Read Kono GBOO FEAN BƆƐ KƆYINDI KO A 5 Bible Online

GBOO FEAN BƆƐ KƆYINDI KO A 5 - Kono bible

GBOO FEAN BƆƐ KƆYINDI KO A 5

¹Koe min na mu, mmɔ‑a a ɔ sɔn fan, mbɛ ni mmɔ ɛ ka nɛ tɛndi gbama min kɔɔ, min mu mmɔ gboo chɛ a nɛ dunya chɛ ɔ, ni a kasaa‑a, Yataa ɛ chenɛ be‑a wan mmɔ ma. A wandi gbu an‑na chen chɛ a dan, mmɔ ma koe a nɔ. An chen chɛ sin, banda bu ɔ, a ee te kuɔ fɔ ko a.

²Mmɔ ɛ wan gbɛ nɛ dunya ma, mmɔ ɛ kuun tena wan. Buɔdia min mbe mmɔ ɔ, a koo kaka an gboo nama chɛ ko a. Mmɔ toen mu gbɛ a ya kɔɔɛ ma, mmɔ 'a gboo nama chɛ, min mbe banda bu ɔ, a ni sɛ gbɛ mmɔ ma.

³Gboo nama chɛ sɛenɛ ɛ ma‑a mmɔ ma, mmɔ ma senɛ ee ma‑a to.

⁴Tima min na wɛ mmɔ ɛ dunya ma gboo chɛ ɔ, mmɔ ɛ kuun tena wan, tɔɔya ɔ. An ma a fɔ ni, mbɛ mmɔ toen mu mmɔ ma senɛ ni ma. Chɛɛ mmɔ toen mu, banda bu ɔ gboo chɛ, a ni sɛ mmɔ ma. Chɛ ni a ma, mmɔ 'a dunya ma gboo chɛ, a ni mun kuɔ fɔ nɛnɛ a.

⁵Yataa wandi gbu, an‑na a ma, mmɔ ma bɛndenɛ mu koe chɛ a. A sin to, a wan‑na a Nyina be mmɔ ma, a ɔ yian koe a mmɔ a, mbɛ ɛ fen chɛ n gbɛɛ be‑a wan mmɔ ma, miin mbe sa ɔ a boo ɔ mmɔ ko a.

⁶Chɛ an fɛ mu, tima ɔ tima ko a, faachima koo mmɔ ɔ. Mmɔ gbu‑a a ɔ sɔn fan, mbɛ ni mmɔ ɛ wɛ tun dunya ma gboo chɛ an dɔ, mbɛ mmɔ ee ma‑a Mansa Chisɔsi waa a.

⁷Mmɔ ɛ tachɛ buɛ min dɔ fɔɛ ɔ, ɛ bɔ mmɔ kai fa buɛ an dɔ Chisɔsi Chasi a, a ee bɔ koe n fan dɔ, mmɔ ɛ miin dɔ yen.

⁸Chɛ ko a, faachima koo mmɔ ɔ. A sin, mmɔ ɛ to‑a wan mmɔ ni bɔ dunya ma gboo chɛ ɔ, mmɔ ɛ min dɔ, mbɛ mmɔ ma‑a, mmɔ bɛ Mansa Chisɔsi a.

⁹Chɛɛ chɛ gbɛɛ ɔ, mmɔ ni ma nɛ wan, mmɔ ni ma pan fan, mmɔ toen mu, mmɔ ni a faa chima koe n ma. An mu mmɔ faa ma koe chenama a, a ben ko ɔ ko ma.

¹⁰Koe min na mu, mmɔ gbɛɛ, mmɔ ɛ sɔ‑a wan Chisɔsi chen kɔɔ tee dankama tee ma, a ni kaa a tɛ mmɔ wakoe ma. Ɛ mmɔ gbɛmbo‑a wan dɔndɔ dɔndɔɛ a. Mɔ ɔ mɔ sin mbe koe miin ma‑a, dunya ma gboo chɛ ɔ, an koe n ni nyan, an ni yaua wan, mɔ ɔ mɔ ɛ an pawa ma sɔn‑da.

¹¹Nn‑na a ɔ sɔn fan, Mansa Yataa ma chianɛ mu koe min na. Chɛ an fɛ mu, nn mbe butuin chɛ mɔ dɔ mende yiima mun koe a chɛndɛ, a si a ma. Yataa‑a nn sɔn fan chɛndɛ chɛ. A sin, n yii na tɛen fan mu, wo ta yiinachii gbu wɛɛ ɔ, wo‑a n sɔn fan.

