Read Kono Gboo Kadesia Ko A 5 Bible Online

Gboo Kadesia Ko A 5 - Kono bible

Gboo Kadesia Ko A 5

¹Ni yɔncha tana mu, Chasi‑a mmɔ bɔ a ɔ. Chɛ an fɛ mu, mmɔ sɔ chidi, a ko a. Wo butuin chɛ, min mbe a ma, wo ma na don to an yɔncha fanka ma chɛ kɔɔ.

²Sanche gbɛ, n fan, Pɔɔ, n mbe chɛ an fɔ tena wo ye. Ni wo dɔn‑da an ni wo a kamincha, Chasi ee na‑a wo deman‑da ɛnden bɛɛ a.

³N mbe chɛ fɔ tena to mɔ ɔ mɔ ye, min ma Chu mɔ a, chɛɛ a dɔn‑da a a ni kamincha. Mbɛ a dindenɛ mu an mɔɛ chɛ ma, don koe a an sawa gbɛɛ kɔɔ.

⁴Wo tɛ du‑a gbɛ, wo bɛ Chisɔsi Chasi a. Wo wan, ɛ wo wɛn yii ma, mbɛ ni wo‑a sawa chɛ gbɛɛ a tachɛ, Yataa ɛ wo ya wan mɔ tandenɛ n na, a tena. Wo nɛnɛ nu, wo fo‑a gbae, Yataa 'a koadia demanɛ a.

⁵Koe min na mu, mmɔ tana, Yataa Nyina 'a gbasaya ɔ, yiinatɛ ɛ ka mmɔ wɛn dɔ, mbɛ Yataa ɛ mmɔ ya wan mɔ tandenɛ n na, a tena. Mmɔ kai faenɛ ɛ Chasi a, mbɛ chɛ ɛ ma‑a wan.

⁶Koe min na mu, mmɔ mu ka buɛ min dɔ mɔ dɔndɔɛ a, mmɔ bɛ Chisɔsi Chasi a, Yataa ee ko dɔ gbɛɛ kan kɔ kan ma fɛn. A ee a ma fɛn, ni mɔɛ a kaminchaen fan mu, chɛ ma, ni a a ma kamincha ni. Ɛ min yen dechee, an nɛ, ni mmɔ‑a mmɔ kai fa wan a a, min dɔ ɛ yian koadia ɔ.

⁷Wo na‑a a kuu sɔ wan ta koe a ya ɔ ma chɛndɛ chɛ. Chɛɛ n ma a ɔ sɔn, mɔɛ min‑na a fɔ wo ye, wo ni sɛmbɛ bea koe a tea chia chɛ fɛ.

⁸Wo yiima mun koe chɛ, a ma ka ni Yataa an na, min‑na wo chee, a‑a a boo sɔ wo ma, ma koe a a ta mɔɛ n na.

⁹An mbe chɛ an fɔ, an dɔ, yisin denɛ chɛenɛ feawa funku ɔ, an dɔ, an mbe a ma, feawa funku gbu ɛ sɛ wa chɛ.

¹⁰N yii faen fan mu Mansa Chisɔsi ma, mbɛ wo ee bea‑a mɔ dɔ mende da a kuiɛ fɛ, chɛɛ wo e bea‑a n ta an fɛ. A sin, mɔɛ min mbe wo tɔɔ‑a, gbɛmbo ɛ wan a ko a. Chɛ ɛ ma‑a wan, a ni ma mɔ ɔ mɔ a.

¹¹Chɛɛ n suun ma nyɔɛ nu Chasi ɔ, n tana, n‑na n boo bɔ kanɛ chɛ koe a, mbɛ ni mɔɛ a ma kamincha ni, a ee ya mɔ tandenɛ a Yataa tena. Chɛ an fɛ mu, an mbe tun ko yawaenɛ sa‑a n ma. Ni chɛ sin ko a mu, Chu mɔɛ n faa nii tɛ‑a n ma, ni n ni mɔɛ n kan, a si an na kamincha koe an ma. Chɛɛ n mbe mɔɛ n kan, a si Chisɔsi 'a saya an ma, kɔn gbengbandenɛ ma.

¹²Ɛ wan n yii ma, mbɛ mɔɛ miin mbe ka wo yiima ɔ basan basan tena, an mbe an fandi ma‑a wan kai busi a.

