Read Kono GBOO SAA KƆYINDI KO A 4 Bible Online

GBOO SAA KƆYINDI KO A 4 - Kono bible

GBOO SAA KƆYINDI KO A 4

¹Chɛ ko a, wo nn ya, mbɛ bɔi denɛ mu nn na, Chasi ko a. Nn‑na ko sɛsɛ ɔ sɔn fan, a si Yataa ma, mɔ dɔ gbɛɛ ma min dɔ sɔn. Nn sin fan yaen mu, a ɔ yian koe a mɔɛ n na.

²A yɛ to, bɔi den kan kɔ kan gbu sin, a dinden fan mu a ma, wai chɛ koe a danaya ɔ.

³Ni n fan ko a mu, n ma n gbɔsɔ ni, ni wo wan‑na n gbɛmbo, chɛ ma, ni mansa nu mu kuti ɔ. N mbe ee kun n ni kaa a tɛ n fandi wakoe ma.

⁴N yiima a koenɛ mu fion. Chɛ ma a yian ni, mbɛ ko yama ma mɔ ma n na. Mansa Chisɔsi dɔndɔ gbe an mbe kaa a tɛ, a si n ma.

⁵Chɛ an fɛ mu, wo ma a a gbandia, kaa a tɛ koe a mɔ ɔ mɔ ma, tima ya ɔ, Mansa Chisɔsi e na to na‑a. A wan mbe koe n na bɔ‑a ya a ma, miin mbe nun dɔ, ni koe nu miin mbe mmɔ faa ɔ. A sin, tando min nyin, Yataa ɛ a be‑a wan mɔ ɔ mɔ ma, a be koe nyin mɔɛ miin ma.

⁶N suun ma nyɔɛ nu Chasi ɔ, n‑na nn fandi ya tɔmɔsi a, nn fea Apɔdɔsi a, wo 'a tɔnɔnɛ an ko a. Chɛ ni a ma, Yataa 'a gboo‑a min fɔ, wo ma na tandin a ɔ. Wo ma na yonka tɛ, mɔɛ dɔndɔɛ wakoe ma, mbɛ wo tɛ‑a dɔndɔɛ sin dɔ.

⁷Wo ta mɔgbuya, a a ma sɛ ni, a ni ben mɔ ɔ mɔ ta ma ɛnden bɛɛ a. Fen kɔ fen min mbe wo boo ɔ, Yataa an‑na a be wo ma. Ni wo‑a an ma sɔn Yataa an na, tea kan kɔ kan mbe ee wo boo ɔ, yonka tɛ koe a, yɔ wo ma an ma sɔn ni an na gbama a.

⁸Wo tana, ɛ wo yii ma, Chisian fɔɛ chɛ ɔ, mbɛ wo ban‑da gbɛ wo faa ma fenɛ n gbɛɛ ma sɔn‑da. Mbɛ wo ban‑da gbɛ nyan‑da, Yataa chia a. A yɛ to, mbɛ wo ban‑da ma‑a mansa wa n na, nn tana, nn to‑a. Yataa ni a ma, wo ni ma mansa wa n na, min mbe a ma, mmɔ gbɛɛ ni ma an mansaya chɛ ɔ dɔndɔ a.

⁹Chɛɛ n ta yiinachii ɔ, mansa ma nn na. Nn fan, Chasi 'a sɔ mɔɛ chɛ nu, nn maen fan mu yɔ mɔɛ nu, Yataa‑a miin ma yii, ma yii dankama a. Nn mbe wan yɔ mɔɛ nu, ya ɔ sɔɛ n mbe ta miin na, an mbe an fa mɔɛ gbɛɛ ya kɔɔ. Ɛ ka wan, koe min na mu, mɔɛ gbɛɛ ya an mbe nn na. Mɔ gbu n bɛ maeka n na, an ya an mbe nn na, kɔ an ni a ɔ yen, koe min mbe ma‑a nn na.

