Read Kono GBOO SAA KƆYINDI KO A 14 Bible Online

GBOO SAA KƆYINDI KO A 14 - Kono bible

GBOO SAA KƆYINDI KO A 14

¹Koadia ni ma wo faa ma koe a, a ben fen fen ma. Chɛɛ wo to chia sɛsɛ chɛ n bɛɛ a, Yataa Nyina ɛ wo dua‑a miin na. A bɛbɛɛ dua chɛ, min mu Yataa da a bai ɔ yian koe a.

²Koe min na mu, mɔɛ min mbe kamaya bai n fɔ, mɔɛ n mbe ee miin dɔ gbɛ ka dechee, a ee koɔ ka mɔ gbu n fan tena. Chɛɛ ɛ ma ka koɔ‑a Yataa an tena. Koe min na mu, Yataa Nyina ɛ ma wan a fɛ, ɛ ma kamaya bai miin fɔ‑a, mɔ ɔ mɔ ee an dɔ gbɛ.

³Chia dɔndɔɛ a, mɔɛ min mbe Yataa da a bai ɔ yian mɔɛ n na, an deman koe mu. Mbɛ a‑a an faa ma nande, an bu ɔ ni dia.

⁴Mɔɛ min mbe kamaya bai n fɔ, mɔ ee miin dɔ gbɛ ka dechee, ɛ a wandi an deman dechee. Chɛɛ mɔɛ min mbe Yataa da a bai ɔ yian mɔɛ n na, ɛ basan ka mɔɛ gbɛɛ an ma, miin mbe chɔchi ɔ.

⁵N toen fan mu, wo gbɛɛ ni kamaya bai sɛsɛ fɔ, mɔ ee miin dɔ gbɛ ka dechee. Chɛɛ min benden mu chɛ ma, n toen mu, wo ni Yataa da a bai ɔ yian mɔɛ n na. Mɔɛ min mbe chɛ ma, a benden mu mɔɛ chɛ ma, min mbe kamaya bai sɛsɛ fɔ. Koe min na mu, ni mɔɛ ma a da a bai ɔ yian ni, mɔɛ n mbe ee demanɛ sɔn chɔchi ɔ.

⁶N suun ma nyɔɛ nu Chasi ɔ, ni n na‑a wo tena, n mbe kamaya bai sɛsɛ fɔ‑a, wo ee miin dɔ gbɛ ka dechee, wo ee a tɔnɔnɛ ma sɔn. Wo ee a sima wɛɛ ma sɔn, mɔɔ ni n‑na a tɛnsɛ wo tena, Yataa ɛ min fɔ tena. Chɛ ma, yiima miin mbe a ɔ, chɛ ma, sakana min nyɔn sima mu a a, chɛ ma, kanɛ minan sima mu.

⁷A ni ma kuiɛ fenɛ n bɛɛ a, miin mbe ee fɔɛ, yɔ koee, chɛ ma, koninka, mɔ ɔ mɔ ee a kuiɛ sɔn, ɛ ma koɔ‑a. Mɔ ee a sɔn, mɔɔ ni a kuiɛ ma‑a bɔ‑a chɛndɛ chɛ.

⁸Chɛ an fɛ mu, mɔɛ min mbe potani fɛ, ni a ma a fɛ ni chɛndɛ chɛ, soya n mbe ee an ma bɛn chɛɛ chɛ koe a.

⁹Ɛ ka wan dechee wo wɛɛ ko a. Ni wo ma koɔ ni gbadan, mɔ ɔ mɔ ee che a ɔ gbɛ‑a, wo e ma‑a bai min fɔ‑a. Koe min na mu, wo e ma‑a wo da a kuiɛ sa‑a fia an na.

¹⁰Chɛnyɛ koɛ sɛsɛ ɛ wan dunya ɔ, chɛɛ dɔndɔ wɛɛ ee nɔ, mɔ ee min dɔ gbɛ.

¹¹Chɛɛ ni n ma chɛnyɛ koɛ sɔn, mɔɛ min mbe a fɔ tena n ye, sonda mu a a n tena. N bɛɛ, n mu sonda an na a wɛɛ tena.

¹²Wo wɛɛ, wo ma bɛndenɛ ɛ ka buɛ min dɔ Yataa Nyina 'a dua ma sɔn koe, wo chɛ ma. Wo e min ma, koe gbɛɛ ya ɔ, dua miin mbe na demanɛ a, chɔchi ɔ, wo ni wai chɛ an pɛn na.

¹³Chɛ an fɛ mu, mɔɛ min mbe kamaya bai n fɔ, mɔ ee miin dɔ gbɛ ka dechee, a ni samunɛ chɛ, gbasaya ni ma nɔ a a ben koe a.

¹⁴Ni n‑na samunɛ chɛ kamaya bai bonda chɛ n dɔ, n mbe a chɛ Yataa Nyina 'a gbasaya an dɔ. Chɛɛ n ta yiima, an mbe ee a ma tena, n mbe a ma.

