Read Kono GBOO FEAN BƆƐ KƆYINDI KO A 3 Bible Online

GBOO FEAN BƆƐ KƆYINDI KO A 3 - Kono bible

GBOO FEAN BƆƐ KƆYINDI KO A 3

¹Nn‑na gboo min nyɛn ka, a ee a ɔ yian tena, mbɛ nn bun‑da ka yonka an tɛ‑a, a si nn fandi ma. Nn mbe ee ka yɔ mɔɛ dɔ nu. Nn ma to ni mɔ ni nn pɛmbɛ gboo chɛ nyɛn koe a wo tena. Nn ma to ni wo wɛɛ, wo ni a nyɛn, a si nn bakoe ma.

²Chɛɛ wo wandi gbu wɛɛ, wo wan mu nn 'na gboo a, min mbe nn pɛmbɛ. Gboo chɛ sin nyɛnden mu nn faa n fan dɔ, mɔɛ gbɛɛ‑a a kan kaina min, an ni a ɔ gbɛ.

³Wo gbu sin mbe a ɔ yian tena wan, mbɛ nn‑na wai min chɛ, a gbɔɛ mu wo wan na. Mbɛ gboo mu wo a, min ka‑a Chisɔsi Chasi tena. Wo ta gbooya sin dɔ, wo ma nyɛn ni pɛnɛ inki an na. Chɛɛ Yataa Nyina, min mbe fɔɛ be, an‑na wo nyɛn. A yɛ to, wo ma nyɛn ni sen sɛndenɛ an ma, chɛɛ a‑a wo nyɛn mɔɛ n faa ɔ wan.

⁴Nn mbe chɛ fɔ tena, koe min na mu, danaya koo nn dɔ Yataa ko a, Chasi 'a gbasaya ɔ.

⁵Nn fandi gbu, an ma a fɔ ni, mbɛ nn mbe kun fan nn ni wai chɛ chɛ nn ta gbasaya a. Nn 'na gbasaya, ɛ ka Yataa an tena.

⁶An‑na a ma nn ma‑a wai chɛ mɔɛ chɛndɛ n na, Yataa 'a dɔbɛn nama chɛ ko a. Dɔbɛn nama chɛ sin, sawa ma min nyɛnden mu, chɛɛ Yataa Nyina mu. Sawa min nyɛnden mu, ɛ na saya an na, chɛɛ Yataa Nyina ta na, ɛ na fɔɛ an na.

⁷Sawa kɔma n nyɛndenɛ ni senɛ an ma. A sin, a ni be tena tima min na Mosisi ma, Yataa 'a manɛ na‑a yen fan. Isɔɛɛ mɔɛ nii ma che ni Mosisi ma fɛn‑da kaka, koe min na mu, a manɛ kɔ ni gbɛɛ. Chɛɛ a ya kɔɔɛ chɛ gbu nii ma man ni tima ɔ yansama ko a. Chɛ an fɛ mu, sawa chɛ min mbe na ka saya a, ni a manɛ ma‑a ka, chɛ ɛ koe an dɔ yian tena.

⁸Mbɛ Yataa Nyina ɛ wai min chɛ, a manɛ ɛ koa‑a wan, a ni ben sawa ta ma. Tea mu chɛ a.

⁹Koe min na mu, sawa chɛ, min mbe a ma kaa ɛ tɛ mmɔ ma, mmɔ ni tɔɔ, ɛ na wan manɛ a. Ni chɛ ɛ ma wan, mbɛ Yataa Nyina ta manɛ tana, ɛ koa‑a wan kaka. Koe min na mu, a wan mbe mɔɛ n ya mɔ tandenɛ n na Yataa chen kɔɔ.

¹⁰Mmɔ a fɔ gbɛ tea ko a, mbɛ manɛ min mbe sanche, a koo a ɔ benden ba a. Chɛ ko a, manɛ chɛ min ni nɔ a kɔma a, a ma to ko a.

¹¹Koe min na mu, koe min mbe tuin gbae, ɛ ma wan manɛ a, mbɛ koe min nan gbu sin mbe ma nɔ kuɔ fɔ, a ta manɛ ɛ koa‑a wan kaka.

¹²Chɛ an fɛ mu, yiinatɛ chɛ sima ɛ ka buɛ min dɔ nn dɔ, chian mbe ee nn dɔ.

¹³Nn mbe ee ka yɔ Mosisi, min na‑a koa bun a ya a. A na‑a chɛ ma, min mbe a ma, Isɔɛɛ mɔɛ n ma na a ya kɔɔɛ yen, ɛ man‑da, mbɛ an man chɛ tuin‑da.

¹⁴An gbu sin, tea ko a, an na‑a fo wan ko ɔ gbɛ yiimatɛ a. Koe min na mu, bi tee chɛ wɛɛ a, Yataa 'a dɔbɛnɛ kɔma chɛ, an mbe ma a kan‑da, a maenɛ mu yɔ an yiima ɛ koa an kɔɔ. Koa chɛ sin, min mbe mɔɛ yii kun ma, ɛ bɔ nɔ dechee tima min na, an nɛ tima chɛ a, mɔɛ ɛ ma tima min na mɔ dɔndɔɛ a Chisɔsi a.

¹⁵Bi tee chɛ wɛɛ a, tima ɔ tima ni an ma‑a sawa chɛ n kan‑da, miin na‑a be Mosisi ma, an yiima ɛ tun koa chɛ an kɔɔ.

¹⁶Chɛɛ koa chɛ, ɛ ka wan mɔɛ ya a, tima ɔ tima dechee, ni mɔɛ a a ya a mun Mansa Chisɔsi ma.

¹⁷Mansa chɛ mu gbɛ Yataa Nyina an na. A sin, Yataa Nyina chɛ ɛ ma kaina min, yɔncha ee ma nɔ.

¹⁸Mmɔ gbɛɛ sin, koa kan kɔ kan mbe ee to bun dɔ mmɔ ya a. Chɛ an fɛ mu, mmɔ ɛ Mansa 'a manɛ an na ta, yɔ mɛmɛ. Yataa Nyina sin, min mu Mansa chɛ a, ɛ a ma tena wan, mmɔ ma‑a tee ɔ tee a Yataa bɔ nyɔɛ a, manɛ ɔ.