Read Kono GBOO SAA KƆYINDI KO A 12 Bible Online

GBOO SAA KƆYINDI KO A 12 - Kono bible

GBOO SAA KƆYINDI KO A 12

¹N suun ma nyɔɛ nu Chasi ɔ, n mbe koɔ tena gbɛ wo tena, a si dua chɛ n fan ma, Yataa Nyina ɛ miin be. Wo na‑a gboo nyɛn, a si an ma. N toen mu wo ni tea ɔ sɔn, a si an ma.

²Wo‑a a ɔ sɔn fan, mbɛ tima min na wo nii ma Yataa sɔn, wo‑a a ɔ sɔn fan wo ni min ma. An‑na wo ka wan a ma, chia sɛsɛ a, wo e ben fenɛ n fai‑a, miin mbe ee koɔ.

³Sanche gbɛ, n toen mu wo ni chɛ an dɔ sɔn. Mbɛ mɔ ɔ mɔ, Yataa Nyina ɛ min fɛ, a ee Chisɔsi main. A sin, mɔ ɔ mɔ ee a bɔ a da ɔ, a ni Chisɔsi chee mansa a, ni Yataa Nyina ma a sɔ ni chia ma.

⁴Dua tana, a ma bɔ ni a nyɔn na. Chɛɛ Yataa Nyina tana sin, min mbe dua be, ɛ dɔndɔ gbe.

⁵Chia wɛɛ kɔkoo, mɔɛ ɛ bɔ min na Yataa koe ɔ. Chɛɛ Mansa Chisɔsi ɛ dɔndɔ gbe, mmɔ ɛ min ko a.

⁶A sin to, mɔ ɔ mɔ ɛ che wai chɛ‑a a ko a chia miin na, an kɔkoo wan. Chɛɛ a wan Yataa dɔndɔ gbe chɛ, an mbe mɔ ɔ mɔ ta chia be a ma, wai chɛ koe a a ko a.

⁷Chɛ an mbe a ɔ yian, mbɛ Yataa Nyina ɛ wan mmɔ tɛ ɔ. Yataa ɛ mɔ ɔ mɔ dua wan, dɔndɔ dɔndɔɛ a, wai chɛ koe a mɔɛ tɔɛ n ni ta ya ɔ ma.

⁸Mɔɛ dɔndɔɛ ɛ nɔ, Yataa Nyina‑a sakana bai min don a da a, a fɔ koe a mɔɛ n ye, yiimatɛ wa an be a ɔ. Mɔɛ dɔndɔɛ sin, Nyina dɔndɔ chɛ‑a a ma wan, yiimatɛ bai wa, ɛ ma a da a bai ɔ.

⁹Nyina chɛ an mbe a ma to, mɔɛ dɔndɔɛ wɛɛ, ɛ a kai fa Chisɔsi a gban. Mbɛ mɔɛ dɔndɔɛ wɛɛ, a‑a gbasaya be a ma, mɔɛ n baun koe a gbandi n dɔ.

¹⁰A Nyina dɔndɔ gbe chɛ, an mbe gbasaya be mɔɛ dɔndɔɛ ma, kamaya koe n ma koe a. Mbɛ a‑a a be to dɔndɔɛ sin ma, Yataa bai sa koe a. Mbɛ a yɛ‑a to, gbasaya min mbe a ma, mɔɛ ni nyina n tɛ bɔɛ sɔn, a‑a a be dɔndɔɛ wɛɛ ma. Kamaya bai n fɔ koe wɛɛ to, miin dɔ ee gbɛ ka dechee, ɛ a be wan mɔɛ dɔndɔɛ ma. Mbɛ a yɛ‑a, an kamaya bai chɛ n fasai koe, a‑a a gbasaya sin be mɔɛ dɔndɔɛ nan ma.

¹¹Yataa Nyina dɔndɔ gbe, an mbe a ma koe chɛ n gbɛɛ, an mbe che ma‑a, a ta faa ma a a. Mɔ gbu gbɛɛ, dɔndɔ dɔndɔɛ a, mmɔ ɛ dua chɛ ma sɔn an na.

¹²Mɔ gbu gboo ɛ dɔndɔ gbe, chɛɛ a sɔna n kɔkoo. Chɛ gbɛɛ ɔ, gboo dɔndɔ gbe chɛ mu tun, sɔna sɛsɛ n mbe wɛɛ a ma. Chisɔsi Chasi wɛɛ ɛ ka wan.

¹³A chia dɔndɔ gbe chɛ a, mmɔ wan mɔ gbu gbɛɛ, mmɔ ɛ ka wan. Mmɔ ni ma Chu mɔ a, chɛ ma, mɔɛ nu miin ma Chu mɔ a, mmɔ ni ma yɔn fan na, mmɔ ma ma yɔn na. Yii min chɛ‑a mmɔ kunɛ ɔ, Yataa chia a, a Nyina‑a mmɔ ma mɔ dɔndɔɛ a, gboo dɔndɔɛ sɛ‑a mmɔ ma. A sin, Yataa‑a an Nyina dɔndɔ gbe chɛ a na, ma koe a mmɔ fɛ.

¹⁴Mmɔ ɛ a fɔ min chɛ ka, mmɔ gboo, mmɔ sɔna dɔndɔ gbe ma.

