Read Kono Gboo Ɛfisɔsi Ko A 6 Bible Online

Gboo Ɛfisɔsi Ko A 6 - Kono bible

Gboo Ɛfisɔsi Ko A 6

¹Wo wan denɛ nu, wo ma‑a ka buɛ min dɔ mɔ dɔndɔɛ a, wo bɛ Mansa Chisɔsi a, wo kooya be wo woo mɔɛ n ma. Chɛ an nyin a ma koe a.

²Yataa 'a sawa saa saa, an nɛ, tooɔdia saen mu min kun ma. A ɔ, “Wo kooya be wo fa ma, a basan wo de a,

³min mbe a ma, dunya ni nyan wo ko a, mbɛ wo mɛ‑a fɔɛ ɔ, dunya chɛ ɔ.”

⁴Wo wan, wo wɛn mu denɛ n fa n na, wo ma a ma, an faa ni tɛ. Chɛɛ wo an bɔ a ɔ chɛndɛ chɛ, an ni kanɛ sɔn, Mansa Chisɔsi ta chia a.

⁵Wo wan yɔnɛ nu, wo kooya be wo ti n ma. Wo chian an ma, a sin, masamba ni ma wo ɔ an ko a. Wo kooya be an ma wo faa gbɛɛ a, yɔ wo e a be buɛ min dɔ Chisɔsi Chasi ma.

⁶Wo ma chɛ ma dechee an ya kɔɔɛ ma wan, an faa chima koe a mɔgbuya ɔ. Chɛɛ wo a ma, wo faa gbɛɛ a, yɔ Chasi 'a yɔnɛ nu, miin mbe Yataa faa ma koe ma.

⁷Wo wai chɛ wo faa gbɛɛ a, yɔ wo e ma ka a chɛ‑a Mansa Chisɔsi an ye. Wo ma a ya, mbɛ wo e ma ka a chɛ‑a wo fian mɔ gbu an ye.

⁸Wo ni a ɔ sɔn, ko chɛndɛ kan kɔ kan, mɔɛ ɛ min ma, Mansa Chisɔsi ɛ a nyɔn sima tɔnɔnɛ be wan a ma. Chɛ ɛ ma wan, a mɔɛ chɛ ni ma yɔn fan na, chɛ ma, a ni ma mɔ dɔ mende wɛɛ a.

⁹Wo wan yɔn ti nu, wo wɛɛ, wo wo 'a yɔnɛ n bia a buɛ chɛ ɔ. Wo sɛmbɛ a ma koe a, tima ɔ tima ko a, an ni chian wo ma. Wo ni a ɔ sɔn, mbɛ wo bɛ an na, wo e min ko a, ɛ banda bu ɔ wan. A sin, a ee mɔ gbu n tɛ bɔ, ɛnden bɛɛ a.

¹⁰N ni a fɔ gbɛ wo ye, mbɛ wo ɔ ni gbɛa, koe min na mu, mɔ dɔndɔɛ mu wo a, wo bɛ Mansa Chisɔsi a. Gbasaya wa min nyɔn sima ɛ a ɔ, a ni ma wo ɔ.

¹¹Wo ni Yataa 'a chɛɛ chɛ fenɛ n gbɛɛ bia. Chɛ an mbe a ma‑a, wo ni che sɔ‑a chidi, Sitana ee che‑a wo bɔ‑a a 'a yaa yaa koe n na.

¹²Koe min na mu, mmɔ ee butuinɛ chɛ tena mmɔ fian mɔ gbu n fan na, chɛɛ mmɔ ɛ a chɛ tena nyina yama n fan na. An fan mu ya ɔ sɔɛ n na, gbasaya ɛ miin boo ɔ kaina nu, banda a. A sin, an pimbi bundenɛ ɛ dunya chɛ kun ma.

¹³Chɛ an fɛ mu, wo wo ma chii gbae, Yataa 'a chɛɛ chɛ koe a. Chɛ an mbe a ma‑a, wo ni kun sɔ‑a gban, ko yama ma tee chɛ kɔɔ. A ni a ma, wo ni butuinɛ chɛ, aan a danka a, wo e sɔ ɔ chidi.

