Read Kono GBOO SAA KƆYINDI KO A 6 Bible Online

GBOO SAA KƆYINDI KO A 6 - Kono bible

GBOO SAA KƆYINDI KO A 6

¹Ka n mbe chɛ wɛɛ fɔ wo ye. Tea ee ma‑a wo boo ɔ, ta koe a wo bɔɛ chɔchi mɔɛ a, kuti ɔ, ni koɛ ma‑a wo tɛ. Ni wo‑a chɛ ma, wo e ma‑a ka ta‑a a mɔɛ chɛ a Yataa sɔn bai n fan chen kɔɔ. Chɛɛ wo e min ma, wo a sa chɔchi ɔ mɔɛ dɔ n chen kɔɔ, an ni a sa Yataa chia a.

²Wo gbu ni a ɔ sɔn, mbɛ mɔɛ miin mbe chɔchi ɔ, an fan mbe na‑a kaa a tɛ‑a, a si mɔɛ n gbɛɛ ma dunya ɔ. Ni wo sin fan mbe na tena chɛ ma‑a, wo ee che wo ni tɛ wo wandi ɔ sanche, kaa a tɛ koe a tataya bai n ma.

³Wo gbu sin ni a ɔ sɔn to, mbɛ mmɔ wan mbe na tena kaa a tɛ‑a, maeka n bɛɛ wakoe ma. Chɛ gbu ko a, wo e che wan, wo ni tataya bai n sa wo nyɔn tɛ, nɛ dunya ma.

⁴Chɛ an fɛ mu, ni bai bonda chɛ n ma‑a wo tɛ ɔ, wo ma ta a a mɔɛ tena, min mbe ee chɔchi ɔ, baa ni ma a ma boo ɔ boo. Chɛɛ wo ta a chɔchi ɔ, mɔɛ chɛ tena, baa sima wɛɛ ee min ma, a ni a sa.[4]

⁵Bai chɛ ma mauen mu, wo ko a. Mɔ dɔndɔ gbe gbu wɛɛ, ɛ wan nɔ wo tɛ ɔ, min yiima tɛen mu, bai sa koe a, wo dechee tɛ ɔ chɔchi ɔ.

⁶Chɛɛ wo suun ma nyɔn dechee dechee nu Chasi ɔ, wo wan mbe ta wo nyɔn na, kuti ɔ. Wo e ta mɔɛ chɛ n chen kɔɔ, miin ma an kai fa ni Chisɔsi a, wo 'a bai sa koe a.

⁷Siibia bonda chɛ chɛ koe wo boo ɔ gbu, a ɔ yiandenɛ an nɛ, mbɛ wo bea‑a fo. A fisa wɛɛ, wo ni an baamaya an dɔ bia. A fisa wɛɛ to, wo bɔɛ n ni wo boo fenɛ n ma kafaya.

⁸Chɛɛ wo e min ma, wo wandi gbu an mbe wo nyɔn kafa, wo e baa wo nyɔn ma. Wo suun ma nyɔɛ nu Chasi ɔ, wo e chɛ n ma an nan fan bɛɛ a.

⁹Wo‑a a ɔ sɔn fan pɛnɛnɛ, mbɛ mɔɛ chɛ n mbe ee don Yataa 'a mansaya kɔɔ, mɔɛ miin mbe ko yama ma. Wo ma wo wandi woo. An mɔɛ chɛ n fan nɛ, miin mbe waa yama ma basanɛ a, ni miin mbe fɛnɛ n fai miin ma Yataa a. Chɛ ma, miin mbe waa ma basan an bɔ kai n na, an bɛ chɛ n na, miin mbe waa ma basan an bɔɛ n ta si nyɔɛ n na.

