Read Kono GBOO SAA KƆYINDI KO A 15 Bible Online

GBOO SAA KƆYINDI KO A 15 - Kono bible

GBOO SAA KƆYINDI KO A 15

¹N suun ma nyɔɛ nu Chasi ɔ, ka n mbe chɛ puin gbɛ wo yii ma, a si sakana bai chɛndɛ chɛ ma, n ni min fɔ wo ye. Wo na‑a min na min, a sin, wo 'a kaifa gbu Chisɔsi a, a kuu sien mu an ma gbau gbau.

²An mu sakana bai chɛndɛ a, min mbe che wo baun‑da, ni wo‑a a a tun wo boo si koe a a kɔɔ. Ni wo ma chɛ an ma ni, wo kai faen fan mu fuu Chisɔsi Chasi a.

³A nyɛnden mu buɛ min dɔ Yataa 'a gboo ɔ, n‑na a a ben ka wan wo tena. Chɛ an mu koe chenama saa saa a, a ɔ gbɛ koe a. Mbɛ Chasi fa‑a mmɔ 'a ko yama n fan ko a.

⁴Mbɛ an‑na a tɔn kɛn, tee fea a sawan bɔɛ ma, Yataa‑a a kɔɔ sɔ, a ka saya ɔ. A ma‑a wan ka, yɔ a nyɛnden mu buɛ min dɔ to Yataa 'a gboo ɔ.

⁵A sin gbu, a‑a a wandi yian Pita pɛn na, mbɛ an sɔ mɔɛ tan kun ma fea chɛ nu, a‑a a wandi yian to an gbɛɛ a.

⁶Mbɛ a‑a a ma wan to, a fɛ mɔɛ nu, miin benden ni mɔ chɛmɛ duu ma, a‑a a wandi yian an na, dɔndɔ a. An fɛ den chɛ n dɔ nu, a faen bɛɛ mu gbɛ, chɛɛ an sɛsɛ, an mbe wan bɛ tun ka fɔɛ ɔ sanche.

⁷Chɛ gbakɔ to, a‑a a wandi yian fan Chimisi a, mbɛ a yɛ‑a, a‑a a wandi yian a 'a sɔ mɔɛ tɔɛ n gbɛɛ a.

⁸A danka‑a gbɔdɛ, a‑a a wandi yian n bɛɛ a. N fan maen mu wɛɛ, yɔ mɔɛ min suun‑da kɔndɔfii ɔ.

⁹Koe min na mu, Chasi 'a sɔ mɔɛ chɛ n gbɛɛ, an benden mu n ma. N gbu sin, mɔ a tenden ma n na, a chee koe a a 'a sɔ mɔɛ a. Koe min na mu, n‑na ko ma gbaaenɛ sa wan Yataa 'a mɔɛ n ma, chɔchi ɔ.

¹⁰Chɛɛ Yataa 'a koadia demanɛ ɔ, n ma‑a mɔɛ a, n mu mɔɛ min na. A 'a koadia demanɛ chɛ sin, a‑a min be n ma, chia yen‑da wan a ma. Chia dɔ mende sin gbu a, n‑na wai chɛ wan, a ben Chasi 'a sɔ mɔɛ tɔɛ kan kɔ kan ma. A maen mu wɛɛ ka boo ɔ boo, mbɛ n fandi an ma a ma ni, n ni koe chɛ n ma. Chɛɛ Yataa 'a koadia demanɛ an na wai chɛ n na.

¹¹Chɛ ko a gbɛ, a ni ma n na, a ni ma a 'a sɔ mɔɛ tɔɛ n na, nn gbɛɛ nn mbe na tena Yataa 'a bai dɔndɔ gbe chɛ an na. Wo sin bɛɛ, wo danden mu an na.

¹²Mmɔ 'a sakana bai sanche chɛ ɔ, an nɛ, mbɛ Chasi‑a a kɔɔ sɔ wan, a ka saya ɔ. Chɛ ko a, wo dɔ nu, wo ee che to a fɔ‑a, mbɛ kɔɔ sɔ ee nɔ, a ka saya ɔ.

¹³Ni tea mu an na, mbɛ Chasi wɛɛ, a nii ma a kɔɔ sɔ ni, a ka saya ɔ.