¹³Koe min na mu, n suun ma nyɔɛ nu Chasi ɔ, Yataa‑a wo chee wan, a bɔ yɔncha ɔ. Chɛɛ yuu min tɛ‑a ka wo ma, wo ma ben ko yama ma‑a, wo gboo faa ma koe nu, wo ni a dɛn wo bɔ koe ma yɔncha ɔ. Chɛɛ koadianyɔncha ɔ, wo ma bɔi denɛ a wo nyɔn ko a.

¹⁴Koe min na mu, Yataa‑a sawa miin gbɛɛ be Mosisi ma, a kun tɛen mu bai dɔndɔ gbe an na. A ɔ, “Wo to wo 'a mɔɛ n na, yɔ wo toen mu buɛ min dɔ wo wandi a.”

¹⁵Chɛɛ ni wo‑a wo nyɔn chin, wo ni wo nyɔn kasaa, chɛ ni ma wo yii ma. Mbɛ ni wo ma tima ya ni, wo e ban‑da wan wo nyɔn kasaa‑a gbae.

¹⁶Chɛɛ n ni chɛ fɔ wo ye. Wo tachɛ Yataa Nyina gbee a. Wo faa ma ta wo faa ma koe yama chɛ n tena, bea koe a an fɛ.

¹⁷Koe min na mu, mmɔ faa ma koe yama nu, an ko a ma di Yataa Nyina ye. Yataa Nyina wɛɛ, a toen mu koe miin na, mmɔ wɛɛ ma to ni an na. Mɔgbuya chia, a kan kɔ sɔenɛ mu Yataa Nyina a. Chɛ an fɛ mu, tima ɔ tima ko a, wo ee che koe ma‑a wo toen mu min ma koe a.

¹⁸Chɛɛ ni Yataa Nyina‑a wo sɔ chia ma, mbɛ wo ee to sawa kɔɔ.

¹⁹Mmɔ faa ma koe yama nu, an mbe wan sa ɔ den. Ko tɛ an mbe ma a ɔ, a boo a ee ko ɛnden bɛɛ a, a maenɛ ɛ yɔ ba tana ti.

²⁰A mu to fenɛ n fai koe an na, fenɛ miin ma Yataa a, ni yawa gbasi, a basan chɛɛ ma nyɔncha a. A yɛ to, koɔ wa, toomaya, ni faa gbandiaya. A sin, an mbe to dechee an fandi an na, mbɛ an du‑a ben‑da gbambe ma.

²¹An ya ɛ ma an bɔɛ n boo fenɛ n fan fɛ, an mbe gbɛ wa min, an mbe daun chɛ bɛnɛ bia wan tima ɔ tima ko a, an mbe ko sɛsɛ dɔ gbɛɛ ma. N sin, n na‑a wo a si buɛ min dɔ a saa a, ka n mbe wo a si to sanche. Mbɛ mɔɛ miin mbe koe chɛ n ma‑a, an mbe ee na‑a don‑da Yataa 'a mansaya kɔɔ.

²²Chɛɛ ni Yataa Nyina ma‑a mɔɛ fɛ, ɛ a mɔɛ chɛ ma ka wan. An fan nɛ koadia a, buɔdia, faachima, faabia, ko chɛndɛ ma, mɔ chɛndɛya, ni mɔɛ ma koe danaya tɔɛ a.

²³A yɛ to, mɔɛ ni a ma chima, a sin, mɔɛ e kun fan i faa ma. Chɛ nɛnɛ nu, sawa kan kɔ kan mbe ee sɔ an na.

²⁴Mɔɛ chɛ n sin, miin gbɛɛ, an mbe Chisɔsi Chasi ko a, an‑na chɛ an ma. Koe gbɛɛ, min ma nyin an 'na mɔgbuya ɔ, an faa ɛ miin dɔ chɛndɛ chɛ, an‑na an gbangban kɔn gbengbandenɛ ma.

²⁵Ni mmɔ ɛ fɔɛ chɛ ɔ, mmɔ tachɛ Yataa Nyina gbee a, mbɛ mmɔ bea‑a chia chɛ fɛ, Yataa Nyina ɛ mmɔ sɔ‑a min ma.

²⁶Mmɔ ma yonka tɛ, mmɔ sin ma sɛ mmɔ nyɔn faa ma, mmɔ sin ma toomaya bɔ mmɔ nyɔn na.