Read Kono GBOO SAA KƆYINDI KO A 11 Bible Online

GBOO SAA KƆYINDI KO A 11 - Kono bible

GBOO SAA KƆYINDI KO A 11

¹Chasi na‑a min ma, n mbe bea tena an fan fɛ. Wo wɛɛ, n mbe min ma tena, wo bea an fan fɛ.

²N mbe wo wai bɔ tena, koe min na mu, wo e wo yii na chii tena n na tima ɔ tima ko a. Wo sin mbe bea tena wan kan chɛ fɛ, n‑na min chɛ wo a.

³Chɛɛ n toen mu wo ni a ɔ gbɛ, mbɛ musu kan kɔ kan kun ti mu a chɛɛ an na. Mɔ gbu kan kɔ kan sin dunya ɔ, a kun ti mu Chasi an na. Chasi sin kun ti mu Yataa an na.

⁴Chɛ an fɛ mu, mɔ kaima kan kɔ kan, min mbe ma samunɛ chɛ‑a, chɛ ma, ɛ ma Yataa bai ɔ yian‑da fanka ɔ, banfua ee ma a kunɛ a. Min mbe banfua si‑a a kunɛ a, a‑a baa bɔ a kun ti ma, min mu Chasi a.

⁵Musu kan kɔ kan sin, min be ma samunɛ chɛ‑a, chɛ ma, ɛ ma Yataa bai ɔ yian‑da fanka ɔ, a kunɛ a chiienɛ ni ma. Min mbe ee a kunɛ a chii‑a, a‑a baa bɔ a kun ti ma, min mu a chɛɛ a. Ɛ ma‑a mɔ dɔndɔɛ an na, an fea musu a, min kunɛ gbanan‑da, a a mau koe a.[8]

⁶Ni musu min mbe ee na‑a to‑a a kunɛ a chii koe a, ɛ nyan fan a gbu ni a kunɛ ma tɛ wɛɛ. A sin, musu kun gbananɛ ma mauen mu ka buɛ min dɔ, a ma tɛenɛ wɛɛ ɛ yau, mbɛ a ni a kunɛ a chii.

⁷Mɔ kaima tana, banfua si ko ee a ma. Koe min na mu, Yataa bɔ nyɔɛ mu a a, a sin, a nyin a ni basɔmaya be Yataa ma. Chɛɛ musu tana, a nyin a ni basɔmaya be a chɛɛ an ma.

⁸Koe min na mu, Yataa ma mɔ kaima a dan ni musu an dɔ. Chɛɛ a‑a musu a dan, a bɔ mɔ kaima an dɔ.

⁹Mɔ kaima gbu sin, Yataa nii ma a nyan ni musu an ko a. Chɛɛ a na‑a a yii na chii wan, mbɛ a‑a musu a dan, mɔ kaima ko a.

¹⁰Chɛ an fɛ mu, kun na chii ɛ musu ko a, a ɔ yian koe a, mbɛ ɛ gbasaya an kɔɔ, ni maeka n bɛɛ gbu ko a to.

¹¹Chɛɛ chɛ gbɛɛ ni ma wɛɛ, mmɔ mu buɛ min dɔ ka mɔ dɔndɔɛ a Mansa Chisɔsi a, ɛ ka wan. Mɔ kaima, a ee ma dechee a wandi ko a, musu wɛɛ, a ee ma dechee a wandi ko a.

¹²Chɛɛ a gbu ma‑a boo ɔ boo, mbɛ musu saa bɔ‑a mɔ kaima an dɔ, a ka gbɛ a tima chɛ ma, mɔ kaima gbɛɛ ɛ bɔ tena musu an dɔ. Yataa sin fan mbe fen kɔ fen na dan tena.

¹³Wo wandi gbu, wo e kun fan gbɛ wo yiima a tachɛ‑a chɛ ma. Mbɛ tea ee a ɔ, musu ni Yataa fai fanka ɔ, a kunɛ a chii wai a.

¹⁴Mauma ko wa mu, mɔ kaima kundi yansanden ba ni ma. Yataa‑a mɔ gbu a dan buɛ min dɔ, a dechee gbu, a‑a mmɔ kan fan chɛ a.

¹⁵A sin, mmɔ gbu‑a a ɔ sɔn fan, mbɛ kundi bɔndenɛ mɔɛ kan kɔ, a mu basɔmaya an na musu ko a. Koe min na mu, Yataa‑a a be a ma, ma koe a gbasa an na.

¹⁶Chɛɛ ni mɔ ɔ mɔ toen mu, a ni chɛ ma nyin, bai chɛ an mbe n da a dechee a ko a. Mbɛ manda dɔ mende ee nn boo ɔ, a ee Chisian chɔchi tɔɛ chɛ n bɛɛ boo ɔ, a ka chɛ ma.

¹⁷N mbe ka gbɛ na‑a bai miin fɔ‑a wo ye, n mbe ee wo bai tena wan. Koe min na mu, wo e bɛnɛ min chɛ, Yataa fai koe a, wo deman ko ma, wo tɔɔ koe mu.

¹⁸Koe saa saa mu min na, mɔɛ n‑na a ɔ yian fan n na, koe min mbe ma, ni wo bɛn‑da chɔchi si tena. Wo kuiɛ a ee kan ɛnden bɛɛ a. N sin danden fan mu chɛ a ɛnden na.

