Read Kono GBOO SAA KƆYINDI KO A 2 Bible Online

GBOO SAA KƆYINDI KO A 2 - Kono bible

GBOO SAA KƆYINDI KO A 2

¹N suun ma nyɔɛ nu Chasi ɔ, n na‑a na wan wo tena. Chɛɛ n nii ma na ni daɔdia an na, Yataa na‑a koe min nun tee, a ɔ yian koe a wo a.[1] N sin nii ma a ya ni, mbɛ n yiima tɛen ni.

²Koe min na mu, tima min na n ni wo tɛ ɔ, ko dɔ gbɛɛ kan kɔ kan nii n yii ma wo kan koe a. Min ni dechee n yiima ɔ, an nɛ min sien mu Chisɔsi Chasi ma, a‑a saya min chɛ kɔn gbengbandenɛ ma.

³Chɛ an‑na a fɔ, mmɔ bɛ ni kɛn, n gboo ɔ nii ma gbɛa nin bɛ. A yɛ to, chianɛ ni wan n dɔ, a basan ma samba a.

⁴A sin, n da a bai nu, daɔdia nii ma, yiimatɛ ɔ yian koe a. Chɛɛ n ni sakana bai miin dɔ yian, an ni a ɔ yian fan, mbɛ Yataa Nyina an ni n fɛ, an wai chɛ n chɛ‑a.

⁵Chɛ ni a ma, wo ma wo kai fa mɔ gbu 'a yiimatɛ a. Chɛɛ wo ni wo kai fa Yataa 'a gbasaya an na.

⁶Chɛɛ chɛ gbɛɛ ɔ, nn mbe sakana bai min sa ka, yiimatɛ ɛ wan a ɔ, chɛ n tena, miin kai faen mu Chasi a chɛndɛ chɛ. Mɔɛ miin mbe dunya chɛ ɔ, an 'na yiimatɛ ma. Gbasaya ɛ miin boo ɔ dunya chɛ ɔ, an ta ɔ ma, an 'na gbasaya min mbe ka gbɛ che‑a a danka a.

⁷Nn mbe bai sa wo tena, a si yiimatɛ an ma, Yataa‑a miin nun tee. A e na to dunya a dan‑da, a‑a a fɔ wan, mbɛ an yiimatɛ chɛ, an mbe na‑a basɔmaya a mmɔ tena.

⁸Yiimatɛ an nɛ, min nii an mɔɛ chɛ n dɔndɔ wɛɛ ɔ, mɔɛ chɛ n gbɛɛ, gbasaya ɛ miin boo ɔ dunya chɛ ɔ. Koe min na mu, a ni ma‑a an dɔ, an nii Mansa Chisɔsi fa‑a kɔn gbengbandenɛ ma, a wɛn mbe si ɔ a 'a gbasaya ɔ.

⁹Chɛɛ min maen mu, ɛ ka wan dechee yɔ min nyɛnden mu Yataa 'a gboo ɔ. A ɔ, mɔ ɔ mɔ ma koe chɛ n dɔ yen nin bɛ, a ya a, a ɔ, a ma an na min ni, a too a, a ɔ, mɔ ɔ mɔ sin ma an dɔ gbɛ ni, a yiima ɔ. A ɔ, koe chɛ nu, Yataa‑a min sa tena ɔ bɛn mɔɛ n ko a, a ɔ, miin toen mu a a.

¹⁰Chɛɛ Yataa‑a koe chɛ n dɔ yian mmɔ a, a Nyina 'a gbasaya an dɔ, a‑a min na na mmɔ tena. Koe min na mu, Yataa Nyina chɛ ɛ ko ɔ ko kɔɔ gbɛngbɛn fan, a ni ma Yataa yii ma koe wɛɛ a.

¹¹Mɔ gbu yii ma koe chɛndɛ wɛɛ gbu, mɔ dɔ gbɛɛ ee a sɔn, fɔ a wandi dɔndɔ gbe dechee. Yataa Nyina wɛɛ ɛ ka wan, a dɔndɔ gbe an mbe ko ɔ ko ɔ sɔn, a si Yataa ma.

¹²An Nyina chɛ mu, mmɔ‑a min ma sɔn, a ka Yataa tena. Chɛɛ mmɔ ma chɛ an ma sɔn ni, min mbe dunya chɛ ɔ. Mmɔ ni kun gbɛ, mmɔ ni a ɔ gbɛ, Yataa‑a koe min chɛ mmɔ ye.

¹³An fɛ mu, nn mbe bai chɛ n fan fɔ mɔ dɔ gbɛɛ ye. N sin mbe ee a fɔ an ye, daɔdia bai n fan dɔ, yɔ mɔɛ n mbe an yii na chii miin na, mɔɛ n kan koe a. Chɛɛ nn mbe min ma, nn mbe bai n fan sa, Yataa Nyina ɛ min don nn da ɔ, an sa koe a. Nn mbe Yataa Nyina ta bai ɔ yian, a wandi ta bai an na, ɛ min fɔ nn ye.

¹⁴Chɛɛ mɔɛ nu, Yataa Nyina ee miin fɛ, an mbe ee dɔn, an ni an boo si fen chɛ n kɔɔ, Yataa Nyina ɛ miin be. Koe min na mu, an mbe an ya wooya fenɛ n fan na. An mbe ee che an dɔ gbɛ‑a. Koe min na mu, Yataa Nyina dechee, an mbe a ma, mɔɛ n ni koe n dɔ gbɛ miin ka‑a Yataa tena.

¹⁵Chɛɛ Yataa Nyina ɛ mɔɛ min fɛ, ɛ kun fan a ni ko ɔ ko ɔ gbɛ, a si ko ɔ ko ma. Chɛɛ a sin, mɔ ɔ mɔ ee kun a ni a wandi gbu wakoe ɔ gbɛ.

¹⁶Tea an nɛ, koe min na mu, a nyɛnden fan mu Yataa 'a gboo ɔ, mbɛ mɔ ɔ mɔ ee Yataa Mansa yii ma koe ɔ sɔn, mɔ ɔ mɔ ee a sɔ chia ma. Chɛ wɛɛ ni ma, mmɔ wɛn, Yataa Nyina 'a gbasaya ɛ mmɔ ɔ, Chasi 'a yiinachii ɛ wan mmɔ ɔ.