Read Kono Gboo Kadesia Ko A 2 Bible Online

Gboo Kadesia Ko A 2 - Kono bible

Gboo Kadesia Ko A 2

¹San tan kun ma naanin gbakɔ, mbɛ n sɛ‑a to Chuusaɛn duu ɔ, nn fea Banabasi a. Nn ta‑a wan Taitɔsi a, nn boo ɔ.

²Chisɔsi na‑a koe min dɔ yian n na, an na‑a a ma, n sɛ‑a Chuusaɛn. A sin, n‑na a sa wan an kɔɔ, chɛɛ nn dechee ni bɛnɛ ɔ, nn bɛ an 'na gbakoo n na. N‑na sakana bai chɛndɛ chɛ ɔ yian an na, n na‑a min dɔ yian mɔɛ chɛ n na, miin ma Chu mɔ a. N‑na chɛ ma, min mbe a ma, n‑na wai min chɛ, a ma na to n ma gbama gbama a.

³Chɛɛ Taitɔsi nan fan bɛɛ gbu, nn fea ni wɛɛ, a sin Kiisi mɔɛ mu a a, a nii ma din ni a ma, a a ni kamincha.

⁴Chɛɛ mmɔ suun ma nyɔɛ dɔ nu Chasi ɔ, a wakoe ɛ sa ɔ dechee miin ya kɔɔɛ, chɛɛ a ee an faa ɔ, an toen ni chɛ an na. A sin, an na‑a wan nn tɛ ɔ yɛdɛn, min mbe a ma, an ni nn na tɛ. An ni a ɔ gbɛ, Chisɔsi‑a mmɔ bɔ buɛ min dɔ sawa chɛ boo ɔ, mbɛ an‑na a ma to, mmɔ yɛ‑a an yɔncha ɔ.

⁵Chɛɛ tima kundu ɛndenɛ wɛɛ ko a, nn ma dɔn ni an ye. Chɛ ni a ma, sakana bai chɛndɛ chɛ, a si Chisɔsi ma, tea min mbe a gbaa, a ma na ka a chia ma wo ko a.

⁶A sin, mɔɛ chɛ nu, baa ni miin ma (Yataa ee mɔ gbu tɛ bɔ, chɛ ko a mu, n ma n gbɔsɔ ni an ni buɛ min dɔ), an nɛnɛ nu, an nii ma fen fen na. Ka n ni chɛ fɔ to, mɔɛ miin mu, baa ni an ma, an nii ma fen kɔ fen sa ni n 'na sakana bai kun ma.

⁷Chɛɛ an na‑a a ɔ yen fan, mbɛ Yataa ban‑da gbɛ n ya a, sakana bai chɛndɛ chɛ ɔ yian koe mɔɛ n na, miin ma Chu mɔ a. A maen fan mu dechee, yɔ Yataa na‑a Pita ya buɛ min dɔ, a ɔ yian koe a mɔɛ chɛ n na, miin mu Chu mɔɛ a.

⁸Koe min na mu, Yataa min na‑a a ma, Pita ta‑a wai chɛ koe a mɔɛ chɛ n tena, miin mu Chu mɔɛ n na, an Yataa dɔndɔ gbe chɛ an‑na n bɛɛ sɔ, mɔɛ n tena, miin ma Chu mɔ a.

⁹Chimisi, Pita, ni Chɔn, mɔɛ n na‑a an ya, mɔ gbau gbau wa n fan na. An‑na a ɔ yen kɛn, mbɛ Yataa wandi an na‑a wai chɛ be n ma, koadia demanɛ ɔ, an‑na an boo si wan nn kɔɔ, nn fea Banabasi a. An dɔn‑da wan nn ta koe ma mɔɛ n tena, miin ma Chu mɔ a, mbɛ an sin ta‑a Chu mɔɛ n tena.

¹⁰An dechee mu, miin‑na nn dɔ tisa, yɔn tɔɛ n deman koe a tima ɔ tima ko a. A sin, koe chɛndɛ chɛndɛ gbu an nii nɛ, n ma bɛnden ni min ma koe a.

¹¹Chɛɛ Pita na‑a kɛn Andiɔki duu ɔ, n‑na a ma nyin fan, a wandi ya kɔɔɛ ma, koe min na mu, a na‑a ma bɔ koe an ma.

