Read Kono Gboo Kadesia Ko A 3 Bible Online

Gboo Kadesia Ko A 3 - Kono bible

Gboo Kadesia Ko A 3

¹Wo wan Kadesia mɔɛ nu, wo wooen mu. N ma a ɔ sɔn mɔɛ min nya‑a wo a. Wo wandi gbu, wo too n‑na a a min fan, mɔɛ n‑na Chisɔsi Chasi gbangban buɛ min dɔ kɔn gbengbandenɛ ma, a fa‑a nɔ.

²N mbe chɛ an fɔ tena dechee wo ye. Wo bea koe a sawa chɛ fɛ, an mbe ee a ma, Yataa Nyina ni bea wo fɛ. Chɛɛ wo dan sakana bai chɛndɛ chɛ a, ni wo‑a a min, an mbe a ma, ɛ bea wo fɛ.

³Wo wooen ba mu. Wo wɛn‑na a kuu sɔ, Yataa Nyina ɛ wo fɛ, wo wan mbe ka gbɛ danka‑a tachɛ‑a mɔgbuya ta fɛ chia a.

⁴Wo tɔɔen mu kaka, ma koe a Chasi ko a. N ma dan ni gbu a a, mbɛ wo‑a koe miin gbɛɛ ɔ bia, mɔnɛ fuu mu.

⁵Yataa‑a a Nyina bea wan wo fɛ, a‑a kamaya koe n ma wo tɛ ɔ. Chɛɛ chɛ an‑na a ma, Yataa na‑a chɛ ma. Wo na‑a sakana bai chɛndɛ chɛ a min fan, a si Chisɔsi ma, a yɛ to, wo‑a wo kai fa wan Chisɔsi a. A nii ma chɛ ma ni, a mu min na, wo bea‑a sawa fɛ.

⁶Wo wo yii na chii wɛ, koe min ma‑a Ebeami a. Yataa 'a gboo‑a a fɔ wan, a ɔ, “Ebeami‑a a kai fa wan Yataa a. A sin, Yataa wɛɛ‑a a ya mɔ tandenɛ a a chen kɔɔ.”

⁷Chɛ ni a ɔ yian wo a, mbɛ mɔɛ miin kai faen mu Yataa a, an fan mu Ebeami cheeya chɛndɛ chɛndɛ n na.

⁸A sin, Yataa 'a gboo‑a chɛ kɔɔ fɔ wan. Mbɛ Yataa ɛ a ma‑a wan, mɔɛ miin ma Chu mɔ a, an ni an kaifa a a, mbɛ a‑a an ya mɔ tandenɛ n na, a chen kɔɔ. Chɛ an‑na a ma, a fua‑a sakana bai chɛndɛ chɛ ɔ yian‑da Ebeami a. A‑a a fɔ wan a ye, a ɔ, “Dunya ɔ mɔɛ tɔɛ n gbɛɛ, an mbe dua sɔn‑da, ɛ ka‑a i wan na.”

⁹Chɛ ko a, mɔɛ chɛ nu, miin kai faen mu Chisɔsi a, an duaenɛ mu, an bɛ Ebeami a, min kai faen ni Yataa a.

¹⁰Mɔɛ gbɛɛ, miin too ma sɔen mu Mosisi 'a sawa ma, an tan koe a Yataa chen kɔɔ, an mbe Yataa 'a danka an kɔɔ. Koe min na mu, Yataa 'a gboo ɔ te, a ɔ, “Yataa ɛ mɔ ɔ mɔ danka‑a wan, min mbe ee don‑da koe chɛ n gbɛɛ kɔɔ, miin mbe a 'a sawa gboo ɔ, a ni an gbɛɛ ma.”

¹¹Mɔ ɔ mɔ‑a a ɔ yen fan gbɛ, mbɛ Yataa ee mɔ ɔ mɔ ya mɔ tandenɛ a, a 'a sawa wakoe a. Koe min na mu, a nyɛnden fan mu Yataa 'a gboo ɔ, “Mɔɛ min mbe a kai fa‑a Yataa a, ɛ an ya mɔ tandenɛ a, a sin fan mbe kuɔ fɔ fɔɛ ma sɔn.”

¹²Chɛɛ bea koe sawa chɛ fɛ, ko dɔndɔ ma, an fea mɔɛ kai fa koe ma Yataa a. Koe min na mu, Yataa 'a gboo ɔ te, “Mɔɛ miin mbe sawa chɛ n gbɛɛ bɔ‑a a gbee a chɛndɛ chɛ, an mɔɛ chɛ n fan mbe kuɔ fɔ fɔɛ ma sɔn‑da.”

¹³Chasi‑a mmɔ kun ka wan, a bɔ sawa chɛ 'a danka kɔɔ. Mmɔ wakoe an na‑a a ma, a‑a danka chɛ ɔ bia, a ka koe a mmɔ kun ma. Koe min na mu, a nyɛnden fan mu Yataa 'a gboo ɔ, “Mɔ ɔ mɔ, min mbe fa‑a dɛn dɔ kɔnɛ ma, Yataa ni a danka.”

¹⁴Chɛ ni a ma, Chisɔsi Chasi 'a gbasaya ɔ, Yataa 'a dua min mbe Ebeami ma, a ni ma mɔɛ chɛ n kun ma, miin ma Chu mɔ a. Chɛ an mbe a ma, mmɔ ni kun Yataa Nyina ma sɔn‑da, mmɔ too ɔ dia‑a min ma sɔn koe a, ni mmɔ‑a mmɔ kai fa Chisɔsi Chasi a.