¹⁴A sin, ni Chasi chɛ nii ma a kɔɔ sɔ ni, a ka saya ɔ, mbɛ fufafuu mu, Yataa 'a bai ɔ yian koe a. Mbɛ wo kai fa koe wɛɛ Chisɔsi a, fufafuu mu.

¹⁵A ka chɛ gbu ma, mmɔ ɛ ma‑a ka fania an fɔ‑a, a si koe ma, Yataa‑a min ma. Koe min na mu, mmɔ wan mbe a fɔ, mbɛ a‑a Chasi kɔɔ sɔ wan, a ka saya ɔ. Chɛɛ ni mmɔ‑a a fɔ, mbɛ kɔɔ sɔ ee nɔ, a ka saya ɔ, chɛ‑a a ɔ yian fan ka, mbɛ Chasi nii ma a kɔɔ sɔ ni, a ka saya ɔ.

¹⁶Koe min na mu, ni mɔ ee a kɔɔ sɔ, a ka saya ɔ, mbɛ Chasi nii ma a kɔɔ sɔ ni.

¹⁷Chasi chɛ sin, ni a nii ma a kɔɔ sɔ ni, a ka saya ɔ, mbɛ wo kai faen mu a a fuu. A sin, wo e wan tun wo 'a ko yama boo ɔ.

¹⁸A gbu ɛ ma‑a wan to, yɔ mɔɛ chɛ n bɛɛ, miin na‑a an kai fa Chasi a, mbɛ an fa‑a, an to‑a saya ɔ.

¹⁹Yiinatɛ chɛ, min mbe mmɔ ɔ Chasi ko a, ni a sien mu dunya chɛ ɔ fɔɛ chɛ an ma dechee, ko ee to a gbaa chia a, mbɛ mmɔ ma chinchin‑da. Mmɔ ma chinchin‑da, a ben mɔɛ tɔɛ gbɛɛ ma dunya ɔ.

²⁰Chɛɛ tea gbu ko a, Chasi na‑a a kɔɔ sɔ wan, a ka saya ɔ. A ma‑a mɔɛ saa a, a kɔɔ sɔ koe a, chɛ n tɛ ɔ, miin na‑a an kai fa a wan Chasi a, mbɛ an fa‑a. Chɛ ni a ma, mmɔ ni dan a a, mbɛ mmɔ wɛɛ ɛ na‑a wan mmɔ kɔɔ sɔ‑a, a ka saya ɔ.

²¹Koe min na mu, mɔ kaima dɔndɔ na‑a buɛ min dɔ saya a, dunya ɔ, mɔ kaima dɔ mende na‑a ka wan to kɔɔ sɔɛ a, a ka saya ɔ.

²²Adami‑a a ma buɛ min dɔ saya‑a mmɔ gbɛɛ fa, Chasi wɛɛ, ɛ a ma‑a ka wan, mmɔ gbɛɛ ni yɛ fɔɛ ɔ, mmɔ bɛ mu ka buɛ min dɔ mɔ dɔndɔɛ a a a.

²³Chɛɛ ni a tima che‑a, chɛ ɛ ma‑a dɔndɔ dɔndɔɛ an na. Chasi pɛn mbe a kɔɔ sɔ‑a. Mbɛ ɛ yɛ‑a to tima min na dunya chɛ ɔ, ɛ a ma‑a wan, a ta mɔɛ n bɛɛ ni an kɔɔ sɔ, a ka saya ɔ.

²⁴Chɛ gbakɔ, tima ɛ che‑a wan, dunya ban koe a. A tima chɛ a, Chasi ɛ kun‑da wan nyina n gbɛɛ ma, miin mbe sɔ tena nu. Ɛ kun‑da wan ya ɔ sɔɛ n ma, ni fen kɔ fen miin gbasa dunya chɛ ɔ. Ɛ a ma‑a wan fen kɔ fen ni yɛ, mmɔ Fa Yataa 'a mansaya kɔɔ.

²⁵Koe min na mu, ɛ ma‑a wan mansaya ɔ, aan Yataa ni kun chɛɛ ma nyɔɛ chɛ n gbɛɛ ma, mbɛ a‑a an si Chasi chen kɔɔ.