¹⁵Ni ɛ ka wan, n mbe fen ma gbɛ? N mbe samunɛ chɛ‑a wan Yataa Nyina 'a gbasaya ɔ, mbɛ n‑na a chɛ to n yiima wɛɛ ɔ. N mbe tando si be‑a wan Yataa Nyina 'a gbasaya ɔ, mbɛ n‑na a be n yiima wɛɛ ɔ to.

¹⁶Ni wo‑a Yataa fai kamaya bai n dɔ, mɔ ee miin dɔ gbɛ ka dechee, wo e a ma tena Yataa Nyina 'a gbasaya an dɔ. Ni mɔ gbama ma‑a wo tɛ ɔ, mbɛ wo ban‑da Yataa wai bɔ‑a an samunɛ chɛ ɔ, mɔɛ chɛ ee che a fɔ‑a, a ɔ, “A ni ma ka.” Koe min na mu, chia kan kɔ kan mbe ee a boo ɔ, a ɔ gbɛ koe a, samun chɛ sien mu koe min ma.

¹⁷Samunɛ chɛ, i‑a min chɛ ka, a ni nyan bɛɛ boo ɔ boo, a ee che ma‑a demanɛ a mɔɛ dɔ mende tena.

¹⁸Yataa ni wai. Wo dɔndɔ wɛɛ ee nɔ, min mbe kamaya bai n fɔ, a ni che n dɔ.

¹⁹Chɛɛ n ni chɔchi ɔ, n mbe ee bai wuu tanɛ sa, kamaya bai n dɔ, mɔ ee miin dɔ gbɛ ka dechee. A fisa, n ni bai duu gbe sa, chɛnyɛ koɛ ɔ, mɔɛ n mbe min dɔ gbɛ. Chɛ an mbe a ma, n ni an kan.

²⁰N suun ma nyɔɛ nu Chasi ɔ, wo wo boo bɔ den mɛsɛ n 'na yiinachii ɔ. Wo wo yii na chii, yɔ gbakoo nu. Chɛɛ ni ko yama ma ɔ mu, wo ma den toa n na.

²¹A nyɛnden fan mu Yataa 'a gboo ɔ, mbɛ, Mansa Yataa ɔ, mbɛ ɛ koɔ‑a wan a 'a mɔɛ n tena, a ɔ, mɔɛ n dɔ, miin mbe koɔ chɛnyɛ koɛ dɔ mende n dɔ. A ɔ, sonda nu, a ɔ, ɛ koɔ‑a an fan dɔ, a ɔ, chɛɛ chɛ gbɛɛ ɔ, a ɔ, a 'a mɔɛ n mbe ee an too ma sɔ‑a a ma.

²²Chɛ an fɛ mu, dua chɛ, min mu kamaya bai n fɔ koe a, mɔ ee miin dɔ gbɛ ka dechee, a mu tɔmɔsi an na. A sin, ɛ mɔɛ n fan ko a, miin ma an kai fa ni Chisɔsi a. A ee mɔɛ chɛ n fan ko a, miin kai faen mu Yataa a. Dua chɛ wɛɛ, min mu bai ɔ yian koe a mɔɛ n na den, a si Yataa ma, a nɛnɛ ɛ mɔɛ n fan ko a, miin kai faen mu Chisɔsi a. A ee chɛ n ko a, miin ma an kai fa ni a a.

²³Chɛ an fɛ mu, mmɔ a ya wɛ, mbɛ mɔɛ n gbɛɛ chɔchi ɔ, an bun‑da kamaya bai n fɔ‑a, mɔ ee miin dɔ gbɛ ka dechee. Mbɛ ko sɔn bai nu, chɛ ma, mɔɛ nu, miin ma an kai fa ni Chisɔsi a, mbɛ an don‑da an chɔchi chɛ ɔ. An mbe a fɔ‑a wan, an dɔ, koɔ chɛ mɔɛ chɛ n wooenɛ mu.

²⁴Chɛɛ ni mɔɛ gbɛɛ ma‑a Yataa bai sa an na, mɔɛ n tena, mbɛ ko sɔn bai don‑da, a yiima ɛ mun‑da wan. Chɛ ma, mɔɛ wɛɛ, min ma a kai fa ni Chisɔsi a, a wɛɛ ta ɛ mun‑da wan. An mbe min na min‑da, ɛ a ma‑a wan, an 'na ko yama ma ni boo an ma. An mbe min gbɛɛ a min‑da, an mbe kaa a tɛ‑a, a si an tachɛ buɛ ma.

²⁵An‑na koe miin ma nun dɔ, miin mbe sa ɔ an yii ma, an mbe bɔ‑a wan ya a ma. An sin, an mbe an kumbai gbangban‑da wan, mbɛ an‑na a fɔ, an dɔ, tea mu, an dɔ, Yataa ɛ wan nɔ an tɛ ɔ.