¹⁵N suun ma nyɔɛ nu Chasi ɔ, ka n mbe tɔmɔsi yian, mɔgbuya ɔ. Mɔ fea nu, ni an‑na dɔbɛnɛ chɛ, mbɛ an kuiɛ bɛn‑da a ma, mɔ ɔ mɔ ee a ka a gba ɔ, chɛ ma, mɔ ɔ mɔ ni a kun ma sa. Ni mɔɛ gbɛɛ ban‑da dɔn‑da a ma, ɛ to ka wan.

¹⁶Yataa‑a tooɔdia sɛsɛ chɛ wan Ebeami a, ni a cheeya. Yataa 'a gboo ma a fɔ ni, “cheeya nu,” min mbe a ɔ yian, mbɛ an kɔ koo wan. Chɛɛ a yii ni dɔndɔɛ an na, a ɔ, “mbɛ ni i cheeya,” min mu Chasi a.

¹⁷N toen mu n ni min fɔ, an nɛ. Mbɛ Yataa‑a sawa be wan Mosisi ma. A ban‑da kɛn dɔbɛnɛ chɛ‑a Ebeami a, san chɛmɛ naanin, san bi sawa gbakɔ, mbɛ a‑a sawa chɛ be Mosisi ma. Chɛ an fɛ mu, an sawa chɛ ee che dɔbɛn chɛ yɔn‑da, Yataa ban‑da min chɛ‑a. Chɛ ee che ma‑a, min mbe a ma, Yataa‑a tooɔdia min chɛ Ebeami a, a ni ma fuu gbama a.

¹⁸Koe min na mu, Yataa ɛ koe min chɛ mɔ gbu ye, ni sawa an mbe a chɛ, mbɛ fanka ee to tooɔdia chɛ a, Yataa‑a min chɛ. Chɛɛ Yataa gbu, a‑a tooɔdia min chɛ Ebeami a, an na‑a a ma, a‑a koadia demanɛ chɛ a a.

¹⁹Chɛɛ sawa chɛ nii ma sa ni gbama a. Ko yama ma, an fɛ mu, Yataa‑a sawa chɛ sa dɔbɛn chɛ kaa a. Koe ni ma ka, aan Ebeami cheeya chɛ ni na, tooɔdia chɛ chɛ‑a min na. A sin, Yataa‑a sawa chɛ a ben maeka n fan dɔ, a be koe a Mosisi ma, min ni mɔ gbu n tɛ ɔ an bɛ Yataa a.

²⁰Tɛ mɔɛ tana, a 'a wai mu kaka fea gbɛɛ faa chima koe an na. Chɛɛ Yataa dɔndɔ gbe, an‑na tooɔdia chɛ Ebeami a.

²¹Chɛɛ chɛ ma a ɔ yian ni, mbɛ sawa chɛ ma to ni ko ɔ ko a, a si Yataa 'a tooɔdia ma. Koe min na mu, ni sawa been fan mu, min mbe fɔɛ be, mbɛ sawa an mbe a ma, Yataa ni mɔ ya mɔ tandenɛ a.

²²Chɛɛ Yataa 'a gboo ɔ te, dunya gbɛɛ, ɛ ko yama 'a gbasaya an kɔɔ. Chɛ ko a, Yataa na‑a tooɔdia min chɛ, ɛ a be‑a chɛ n fan ma, miin mbe an kai fa‑a Chisɔsi Chasi a.

²³Mmɔ e na to mmɔ kai fa‑a Chisɔsi Chasi a, mmɔ ni sawa an kɔɔ. Sawa chɛ‑a mmɔ bia wan, yɔ pimbi chenɛ a sa mɔɛ nu, aan tima chɛ, mmɔ kai fa koe Chisɔsi a, a ɔ yian‑da mmɔ a tima min na.

²⁴Chɛ‑a a ɔ yian fan, mbɛ Yataa‑a sawa an sa mmɔ kun ma, aan Chasi na tima a. A sin na‑a, min mbe a ma, mmɔ ni mmɔ kai fa a a, mbɛ Yataa‑a mmɔ ya mɔ tandenɛ a.

²⁵Mmɔ sin‑na mmɔ kai fa ka gbɛ buɛ min dɔ Chasi a, mmɔ ee to an sawa kɔɔ, mmɔ kun ma fɛn koe a.

²⁶Koe min na mu, ni wo‑a wo kai fa Chisɔsi Chasi a, wo gbɛɛ mu Yataa 'a denɛ n fan na, wo gbɛɛ mu gbɛ mɔ dɔndɔɛ an na, wo bɛ Chisɔsi Chasi a.

²⁷Koe min na mu, yii chɛ‑a wo gbɛɛ kunɛ ɔ Yataa chia a, wo ma koe mɔ dɔndɔɛ a Chasi a. A sin, wo‑a Chasi sɔnɛ ya gbɛ.

²⁸Wo gbɛɛ, wo bɛ Chisɔsi Chasi a, wo ma‑a gbɛ mɔ dɔndɔɛ a. Tɛ bɔ kan kɔ kan mbe ee to Chu mɔɛ n ma, an bɛ mɔɛ n na, miin ma Chu mɔɛ n na. Tɛ bɔ ee chɛ n ma miin mu yɔnɛ n na, an bɛ chɛ n na, miin mbe an fandi ko a. Tɛ bɔ ee mɔ kaima an ma, an bɛ musu n na. Mɔ tɛ bɔ ee to nɔ.

²⁹A sin, ni wo e gbɛ Chasi an ko a, mbɛ wo mu gbɛ Ebeami cheeya n fan na. Wo wan yɛ‑a a gbaa a, tooɔdia chɛ ko a.