Read Kono GBOO SAA KƆYINDI KO A 9 Bible Online

GBOO SAA KƆYINDI KO A 9 - Kono bible

GBOO SAA KƆYINDI KO A 9

¹Ko ɔ ko boo ee n na, ae? Chisɔsi 'a sɔ mɔɛ mu n na, ae? N‑na a yen fan n ya a pɛnɛnɛ, mmɔ 'a mansa chɛ. A sin, wo ma min chɛ a Chisianɛ n na, a bɔ‑a wai chɛ an dɔ, n‑na min chɛ Mansa Chisɔsi ko a.

²Ni mɔ dɔ mende nu, an ma n ya nin bɛɛ Chisɔsi 'a sɔ mɔɛ a, wo nɛnɛ tana, wo ee ka ɛnden bɛɛ a. Wo wan mu tɔmɔsi gbau gbau a, mbɛ Mansa Chisɔsi 'a sɔ mɔɛ mu n na.

³N mbe chɛ an fɔ mɔɛ chɛ n ye, miin mbe n ma nyin.

⁴Nn bɛɛ, tea ɛ wan nn boo ɔ, nn ya sɔ koe a wo ya ɔ, daun fɛnɛ wakoe a, ae?

⁵Tea ɛ wan to nn boo ɔ, nn mbe ma n 'na wai chɛ a, ben ben koe a, nn bɛ nn 'na musu n na, Chisianɛ nu. Ni musu ɛ wan nn boo ɔ, nn mbe chɛ ma wan, ae? Tea ɛ wan nn boo ɔ nn ni chɛ ma, yɔ Mansa Chisɔsi 'a sɔ mɔɛ tɔɛ nu, ni a suun ma nyɔɛ nu, a che kai Pita[6] wɛɛ ma, an gbɛɛ‑a a ma buɛ min dɔ.

⁶Chisɔsi 'a sɔ mɔɛ tɔɛ nu, an mbe ee wai chɛ an da a daun fen ko a. Nn fea Banabasi a, nn fan mbe wai chɛ gbɛ dechee nn da a daun fenɛ ma sɔn koe a. Fen ko a chɛ ɛ ma?

⁷Soya mɔ kan kɔ kan mbe ee nɔ, min mbe a wandi pawa. Chin fen chin mɔ kan kɔ kan bɛɛ ee nɔ, min mbe a 'a chin fenɛ ya, chɛɛ dɔndɔ wɛɛ ee tu a da a. Ninchi kun ma fɛn mɔ nan fan mbe ee nɔ, min mbe a fɔ, mbɛ a 'a ninchi nɔnɔnɛ ee che a da ma.

⁸N mbe ee chɛ fɔ tena dechee mɔgbuya ta fɛ chia an na. Sawa chɛ wɛɛ, min be‑a Mosisi ma, a‑a bai dɔndɔ gbe chɛ an fɔ.

⁹Koe min na mu, an sawa chɛ, a ɔ te, mbɛ mɔ ma ninchi da a chii, a ɔ, ni a ma‑a fenɛ tɛn‑da.[7] A sin ma ma wo yii ma, mbɛ Yataa ni bai sa tena a si ninchi dechee an ma, an sawa chɛ ɔ.

¹⁰Yataa‑a bai chɛ n gbɛɛ fɔ, mmɔ wan ko a. Mɔɛ miin mbe wai chɛ tena Chisɔsi Chasi ko a, an ni pawa ma sɔn mɔɛ n na, an mbe wai chɛ tena miin ko a. Ɛ wan dechee yɔ chin fen wai chɛ mɔɛ nu, miin mbe chin fenɛ tɛn, an yii na tɛenɛ ɛ ma buɛ min dɔ an ta ma sɔn koe ma.

¹¹Nn‑na koe n sa wan wo faa ɔ, Yataa Nyina ɛ miin be. Chɛ ko a, kafa ma, ni nn‑na wo ɔ tisa dunya chɛ ɔ tɔnɔnɛ ko a.

¹²Ni wo e wo boo fenɛ n be wan mɔ dɔ mende n ma, miin mbe Yataa 'a bai sa wo tena, tea ɛ wan a ɔ wo gbu ni wo boo fenɛ chenama be nn fan ma. Chɛɛ chɛ gbɛɛ ɔ, nn ma bea nin bɛ tea chɛ fɛ. Nn mbe e na kɔnɛ sɔ sakana bai chɛndɛ chɛ ya ɔ, nn mbe nn faa bia wan ko ɔ ko a.

¹³Wo‑a a ɔ sɔn fan, mɔɛ miin mbe Yataa 'a kata ɔ, an mbe an daun fenɛ ma sɔn buɛ min dɔ. An mbe a ma sɔn wai chɛ an dɔ, an mbe min chɛ nɔ. Mɔɛ chɛ n bɛɛ, Chu mɔɛ n tɛ Yataa a, miin mbe yasi minda sen gbengbe ma nɔ, an mbe kana an yasi n fan dɔ.

¹⁴A chia dɔndɔ gbe chɛ a, Mansa Chisɔsi‑a chɛ an fɔ, a si a 'a sakana bai chɛndɛ ɔ yian mɔɛ n ma. Mbɛ an bɛɛ, mɔɛ miin mbe an sakana bai chɛ a min, an ni an ma koe chɛ.

