Read Kono GBOO SAA KƆYINDI KO A 16 Bible Online

GBOO SAA KƆYINDI KO A 16 - Kono bible

GBOO SAA KƆYINDI KO A 16

¹N mbe chɛ an fɔ tena gbɛ wo ye, a si kɔpɔ kain koe chɛ ma, Yataa 'a mɔɛ n deman koe a, wo‑a gboo nyɛn a si min ma. Chɔchi chɛ nu pan Kadesia chɛnyɛ ɔ, n‑na an sɔ buɛ min dɔ chia ma, wo wɛɛ, wo a ma ka.

²Tɛnɛ kan kɔɔ dɔɛ kan kɔ kan ma, mɔ ɔ mɔ ni kɔpɔɛ ɛnden dɔ bɛn, a ni a sa tena ɔ bɛn. Mɔɛ ɛ kɔpɔɛ ma sɔn buɛ min dɔ, ɛ a boo ma sɛ ka wan, mbɛ a‑a a sa tena ɔ bɛn. Chɛ ɛ a ma‑a wan, n mbe a fo‑a nɔ tima min na, kɔpɔ ma kain mbe ee ma‑a to nɔ.

³N sin mbe a fo‑a kɛn, n mbe gboo be‑a wan mɔɛ chɛ n ma, wo‑a miin yian ma koe a wo 'a sɔ mɔɛ n na. N mbe wo boo fenɛ be‑a wan an ma, an ni ta a a Chuusaɛn duu ɔ.

⁴Ni a sin mbe nyan fan, n fandi gbu, n bɛɛ n ni ta, nn bɛ an na, nn mbe ta‑a wan.

⁵N mbe na‑a wan wo kɔndɔn‑da, ni n‑na Masidonia chɛnyɛ ɔ tandin, koe min na mu, n toen mu, n ni ben nɔ chia an na.

⁶N mbe na‑a tima ɛnden ya‑a wan wo tena. Chɛ ma, kɔkɔɛ mmɔ bɛ ɛ ma‑a wan, aan chima tima chɛ ni ban. A tima chɛ a gbɛ, wo e kun fan wo ni basan n ma, n 'na tachɛ ɔ, n ta koe a kaina dɔ mende, a ni ma kan kɔ kan na.

⁷N ma to ni, n ni na sanche, wo kɔndɔn‑da, min mbe ma dechee tima ɔ wuuma ko a. Ni Mansa Yataa dɔn‑da, n toen mu, n ni tima ɔ yansama ya wan nɔ, mmɔ bɛ ɛ.

⁸N mbe to‑a nɛ wan Ɛfisɔsi, aan tima min na, Pɛndekɔsi tee chɛ ni che.[12]

⁹Tima an nɛ n ko a nɛ, Chisian wai kɔkoo tima min na. Wai n fan nɛ, miin nyin an chɛ koe a, n chɛɛ ma nyɔɛ n kɔkoo wɛɛ ka boo ɔ boo.

¹⁰Ni Timoti che‑a wo ma, wo a ma wo ni a ɔ yian a a, mbɛ a che‑a ka a waa wan. Koe min na mu, ɛ ka Mansa Chisɔsi 'a wai an na, yɔ n mbe a a buɛ min dɔ.

¹¹Chɛ ko a, wo ma dɔn mɔ ɔ mɔ wo tɛ ɔ, a ni baa bɔ a ma. Chɛɛ wo ni basan a ma, a ni a 'a tachɛ a tun a ma, faachima ɔ. Chɛ ɛ a ma‑a wan, a ni yɛ to nɛ, n tena. Koe min na mu, n mbe ma tena wan, a ya ɔ fɛn‑da nɛ, an bɛ mmɔ suun ma nyɔɛ chɛ n na Chasi ɔ.

¹²Wo 'a gboo‑a min fɔ, a si mmɔ suun ma nyɔɛ ma Chasi ɔ, min mu Apɔdɔsi a, ka n mbe koɔ gbɛ a si a ma. N mbe a ma nande n faa gbɛɛ ɔ, a ta koe a wo kɔndɔn‑da, an bɛ mmɔ suun ma nyɔɛ dɔ n na Chasi ɔ. A bu ɔ nii ma di ɛnden bɛɛ a, na koe a nɔ sanche. Chɛɛ chɛ gbɛɛ ɔ, ni a‑a tima ma sɔn, ɛ na‑a wan nɔ.

¹³Wo ma bɛndenɛ ni ma, tima ɔ tima. Wo sɔ gban, wo 'a danaya ɔ, Chisɔsi Chasi a, wo sin ma chian. Wo ɔ ni gbɛa gbau.

¹⁴Wo e koe min gbɛɛ ma, wo a ma koadia faa a.

¹⁵N suun ma nyɔɛ nu Chasi ɔ, sanche chɛ ɔ, wo‑a a koe ɔ sɔn fan, a si Sitɛfanasi ma, ni a 'a chen na mɔɛ nu. An fan pɛn‑na an kai fa Chisɔsi Chasi a, Akaya chɛnyɛ chɛ ɔ. A sin, an‑na an fandi be, wai chɛ koe a, Yataa 'a mɔɛ n ko a. N mbe chɛ ma din wo tena,

¹⁶wo ni don ya ɔ sɔɛ sima chɛ n kɔɔ. Wo gbu ni don mɔ ɔ mɔ kan kɔ kan kɔɔ, miin mbe wai chɛ chɛ tena.

¹⁷N bu ɔ di kaka, Sitɛfanasi na koe a, an fea Fɔtunatɔsi a, ni Akaikɔsi. Wo ee nɛ chɛ, an fan yɛ‑a ka wo gba ɔ.

¹⁸Chɛ‑a a ma wan, n faa chima‑a, yɔ wo ta wɛɛ ɛ ma buɛ min dɔ. A nyin wo ni baa be mɔ bonda chɛ n ma chɛndɛ chɛ.

¹⁹Chɔchi mɔɛ miin mbe Esia chɛnyɛ chɛ ɔ, an ni wo kɔndɔn. Akuida wɛɛ, an fea a 'a musu Pisida a, an‑na wo kɔndɔn. Mɔɛ chɛ n bɛɛ, miin mbe bɛn an 'na chenɛ a, an bɛɛ‑a wo kɔndɔn, buɔdia kɔndɔnɛ a.

²⁰Mmɔ suun ma nyɔɛ n gbɛɛ Chasi ɔ, an mbe wo kɔndɔn tena. Wo wɛɛ, ni wo bɛn‑da, mbɛ wo‑a wo nyɔn kɔndɔn koadia faa a.

²¹N fandi gbu, n fan Pɔɔ, n fan mbe ka gboo chɛ nyɛn‑da, n ni wo kɔndɔn.

²²Mɔ ɔ mɔ, Mansa Chisɔsi ko a ee dia min ye, danka ni ma a fɛ. Mansa Chisɔsi, na wɛ nn ye.

²³Mansa Chisɔsi Chasi ni wo dua.

²⁴Chisɔsi Chasi 'a gbasaya ɔ, n 'na koadia ni ma wo gbɛɛ fɛ.