Read Kono GBOO SAA KƆYINDI KO A 7 Bible Online

GBOO SAA KƆYINDI KO A 7 - Kono bible

GBOO SAA KƆYINDI KO A 7

¹N mbe na tena gbɛ n da tu‑a koe chɛ n na, wo‑a miin nyɛn wo 'a gboo ɔ. N dɔnden fan mu a ma, mbɛ a nyin ni mɔ ma tu ni musu a.[5]

²Chɛɛ mɔ sɛsɛ ɛ waa ma basan ko yama ma wan. Chɛ an fɛ mu, a nyin kai kan kɔ kan ni a ta musu ma sɔn, musu kan kɔ kan bɛɛ.

³Mɔ kaima min sin mbe musu fuu‑a, a ni ko ɔ ko chɛ musu si kai, ɛ min chɛ a 'a musu ye. Fuu musu wɛɛ ni ko ɔ ko chɛ, kai sɔn musu ɛ min chɛ, a chɛɛ ye. Mɔɛ ɛ i bɔɛ faa ma koe an ma.

⁴Gbasaya kan kɔ kan mbe ee musu boo ɔ, a gboo kun ma. Gbasaya chɛ ɛ a chɛɛ an boo ɔ. Mɔ kaima wɛɛ ɛ ka wan. Gbasaya ɛ a 'a musu an boo ɔ, a gboo kun ma.

⁵Wo ma ban waa ma basan koe a, wo nyɔn na. Fɔ ni a ma‑a wo 'a dɔbɛnɛ an na, a ma koe a ka, tima kundu ɛnden ko a. Chɛ ni a ma, wo ni tima ya samun chɛ koe a. Chɛɛ chɛ gbakɔ wɛɛ, wo yɛ to wo gba ɔ, fuu ta chia a. Ni wo‑a chɛ ma, wo e na‑a bɔ‑a wan Sitana 'a dɔsimanɛ boo ɔ. Koe min na mu, wo ee na‑a kun‑da wo ni wo wandi kun ma fɛn.

⁶N mbe chɛ fɔ tena wo ye, gbasaya an kɔɔ ma. Chɛɛ a ɔ yian koe mu wo a, wo e min ma.

⁷A ni ma‑a wan buɔdia a, ni wo ni wan yɔ n mbe buɛ min dɔ. Chɛɛ Yataa ɛ mɔ ɔ mɔ kɔ wan, a ta chia a. Ɛ mɔɛ dɔndɔɛ kɔ chia chɛ a, mbɛ a‑a dɔndɔɛ kɔ chia dɔ mende a.

⁸N mbe dasi chɛ an be tena gbɛ fuinya n ma. A nyin an ni ma an 'na dɔndɔ gbeya chɛ ɔ, yɔ n fan.

⁹Chɛɛ ni wo ee che wo wandi bia‑a a chia a a, mbɛ wo dɛ fuu ɔ. Koe min na mu, a nyin mɔ ni ma fuu ɔ, a ben dunya ma koe ben koe ma mɔɛ ɔ.

¹⁰Wo wɛn mbe fuu ɔ, sawa chɛ an mbe n boo ɔ wo ko a. Musu ma a chɛɛ boo ka. N fan ma sawa chɛ sa ni, chɛɛ Mansa Chisɔsi mu.

¹¹Chɛɛ ni musu‑a a chɛɛ boo ka, a ma kai dɔ gbɛɛ sɔn to. Ni chɛ ma, a ni yɛ a chɛɛ tena, an 'na bai ni ban. Mɔ kaima nan fan bɛɛ ma a 'a musu boo ka.

¹²Ka n mbe chɛ fɔ gbɛ mɔɛ tɔɛ chɛ n sin ye. (N fandi an mbe chɛ fɔ tena, Mansa Chisɔsi an ma a don ni n da ɔ.) Mbɛ mɔ kaima min mu Chisianɛ a, ni a 'a musu sin ma Chisian na, kai chɛ ma a boo ka chɛ ko a. Ni an musu chɛ dɔnden fan mu, an ni ma tun an si chɛ ɔ.

¹³Ni musu wɛɛ mu Chisianɛ a, a chɛɛ sin ma a, a wɛɛ ma a boo ka chɛ ko a. Ni a chɛɛ chɛ dɔnden fan mu tun, an ni ma an si chɛ ɔ.