¹²A na‑a a fo kɛn nɔ a saa saa a, an bɛ an ni daunɛ chɛ mɔɛ chɛ n na, miin ma Chu mɔ a. Chɛɛ mɔɛ dɔ n na‑a kɛn, a ka Chimisi tena, a wan Pita sɛmbɛ‑a wan daun chɛ koe a, an bɛ an mɔɛ n na, a ka‑a an kaa a. Koe min na mu, a chianden ni mɔɛ chɛ n fan ma, miin ni a fɔ, mbɛ mɔɛ ee ma Chasi fɛ mɔɛ chɛndɛ chɛndɛ a, ni a a ma kamincha ni yɔ Chu mɔɛ nu.

¹³Pita dɔndɔ gbe nii ma, chɛɛ Chisianɛ tɔɛ n bɛɛ, miin mu Chu mɔɛ a, an na‑a a ma ka wan. Chɛ na‑a a ma wan, Banabasi wɛɛ, a bea‑a an fɛ, bɔ koe mɔɛ chɛ n kaa a, miin ma Chu mɔ a.

¹⁴Chɛɛ n na‑a a ɔ yen fan, mbɛ an nii ma tan ni, min sien mu tea ma, sakana bai chɛndɛ chɛ ɔ. Mbɛ n‑na a fɔ Pita ye, an gbɛɛ ya kɔɔɛ ma, n dɔ, “I wan Pita, i wɛn mu Chu mɔɛ a, chɛɛ e koe ma‑a yɔ mɔɛ min ma Chu mɔ a. Fen ko a, e a din‑da mɔɛ n ma, miin ma Chu mɔ a, an ni koe ma yɔ Chu mɔɛ nu?”

¹⁵Mmɔ wandi gbu, mmɔ wɛn mu ka Chu mɔɛ n na, mmɔ ma mɔɛ chɛ n na, mɔɛ min nii sɔ ɔ Yataa 'a chia ma, mɔɛ miin ma ka Chu mɔ a.

¹⁶Chɛ gbɛɛ ɔ, mmɔ wɛn mu Chu mɔɛ n na, mmɔ ni a ɔ sɔn, mbɛ mɔɛ ɛ wai min chɛ, an mbe ee a ma, Yataa ni a ya mɔ tandenɛ a, a tena. Chɛɛ chɛ ɛ bɔ kai fa an dɔ, mɔɛ ɛ min chɛ Chisɔsi Chasi a. Chɛ ko a, mmɔ wɛɛ mmɔ‑a mmɔ kai fa Chisɔsi Chasi a, min mbe a ma, Yataa ni mmɔ ya mɔ tandenɛ n na, a tena, mmɔ 'a kaifa chɛ ko a. A ee bɔ wai an dɔ, sawa ɛ a ma, mɔɛ ɛ min chɛ. Koe min na mu, ni wai ta fɛ chia a mu, sawa ɛ a ma mɔɛ ɛ min chɛ, Yataa ee mɔ ɔ mɔ ya mɔ tandenɛ a, a tena.

¹⁷Ɛ wan Chu mɔɛ dɔ n yii ma, mbɛ mmɔ ee sɔ ɔ Yataa chia ma. Koe min na mu, mmɔ kai faen mu Chasi an na, min mbe a ma, Yataa ni mmɔ ya mɔ tandenɛ n na. Ni mmɔ‑a chɛ ma, mmɔ ɛ ma‑a ka a ɔ yian fan na, mbɛ Chasi wandi an mbe a boo si ko yama ma kɔɔ. A sin, a ee ka buɛ chɛ ɔ.

¹⁸Chɛɛ n ni yɛ wan to, n ni n kunɛ don Chu sawa kɔɔ, n kunɛ na‑a bɔ min kɔɔ, mbɛ n‑na a yian, mbɛ ko yama ma mɔɛ mu n na.

¹⁹Koe min na mu, Yataa 'a sawa ko a ni dechee, Chasi fa‑a. Chɛ‑a a ma wan, n fa‑a wan, sawa chɛ ta fɛ chia a, min mbe a ma, n ni ma Yataa ta fɔɛ ɔ. An ban‑da gbɛ n fa‑a, kɔn gbengbandenɛ ma, nn fea Chasi a.

²⁰N fandi gbu wɛɛ, n faenɛ mu gbɛ, chɛɛ Chasi ɛ sɔ ɔ n kɔ. Chɛ ko a, n mbe buɛ min dɔ fɔɛ chɛ ɔ, n kai faen mu Yataa 'a denɛ an na. A wan to‑a n na, mbɛ a‑a a fɔɛ be n ko a.

²¹N mbe ee dɔn, n ni Mansa Chisɔsi 'a koadia demanɛ kɔɔsa bia. Koe min na mu, ni Yataa 'a sawa nu, an fan mbe mɔɛ ma mɔ tandenɛ a Yataa tena, mbɛ Chasi fa‑a wan fuu.