ dɔndɔya ɔ. A sin to, ni mmɔ‑a biidi ɔ kai, mmɔ ni a daun, mmɔ ɛ ma‑a ka Chasi gboo an ma sɔn‑da kuiɛ dɔndɔya ɔ.

¹⁷Mmɔ da a koo, chɛɛ mɔ dɔndɔ gbe mu mmɔ a, a mu min na, mmɔ ɛ biidi gbugbu dɔndɔ gbe an daun.

¹⁸A sin, wo Isɔɛɛ mɔɛ n ma fɛn, ni an mbe koe miin ma. Ni an‑na soe chɛ n daun, an mbe min bɔ ka yasi n na Yataa tena, an mbe ma ka a ɔ yian fan na, mbɛ an bɛ mu Yataa 'a kuiɛ dɔndɔɛ ɔ.

¹⁹N mbe ee ka a fɔ an na, mbɛ yasi min mbe bɔ fen chɛ n tena, miin ma Yataa a, mbɛ yasi mu, tɔnɔnɛ ee min dɔ. Chɛ ma, mbɛ an fen chɛ n gbu, mbɛ baa kan kɔ kan mbe wan an ma.

²⁰Chɛɛ n mbe min fɔ tena, mbɛ an mbe yasi miin bɔ tena, an mbe an bɔ tena nyina yama n fan ma, an mbe ee an bɔ tena Yataa an tena. A ee dia n ye, n ni wo yen kuiɛ dɔndɔɛ ɔ, wo bɛ nyina yama n na.

²¹E ee che ma‑a nɔ, e a min Mansa Chisɔsi 'a kɔpu ɔ, mbɛ e a min nyina yama n ta wɛɛ ɔ. A yɛ to, e ee ma nɔ, e si daun chɛ tena Mansa Chisɔsi 'a tebu ma, mbɛ e si daun chɛ tena nyina yama n bɛɛ a tebu ma.

²²Ni i‑a chɛ ma, e a ma tena koe min na, i toen mu Mansa Chisɔsi faa ni yɔn a si i ma. Tea gbu sin ko a, i ɔ ma gbɛ a ni ben Mansa Chisɔsi ma.

²³Wo dɔ n mbe a fɔ wan, wo ɔ, “Kɔn mbe ee sa ɔ n ya ɔ, ko ɔ ko ma koe a.” Chɛɛ koe gbɛɛ ma, min nyin a ma koe a wo boo ɔ. Wo ɔ te to, wo ɔ, “Kɔn mbe ee sa ɔ n ya ɔ, ko ɔ ko ma koe a.” Tea gbu mu, chɛɛ mɔ gbu ɛ koe miin gbɛɛ ma, an gbɛɛ an mbe ee che ma‑a basamaya a Chisianɛ n tena.

²⁴Wo ma ma nɔ koe n fan ko a dechee, miin ko a di wo ye. Chɛɛ wo ma nɔ koe n ko a, miin ko a di mɔ dɔ mende n ye.

²⁵Koe yen ko, wo e min ma. Wo e kun fan wo ni fen kan kɔ kan daun, an mbe miin ma tachɛ machiti ɔ. Yiinachii kan kɔ kan mbe ee che ma‑a wo ɔ, an daun fen chɛ daun koe a.

²⁶Koe min na mu, a nyɛnden fan mu Yataa 'a gboo ɔ, mbɛ “Dunya chɛ, ni fen kɔ fen min mbe a ɔ, Mansa Yataa an ta mu an gbɛɛ a.”

²⁷Ni mɔɛ min ma Chisianɛ a, a‑a wo chee daun fenɛ ma, mbɛ wo ta‑a nɔ, wo fen kɔ fen daun, ɛ min be‑a wo ma a daun koe a. Wo ma tisa kan kɔ kan chɛ, a si an daun fen chɛ ma, wo ma a ma, mbɛ yiinachii an mbe wo ɔ.

²⁸(Chɛɛ ni mɔɛ‑a a fɔ wo ye, a ɔ, an daun fen chɛ bɔen mu yasi an na, fenɛ n tena, an mbe miin fai, wo ma an daun fen chɛ daun. Wo ee a daun tena koe min na, an mɔɛ chɛ an ko a mu, ni wo 'a yiinachii gbu ko a.

²⁹N mbe ee a fɔ tena, mbɛ wo ta yiinachii ɔ mu o. Chɛɛ an mɔɛ chɛ ta yiinachii ɔ mu). Koe min na mu, mɔ dɔ mende 'a tataya koe, an mbe ee n ka‑a n faa ma koe ma‑a.

³⁰Ni n‑na Yataa wai bɔ pɛn, mbɛ n‑na daun fen chɛ daun, mɔ ee n ma nyin chɛ ko a. Mɔ ee n ma nyin, koe min na mu, n‑na Yataa wai bɔ.

³¹Chɛ an fɛ mu, mɔ ni ma ko ɔ ko kan kɔ kan ma‑a, basɔmaya ni ma i boo ɔ Yataa ko a. A ni ma daun chɛ ko a, a ni ma fen min koe wɛɛ a.

³²Wo ma mɔ ɔ mɔ sɔ chia yama ma, wo 'a fɔɛ ɔ. Wo ma Chu mɔ sɔ a ma, ni chɛ n bɛɛ miin ma Chu mɔ a. Wo gbu ma chɔchi ɔ mɔɛ n sɔ chia yama ma.

³³Wo koe n ma dechee, yɔ n mbe a ma buɛ min dɔ. N mbe butuinɛ chɛ wan mɔ ɔ mɔ faa chima koe a, n tachɛ buɛ gbɛɛ ɔ. N mbe ee n yii na chii, n fandi a tɔnɔnɛ an ko a. Chɛɛ tɔnɔnɛ chɛ mu, mɔɛ gbɛɛ ko a, an ni bauncha ma sɔn.