Read Kono GBOO FEAN BƆƐ KƆYINDI KO A 11 Bible Online

GBOO FEAN BƆƐ KƆYINDI KO A 11 - Kono bible

GBOO FEAN BƆƐ KƆYINDI KO A 11

¹Ɛ n bu ɔ dia‑a wan, ni wo‑a wo faa bia n na, n ni wooya bai ɛnden sa. Wo dimu.

²N faa gbaaen mu kaka wo ko a, yɔ Yataa faa gbaaen mu buɛ min dɔ. Koe min na mu, wo e wan yɔ sɛnama, min ma kai koe ɔ sɔn. N‑na wo yan mɔ dɔndɔ gbe an ko a, min mu Chasi a.

³Chɛɛ n chianden mu ko dɔndɔ an ko a. Mbɛ ka chɛ na‑a Ifi bun buɛ min dɔ, yaa a, wo wɛɛ, wo yiima ɔ ma na chɛ. Wo ee na‑a ma‑a teaya ɔ, Chisɔsi Chasi a, wo ni ma a ko a chɛndɛ chɛ.

⁴Koe min na mu, wo e wo boo a si wan mɔɛ kɔɔ, buɔdia ɔ, min mbe na wo tena, ɛ bai ɔ yian, a si Chisɔsi dɔ mende ma. Chisɔsi chɛ ma, nn‑na sakana bai chɛndɛ ɔ yian, a si min ma. Mbɛ wo‑a wo boo si nyina dɔ mende kɔɔ, min ma Yataa Nyina a. Wo‑a wo boo si to sakana bai dɔ mende kɔɔ, min kaen mu chɛ ma, wo na‑a wo boo si tee min kɔɔ. Wo‑a wo wandi be a ma, ko ɔ wuu ma a.

⁵Chɛɛ n ta yiinachii ɔ, n ma dan ni a a, mbɛ mɔɛ chɛ n benden fan mu n ma ɛnden bɛɛ a, wo e mɔɛ miin ya ka Chisɔsi 'a sɔ mɔ wa an na.

⁶An ni a fɔ wɛɛ n ma kosan koɔ‑a, chɛɛ yiimatɛ nan tana, a been fan mu n ma. Chia ɔ chia a, nn‑na chɛ ɔ yian fan wo a, ko ɔ ko ɔ.

⁷N ma ko yama an ma ni ka, n fandi ma yii koe a, min mbe a ma, n ni wo a sɛ. N‑na Yataa 'a sakana bai chɛ ɔ yian fan wo a, n ma wo ɔ tisa ni fen kɔ fen be koe a.

⁸Chɔchi mɔɛ dɔ mende nu, an‑na an boo fenɛ n be wan, basan koe a n ma, n ni wai chɛ wo tɛ ɔ.

⁹Mmɔ bɛ sin ni tima min na, n sin toen ni demanɛ a, n nii ma n 'na yakɔɔtawa si ni mɔ ɔ mɔ kun ma. Mmɔ suun ma nyɔɛ nu Chasi ɔ, miin na‑a ka Masidonia chɛnyɛ ɔ, an fan‑na fen kɔ fen be n ma, min ma gbɔsɔɛ ni n ma. N ni buɛ min dɔ, a kɔma a, n mbe ma‑a ka wan, ya ɔ ma wɛɛ. N mbe ee n 'na yakɔɔtawa sa‑a wo kun ma, chia ɔ chia a.

¹⁰Chasi 'a tea, ɛ ka buɛ min dɔ n dɔ, n mbe ka yonka min tɛ‑a, a ɔ ee maun‑da Akaya chɛnyɛ gbɛɛ ɔ.

¹¹N mbe chɛ fɔ tena, wo wakoe an ma don ni n ma, n toen fan mu wo a. Yataa‑a chɛ ɔ sɔn fan.

¹²N sin mbe ka koe min na, n mbe an na tun‑da, a ma koe a. N mbe chɛ ma‑a wan, mɔɛ chɛ n kɔɔ bɔ koe a. Mɔɛ chɛ nu, miin mbe an fandi ya Chasi 'a sɔ mɔɛ n na, an ma chia sɔn, yonka tɛ‑a. An mbe ta‑a a fɔ‑a, an dɔ, nn bɛ an na, nn mbe wai dɔndɔɛ an na.

¹³An mɔɛ chɛ nu, fania mɔɛ nu mu, an fandi ya koe a sɔ mɔɛ n na. Wai chɛ mɔɛ n fan nɛ, miin mbe mɔɛ n bun, an mbe ben an fandi ya‑a mɔɛ n na, miin mu Chasi 'a sɔ mɔɛ n na.

¹⁴Chɛɛ tɛnɛ ko ma chɛ nɛnɛ a. Sitana wandi gbu wɛɛ, ɛ kun fan, a ni a wandi ma yɔ maeka, min mbe man taun Yataa 'a manɛ a.

¹⁵Chɛ an fɛ mu, kɔndɔfii ko ma, ni Sitana 'a wai chɛ mɔɛ n bɛɛ, an‑na an fandi mun tea wai chɛ mɔɛ n na. A dankama a, an mbe pawa min sɔn‑da, a ɛ kan‑da an wai chɛ buɛ an na.

¹⁶Ka n mbe a fɔ to. Wo dɔndɔ wɛɛ, wo ma n ya woo mɔɛ a. Chɛɛ ni wo‑a n ya wɛɛ ka, wo wo boo a si n kɔɔ n 'na wooya ɔ. Chɛ ɛ a ma‑a wan, n bɛɛ, n ni yonka tɛ ɛnden na.