¹⁰Nn tana, mɔɛ n mbe nn ya woo mɔɛ n fan na, wai chɛ koe a Chasi ko a. Chɛɛ wo tana, wo e wo wandi ya yiimatɛ tɔ wa n fan na, koe min na mu, mɔ dɔndɔɛ mu wo a, wo bɛ Chisɔsi Chasi a. Mɔɛ n mbe nn ya, mbɛ gbasaya ee nn boo ɔ, wo sin tana, wo‑a wo wandi ya, mbɛ ɛ wan wo boo ɔ. Wo e baa be wan wo wandi ma, chɛɛ nn tana, mɔ ɔ mɔ ee baa be nn ma.

¹¹A sɔ sanche ma, nn mbe ee daun chɛ tima dɔ a, nn sin kanɛ a ɛ gbaa wan. Nn ma chiienɛ ɛ koa taa an na, nn mbe ee si kaina dɔndɔ, nn sin mbe gbasi ɔ yen ka wan.

¹²Nn mbe wai chɛ wan, nn sɔɛ a, nn boo n na, nn da a daun fenɛ ma sɔn koe a. Ni an‑na nn main, nn mbe dua wan an ko a. Ni an‑na ko yawaenɛ sa nn ma, nn mbe nn faa bia wan.

¹³Ni an‑na nn ma yaua, nn mbe bai chɛndɛ an sa, a si an ma. Sanche wɛɛ, an mbe nn bia yɔ bubuu, an‑na nn ya mɔ gbu tɔɛ a banɛ n na, dunya chɛ ɔ.

¹⁴N ma gboo chɛ nyɛn ni wo tena, wo a mau koe an na. Chɛɛ n‑na a nyɛn wo tena, n ni wo sɔ chia ma, yɔ n faa ma denɛ nu.

¹⁵Wo kan mɔɛ n ni ma wu sɛsɛ wɛɛ, ni wo ma‑a mɔ dɔndɔɛ a, wo bɛ Chasi a, wo fa ɛ dɔndɔ gbe. Koe min‑na a ma, n ma‑a wo fa a, an nɛ sakana bai chɛndɛ chɛ a, a si Chisɔsi ma, n na‑a min na wo tena.

¹⁶Chɛ an fɛ mu, wo dimu, wo sɔ n chen gba ɔ, wo ni tachɛ Yataa a, yɔ n mbe a ma tena buɛ min dɔ.

¹⁷Chɛ gbu an fɛ mu, n mbe Timoti sɔ tena wo tena. Mɔɛ mu a a, mɔɛ ɛ che i yii sɔ‑a min ma gbau gbau, wai chɛ koe a Chisɔsi Chasi ko a. N 'na denɛ mu gbɛ a a, n toen mu min na kaka. Ɛ a ma‑a wan wo ee nyina‑a koe n ma, n mbe bea tena miin fɛ, n 'na fɔɛ ɔ, Chisɔsi 'a sɔmɔya ɔ. N ni mɔɛ n kan ko dɔndɔ gbe chɛ n fan na, chɔchi kan kɔ kan dɔ, n ni ta miin dɔ.

¹⁸Ɛ wo dɔ n yii ma, mbɛ n mbe ee na tena to wo tena. A sin, chɛ bun‑da a ma‑a, wo bun‑da dɔpanda bɔ‑a.

¹⁹Chɛɛ ni Mansa Yataa dɔn‑da, n mbe na tena wo tena sanche. A tima chɛ a gbɛ, n mbe a ɔ yen‑da wan, dɔpanda tɔɛ chɛ n mbe che koe min ma‑a, a fɔ koe ma dechee.

²⁰Koe min na mu, Yataa 'a mansaya wakoe, a ee dechee mɔ da an dɔ, chɛɛ a gbasaya gbu ɛ ma wan nɔ.

²¹Ni n na‑a tima min na, wo wandi an mbe wo faa ma ya a gbɛ. Ni n mbe sɔnkɔ wan wo ma, n ni wo a tɔɔya. Chɛ ma, ni n mbe koadia an dɔ yian wo a, mbɛ n‑na wo bia chɛndɛ chɛ.