¹⁰N mbe ee a fɔ, chɛ n bɛɛ, miin mbe kanka chɛ, ni miin fen ko yaen mu kaka. A yɛ to, gbɛ min mɔ wa an bɛɛ, ni miin mbe tɔ ɔ tɛ yama chɛ, an bɛ kafa tɔɛ n na. An dɔndɔ wɛɛ ee don‑da Yataa 'a mansaya kɔɔ.

¹¹Wo dɔ n ni ka wan tee. Chɛɛ sanche gbɛ, wo ko‑a fo, wo 'a ko yama n boo ɔ. Wo ma‑a tenchen Yataa ko a. Yataa‑a wo ya mɔ tandenɛ n na, a chen kɔɔ, Mansa Chisɔsi Chasi 'a gbasaya ɔ, an fea Yataa Nyina a.

¹²Wo dɔ n mbe a fɔ wan, wo ɔ, “Kɔn mbe ee sa ɔ n ya ɔ, ko ɔ ko ma koe a.” Chɛɛ wo koe gbɛɛ ma, min nyin a ma koe a wo boo ɔ. Wo ɔ te to, wo ɔ, “Kɔn mbe ee sa ɔ n ya ɔ, ko ɔ ko ma koe a.” Chɛɛ n mbe ee dɔn‑da, n ni ma yɔnɛ a koe n boo ɔ, n mbe miin ma.

¹³Wo dɔ n sin mbe a fɔ, wo ɔ, “Daun fenɛ ɛ bu an ko a,” wo ɔ, “bu wɛɛ ɛ daun fenɛ ko a.” A gbu sin mbe ka wan. Chɛɛ tee dɔndɔ a, Yataa ɛ a ma‑a wan, an fea gbɛɛ ee ma‑a to nɔ. Wo gboo ee nɔ, min mbe a ma, wo ni koe tɛ. Chɛɛ wo tachɛ koe mu Chisɔsi ko a, mbɛ wo gboo kɔ koe sin, a ma‑a Mansa Chisɔsi wɛɛ ma.

¹⁴Yataa‑a Mansa Chisɔsi kɔɔ sɔ wan, a ka saya ɔ. A sin mbe a ma‑a ka wan, mmɔ wɛɛ ni mmɔ kɔɔ sɔ, a ka saya ɔ, a 'a gbasaya dɔndɔ gbe chɛ ɔ.

¹⁵Wo gbu ni a ɔ sɔn, mbɛ wo gboo mu Chasi wandi sɔna n fan na. Mɔɛ sin mbe ee a gboo ya, min mu Chasi ta a, a ni a a tun ko tɛ mɔɛ ta a. Chɛ ee ma ɛnden bɛɛ a.

¹⁶Wo ni a ɔ sɔn, mbɛ mɔɛ min mbe a gboo be‑a ko tɛ musu ma, mbɛ an fea ma‑a mɔ dɔndɔɛ a. A nyɛnden mu den Yataa 'a gboo ɔ, mbɛ an fea ma‑a mɔ dɔndɔɛ a.

¹⁷Chɛɛ mɔɛ min ma‑a mɔ dɔndɔɛ a, an fea Mansa Chisɔsi a, a Nyina an mbe ma an mɔɛ chɛ fɛ.

¹⁸Wo wo boo bɔ waa ma basan ko yama kan kɔ kan dɔ. Koe min na mu, ko yama kan kɔ kan, mmɔ ɛ min ma, a ee mmɔ gboo tɔɔ. Chɛɛ mɔɛ min mbe koe tɛ, a‑a ko yama si a wandi gboo a.

¹⁹Wo ni a ɔ sɔn, mbɛ wo gboo mu Yataa Nyina 'a chenɛ n fan na, miin mbe tenchen a ko a. Yataa an‑na an Nyina chɛ be wo ma, an ni ma wo fɛ. Wo ee wo wandi an ko a, chɛɛ wo e Yataa an ko a.

²⁰Yataa‑a wo sɔnkɔɛ bɔ wan. Chɛ ko a, wo wo gboo bia chia an na, min mbe na tando a a tena.