²⁶N suun ma nyɔɛ nu Chasi ɔ, n mbe chɛ an fɔ tena. Ni wo bɛn‑da samun chɛ tena, mɔ dɔndɔ ni ma si sa kun ma, dɔndɔɛ ɛ kan chɛ kun ma. Dɔndɔɛ nan sin, a ni ma nɔ koe ɔ yian koe a, min dɔ nunden mu Yataa boo ɔ. Dɔndɔɛ wɛɛ, a ni ma sakana bai fɔ‑a kamaya bai n dɔ, mɔ ee miin dɔ gbɛ ka dechee. A yɛ to, mɔɛ dɔndɔɛ ni ma nɔ, a gbɛɛ ɔ yian koe a, sakana chɛ sien mu koe min ma. Ko ɔ ko min mbe chɛ‑a a ɔ, an ni ma tɔnɔnɛ an na chɔchi tena.

²⁷Ni mɔɛ ɛ bɔ‑a wan wo tɛ ɔ, kamaya bai n fɔ koe a, mɔ ee miin dɔ gbɛ ka dechee, a ni ma mɔ dɔndɔɛ a, chɛ ma, mɔ fea a, chɛ ma, a ni danka mɔ sawa ma. An sin mbe ma koɔ‑a, an ma koɔ dɔndɔ a, an ni koɔ dɔndɔ dɔndɔɛ an na. A sin, mɔɛ ni ma nɔ, an da a kuiɛ a ben koe a.

²⁸Chɛɛ ni mɔ ɔ mɔ ee nɔ, min mbe an da a kuiɛ a ben, an ni a ɔ maun don chɔchi ɔ. Ni an ma‑a kamaya bai chɛ n fɔ‑a, mɔ ee miin dɔ gbɛ ka dechee, an ni koɔ an da kɔɔ wan, Yataa tena.

²⁹Mɔ fea, chɛ ma, mɔ sawa, an fan mbe Yataa 'a sakana bai ɔ yian. Mɔɛ tɔɛ chɛ n sin, an mbe ma nɔ a tɛnsɛ koe an na, an ni tachɛ chɛndɛ.

³⁰Chɛɛ ni mɔɛ dɔ mende to‑a nɔ, chɔchi chɛ ɔ, mbɛ a bun‑da sakana ma sɔn‑da, a ka Yataa tena, mɔɛ dɔndɔɛ min ni koɔ tena, a ni a bia a ma.

³¹Wo gbɛɛ, dɔndɔ dɔndɔɛ a, wo e kun fan Yataa bai ɔ yian koe ma. Wo ni a ɔ yian, mɔɛ gbɛɛ ni a ɔ gbɛ, an bu ɔ ni dia.

³²Dua, Yataa bai ɔ yian koe a, a ɛ Yataa 'a gbonka chɛ mɔɛ n fan boo ɔ.

³³Koe min na mu, Yataa ee koe ɔ basan basan, ɛ na kuiɛ dɔndɔya an na mɔɛ n tɛ ɔ. A sin mbe ka wan chɔchi n gbɛɛ ɔ, Yataa 'a mɔɛ n tɛ ɔ,

³⁴mbɛ musu n koɔ koe chɔchi ɔ, ko ma kawaen ma, an ni an ma maun don bɛnɛ ɔ. Chɛɛ yɔ Chu mɔɛ n 'na sawa‑a a fɔ buɛ min dɔ, an ni ma kooya gbee an na.

³⁵Ni ko ɔ ko ɛ wan nɔ, an toen mu an ni min dɔ gbɛ, an ni an chɛɛ n dɔ tisa chenɛ a. Koe min na mu, a ma mauen mu, musu ni koɔ bɛnɛ ɔ, chɔchi ɔ.

³⁶Gba! Sakana bai chɛndɛ chɛ, a si Chisɔsi Chasi ma, a ma ka ni wo wan tena. A sin, a ma na ni wo dechee an ko a.

³⁷Ni mɔ ɔ mɔ‑a a wandi ya Yataa 'a gbonka chɛ mɔɛ a, chɛ ma, a ni a wandi ya, mbɛ dua ɛ wan a boo ɔ, Yataa Nyina‑a a min be. An mɔɛ chɛ ni a ɔ sɔn, mbɛ n mbe ka min gbɛɛ nyɛn tena wo tena, mbɛ Mansa Chisɔsi 'a sawa an nɛ.

³⁸Chɛɛ ni a ma chɛ ya ni sɔɛ ma koe a, a wɛɛ ee a ya‑a sɔɛ ma ya mɔɛ a.

³⁹Chɛ an fɛ mu, n suun ma nyɔɛ nu Chasi ɔ, wo wo faa chɛ Yataa bai ɔ yian koe a, mɔɛ n na. Chɛɛ wo ma mɔɛ n na gban, kamaya bai n fɔ koe a, mɔ ee miin dɔ gbɛ ka dechee

⁴⁰Chɛɛ ko ɔ ko, min mbe chɛ‑a a ɔ, a ni ma chɛndɛ chɛ, a chia ma.