Read Kono GBOO FEAN BƆƐ KƆYINDI KO A 13 Bible Online

GBOO FEAN BƆƐ KƆYINDI KO A 13 - Kono bible

GBOO FEAN BƆƐ KƆYINDI KO A 13

¹Chɛ an mbe ma‑a gba sawan bɔɛ a, n mbe na‑a wo kɔndɔn‑da. Yataa 'a gboo‑a a fɔ wan, a ɔ, “Ni an‑na kunɛ si mɔ ɔ mɔ kun ma, siiya fea, sawa an mbe bɔ a ma, an mbe e na to kaa a tɛ‑a, a si an bai chɛ ma.”

²N‑na wo a si wan, n 'na gba fean bɔɛ ɔ, wo kɔndɔn‑da. N‑na wo a si wan, wo wɛn na‑a ko yama ma, a kɔma a, a basan mɔɛ tɔɛ n gbɛɛ a. Chɛɛ n mbe a fɔ‑a wan to sanche, mbɛ n mbe ee ka buɛ min dɔ wo tɛ ɔ, mbɛ n mbe na‑a to tima min na, mɔ ɔ mɔ kun mbe ee bɔ‑a tɔɔya ɔ.

³Wo toen mu, wo ni a ɔ sɔn, mbɛ n mbe koɔ tena, Chasi 'a gbasaya an dɔ. Wo sin mbe a ɔ sɔn‑da wan. Ni a ma‑a tachɛ‑a wo a, a ee ma gboo ɔ fa ɔ. Chɛɛ ɛ min ma, ɛ a 'a gbasaya ɔ yian fan wo tɛ ɔ.

⁴Koe min na mu, tima min na an ni Chasi gbangban tena kɔn gbengbandenɛ ma, a fa koe a, a nii ma gbasaya yian ni. Chɛɛ ɛ tun fɔɛ ɔ, Yataa 'a gbasaya ɔ. Chɛ an fɛ mu, gbasaya ee nn bɛɛ boo ɔ, nn mu ka buɛ min dɔ mɔ dɔndɔɛ n na Chasi a. Chɛɛ wo e a ɔ yen‑da wan, Yataa 'a gbasaya ɔ, nn mbe fɔɛ ɔ, nn bɛ Chasi a, wai chɛ koe a wo ko a.

⁵Wo wo wandi ma mɛn, wo ni a ɔ yen, ni wo boo a chiien fan mu, wo kai fa koe a Chasi a. Wo ni a ya, mbɛ wo ma‑a gbɛ mɔ dɔndɔɛ a, wo bɛ Chisɔsi Chasi a. Fɔ dechee, ni chia ɔ chia ee wo ye, wo wandi ma mɛn koe chɛ a.

⁶N ko a, ɛ wan n yii ma, mbɛ wo e a ɔ gbɛ‑a wan, mbɛ nn ban‑da nn fandi ma mɛn‑da, ko ee nn ma.

⁷Chɛɛ nn mbe samunɛ chɛ tena, wo ma na ko yama kan kɔ kan ma. Nn mbe ee a ɔ yian tena wan ka, mɔɛ n na, mbɛ nn‑na wai chɛndɛ an chɛ wo tɛ ɔ. Chɛɛ nn toen mu, wo ni koe n ma, miin nyin, a ma koe a. A ni ma wɛɛ, mbɛ nn‑na wai min chɛ, ko ma bɔ ni a ɔ.

⁸Koe min na mu, nn mbe ee ko ɔ ko ma, miin mbe ee tea gbee a. Chɛɛ ɛ ma tea gbee an na, a si Chisɔsi ma.

⁹Koe min na mu, n bu ɔ diama an mbe ma, tima ɔ tima ko a, gbasaya ee wɛɛ nn boo ɔ, chɛɛ wo sin dɔ gbɛama ɛ. Nn mbe samunɛ chɛ min ko a, an nɛ, mbɛ mabɔ ma na ma wo ma.

¹⁰Chɛ an fɛ mu, n mbe gboo chɛ nyɛn tena, wo tena, n mbe ee tima min na wo baima. N mbe chɛ ma tena, min mbe a ma, ni n‑na a fo wo ma tima min na, n mbe ee na‑a wo bia‑a faaakɔɔɛ a. N mbe ma‑a gbasaya chɛ a tachɛ‑a, Mansa Chisɔsi‑a min be n ma, wo ɔ gbɛa koe mu, wo yɔn koe ma.

¹¹N suun ma nyɔɛ nu Chasi ɔ, an nɛ, wo buɔdia bɔ. Wo butuin chɛ, wo ni wo tachɛ buɛ n dɔ bɛn. Wo wo too ma sɔ n 'na dasi n ma. Wo ma kuiɛ dɔndɔɛ ɔ, wo ni ma faachima ɔ. A sin, Yataa min mbe faachima be, koadia ɛ to a faa ɔ, ɛ ma‑a wan wo kɔ.

¹²Ni wo bɛn‑da, mbɛ wo‑a wo nyɔn kɔndɔn koadia faa a. Yataa 'a mɔɛ n gbɛɛ nɛ, an‑na wo kɔndɔn.

¹³Mansa Chisɔsi Chasi 'a dua ni ma wo ma. Yataa 'a koadia ni tachɛ wo a. A sin, wo ni ma yiima dɔndɔɛ ɔ Yataa Nyina a.[9]