²⁶Chɛɛ ma nyɔɛ dankama, Yataa ɛ kun‑da min ma, an nɛ saya a.

²⁷Yataa‑a a fɔ wan a 'a gboo ɔ, a ɔ, a‑a a ma wan fen fen si‑a Chasi chen kɔɔ. Chɛɛ chɛ ma a ɔ yian ni, mbɛ ni a fɔ‑a, fen fen, mbɛ a wan Yataa wandi wɛɛ si‑a wan Chasi chen kɔɔ. Koe min na mu, a wan‑na a ma, fen fen si‑a Chasi chen kɔɔ.

²⁸Yataa ban‑da wan a ma‑a, mbɛ fenɛ n gbɛɛ don‑da Chasi 'a mansaya kɔɔ. Chɛ ɛ ma‑a kɛn, mbɛ a tima chɛ a gbɛ, Chasi wandi gbu, a wan denɛ, ɛ don‑da wan gbɛ a Fa 'a mansaya kɔɔ. A Fa Yataa, min‑na a ma, fenɛ n gbɛɛ si‑a Chasi chen kɔɔ. A sin, a wan Yataa 'a mansaya ɛ ma‑a wan fenɛ n gbɛɛ kun ma chɛndɛ chɛ.

²⁹Mbɛ mmɔ mmɔ yii na chii gbɛ bai chɛ ma. Mbɛ yii, ɛ chɛ wan mɔɛ n kunɛ ɔ Yataa chia a, miin mbe fɔɛ ɔ, mɔɛ chɛ n ko a miin faen mu. N ma a ɔ sɔn, ni an yii na tɛen mu fenɛ min ma, ko bonda chɛ ɛ min chɛ an ye. Mmɔ a ya, yɔ mbɛ tea gbu mu, a si bai chɛ ma mɔɛ dɔ n mbe min fɔ tena. Mbɛ mɔ ee i kɔɔ sɔ, a ka saya ɔ, ni i fa a. Ni chɛ mu tea an na, mbɛ yiimatɛ ee a ɔ, yii chɛ koe a mɔɛ n kunɛ ɔ Yataa chia a, mɔɛ n ko a miin faen mu.

³⁰Nn ta nan gbu, ni kɔɔ sɔ ee nɔ, a ka saya ɔ, mbɛ nn mbe ka nn fɔɛ ma tachɛ‑a gbama gbama an ko a.

³¹N suun ma nyɔɛ nu Chasi ɔ, tee ɔ tee a, n kaa ɔ kaen fan mu saya ko a. N mbe yonka tɛ wan wo wakoe ma, a si fɔɛ chɛ ma, mmɔ ɛ min dɔ. Mmɔ ɛ wan kuiɛ dɔndɔya ɔ, mmɔ bɛ mmɔ 'a mansa Chisɔsi Chasi a. An fɛ mu, n mbe chɛ fɔ tena den.

³²N‑na butuinɛ chɛ wan, Ɛfisɔsi duu ɔ, nn fea nyima soe a. N nii ma chɛ ma ni dechee, mɔgbuya ɔ koe an ko a. Chɛɛ tɔnɔnɛ kan kɔ kan mbe ee bɔ‑a chɛ ɔ, ni faa mɔɛ ee a kɔɔ sɔ, a ka saya ɔ. Mbɛ ɛ ma‑a wan dechee, yɔ an mbe a fɔ buɛ min dɔ, an dɔ, “Mmɔ ni daunɛ chɛ, mbɛ mmɔ‑a mmɔ min,” an dɔ, “koe min na mu, saya ɛ na tena wan sinan bɛɛ.”

³³Wo ma a ma mɔɛ n ni wo woo. An mbe a fɔ wan to, an dɔ, “Mmɔ dia nyɔɛ yama nu, an mbe a ma wan, mmɔ wɛɛ sɔnɛ ni yaua.”

³⁴Wo yiima chɛndɛ ni ma gbɛ wo baima, wo ni sɛmbɛ ko yama ma koe a kuɔ fɔ. N mbe chɛ fɔ tena den, mbɛ wo dɔ nu, wo ma ko ɔ ko sɔn, a si Yataa ma. Chɛ ni a ma wo ni mau.