¹⁵Chɛɛ chɛ gbɛɛ ɔ, n ma bea nin bɛ tea chɛ dɔndɔ wɛɛ fɛ. N sin mbe ee gboo chɛ nyɛn tena an tea chɛ konde gbain koe an na. Koe min na mu, n mbe ee chia be tena mɔ ɔ mɔ ma, n da tɔn koe a tea yonka chɛ tɛ koe a. A fisa wɛɛ n ni fa.

¹⁶N mbe sakana bai chɛndɛ min dɔ yian tena mɔɛ n na, a si Chisɔsi Chasi ma, an mbe ee che a ma‑a n ni yonka tɛ. A dinden fan mu n ma, a ma koe a ka. A sin, a ma ɛ chian‑da gba n ko a, ni n ma sakana bai chɛ ɔ yian ni mɔɛ n na.

¹⁷N mbe ka wai min chɛ‑a, ni n fandi kun ma a ni, n ni pawa ɔ tisa‑a wan. Chɛɛ a ee ka wan. N mbe wai chɛ chɛ tena, koe min na mu, Yataa wandi an‑na n sɔ a chɛ koe a.

¹⁸N 'na pawa sin gbu ɛ ma chɛ an na. Mbɛ n ni ma‑a sakana bai chɛ ɔ yian‑da, n ma tisa chɛ pawa ko a. N mbe ee bea tena n 'na tea fɛ, n ni che a ɔ nyɔɔ.

¹⁹Chɛ ɛ a ɔ yian fan, mbɛ mɔ ɔ mɔ 'a yɔn ma n na. Chɛɛ chɛ gbɛɛ ɔ, n‑na n fandi ma yɔnɛ a mɔ ɔ mɔ ko a. Chɛ ni a ma, n ni na mɔɛ n gbɛɛ a, n mbe che na‑a miin na Chisɔsi Chasi tena.

²⁰Ni n ma‑a wai chɛ‑a Chu mɔɛ n tɛ ɔ, n mbe mun fan Chu mɔɛ a, an ma sawan koe a Chasi tena. A sin, n mbe ee wɛɛ ka boo ɔ boo an sawa chɛ kɔɔ, Yataa‑a min mbe Mosisi ma, n 'na fɔɛ ɛ wan yɔ miin mbe a kɔɔ, an mɔɛ chɛ n mun koe a, Chasi 'a mɔɛ n na.

²¹A chia dɔndɔ gbe chɛ a mu, ni n ma‑a wai chɛ‑a mɔɛ chɛ n tɛ ɔ, miin mbe ee an sawa chɛ kɔɔ, n mbe bɛn fan an bɛɛ tɛ ɔ. Chɛ ma a ɔ yian ni, mbɛ sawa chɛ ee nan gbu ko a. N sin gbu, n mbe wan Chasi 'a sawa kɔɔ chɛndɛ chɛ. Chɛɛ n mbe chɛ ma, an ma sawan koe an na Chasi tena.

²²Ni n ma‑a wai chɛ‑a mɔɛ chɛ n tɛ ɔ, miin 'na danaya ɔ ma gbɛ, Chisɔsi a, n bɛɛ, n mbe a ma wan yɔ n ta wɛɛ ɔ ma gbɛ. N mbe chɛ ma, n ni an ma sawan Chasi tena. Chɛ ɛ a ɔ yian, mbɛ n mbe mun fan mɔ kan kɔ kan na, mɔɛ kan kɔ kan tena. N mbe chɛ ma, an dɔ n baun koe an na, chia ɔ chia a.

²³N mbe chɛ gbɛɛ ma, min mbe a ma, sakana bai chɛndɛ chɛ ni fasan a ɔ kan kɔ kan. A ni a ma, mmɔ ni dua chɛ ma sɔn, bai chɛ ɛ na min na.

²⁴Wo‑a a ɔ sɔn fan gbu, mbɛ bui chɛ tɔmbɔɛ ɔ, bui chɛ mɔɛ gbɛɛ an mbe ee a to a ɔ an nyɔn ko a. Chɛɛ dɔndɔ gbe, an mbe boo ɔ gbasi woo ma sɔn, sɔ koe a a bɔɛ n ya ɔ. Chɛ an fɛ mu, wo bui chɛ chɛ, wo ni boo ɔ gbasi woo chɛ ma sɔn.

²⁵A sin, bui chɛ mɔɛ kan kɔ kan, ɛ tachɛ wan a wandi a chɛndɛ chɛ koe gbɛɛ ɔ. An mbe chɛ ma, min mbe a ma, an ni mansa banfua ma sɔn, min gbu ee mɛ. Chɛɛ mmɔ tana, mmɔ ɛ bui chɛ tena boo ɔ gbasi woo an ko a, min mbe ma‑a kuɔ fɔ ko a.

²⁶Chɛ an fɛ mu, n tana, n mbe ee bui chɛ n kun fan ye. N mbe ee botani a dɛ, fia gbama ɔ.

²⁷Chɛɛ n mbe n fandi gboo ma wan tindin, mbɛ n‑na n tachɛ buɛ ma mɛn. N mbe chɛ ma, min mbe a ma, Yataa ma na n na yɛ a boo kɔ, ni n ban‑da mɔɛ n chee‑a bui chɛ koe a.