Read Kono GBOO SAA KƆYINDI KO A 8 Bible Online

GBOO SAA KƆYINDI KO A 8 - Kono bible

GBOO SAA KƆYINDI KO A 8

¹Ka n mbe koɔ gbɛ, a si daun fenɛ n ma, mɔɛ ɛ miin bɔ yasi n na, fen chɛ n tena, miin ma Yataa a. Wo‑a gboo nyɛn fan, a si a ma. Mmɔ gbɛɛ, yiimatɛ ɛ wan mmɔ ɔ, yɔ wo e a fɔ buɛ min dɔ. Chɛɛ an yiimatɛ chɛ sima, ɛ mmɔ kunɛ koa dɔpanda an na. Chɛɛ koadia tana, ɛ chen sɔ wan mmɔ kɔɔ.

²Ni a ma‑a mɔ ɔ mɔ 'a yiinachii ɔ, mbɛ a‑a koe sɔn fan, a ni ma a yii ma, mbɛ a ma ko sɔn, yɔ a gbu ɛ min sɔn.

³Chɛɛ ni Yataa ko a dia‑a mɔɛ ye, ɛ a mɔɛ chɛ sɔn fan.

⁴Chɛ sin fan mbe n da a gbɛ, a si an daun fenɛ daun koe ma, mɔɛ n mbe min bɔ yasi a, fen chɛ n tena, miin ma Yataa a. Mmɔ gbu‑a a ɔ sɔn fan, mbɛ an fen chɛ n mbe ee fɔɛ ɔ. Mmɔ‑a a ɔ sɔn fan, mbɛ Mansa Yataa ɛ dɔndɔ gbe.

⁵Tea gbu mu a a, mbɛ mɔɛ n mbe bai sa wan, a si fenɛ n ma banda bu ɔ, ni dunya chɛ ɔ, an mbe miin chee Yataa a. An fen chɛ n kɔkoo wan, an sin mbe miin bɛɛ chee, an dɔ, mansa, an bɛɛ kɔkoo.

⁶Chɛɛ chɛ gbɛɛ ɔ, Yataa ɛ dɔndɔ gbe mmɔ ko a. An mu mmɔ Fa a, min‑na fen kɔ fen na dan dunya ɔ. An 'na fɔɛ ɛ mmɔ sun da a. Mmɔ 'a Mansa wɛɛ, ɛ dɔndɔ gbe, min mu Chisɔsi Chasi a. Yataa 'a gbasaya ben‑da an dɔ, fen fen na dan koe a dunya chɛ ɔ. A sin fan‑na a ma, mmɔ ɛ fɔɛ chɛ ɔ, mmɔ ɛ ka min na fɛ‑a.

⁷Chɛɛ mɔɛ gbɛɛ an ma tea chɛ ɔ sɔn. Mɔɛ dɔ n dii‑a gbɛ bea koe a an 'na fania yataa chɛ n fɛ kaka. Bi tee chɛ wɛɛ a, mɔɛ dɔ n mbe daun fenɛ n daun fan, miin been mu an fania yataa chɛ n ma. An sin mbe ma a daun‑da, an gbu dandenɛ an mbe ma an na tun, mbɛ an daun fen chɛ n mbe an 'na yataa chɛ n fan ko a. An 'na Chisian danaya ɔ ma gbɛ wɛ kaka. An mbe ma an fen chɛ n daun‑da, ɛ ma wan an yii ma, mbɛ an mbe ee ka tea ko ma‑a, mbɛ an ma‑a ko yama ma mɔɛ n na.

⁸Chɛɛ mmɔ ɛ daun fenɛ min daun, an mbe ee na mmɔ a Yataa baima. Mmɔ ni daunɛ chɛ, tɔnɔn kan kɔ kan mbe ee a ɔ, mmɔ ma a chɛ, mmɔ ee fo fen kɔ fen na.

⁹Chɛɛ wo tima an ya dechee, wo e koe n ma buɛ min dɔ. Min mbe a ma, gbasaya min been mu ka wo ma daun chɛ koe a, a ma na a ma miin 'na danaya ɔ ma gbɛ, an ni ko yama ma.

¹⁰Mmɔ a ya, mbɛ mɔɛ min 'na danaya ɔ ma gbɛ, a‑a wo yen daun chɛ‑a. Wo wan, an dɔ, yiimatɛ ɛ wo wɛn dɔ, wo e daun chɛ‑a an 'na fania Yataa chɛ n fai tena. Wo ni dan gbɛ a a, mbɛ chɛ ɛ ma wan a ma buɔdia a daun fen bonda chɛ daun koe a tima ɔ tima.

¹¹Ni wo‑a chɛ ma, mbɛ wo 'a yiimatɛ chɛ, an‑na a ma ka, wo suun ma nyɔɛ chɛ Chasi ɔ, min 'na danaya ɔ ma gbɛ ka, a kasaa‑a. Wo suun ma nyɔɛ chɛ, Chasi fa‑a ka min ko a.

¹²An chia chɛ sin na, wo e ma‑a ka ko yama an ma‑a wo bɔɛ Chisianɛ n na, wo e paa to‑a an yii ma, miin 'na danaya ɔ ma gbɛ. Wo sin mbe ka ko yama ma‑a Chasi an na.

¹³Chɛ an fɛ mu, ni n daun fenɛ an mbe a ma, n suun ma nyɔɛ ɛ ko yama ma, mbɛ n mbe ee soe daun‑da to. Min mbe a ma, n ma na n suun ma nyɔɛ a dɛ ko yama ɔ.