³⁵Chɛɛ mɔɛ dɔndɔɛ ɛ to‑a wan, a ni a ɔ sɔn, ni mɔɛ miin faen mu, an mbe an kɔɔ sɔ‑a ka ma, a ka saya ɔ. Ɛ to‑a wan to a ɔ sɔn koe a, ni an‑na an kɔɔ sɔ, an mbe na‑a to dunya chɛ ɔ gboo min nyɔn sima ɔ.

³⁶Woo mɔ tisa an nɛ, e ka min chɛ‑a. Ni i‑a chin fenɛ chin duu gboo ɔ, ɛ tui pɛn, mbɛ a fɛn‑da gbɛ.

³⁷E chin fenɛ min fasi tena, chin fen kuu gbama mu.[11] E ee chin fen fɛnɛ wandi gbu an chin tena, min mbe danka koa‑a.

³⁸Chɛɛ Yataa wandi, an mbe gboo nama be‑a chin fen kuu chɛ ma, a toen mu min be koe a a ma. Gboo min ma bɛnden mu chin fen kuu kan kɔ kan ko a, ɛ an be‑a a ma.

³⁹A sin, fɔɛ fenɛ n gbɛɛ, an soe ee dɔndɔ. Mɔ gbu n ta soe, ɛ dama. Soe n ta ɛ dama, konde n bɛɛ ta ɛ dama, nyɛ n ta ɛ dama.

⁴⁰A sin to, fenɛ nu, miin mbe banda a, an ta ma buɛ ɛ wan nɔ. Fen chɛ n bɛɛ, miin mbe yii kɔɔ, an ta gboo n mbe wan nɔ. Fenɛ miin mbe banda a, an nyan buɛ ɛ dama. Fen chɛ n bɛɛ, miin mbe duu gboo ma, an nyan buɛ, a wɛɛ ɛ dama.

⁴¹Tee ta nyan buɛ ɛ dama, kau ta ɛ dama, tɔmbuaka n bɛɛ ta nyanɛ ɛ dama. Tɔmbuaka n dechee nan fan gbu wɛɛ, an 'na nyanɛ n ma bɔ ni an nyɔn na.

⁴²Mɔɛ miin bɛɛ fa‑a ka, an kɔɔ sɔ koe chɛ wɛɛ, a ka saya ɔ, ɛ ma‑a ka wan. Ni mɔɛ su tɔn‑da, ɛ tui wan. Chɛɛ ni Yataa‑a a ma, a‑a a kɔɔ sɔ, a ka saya ɔ, an gboo chɛ tana, a ee tui to kuɔ fɔ ko a.

⁴³Mɔ su ɛ ma tɔn‑da, baa ee ma to a ma. Chɛɛ a kɔɔ sɔ buɛ nan tana, a ka saya ɔ, baa ɛ ma wan a ma. Mɔɛ ɛ ma tɔn‑da, a su chɛ, gbasaya ee ma a boo ɔ. Chɛɛ a kɔɔ ɛ ma sɔ‑a, ɛ ma gbasaya an dɔ.

⁴⁴Mɔ gbu gboo min mbe tɔn, dunya ma gboo gbama mu. Chɛɛ a kɔɔ ɛ ma sɔ‑a, an gboo chɛ nɛnɛ tana, Yataa Nyina an mbe a be a ma. Mmɔ gbu sin‑na a ɔ sɔn fan, mbɛ dunya ma gboo ɛ wan nɔ. Chɛ ko a mu, gboo wɛɛ ɛ wan nɔ, Yataa Nyina ɛ min be.

⁴⁵A gbu sin, a nyɛnden mu ka wan Yataa 'a gboo ɔ, mbɛ mɔ kaima saa saa, min tɔ ni Adami, Yataa‑a fɔɛ be wan a ma. Mbɛ Adami dankama sin, a mu Yataa Nyina an na, min mbe fɔɛ be.

⁴⁶Chɛɛ mmɔ 'a dunya ma gboo pɛn mbe sɔ ya ɔ, mbɛ Yataa Nyina ɛ gboo min be, a na‑a a gbaa chia a.