¹⁴Koe min na mu, mɔɛ min ma Chisianɛ a, ni a‑a musu fuu min mu Chisianɛ a, an fea chɛ ma‑a mɔ dɔndɔɛ a. Mɔ kaima chɛ, min ma ka Chisianɛ a, Yataa ɛ a ya wan yɔ a ta. Musu wɛɛ ɛ ka wan, ni a ma Chisianɛ a, chɛɛ a fuu kai mu Chisianɛ a, an bɛɛ ma‑a mɔ dɔndɔɛ a. Musu chɛ, Chisianɛ ma ka min na, Yataa ɛ a ya wan yɔ a ta. Ni chɛ ma, an 'na denɛ n mbe ma‑a wan, yɔ denɛ nu, miin ma Yataa sɔn. Chɛɛ Yataa ban‑da ka buɛ min dɔ an fa ya‑a, ni an de, mbɛ a wan ta mu an na, a ban‑da an 'na denɛ n bɛɛ ya‑a, mbɛ a wan ta mu an bɛɛ a.

¹⁵Chɛɛ ni mɔɛ n ma‑a fuu ɔ, min ma ka Chisianɛ a, a toen mu an ni du, yuu tɛen fan mu an ma, du koe a. Chɛɛ chɛ gbɛɛ ɔ, ni ɛ bɛn fan, an ni to an fuu chɛ ɔ. Yataa toen mu, mmɔ ni ma faachima an dɔ, mɔ dɔ mende n na.

¹⁶Wo wɛn mu fuu musu n na, n ni a fɔ wo ye, mbɛ kɔkɔɛ wo chɛɛ n mbe an kai fa‑a wan Chisɔsi Chasi a, a si wo wakoe ma. A chia dɔndɔ gbe chɛ a, kɔkɔɛ wo wan Chisian kai n bɛɛ, wo e ma‑a ka wan demanɛ a wo 'a musu n tena, miin ma Chisianɛ n na.

¹⁷Sawa mu chɛ an na, n mbe wo kan tena min na chɔchi n gbɛɛ ɔ. Mansa Chisɔsi‑a mɔ ɔ mɔ ma koe fɔ buɛ min dɔ fɔɛ chɛ ɔ, mɔ ɔ mɔ ni ma ka a ɔ. Mɔ ɔ mɔ 'a fɔɛ ni ma, yɔ a ni buɛ min dɔ, Yataa‑a mɔ ɔ mɔ chee tima min na, ma koe a a ta mɔɛ n na.

¹⁸Ni mɔɛ min na kaminchaenɛ ɛ, Chu mɔɛ n 'na sawa chia a, mbɛ a dɔn‑da Yataa 'a chee ma, a ma a fɔ, mbɛ ɛ kamincha paa chɛ ka wan a gboo ma. Ni mɔɛ min na ma kamincha ni, a dɔn‑da Yataa 'a chee ma, a ma a fɔ, mbɛ a ɛ kamincha wan to.

¹⁹Mɔɛ a ni kamincha wan, a a ma kamincha ni fan, ko ɔ ko ma chɛ a. Koe mu min na dechee, an nɛ, Yataa 'a sawa bia koe a chɛndɛ chɛ.

²⁰Mɔ ɔ mɔ ni to ka, yɔ a ni buɛ min dɔ, a e na to dɔn‑da Yataa 'a chee ma, ma koe a a ko a.

²¹Tima min na Yataa‑a i chee, ni i ni yɔnɛ an na, chɛ ma i faa gbaa. Chɛɛ ni i‑a chia ma sɔn, bɔ koe a an yɔncha ɔ, an chia chɛ bia i boo fea a.

²²Koe min na mu, Mansa Chisɔsi ɛ yɔnɛ min chee, a ma‑a mɔ kun kaenɛ a. A chia dɔndɔ gbe chɛ a, mɔɛ min mbe ee yɔncha ɔ, ni Mansa Chisɔsi‑a a chee, a mɔɛ chɛ ma‑a a 'a yɔnɛ a.

²³Yataa‑a wo sɔnkɔɛ an bɔ. Wo ma Yataa to, wo ni don mɔɛ n kɔɔ.

²⁴N suun ma nyɔɛ nu Chasi ɔ, mɔ ɔ mɔ ni to ka, yɔ a ni buɛ min dɔ Yataa ya kɔɔ, a e na to dɔn‑da Yataa 'a chee ma, ma koe a a ko a.

²⁵Ka n mbe koɔ gbɛ, a si den tɔngbɔɛ n ma, miin ma si nin bɛ fuu ɔ, wo‑a gboo nyɛn a si miin ma. Mansa Chisɔsi an ma chɛ don ni n da ɔ, n mbe ka min fɔ‑a. Chɛɛ bai min mbe n da a, n mbe ka an fɔ‑a. N mbe koɔ tena wan, yɔ mɔɛ, wo e kun wo ni dan min na. Koe min na mu, Yataa chinchinden fan mu n ma.

²⁶N ta yiima ɔ, ni n‑na a ma fɛn faayɔnɛ min mbe sanche, a nyin mɔ ɔ mɔ ni to ka, yɔ ɛ buɛ min dɔ.

²⁷Ni musu ɛ wan i boo ɔ, i ma a boo ka. Ni musu sin mbe ee i boo ɔ, mbɛ i ma i ya a kan musu a.