¹⁵Mmɔ a ya gbɛ, mbɛ mmɔ chenɛ gbu ni a fɔ, a ɔ, boo ma a a, a ɔ, chɛ ko a, a ɔ, mmɔ sɔna ma a a. Chɛ ee che a ma‑a, a ta ni ka mmɔ gboo wakoe ma.

¹⁶Mmɔ a ya to, mbɛ mɔ gbu too wɛɛ ni a fɔ, a ɔ, a tana, a ɔ, ya ma a a. A ɔ, chɛ ko a, a ɔ, a ta ee gboo koe ma. Chɛ ee che a ma‑a, a ta ni ka mmɔ gboo wakoe ma.

¹⁷Ni mɔ gbu gboo gbɛɛ ni dechee ya kuu an na, ko a minɛ nii ma‑a a ɔ. A yɛ to, ni mɔ gbu gboo ni dechee mmɔ too an na, fen kunyɛ a minɛ nii ma‑a a ɔ.

¹⁸Chɛ gbɛɛ ɔ, koe n mbe ka buɛ min dɔ, mmɔ sɔna n gbɛɛ, mmɔ gboo ma, Yataa‑a an dɔ bɛn bɛn fan, a ta faa ma a a.

¹⁹Mɔ gbu gboo nii ma‑a nɔ, ni sɔna dɔndɔ gbe ni.

²⁰Tea gbu mu min na, mɔ gbu sɔna n kɔkoo wan, chɛɛ a gbɛɛ mu mɔ gboo dɔndɔɛ a.

²¹Chɛ an fɛ mu gbɛ, ya ee che a fɔ‑a boo ye, a ɔ, a ma gbɔsɔ ee a ma. A yɛ to, n mbe ee a fɔ, kunɛ wɛɛ ni a fɔ chenɛ ma, a ɔ, a ma gbɔsɔ kan kɔ kan mbe ee a ma.

²²A ka chɛ gbu ma, mmɔ sɔna n gbu wɛɛ, miin dɔ ma gbɛ, mmɔ ee che an to‑a gbaa ko ɔ ko ɔ.

²³A sin, mmɔ sɔna chɛ nu, ɛ ma mmɔ yiima baa ee miin ma, kaka, mmɔ ɛ an fan gbu bia chɛndɛ chɛ. Mmɔ sɔna chɛ n sin, miin ma ma kawa ni mmɔ ye, mmɔ ɛ tima ya an fan na.

²⁴Mmɔ ee an tima chɛ ya, mmɔ sɔna chɛ n na, miin ma kawaen mu kaka. Mmɔ gboo chɛ, Yataa wandi gbu wɛɛ, a‑a a ɔ bɛn, a buɛ ɔ, min mbe a ma, mɔ ni baa chenama be i gboo kaka n ma, baa bɛnden mu a ni be miin ma.

²⁵Chɛ ni a ma, koɛ ma ma mmɔ sɔna n tɛ, mmɔ gboo ma. Chɛɛ mmɔ sɔna n gbɛɛ, an gbɔsɔenɛ ni ma an nyɔn ko a kuiɛ a kanɛ ɔ.

²⁶Ni mɔ gbu sɔna dɔndɔ wɛɛ tɔɔya‑a, a ni ma a tɔɛ chɛ n gbɛɛ a tɔɔya a. Ni an sɔna dɔndɔ a basɔmaya ma sɔn, a tɔɛ chɛ n gbɛɛ ni buɔdia bɔ a a.

²⁷Sanche chɛ ɔ, wo gbɛɛ, wo mu Chasi gboo dɔndɔɛ chɛ an na. A sin, dɔndɔ dɔndɔɛ a, wo mu a sɔna n fan na.

²⁸Yataa‑a sɔ tena koe ɔ bɛn fan, Chisianɛ n tɛ chɔchi ɔ. A saa ma‑a min na, a‑a a boo sɔ wan Chasi 'a sɔ mɔɛ n ma. A fean bɔɛ mu, a wan Yataa 'a gbonka chɛ mɔɛ n fan na. A sawan bɔɛ mu, mɔɛ n kan mɔɛ n fan na. Chɛ gbakɔ, mɔɛ miin mbe kamaya koe n ma, ni chɛ nu gbasaya be‑a miin ma, mɔɛ n danda koe a, deman koe a an ma, an sɔ koe wɛɛ a chia chɛndɛ ma, a basan kamaya bai n fɔ koe a, miin dɔ ee gbɛ ka dechee.

²⁹Mɔɛ gbɛɛ, an ma Chasi 'a sɔ mɔɛ n na, an ma Yataa 'a gbonka chɛ mɔɛ n na, an ma mɔɛ n kan mɔɛ n na. A sin, an gbɛɛ an mbe ee kamaya koe n ma.

³⁰Yataa Nyina ma mɔɛ gbɛɛ an dua ni, mɔɛ n baun koe a gbandi n dɔ. A ma mɔɛ gbɛɛ dua ni, kamaya bai n fɔ koe a, miin dɔ ee gbɛ ka dechee. A yɛ to, a ma mɔɛ gbɛɛ dua ni, an kamaya bai chɛ n na ben koe a.

³¹Chɛɛ wo butuin chɛ, wo faa gbɛɛ a, Yataa Nyina ɛ dua miin chɛ, a kuu ba n fan ko a ni dia wo ye. Chɛɛ chɛ gbɛɛ ɔ, min benden mu chɛ n gbɛɛ ma, an nɛ yɔ n mbe ka na‑a chia min yian‑da wo a.