⁴⁷Mɔ kaima saa saa chɛ, a bɔ‑a duu gboo an dɔ, a nyan‑da fifii ɔ. Mɔ kaima fean bɔɛ chɛ sin, a ka‑a banda bu ɔ wan.

⁴⁸A ni ka buɛ min dɔ fifii ɔ mɔɛ a, mɔɛ tɔɛ chɛ n gbɛɛ, miin bɔ‑a fifii ɔ, an mbe ka wan. A sin to, mɔ dɔndɔɛ mu buɛ min dɔ mɔɛ chɛ a, min ka‑a banda bu ɔ, chɛ n bɛɛ, miin mbe gbɛ banda bu ɔ ko a, an mbe ka wan.

⁴⁹Sanche, mmɔ bɔen mu ka buɛ min dɔ mɔɛ chɛ a, min bɔ‑a fifii ɔ, mmɔ ɛ na‑a bɔ‑a ka wan to mɔɛ chɛ wɛɛ a, min ka‑a banda bu ɔ.

⁵⁰N suun ma nyɔɛ nu Chasi ɔ, n toen mu wo ni chɛ ɔ sɔn. Mbɛ mɔ gbu e ma i gboo ɔ, wii ɛ i ɔ, e ee don Yataa 'a mansaya kɔɔ. N mbe baa a, fenɛ min mbe fa, a ni che ma‑a fenɛ a, min mbe ee fa.

⁵¹Wo wo too ma sɔ koe chɛ ma, tea chɛ, min dɔ nunden ni tee. Mmɔ gbɛɛ, mmɔ ee na‑a fa a. Chɛɛ mmɔ gbɛɛ, mmɔ ma ɛ fan‑da wan.

⁵²A tima chɛ a, ɛ na‑a ka wan, a ya kɔɔɛ a. Ɛ ma‑a bui chɛ an na, yɔ mɔɛ e i ya ma kai buɛ min dɔ kabu kabu. Koe min na mu, ni buu chɛ kuiɛ bɔ‑a, buu dankama nɛnɛ chɛ, faa mɔɛ n kɔɔ ɛ sɔ‑a wan, a ka saya ɔ. A sin, an mbe ee na‑a fa a to kuɔ fɔ ko a. A sin to, mmɔ gbɛɛ, mmɔ ma ɛ fan‑da wan.

⁵³Koe min na mu, mmɔ gboo chɛ, min mbe tui ka, ɛ fan‑da wan gboo a, min mbe ee fa a to, a ni tui.

⁵⁴Ni fenɛ min mbe fa, ɛ tui, a ma‑a gbɛ fenɛ a, min mbe ee fa, a ee tui, mbɛ bai chɛ ɛ bɔ‑a wan a a, min nyɛnden mu Yataa 'a gboo ɔ, a ɔ, “Kunɛ chɛ‑a saya ma, buɔdia kun tɛ‑a gbɛ.”

⁵⁵Yataa 'a gboo‑a a fɔ wan to, a ɔ, “Saya gbu, buɔdia ee to a boo ɔ. A yɛ to, saya 'a gbasaya ban‑da, kasaa chɛ koe a.”

⁵⁶Ko yama, mmɔ ɛ miin ma, an fan mbe gbasaya be saya ma, mmɔ kasaa koe a. Sawa sin, min be‑a Mosisi ma, an mbe gbasaya be ko yama ma.

⁵⁷Chɛɛ Yataa ni wai. A‑a buɔdia be mmɔ ma. Mmɔ 'a mansa Chisɔsi Chasi 'a gbasaya ɔ, Yataa‑a a ma mmɔ kun‑da saya ma.

⁵⁸Chɛ an fɛ mu, n faa ma suun ma nyɔɛ nu Chasi ɔ, wo sɔ gban wo 'a danaya ɔ. Wo ma ka wo gba ɔ, wo ma Mansa Chisɔsi 'a wai a tima ɔ tima ko a. Koe min na mu, wo‑a a ɔ sɔn fan, wai ɔ wai, wo e min chɛ‑a Mansa chɛ ko a, a ee ma wai gbama a.