²⁸Chɛɛ ni i gbu sin‑na musu si, i ma ko yama ma ni. A sin to, ni sɛnama‑a kai sɔn, a wɛɛ ma ko yama ma ni. Chɛɛ mɔɛ chɛ nu, miin mbe fuu ɔ, an 'na kun dumɛ koo. Chɛ an fɛ mu, n bu ɔ ɛ dia‑a wan, ni wo ma dɛ ni an tee ɔ tee a kun dumɛ ɔ.

²⁹N suun ma nyɔɛ nu Chasi ɔ, min mbe n yii ma, tima min yianden mu, a ɔ wua‑a gbɛ. A ka gbɛ sanche ma, aan a ta, musu si kai n ni ma, yɔ mɔɛ nu, musu ee miin boo ɔ.

³⁰Mɔɛ chɛ n bɛɛ, miin mbe di chɛ‑a, an ni a ma yɔ an faa ma yɔn ni. Miin mbe yɛn chɛ‑a, an ni a ma yɔ an bu ɔ ma di. Miin‑na fee fenɛ n san, an ni a ma yɔ an‑na fenɛ miin san ka, mbɛ an fan ta ma an na.

³¹Mɔɛ miin mbe wai chɛ tena, dunya ma fenɛ n na, an ma an faa gbɛɛ chɛ an fen chɛ n bakoe ɔ. Koe min na mu, dunya chɛ ɛ ka buɛ min dɔ, a ee to tena a gba ɔ.

³²N ma to ni, faagbaa kan kɔ kan ni ma wo ma. Chisianɛ n tɛ ɔ, mɔ kaima miin ma musu si nin bɛ, an gbɔsɔen mu Mansa Chisɔsi 'a wai an na. Koe min na mu, an toen mu an ni koe n ma, miin mbe Mansa Chisɔsi faa chima.

³³Chɛɛ musu si kai tana, a faa gbaaen mu dunya chɛ ma koe an na. Ɛ ma buɛ min dɔ, a ni a 'a musu faa chima.

³⁴A sin to, a faa ma ko ee dɔndɔ. Musu wɛɛ, a ni ma sunkun tɔngbɔ a, a ni ma sɛnama a, ni a ee kai boo ɔ, a gbɔsɔen mu Mansa Chisɔsi 'a wai an ko a. A toen mu, a ni Mansa Chisɔsi faa chima koe ma, a chɛ chɛ wai gbɛɛ ɔ, ni a 'a yiinachii gbɛɛ ɔ. Chɛɛ fuu musu tana, a faa gbaaen mu dunya chɛ ɔ koe an na, ɛ ma buɛ min dɔ, a ni a chɛɛ faa chima.

³⁵N mbe chɛ fɔ tena, wo deman koe mu. Chɛɛ n mbe ee wo a gban tena wan. Chɛɛ n toen mu min na, an nɛ, koe ma koe a, min nyin, a sin tea ɛ a ɔ, a ma koe a. A yɛ to, min mbe a ma, wo ni wo wandi be Mansa Chisɔsi ma gbae, wai chɛ koe a a ko a, wo faa gbɛɛ a.

³⁶Chɛ an mbe n da a chɛ n ko a, miin‑na woo sa musu n ko a. Chɛɛ ni mɔ kaima yiima‑a a fɔ a ye, mbɛ a ee tachɛ chɛ tena musu chɛ a a chia ma, ni a to‑a musu a kaka, a fuu koe chɛ‑a a faa ɔ, a ni a fuu, a faa ni chima. Ko yama kan kɔ kan ma chɛ a.

³⁷Chɛɛ ni mɔ kaima‑a a yiima ɔ bɛn, mbɛ a ee fuu chɛ tena, mɔ ɔ mɔ sin ma a din ni a ma, a nyin fan. Ni ɛ kun fan tachɛ koe a a wandi a chɛndɛ, a 'a woo chɛ saenɛ ni ma tun musu chɛ ko a.

³⁸Chɛ an fɛ mu, mɔɛ min mbe musu fuu, a‑a ko chɛndɛ ma. Chɛɛ mɔɛ min gbu sin ma musu fuu ni, a nan gbu ta ko chɛndɛ koo.

³⁹Fuu musu ɛ a chɛɛ an ko a, kai ɛ wɛ tima min kɔɔ fɔɛ ɔ. Chɛɛ ni a chɛɛ fa‑a, yuu tɛ‑a a ma, kai dɔ gbɛɛ sɔn koe a, Mansa Chisɔsi ta chia a.

⁴⁰Chɛɛ n ta yiinachii ɔ, musu chɛ 'a buɔdia ma ɛ munda‑a wan, ni a ma si ni kai ko a. N sin danden fan mu a a, mbɛ Yataa Nyina ɛ wan n bɛɛ fɛ, n sɔ koe a chia ma.