¹⁴Chɛ an fɛ mu, wo sɔ gban, wo ni tea ɔ gbɛ a si Yataa ma. A sin ni ma yɔ yuu wo bu tɛ. Wo ma nyina, mbɛ Yataa‑a wo ya mɔ tandenɛ n na a tena. Chɛ ɛ wo konde gbain‑da wan, yɔ soya 'a chɛɛ chɛ doma.

¹⁵Sakana bai chɛndɛ chɛ, min mbe faa chima be, ɛ a ma‑a wan wo ma bɛndenɛ ni ma. A ni ma yɔ kɔɔwa wo chenɛ a.

¹⁶A ka chɛ gbɛɛ ma, wo wo kai fa Chisɔsi Chasi a, tima ɔ tima ko a. Chɛ ɛ ma‑a wan, yɔ chɛɛ chɛ fenɛ wo boo a, min mbe a ma, soya mɔ dɔ gbɛɛ ee che wo sɔɔ‑a. Chɛ ɛ wo konde gbain‑da wan chia gbɛɛ a, an nyina yama, Sitana ɛ bɔ miin na.

¹⁷Wo dan chɛ a chɛndɛ chɛ, mbɛ Yataa‑a wo baun. A ni ma yɔ chɛɛ chɛ banfua, wo kunɛ a. Mbɛ Yataa 'a bai sin, a ma‑a wo boo a chɛɛ chɛ mɛ a, Yataa Nyina 'a gbasaya ɔ.

¹⁸Wo samunɛ chɛ, tima ɔ tima ko a, Yataa Nyina ɛ wo sɔ‑a buɛ min dɔ chia ma. Wo 'a samunɛ sin gbɛɛ ɔ, wo Yataa ɔ tisa, a ni basan wo ma. Chɛ ko a, ko ɔ ko ma a ma, wo gboo ɔ ni fa. Ni wo sin ma‑a samunɛ chɛ‑a tima ɔ tima ko a, wo a chɛ Yataa 'a mɔɛ n gbɛɛ ko a.

¹⁹Wo samunɛ chɛ to, n bɛɛ ko a. Yataa ɛ bai don‑da wan n da ɔ, n mbe min fɔ. A ni a ma, chianɛ ma na ma n dɔ, n da a ka koe a, n ni bai sa mɔɛ n tena, a si sakana bai chɛndɛ chɛ ma, min dɔ nunden ni mmɔ ma a kɔma a.

²⁰Koe min na mu, bai chɛ an ko a mu ka, n mbe sa ɔ pimbi chenɛ a. Wo samunɛ chɛ n ko a, min mbe a ma, n ni koɔ mɔɛ gbɛɛ tena, faagbɛa ɔ, yɔ a nyin n ni koɔ buɛ min dɔ.

²¹N toen mu wo wɛɛ ni a ɔ sɔn, n mbe buɛ min dɔ sanche nɛ. Chɛ an fɛ mu, n mbe Tikikɔsi a na tena wo tena, a ni ko ɔ ko ɔ yian wo a, min mbe si tena n na. Mmɔ suun ma nyɔɛ an nɛ, min ko a di n ye, a sin, ɛ wai chɛ tena wan Mansa Chisɔsi ye, teaya ɔ.

²²Chɛ an fɛ mu, n mbe a sɔ tena wo tena, a ni a ɔ yian wo a, nn gbɛɛ, nn mbe buɛ min dɔ sanche nɛ. A yɛ to, a ni wo faa n ma nande.

²³Fa Yataa, an fea Mansa Chisɔsi Chasi a, an ni faa chima be wo ma, wo wan suun ma nyɔɛ nu Chasi ɔ. An ni koadia yian wo a, a sin, wo ni wo kai fa an na.

²⁴Koadia ɛ miin gbɛɛ faa ɔ, mmɔ 'a mansa Chisɔsi Chasi ko a, koadia min mbe ee danka kuɔ fɔ, Yataa ni an gbɛɛ dua.