Read Kono GBOO SAA KƆYINDI KO A 3 Bible Online

GBOO SAA KƆYINDI KO A 3 - Kono bible

GBOO SAA KƆYINDI KO A 3

¹N suun ma nyɔɛ nu Chisɔsi ɔ, mmɔ bɛ ni tima min na, n fandi gbu nii ma koɔ ni wo tena, yɔ Yataa Nyina ɛ mɔɛ miin fɛ. Chɛɛ n na‑a wo ya wan yɔ mɔɛ nu, miin mbe bea an ta faa ma koe n fɛ. Wo e wan dechee yɔ den toa nu, miin mbe ka dechee a kuu sɔ‑a an kai fa koe a Chisɔsi Chasi a.

²N ni ma wo kan‑da, n ni wo da kɔ tee susu yii an na, n nii daun fen dɔ gbɛama be wo ma. Koe min na mu, wo ma nii ma bɛn nin bɛ daun fen dɔ gbɛama ko a. Tea gbu ko a, wo gbu sin ma ma bɛn nin bɛ a ko a sanche wɛɛ.

³Koe min na mu, wo mu tun mɔɛ n fan na, miin faa ma koe n benden mu an ma. Toomaya ɛ wo tɛ ɔ, a basan koɛ a. Chɛ ɛ a ɔ yian fan, mbɛ wo e koe ma tena wan yɔ mɔɛ nu, miin mbe ee Yataa chia ma.

⁴Koe min na mu, wo dɔ n mbe a fɔ tena wan, mbɛ wo e n fan Pɔɔ an ko a. Mbɛ dɔ n sin dɔ, an mbe Apɔdɔsi an ko a. Ni wo ma‑a chɛ ma‑a, wo e ma‑a ka koe ma‑a na yɔ mɔɛ nu, miin mbe ee Yataa chia ma.

⁵Chɛɛ n fan Pɔɔ, n ma mɔ a, Apɔdɔsi wɛɛ ma mɔ ɔ mɔ a. Min sin sien mu nn ma, Yataa 'a yɔnɛ gbama mu nn na, miin‑na a ma, wo dan‑da Chisɔsi Chasi a. Mansa Yataa‑a nn sɔ wai chɛ‑a buɛ min dɔ, nn‑na a chɛ ka wan.

⁶N fan‑na wai chɛ kuu sɔ, mbɛ Apɔdɔsi‑a toa si a kɔɔ. Chɛɛ Yataa wandi gbu an‑na a ma, a ta‑a ya ɔ ma.

⁷Chɛ an fɛ mu, mɔɛ min mbe chin fenɛ chin‑da, a ma wai chɛ ni, an fea mɔɛ chɛ a, min bɛɛ ɛ yii chɛ‑a a ma. Chɛɛ Yataa, min mbe a ma chin fen chɛ, ɛ koa, a ta wai an koo.

⁸Mɔɛ min mbe chin fenɛ chin, an fea mɔɛ chɛ a, min mbe yii chɛ a ma, an mbe wai dɔndɔɛ an chɛ. Yataa ɛ an fea gbɛɛ pawa‑a wan, yɔ an‑na wai chɛ buɛ min dɔ.

⁹Koe min na mu, nn mbe wai chɛ tena Yataa an ko a. Wo sin, wo e wan yɔ wo e a 'a yadi ɔ wan. A yɛ to, wo e wan bɛɛ yɔ a 'a chen sɔenɛ.

¹⁰N 'na wai maen fan ni, yɔ chen sɔ mɔ wa. N fan‑na chenɛ chɛ kuu si. Yataa an‑na mɔnɛ chɛ be n ma. Mbɛ mɔ dɔ mende sin mbe ta‑a chen chɛ sɔɛ a ya ɔ ma. An fɛ mu, mɔ ɔ mɔ ni tima ya, chen chɛ sɔ buɛ a.

¹¹Koe min na mu, mɔ ɔ mɔ ee an chen chɛ kuu sɔ, ni a ma a kuu si ni Chisɔsi Chasi a.

¹²Chɛɛ mɔ ɔ mɔ‑a fen sɛsɛ ya wan, chen chɛ sɔ koe a. Mɔɛ n‑na sanu ya wan, an‑na kain gbɛ ya, a basan sen baa gbɛama a. Mɔɛ dɔ n‑na kɔnɛ ya wan, an‑na nyanda ya, a basan nungbu a.

¹³Chɛɛ mɔ ɔ mɔ ta wai chɛ buɛ, ɛ bɔ‑a wan ya a ma, kaa a tɛ tee chɛ ma. A sin, ta an mbe a ɔ yian‑da, mɔ ɔ mɔ kan kɔ kan‑na a ta wai min chɛ.

¹⁴Ni a‑a chenɛ min sɔ, ni a sɔ‑a chidi, ɛ a 'a pawa ma sɔn‑da wan.

¹⁵Chɛɛ ni a minda‑a, ɛ fo‑a wan fen kɔ fen na. A wandi kunɛ ɛ bɔ‑a wan a ɔ, yɔ mɔɛ min ma chɛ chɛ‑a ta manɛ boo ɔ.

¹⁶Wo gbu sin‑na a ɔ sɔn fan, mbɛ wo gbɛɛ mu Yataa 'a chenɛ an na. A sin, Yataa Nyina ɛ wan wo tɛ ɔ.

¹⁷Chɛ ko a, mɔ ɔ mɔ min mbe na‑a kasaa a Yataa 'a chenɛ a, Yataa wɛɛ, ɛ a mɔɛ chɛ kasaa‑a wan. A mu min na, Yataa 'a chenɛ ɛ tenchen a wandi an ko a. Wo sin fan mu an chen chɛ a.

¹⁸Mɔ ɔ mɔ ma a wandi woo. Wo dɔndɔ wɛɛ ma a wandi ya yiimatɛ tɔ wa a, dunya chɛ ta chia a. Wo wo wandi woo mɔ a bɔɛ chɛ pɛn, min mbe a ma, wo ni ma yiimatɛ tɔ wa an na, Yataa ta chia a.

¹⁹Koe min na mu, dunya chɛ ɔ yiimatɛ, a mu wooya koe an na Yataa tena. A 'a gboo‑a a fɔ wan, a ɔ, “Yataa ɛ yiimatɛ tɔ wa an bia, an 'na yaa wa an fan dɔ.”

²⁰Yataa 'a gboo chɛ‑a a fɔ wan to, a ɔ, “Mansa Yataa‑a a ɔ sɔn fan, mbɛ koe miin mbe yiimatɛ tɔɛ n yii ma dunya chɛ ɔ, wooya koe nu mu.”

²¹Chɛ an fɛ mu, mɔ ɔ mɔ ma yonka tɛ, a si ma koe ma mɔ dɔ mende fɛ mɔɛ a. Yataa ban‑da fen fen ma‑a wo ta a.

²²Pɔɔ ni ma, Apɔdɔsi, ni Pita,[2] an mbe wo wan ko a. Dunya chɛ wɛɛ, fɔɛ chɛ, saya, fenɛ miin mbe sanche, ni miin mbe kɔkɔɛ ya ɔ ma, an gbɛɛ, an mbe wo wan ko a.

²³Wo sin mbe Chisɔsi Chasi an ko a, a wɛɛ sin mbe Yataa ko a.