Read Kono Gboo Kadesia Ko A 1 Bible Online

Gboo Kadesia Ko A 1 - Kono bible

Gboo Kadesia Ko A 1

¹N fan Pɔɔ, n fan mbe gboo chɛ nyɛn tena, nn bɛ mmɔ suun ma nyɔɛ n gbɛɛ n na Chasi ɔ, miin mbe nɛ. Chisɔsi Chasi 'a sɔ mɔɛ mu n na. Mɔ gbu an ma a ma ni, chɛ ni ma. Chɛɛ Chisɔsi Chasi wandi, an‑na a ma, an fea mmɔ Fa Yataa a, min‑na Chasi chɛ kɔɔ sɔ a ka saya ɔ. N mbe a nyɛn tena wo wan tena, wo wɛn mbe chɔchi n dɔ, Kadesia chɛnyɛ ɔ.

³Mmɔ Fa Yataa, an fea Mansa Chisɔsi Chasi a, an 'na dua ni ma wo ma, a basan an 'na faachima a.

⁴Mansa Chisɔsi chɛ, an na‑a a wandi be a fa koe a, mmɔ 'a ko yama n ko a. A na‑a chɛ ma, mɔ kun ka koe an na, mmɔ 'a ko yama n boo ɔ dunya chɛ ɔ. Mmɔ Fa Yataa sin faa ma koe, Chasi na‑a an ma ka.

⁵Tando ni ma a tɔɛ ma, kuɔ fɔ, ni kuɔ fɔ ko a. A ni ma ka.

⁶Da ɔ gbaa koe mu n tena, mbɛ wo‑a wo ya a mun sakana bai dɔ mende ma. A ɔ wuuma a, wo bun‑da ka‑a Yataa fɛ, min‑na wo chee, Chasi 'a koadia demanɛ ɔ.

⁷N mbe ee a gbu fɔ tena, mbɛ sakana bai chɛndɛ dɔ mende an mbe to nɔ. Chɛɛ mɔɛ dɔ n fan mbe nɔ, miin mbe wo tɔɔ tena. An toen mu, an ni sakana bai chɛndɛ chɛ, a si Chisɔsi ma, a ka a chia ma.

⁸Chɛɛ an ni a fɔ wɛɛ, nn fan, nn ni sakana bai dɔ mende sa, a si Chisɔsi ma, Yataa ni nn danka kuɔ fɔ ko a. Chɛ ma, maeka gbu wɛɛ, min ka‑a banda bu ɔ, ni a wɛɛ‑a chɛ ma, danka ni ma a ma kuɔ fɔ ko a.

⁹Nn‑na min fɔ wo ye tee, n mbe ka to an fɔ tena wo ye. Ni mɔ ɔ mɔ‑a sakana bai chɛndɛ dɔ mende sa wo tena, a ka chɛ ma wo na‑a wo boo si ka min kɔɔ, Yataa ni a mɔɛ chɛ danka kuɔ fɔ ko a.

¹⁰Ni n ma‑a chɛ fɔ‑a, n mbe ee ka a ma‑a na tea tea ɔ, mɔ gbu n ni to n na. Chɛɛ n mbe a ma tena wan ka, Yataa faa ni chima n na. Ni n toen ni tun mɔ gbu n faa ma koe an na, n nii che ma‑a tima chɛ a, Chasi 'a wai chɛ mɔɛ a.

¹¹Chɛɛ n suun ma nyɔɛ nu Chasi ɔ, n toen mu, wo ni ko dɔndɔ an dɔ sɔn. Mbɛ n mbe sakana bai chɛndɛ min sa ka, a si Chisɔsi Chasi ma, mɔ gbu n fan ma a kuu sɔ ni a fɔ‑a.

¹²Koe min na mu, mɔ gbu an ma a be ni n ma, mɔ ɔ mɔ wɛɛ ma n kan ni a ma. Chɛɛ koe ɔ nunden chɛ, Chisɔsi Chasi wandi gbu, an‑na a ɔ yian n na.

¹³Chɛɛ wo gbu, wo na‑a a a min fan, n ni Chu n 'na sawa n bia buɛ min dɔ gbau gbau, a si Yataa fai koe ma. N‑na ko yawaenɛ sa wan mɔɛ n ma, a yama boo a, chɔchi ɔ. N gbu toen ni, n ni an kasaa wan.

¹⁴A gbu sin, Chu mɔɛ n 'na sawa chɛ ɔ, n tɔɛ na‑a bɔ wan, a ben n ya teen ma an sɛsɛ ma, n 'na mɔɛ n tɛ ɔ. N bemba n ta bemba n 'na manda chɛ ko a, mɔ nii sai bɔ n na ɛnden bɛɛ a.

¹⁵Chɛɛ Yataa‑a a boo sɔ wan n ma, n suun‑da tima min na. A‑a n chee wan, a 'a koadia demanɛ ɔ. A bu ɔ dia‑a wan,

¹⁶a 'a denɛ yian koe a n na. A na‑a chɛ ma, min mbe a ma, n ni a wakoe ɔ yian mɔɛ n na, miin nii ma Chu mɔ a. A‑a a yian kɛn, n nii ma n kun puin ni mɔ gbu kan kɔ kan ma.

¹⁷N mbe ee n sɛ koe fɔ, Chuusaɛn duu ɔ, chɛ n tan koe a, miin ni Chisɔsi 'a sɔ mɔɛ n na, n ya ɔ. Chɛɛ n ta‑a a ya kɔɔɛ a, Adebia chɛnyɛ ɔ, a sin, n yɛ‑a wan to Damasikɔsi duu ɔ.

¹⁸Mbɛ san sawa gbakɔ, n sɛ‑a Chuusaɛn duu ɔ, Pita[1] kɔndɔn tena. A sin, nn fea ni wan nɔ, aan tee tan kun ma duu ko a.

¹⁹Chɛɛ n nii ma Chisɔsi 'a sɔ mɔ dɔ gbɛɛ yen ni, mɔɔ dechee Chimisi, Mansa Chisɔsi suun ma nyɔɛ.

²⁰N mbe ka min nyɛn tena, wo tena, tea mu. N mbe ka a fɔ‑a Yataa chen kɔɔ wan.

²¹Chɛ gbakɔ, n ta‑a wan Siyia chɛnyɛ ɔ, an fea Sidisia a.

²²Chɛɛ a tima chɛ a, mɔɛ miin mbe chɔchi n dɔ Chudia chɛnyɛ ɔ, miin kai faen ni Chasi a, an nii n yen, an ni n sɔn.

²³An na‑a chɛ an na min dechee, mɔɛ n mbe a fɔ, an dɔ, “Kaminɛ min ni ko yawaenɛ sa mmɔ ma, a yɛ‑a mmɔ kaa a. An mbe gbɛ mɔɛ n kan‑da a si ko dɔndɔ gbe chɛ ma, a toen ni min kasaa koe a.”

²⁴A sin, n bakoe na‑a a ma wan, an‑na Yataa tando.