Read Kono GBOO FEAN BƆƐ KƆYINDI KO A 9 Bible Online

GBOO FEAN BƆƐ KƆYINDI KO A 9 - Kono bible

GBOO FEAN BƆƐ KƆYINDI KO A 9

¹Tima yayi mu gbɛ sanche, n ni bun to gboo nyɛn‑da, a si wo boo fenɛ n ma, miin mbe be mmɔ bɔ Chisian chɛ n ma Chuusaɛn duu ɔ.

²N‑na a ɔ sɔn fan, mbɛ wo ma bɛndenɛ mu, basan koe a an ma. N gbu sin, n mbe yonka tɛ wan, a si wo ma mmɔ bɔɛ Chisian chɛ n tena Masidonia chɛnyɛ ɔ. N mbe a fɔ wan an ye, mbɛ an bɔɛ Chisianɛ nu, miin mbe Akaya chɛnyɛ ɔ, an ma bɛndenɛ mu, kɛn banun, demanɛ chɛ koe a. Faa min mbe wo ɔ demanɛ chɛ koe a, a‑a a ma wan, an sɛsɛ faa bɔ‑a gbɛ.

³Chɛɛ mmɔ suun ma nyɔɛ chɛ nu, Chasi ɔ, n yen ko gbɛ an na na‑a sanche wo tena, nn 'na yonka ɔ siman koe a. A ɔ ni sɔn, mbɛ nn mbe yonka min tɛ, a si wo ma, mbɛ fania ma. Chɛ ni a ma, wo ma bɛndenɛ ni ma, yɔ n‑na wo ma bɛn koe fɔ buɛ min dɔ.

⁴Koe min na mu, ni Masidonia mɔɛ n bea‑a nn fɛ, na koe a, an ni a ɔ yen, mbɛ wo ma wo ma bɛn ni, mau wa mu nn ko a. Wo ta nan tana, n yii na tɛen mu ka buɛ min dɔ wo ma, n mbe ee a fɔ, wo ta mau ɛ ma‑a buɛ min dɔ.

⁵Chɛ an fɛ mu, n‑na n yii na chii, mbɛ a nyin fan, n ni mmɔ bɔɛ Chisian chɛ n disa, an ni na n ya ɔ wo tena. Mbɛ wo na‑a wo boo fenɛ miin be koe fɔ, wo sin‑na a sa tena ɔ bɛn, a be koe a, wo ni a be. An ni a sa tena ɔ bɛn, n ya ɔ. Chɛ sin mbe a ɔ yian‑da wan, mbɛ wo ta faa ɔ mu, wo‑a a be, chɛɛ mɔ an ma a din ni wo ma.

⁶Koe gbu mu chɛ an na, a nyin wo ni min sa wo yii ma. Mbɛ mɔɛ min mbe chin fen pɛɛ chin, ɛ chin fen pɛɛ an ma sɔn. Chɛɛ mɔɛ min mbe chin fen chenama chin, ɛ chin fen sɛmbɛndenɛ an ma sɔn.

⁷Mɔ ɔ mɔ yiima, ɛ min fɔ a ye, a be koe a, a ni an be. A ma a gbɔɔ a be‑a, a sin ma din a ma a be koe a. Koe min na mu, Yataa toen mu mɔɛ a, min mbe ma fenɛ be‑a, a bu ɔ diama ɛ.

⁸A sin, Yataa kundenɛ mu, a ni mɔɛ kɔ boo fen chɛndɛ a, a ɔ benden ba a. Chɛ ni a ma, a mɔɛ chɛ toen mu fenɛ min na tima ɔ tima ko a, a ni ma a boo ɔ. A sin gbu, fenɛ ɛ ma‑a wan a boo ɔ, ko kan kɔ kan ma koe a, min nyin a ma koe a.

⁹Ɛ wan dechee yɔ Yataa 'a gboo‑a min fɔ, a ɔ, “A mɔɛ chɛ ni wai nyima chɛ wan kaka, yɔn tɔɛ n na. A 'a ko chɛndɛ sin, a ni min ma, a danka ee ma‑a.”

¹⁰Yataa sin fan mbe chin fen kuu be chin fen chin mɔɛ ma, ɛ daun fenɛ be mɔ gbu ma, a daun koe a. Chin fen kuu gbɛɛ, i toen mu min na, ɛ a be‑a wan i ma. Ɛ i boo fenɛ ma munda‑a wan, min mbe a ma, e fenɛ min be yakɔɔtawa tɔɛ n ma, a ni koa.

¹¹Ɛ a ma‑a wan i nyanden ba ni ma, ko chɛndɛ ma koe a, tima ɔ tima ko a. Chɛ ɛ a ma wan, mɔ sɛsɛ ni Yataa wai bɔ, i boo fenɛ chɛ n ko a, an mbe miin ma sɔn, a ka nn na.

¹²Koe min na mu, wo e wai min chɛ tena ka, a ee Yataa 'a mɔɛ n ma gbɔsɔɛ an bɔ tena dechee. Chɛɛ ɛ a ma tena wan, mɔ sɛsɛ n ni Yataa wai bɔ.

¹³A sin, wo e wai min chɛ tena ka, ɛ koe min dɔ yian tena, ɛ a ma tena wan, mɔ sɛsɛ ni basɔmaya be Yataa ma. Koe min na mu, wo‑a wo boo si wan sakana bai chɛ kɔɔ, wo e min dɔ yian, a si Chisɔsi ma. A yɛ to, wo 'a wai nyima wɛɛ ko a, wo e min chɛ an na, a basan mɔ dɔ mende n bɛɛ a.

¹⁴Chɛ sin ko a, an toen mu wo a kaka, an mbe samunɛ chɛ tena wo ko a. Koe min na mu, Yataa 'a koadia demanɛ koo, min been mu wo ma.

¹⁵Yataa ɛn wai, a 'a wai nyima ko a, a‑a min chɛ mmɔ a. An wai nyima chɛ sɔnkɔ ee.