Read Kono GBOO SAA KƆYINDI KO A 13 Bible Online

GBOO SAA KƆYINDI KO A 13 - Kono bible

GBOO SAA KƆYINDI KO A 13

¹Chɛnyɛ koɛ sɛsɛ wa chɛ nu, mɔ gbu n mbe miin fɔ, maeka n bɛɛ an mbe miin fɔ, n ni an gbɛɛ fɔ wɛɛ, koadia ni ma n faa ɔ. Chɛɛ ni koadia ee n faa ɔ, n bɔ mɔ gbu ko a, n da a bai chɛ n mbe wan dechee yɔ tainɛ sɔnkɔ sɔnkɔ kuiɛ, chɛ ma, pani tata n mbe ma bɛn bɛn‑da an nyɔn na.

²Chɛ n bɛɛ, n mbe na tena ka miin ma dan‑da, an ni ma wɛɛ n boo ɔ, koadia ni ma n faa ɔ. Gbasaya ni ma n boo ɔ, Yataa da a kuiɛ ɔ yian koe a mɔɛ n na. A ni ma n boo ɔ, koe gbɛɛ mɔ gbu ee kun min dɔ gbɛ koe a, n ni an dɔ gbɛ. A ni ma to n boo ɔ, n ni n kai fa Chisɔsi a gbeden, min mbe che a ma‑a, n ni a fɔ kɔnkɔɛ ma, n dɔ, a ni ka a gba ɔ, mbɛ a kuɛn‑da. Chɛ n gbɛɛ ni ma wɛɛ n boo ɔ, ni koadia ee n faa ɔ, mɔ ma n na.

³N gbu ni n boo fenɛ gbɛɛ be wɛɛ mɔɛ n ma, n ni n fandi gbu be, an ni n minda,[10] koadia ni ma n faa ɔ. Chɛɛ ni a ee a ɔ, n mbe ee ko chɛndɛ kan kɔ kan ma sɔn chɛ gbakɔ.

⁴Faabia, an mbe koadia ɔ, a basan chinchimaya a. Toomaya ee koadia ɔ, yonkatɛ ee a ɔ, dɔpandaya wɛɛ ee a ɔ.

⁵Kanbaiya ee koadia a ɔ, faagbandia ee a ɔ, mɔ sin mbe ee i gbɔsɔ dechee i ta ma koe n fan na, a ni ben i bɔɛ ta ma. Koadia ɔ, kakaa ee nɔ, kodomaya sa koe a ɔ.

⁶Koadia ɔ, mɔ bu ɔ ee dia ko yama ma koe a, mɔ bu ɔ ni dia tea koe an ma koe a.

⁷Koadia ɔ, mɔ sɔɛ ee bɔ, i bɔɛ ko a. A sin, danaya, yiinatɛ, ni faabia, mɔ gboo ɔ ee fa an na.

⁸Kuɔ fɔ koe mu koadia a. Sakana bai n mbe wan nɔ a ka Yataa tena, mɔɛ n mbe miin ma sɔn. Chɛɛ an mbe ma tima kundu an ko a. Dua sɛsɛ ɛ wan nɔ, kamaya bai n fɔ koe a, miin dɔ ee gbɛ dechee. Chɛɛ dua chɛ ɛ ban fan. Yiimatɛ ɛ wan nɔ. Chɛɛ a nan fan bɛɛ danka ɛ.

⁹Koe min na mu, mmɔ 'a ko sɔnɛ, a a ma ban ni. Yataa da a bai chɛ wɛɛ, mmɔ ɛ min dɔ yian mɔɛ n na, a a ma ban ni.

¹⁰Chɛɛ ni koe min na banden mu, ni a che‑a a ma, koe min na ma ban ni, ɛ tuin‑da wan.

¹¹N ni denmɛsɛya ɔ tima min na, n 'na bai sa buɛ, n 'na ko a tisɔn buɛ, a basan n yii si buɛ a koe n ma, an ni wan yɔ den mɛsɛ. Chɛɛ n ma‑a kɛn kai da faenɛ a, n‑na n boo bɔ n 'na den mɛsɛ sɔnɛ n dɔ.

¹²Sanche gbɛ, mmɔ ɛ koe ɔ yen mia mia, yɔ mɔɛ ɛ ma mɛmɛ ɔ fɛn‑da. Chɛɛ tima ɛ che‑a wan, mmɔ ɛ a yen‑da tima min na gboden, mmɔ ya fea sɔenɛ a nyɔn na. N ma ko a tenden sɔn bɛ, chɛɛ a da ɛ na‑a wan fa a. A da ɛ fa‑a wan, yɔ n bakoe ɔ sɔn koe da faen mu buɛ min dɔ Yataa boo ɔ.

¹³Chɛ ni ma wɛɛ ma‑a, ko sawa an fan mbe nɔ, miin mbe ma‑a nɔ tun. An mu kai fa an na Chisɔsi a, yiinatɛ a ma, ni a ko a dia koe a mmɔ ye. Ko sawa chɛ n tɛ, a kuu ba mu koadia an na.