¹⁹Tɛnɛ ko ma chɛ a n tena. A gbu nyin fan, wo ni ma sɔ ɔ wo nyɔn kanɛ ɔ. Chɛ an mbe a ma‑a, tea ɛ miin boo ɔ, an ma ni gbɛ chɛndɛ chɛ.

²⁰Ni wo bɛn‑da kaina dɔndɔ, daun chɛ koe a, wo ee ma ka Mansa Chisɔsi 'a daun chɛ bɛnɛ an dɔ.

²¹Koe min na mu, wo e ma daunɛ chɛ‑a, mɔ ɔ mɔ ee a chɛ a nyɔn ko a. A sin, mɔɛ dɔndɔɛ kɔnkɔ tɔɛ ɛ ma, mɔɛ dɔndɔɛ sin gbɛ tɔɛ ɛ.

²²Gba! Chenɛ n mbe wan wo boo ɔ, wo e daunɛ chɛ kaina min, wo e fenɛ n min nɔ. Chɛ ma, wo ma wo yii dɛn Yataa 'a chɔchi kun ma. Wo ma mɔɛ chɛ n na mau, fen mbe ee miin boo ɔ. N ma a ɔ sɔn, n mbe fen fɔ wo ye, a si chɛ ma. Wo toen mu, n ni wo tando wan. Chɛɛ n mbe ee che wo tando‑a chɛ ko a, ɛnden bɛɛ a.

²³Koe min na mu, n bɛɛ n‑na min na ben wo tena, n‑na a ma sɔn Mansa Chisɔsi an na. An na‑a a ma tachɛ ka yɛɛ min ma, a‑a biidi gbugbu ya wan.

²⁴Mbɛ a‑a Yataa wai bɔ, mbɛ a‑a a ɔ kai kai. Mbɛ a‑a a fɔ, a ɔ, “N gboo an nɛ, min mbe wo ko a. Wo chɛ ma tima ɔ tima ko a, wo yii na chii koe a n na.”

²⁵A chia dɔndɔ gbe chɛ a to, an ban‑da kɛn kun bɔ a ɔ daunɛ chɛ‑a, a‑a an ko dɔndɔ gbe chɛ an ma kɔpu wɛɛ a. A‑a a ya wan, mbɛ a ɔ, “N wii an nɛ. Yataa ɛ an ya tena, mbɛ a‑a dɔbɛn nama chɛ a 'a mɔɛ n na. Tima ɔ tima ko a, wo ni ma chɛ min‑da, wo yii na chii koe a n na.”

²⁶Koe min na mu, wo e biidi chɛ daunɛ min chɛ‑a tima sɛsɛ ko a, wo ni gbɛ chɛ wɛɛ min kɔpu ɔ, wo e ma‑a Mansa Chisɔsi 'a saya an dɔ yian‑da den, aan a ni na to.

²⁷Chɛ an fɛ mu, mɔ ɔ mɔ kan kɔ kan, ni i ma‑a Mansa Chisɔsi 'a biidi chɛ daun‑da, i ma baa bɔ a ma. A 'a gbɛ chɛ wɛɛ min koe ɛ ka wan. Ni i‑a chɛ ma, mbɛ i‑a ko yama an ma ka, Chisɔsi gboo a, i‑a a ma a wii a.

²⁸Chɛ an fɛ mu, mɔ ɔ mɔ ni a wandi faa ma mɛn pɛn, a e na to biidi chɛ daun‑da, a basan gbɛ chɛ min koe a.

²⁹Koe min na mu, mɔ ɔ mɔ min mbe a daun‑da, a ni a ɔ sɔn, mbɛ Mansa Chisɔsi gboo an nɛ. Ni mɔ ɔ mɔ ma‑a gbɛ chɛ wɛɛ min‑da, a ni a ɔ sɔn, mbɛ a wii wɛɛ an nɛ.[9] Chɛɛ ni a ma koe chɛ n ma ni a chia ma, ni a gbu ma a ɔ sɔn an sien mu fen ma, Yataa ɛ kaa tɛ‑a wan a ma, a ni a tɔɔ.

³⁰Chɛ an fɛ mu, wo sɛsɛ, wo gboo fanka wo ma, gboo ɔ bɔ wɛɛ ee wo ma. A sin, dɔ n gbu fa‑a.

³¹Chɛɛ ni mmɔ‑a mmɔ wandi ma mɛn pɛn, Yataa ee na‑a kaa a tɛ‑a mmɔ wakoe ma.

³²Chɛɛ Mansa Yataa ɛ kaa a tɛ‑a wan mmɔ ma gbɛ, mbɛ a‑a mmɔ koo. Chɛ an mbe a ma‑a, tee dankama tee kɔɔ, ɛ ma‑a kaa a tɛ‑a dunya chɛ ma mɔɛ n ma, a ee na‑a mmɔ wɛɛ sa‑a an kun ma, a ni mmɔ a tɔɔya.

³³Chɛ an fɛ mu gbɛ, n suun ma nyɔɛ nu Chasi ɔ, ni wo bɛn‑da kaina dɔndɔɛ daun chɛ chɛ tena, wo wo nyɔn ma kɔn.

³⁴Ni kɔnkɔɛ ma‑a mɔ ɔ mɔ a, a ni daunɛ chɛ pɛn a waa chenɛ a. Wo ni chɛ ma, min mbe a ma, ni wo bɛn‑da kaina dɔndɔɛ, wo ee na‑a koe ma‑a, Yataa ni kaa a tɛ wo wakoe ma. Min sien mu koe tɔɛ n ma, n mbe chia n yian‑da wan wo a, ni n na‑a tima min na.