Read Kono Gboo Ɛfisɔsi Ko A 3 Bible Online

Gboo Ɛfisɔsi Ko A 3 - Kono bible

Gboo Ɛfisɔsi Ko A 3

¹Chɛ an fɛ mu, n fan Pɔɔ, n mbe samunɛ chɛ tena wo ko a. N fɛn mu ka, n mbe sa ɔ pimbi chenɛ a, koe min na mu, n mbe wai chɛ tena Chisɔsi Chasi ye wo ko a, wo wɛn ma ka Chu mɔ a.

²Mmɔ a ya wɛ, mbɛ wo‑a a a min fan, Yataa‑a n ma buɛ min dɔ wai chɛ mɔɛ a, a ko a. Wo wan ko a mu, a‑a koadia deman chɛ chɛ n na.

³N‑na a sima ɔ yian fan wo a gboo ɔ, a si koe chɛ ma, min dɔ nunden ni, Yataa‑a a ɔ yian buɛ min dɔ n na.

⁴Ni wo‑a gboo nyɛnden chɛ kan, wo yii ɛ ta‑a wan nɔ, mbɛ n‑na koe chɛ n dɔ gbɛ wan, a si Chisɔsi Chasi ma.

⁵Suun, koe n fan nɛ, miin dɔ nii yian mɔ gbama n na. Yataa Nyina‑a a ɔ yian fan mɔɛ n na, miin mbe tenchen Yataa ko a. A‑a a ɔ yian Chasi 'a sɔ mɔɛ n na, an bɛ Yataa 'a gbonka chɛ mɔɛ n na.

⁶Yataa‑a dɔbɛn chɛ an yian an na. Mbɛ Chisianɛ miin ma Chu mɔ a, an mbe an ta ma sɔn‑da wan dua gbɛɛ ɔ, Yataa ɛ min be. Ɛ ma‑a wan dechee yɔ Chisianɛ nu, miin mu Chu mɔɛ n na, an mbe a ma sɔn‑da buɛ min dɔ. Mɔɛ miin ma Chu mɔ a, an ma‑a mɔ dɔndɔɛ a, an bɛ Chu mɔɛ n na. Yataa‑a a 'a mɔɛ n too ɔ dia min na, mɔɛ miin ma Chu mɔ a, an bɛɛ an mbe a ma sɔn‑da wan. Koe min na mu, an mu mɔ dɔndɔɛ an na Chisɔsi Chasi a. Yataa 'a sakana bai chɛndɛ‑a a fɔ ka wan.

⁷Sakana bai chɛ, an ko a mu, Yataa‑a n ma a 'a sɔ mɔɛ a. Chɛ bɔ‑a a 'a koadia demanɛ an dɔ, n‑na min ma sɔn, a 'a gbasaya ɔ.

⁸N fan, n fɛn ma wɛɛ ka mɔ a tenden na, Yataa 'a mɔɛ n gbɛɛ tɛ ɔ, chɛ gbɛɛ ɔ, a‑a koadia deman chɛ chɛ n fan na. A ɔ, Chisɔsi na‑a ko chɛndɛ miin ma, n ni a ɔ yian chɛ n na, miin ma Chu mɔ a. An ko chɛndɛ chɛ nu, koe n fan nɛ, miin nyin a danka ee.

⁹A sin, n ni a ma to, mbɛ mɔɛ n gbɛɛ ni koe ɔ gbɛ, a si koe chɛ ma, Yataa‑a min dɔ nun kɛn a‑a dunya a dan suun tima min na.

¹⁰A‑a chɛ ma, min mbe a ma sanche, a ni a ɔ yian nyina yama n na, an bɛ an ya ɔ sɔɛ n na, gbasaya ɛ miin boo ɔ banda a, mbɛ yiimatɛ koo a ɔ kaka. A‑a chɛ ɔ yian an na koe n fan dɔ, a‑a miin chɛ chɔchi ko a.

¹¹Yataa‑a a ɔ bɛn chɛ ma koe a suun pɔɔ, a e na to dunya chɛ a dan‑da. A sin, a‑a chɛ ma, mmɔ 'a mansa Chisɔsi Chasi an dɔ.

¹²Mmɔ kai faen fan mu a a, an fɛ mu, mmɔ dɔndɔɛ mu mmɔ a, mmɔ bɛ a a. Chia a kaen fan mu mmɔ ya ɔ Yataa tena, mmɔ sin mbe sɔ wan a chen kɔɔ, chian mbe ee ma mmɔ ya a.

¹³Chɛ an fɛ mu, wo dimu, wo faa ma yɔn, a si tɔɔya chɛ ma, n mbe min chɛ tena wo ko a. A gbu sin ni na basɔmaya a wo tena.

¹⁴Chɛ an fɛ mu, n mbe n kumbai gbangban tena mmɔ Fa Yataa chen kɔɔ.

¹⁵Mmɔ Fa chɛ sin, dambi kan kɔ kan, banda bu ɔ, ni nɛ dunya chɛ ɔ, a wan mbe an sɔnɛ be.

¹⁶Dua sɛsɛ ɛ wan a boo ɔ, banda bu ɔ. A sin, n mbe samunɛ chɛ tena, a ni a ma wo ɔ ni gbɛa, wo 'a danaya ɔ. Chɛ ni ma, Yataa Nyina 'a gbasaya ɔ

¹⁷A sin ni a ma to, Chasi wakoe ni ma wo faa ɔ, koe min na mu, wo‑a wo kai fa a a. N mbe samunɛ chɛ tena, wo ni sɔ gban koadia ɔ, wo ni yɛ, wo ɔ ni gbɛa chɛndɛ chɛ.

¹⁸Chɛ ɛ a ma‑a wan, wo ni a ɔ gbɛ chɛndɛ chɛ, wo 'a koadia da a koo buɛ min dɔ Chasi faa ɔ. A yɛ to, Yataa 'a mɔɛ tɔɛ n gbɛɛ, an bɛɛ ni a ɔ gbɛ a buɛ chɛ ɔ.

¹⁹A gbu sin nyin, n mbe samunɛ chɛ tena, wo ni a 'a koadia a tinsɔn. Chɛɛ a gbu sin, a ma koe a, mɔɛ ee min dɔ gbɛ, ɛnden bɛɛ a. Chɛ sin fan fɛ mu, wo sɔnɛ n ni ma yɔ Yataa wandi gbu ta.

²⁰Mmɔ Yataa tando, min 'na gbasaya ɛ wai chɛ tena mmɔ ɔ. A gbasaya ɛ wan Yataa boo ɔ, koe n ma koe a mmɔ yii nii miin dɔ. Ɛ koe n ma wan, miin koo an ni ben chɛ n ma, mmɔ ɛ a ɔ tisa miin ma koe a.

²¹Mmɔ wɛn mbe chɔchi ɔ, miin mu mɔ dɔndɔɛ a, mmɔ bɛ Chisɔsi Chasi a, mmɔ Yataa tando tima ɔ tima ko a, kuɔ fɔ ni kuɔ fɔ ko a. A ni ma ka.