¹²Wo ma a yen, mbɛ nn mbe nn fandi pɛmbɛ tena wan to wo tena. Chɛɛ nn mbe ka min ma‑a, nn mbe dɔ yian chɛndɛ an chɛ tena wo a, min mbe a ma, wo ni yonka tɛ nn ma. Chɛ ni a ma, wo ni che mɔɛ dɔ n da a kuiɛ yɛman‑da. Mɔɛ dɔ nu, miin mbe yonka tɛ mɔɛ ma buɛ ma a gboo ma, an mbe ee na a tɛ a sɔnɛ ma.

¹³Koe min na mu, ni nn wooen bɛɛ mu, mbɛ Yataa an ko a mu. Chɛ ma, ni nn yiima tɛen fan mu, mbɛ wo sin fan ko a mu.

¹⁴Chisɔsi Chasi 'a koadia, an mbe tachɛ tena mmɔ a. Mmɔ ban‑da ka gbɛ buɛ min dɔ a ɔ sɔn‑da, mbɛ a dɔndɔ gbe an fa‑a mɔ gbu gbɛɛ ko a. Chɛ ɛ a ɔ yian fan, mbɛ mɔɛ gbɛɛ fa‑a wan, a 'a saya chɛ ɔ.

¹⁵A sin gbu, a na‑a fa mɔɛ gbɛɛ an ko a. Chɛ‑a a ma wan, mɔɛ gbɛɛ, miin mbe fɔɛ ɔ, an mbe ee to a ɔ an fandi an ko a. Chɛɛ an mbe gbɛ fɔɛ ɔ, Chasi an ko a. A wan fa‑a, mbɛ a kɔɔ sɔ‑a, a ka saya ɔ, an ko a.

¹⁶Chɛ an fɛ mu, a ka gbɛ sanche ma, mmɔ ee mɔ ɔ mɔ ya to mɔgbuya ta fɛ chia a. Mmɔ na‑a Chasi wɛɛ ya boo ɔ boo mɔgbuya ta fɛ chia a, tima dɔndɔ a, mmɔ ee an yiinachii chɛ chɛ tena to a a.

¹⁷Chɛ ko a, ni mɔ ma‑a gbɛ mɔ dɔndɔɛ a mmɔ bɛ Chasi a, mmɔ ma‑a mɔ nama a. Mmɔ ka‑a mmɔ tachɛ buɛ kɔma kun ma, mmɔ dɛ‑a a nama ɔ.

¹⁸Yataa an‑na koe chɛ n gbɛɛ ma, mmɔ ko a. A wan‑na a ma, Chasi‑a a ma, mmɔ ma‑a Yataa dia nyɔɛ a, mmɔ bɔ‑a chɛɛ ma nyɔncha ɔ. A sin fan‑na nn sɔ, mɔ dɔ mende n ma sawan koe a Yataa tena, dia nyɔncha ɔ.

¹⁹Nn 'na sakana yen ko. Mbɛ Yataa‑a a ma wan, Chasi‑a a ma, mɔɛ gbɛɛ dunya ɔ, an ni ma a wan Yataa dia nyɔɛ a. Yataa nii ma mɔɛ gbɛɛ 'a ko yama n sa tena ɔ bɛn ni. A sin, a‑a an sakana bai chɛ be wan nn ma. Sakana bai chɛ, min mbe a ɔ yian, mmɔ gbɛɛ ɛ ma buɛ min dɔ a dia nyɔɛ a.

²⁰Chɛ ko a, nn yen ko gbɛ nɛ, nn mu Chasi 'a sɔ mɔɛ a. Nn mbe a ɔ yian‑da, a maenɛ mu yɔ Yataa wandi an mbe koɔ tena nn dɔ. Nn mbe wo disa tena, yɔ Chasi wandi an mbe koɔ tena, Yataa ni a ma wo ni mun chɛɛ ma nyɔncha ɔ, wo ni ma a dia nyɔɛ n na.

²¹Mmɔ ko a ni, Yataa‑a ko yama gbɛɛ si Chasi kun ma. Chɛɛ Chasi chɛ nii ma ko yama kan kɔ kan ma ni. Yataa‑a chɛ ma, min mbe a ma, mmɔ ni ma mɔ tandenɛ a a chen kɔɔ. Koe min na mu, mmɔ ma‑a mmɔ dɔndɔɛ a Chasi a.