¹⁷N gbu sin, mbe ka miin fɔ‑a gbɛ, bai ma a, Mansa Chisɔsi toen mu min na. Chɛɛ n mbe a fɔ tena wan, yonka chɛ a, yɔ woo mɔɛ ɛ koɔ buɛ min dɔ.

¹⁸Mɔɛ sɛsɛ nu, an mbe yonka tɛ kɛn dunya ma mɔɛ n ta chia an fan na, n bɛɛ, n mbe yonka tɛ‑a wan.

¹⁹Wo e wo faa bia wan woo mɔɛ n na, buɔdia a, a yen ko wo wandi gbu yiima tɛen ba mu.

²⁰Wo gbu sin mbe wo faa bia wan, mɔɛ ni wo yɔn bia wɛɛ chɛ. Chɛ ma, mɔɛ ni wo boo fenɛ daun, chɛ ma, a ni wo chii, chɛ ma, a ni a yombo sɔ a ma, chɛ ma, a ni wo ya a gbasi.

²¹A ma ɛ che wan mau‑a n ye, n ni dɔn a ma, mbɛ nn dɔ nii ma gbɛ, koe chɛ n ma koe a. Chɛɛ ni mɔ ɔ mɔ faa na‑a gbɛa, tima kan kɔ kan ko a, yonka tɛ koe a, a si ko kan kɔ kan ma, n bɛɛ, n faa ɛ gbɛa wan n ni yonka tɛ an koe chɛ ma. N mbe ka koɔ an na, yɔ woo mɔɛ.

²²Ni Ibu[4] mɔɛ mu an na, n bɛɛ, Ibu mɔɛ mu ka wan n na. Ni Isɔɛɛ mɔɛ mu an na, n bɛɛ, Isɔɛɛ mɔɛ mu ka wan n na. Ni Ebeami cheeya mu an na, n bɛɛ, a cheeya mu ka wan n na.

²³Ni wai chɛ mɔɛ mu an na, Chasi ko a, n mbe wɛɛ ka koɔ‑a yɔ woo mɔɛ, chɛɛ an wai chɛ mɔɛ chɛndɛ gbu mu n na, a ben an ma. N‑na wai chɛ, a ben an ma, n ta‑a pimbi chenɛ a, a ben an ma. N‑na gbasi min sin dɔ yen, dan mbe ee a ma. Tima sɛsɛ ko a, n ni ma wan saya baima, a ben an ma.

²⁴N‑na gbasi ma sɔn fan, si tena duu, Chu mɔɛ n boo ɔ. An ni n bosa wan, gba bi sawa, kun ma kɔnɔntɔ ko a.[5]

²⁵Si tena sawa gbɛ, Domi mɔɛ n ni n gbasi kɔnɛ an na. Mɔɛ n‑na n ma bon bon gba dɔndɔ, senɛ a, n fa koe a. Gba sawa gbɛ, dɛndɛ wɛɛ ɛ gban‑da n na, yii a. A sin, n ni wan yii a su ɔ tee a, tima dɔndɔ ko a.

²⁶N 'na tachɛ sɛsɛ n dɔ, n ni wan chianɛ kɔɔ, yii fa boo ɔ, a basan kanka n na. N ni wan chianɛ kɔɔ, n bɔ Chu mɔɛ n boo ɔ, ni mɔɛ chɛ n bɛɛ boo ɔ, miin ma Chu mɔ a. Ko ma chiandenɛ n ma‑a wan duu wa n dɔ, an ma‑a fuinɛ ma, an ma‑a kɔ yii a. N suun ma nyɔɛ chɛ n gbu wɛɛ Chasi ɔ, a wakoe ni sa ɔ dechee miin ya kɔɔɛ, chɛɛ a ee an faa ɔ, n chiandenɛ ni wan an ma.

²⁷N‑na wai chɛ wan n sɔɛ gbɛɛ a. Tima sɛsɛ ko a, n ni chi wan n ya a. Tima sɛsɛ ko a, kɔnkɔɛ‑a n bia wan, n kanɛ a gbaa‑a, a sin n nii daun fen ma sɔn. Tima sɛsɛ ko a, chima ni n bia wan, koa a tenden bɛɛ nii n ma.

²⁸A sin, a ka ko dɔ gbɛɛ chɛ n ma, n faa gbaaen fan ni tima ɔ tima ko a, chɔchi n gbɛɛ ko a.

²⁹Ni mɔɛ ɛ nɔ min gboo ɔ faenɛ ɛ, n bɛɛ, n gboo ɔ fa wan a mɔɛ chɛ ko a. Ni mɔɛ‑a a ma, a bɔɛ ni ko yama ma, n faa ɛ gbandia wan yɔ ta.

³⁰Ni n mbe kun fan n ni yonka tɛ, n mbe yonka tɛ‑a, a si koe chɛ n fan ma, miin mbe a ɔ yian, mbɛ gbasaya ee n boo ɔ.

³¹Tando ni be Yataa ma kuɔ fɔ ko a. A wan mu Mansa Chisɔsi Chasi fa a, ni a 'a Yataa.[6] A‑a a ɔ sɔn fan, mbɛ n mbe ka tea an fɔ tena.

³²N ni kɛn Damasikɔsi, duu mansa min ni nɔ Mansa Ayetasi kɔɔ, a‑a mɔɛ n sɔ wan chia kunɛ gbɛɛ a, duu wa chɛ a tindanɛ. A ɔ, an ni n bia.

³³Chɛɛ n si‑a wan tɛngbɛ ɔ, mbɛ an‑na n na yii duu ma, kanda wa chɛ gbaa, a bɔ woe a, kanda wa chɛ ɔ. Mbɛ n bɔ‑a a boo ɔ.