Read Kono Gboo Fiipai Ko A 1 Bible Online

Gboo Fiipai Ko A 1 - Kono bible

Gboo Fiipai Ko A 1

¹N fan Pɔɔ, n fan mbe gboo chɛ nyɛn tena, nn fea Timoti a. Chisɔsi Chasi 'a wai chɛ mɔɛ mu nn na. Nn fan mbe ka gboo chɛ nyɛn tena wo tena, wo wɛn mu Yataa 'a mɔɛ n na, miin ma‑a mɔ dɔndɔɛ a Chisɔsi Chasi a, Fiipai duu ɔ. A yɛ to, ni chɔchi ya ɔ sɔɛ n tena, an bɛ mɔɛ chɛ n na, miin mbe deman chɔchi ma.

²Mmɔ Fa Yataa, an fea Mansa Chisɔsi Chasi a, an 'na dua ni ma wo ma, a basan an 'na faachima a.

³Tima ɔ tima, ni n‑na n yii na chii wo a, n mbe n 'na Yataa wai bɔ wan.

⁴A sin, tima ɔ tima, ni n ma‑a samunɛ chɛ‑a wo gbɛɛ ko a, n mbe a chɛ buɔdia an dɔ.

⁵Koe min na mu, a ka tee saa saa ma, aan sanche, wo e basan tena wan n ma, sakana bai chɛndɛ chɛ a che koe a mɔɛ n ma.

⁶Chɛ an fɛ mu, n danden fan mu a a, mbɛ Yataa boo ɛ ka gbɛ buɛ min dɔ wo baun koe ɔ, a ee sɛmbɛ‑a to. A ɛ wo baun‑da wan, aan a ni che a danka a gbɔdɛ, aan Chisɔsi Chasi na tima a to.

⁷A nyin yiinachii chɛ sima ni ma n dɔ, a si wo ma. Koe min na mu, wo wakoe ɛ wan n faa ɔ. A mu min na, wo gbɛɛ, wo e basan tena wan n ma, wai chɛndɛ chɛ chɛ koe a, Yataa‑a min be n ma, a chɛ koe a. Wo basan‑da wan n ma, tima min na n ni ben‑da sɔ‑a sawa ti n na, sakana bai chɛndɛ chɛ ko a, a kɔ ni gbɛa. A sin to, n mbe wɛɛ ka sa ɔ pimbi chenɛ a sanche, wo e basan tena wan n ma.

⁸Koe min na mu, n toen mu wo a, yɔ Chisɔsi Chasi 'a koadia ɛ buɛ min dɔ. Yataa wandi an mu n 'na siiya a, ni tea ma chɛ a.

⁹A sin, chɛ an mu samunɛ a, n mbe min chɛ tena, mbɛ koadia min mbe wo faa ɔ, a ma ni munda tima ɔ tima ko a. A yɛ to, yiima ni ma wo ɔ, wo ni koe n tɛ bɔɛ sɔn,

¹⁰min mbe a ma, wo ni a ɔ sɔn koe min nyin chɛndɛ chɛ Yataa chen kɔɔ, mabɔ kan kɔ kan mbe ee min ma. Chɛ ɛ a ma‑a wan, Chasi na tee ma, mabɔ ee na‑a ma‑a wo ma, ko yama kan kɔ kan ko a.

¹¹Chisɔsi Chasi 'a gbasaya ɔ, wo sɔnɛ a dondandenɛ ni ma. Chɛ an mbe ma tando a, Yataa tena, a basan basɔmaya a.

¹²N suun ma nyɔɛ nu Chasi ɔ, n toen mu wo ni chɛ ɔ gbɛ. Mbɛ koe gbɛɛ, miin sien mu n na, an gbu an‑na a ma, sakana bai chɛndɛ chɛ a si Chisɔsi ma, a ta‑a ya ɔ ma.

¹³Chɛ‑a a ma gbɛ, mɔɛ gbɛɛ, an‑na a ɔ sɔn, mbɛ n mbe sa ɔ pimbi chenɛ min na, Chasi an fɛ mu. Soya chɛ n gbɛɛ nɛ, miin mbe Domi kun ti wa 'a kata kun ma fɛn, an‑na chɛ ɔ sɔn fan, a basan mɔ sɛsɛ dɔ gbɛɛ n bɛɛ a nɛ.

¹⁴N mbe sa ɔ pimbi chenɛ min sin na, Mansa Chisɔsi‑a a ma gbɛ, n suun ma nyɔɛ chɛ n sɛsɛ Chasi ɔ, an faa sɔ‑a gbɛ a ko a. An mbe ee chian to ɛnden bɛɛ a, a 'a sakana bai chɛ ɔ yian koe a mɔɛ n na.

¹⁵An dɔ n gbu, an mbe sakana chɛ, a si Chasi ma, a ɔ yian toomaya faa an na, a basan koɔ yanɛ a. Chɛɛ an dɔ n sin, an mbe a ma, yiinachii chɛndɛ an na.

¹⁶Mɔɛ dankama chɛ nu, koadia an mbe a ma, an mbe bai chɛ sa ka. Ɛ ma wan an yii ma, n mbe ka nɛ sa ɔ pimbi chenɛ min na, sakana bai chɛndɛ chɛ an ko a mu, n sɔ‑a min ko a.

¹⁷Chɛɛ mɔɛ saa chɛ n sin, an mbe ee a sa tena faa ɔ gbɛ an na, an gbɔsɔen mu dechee an fandi an ko a. An ta yiinachii ɔ, an dɔ, an ni a ma, n 'na mɔnɛ ma ni munda pimbi chen chɛ a nɛ.

¹⁸Chɛ ma faagbaa a, n tena. N buɔdia koe mu, an mbe ma ka dechee sakana bai chɛ ɔ yian‑da, a si Chasi ma. A ni ma tea chia an na, a ni ma fania chia wɛɛ a. Tea gbu sin ko a, n mbe buɔdia bɔ‑a wan.

¹⁹Koe min na mu, wo e samunɛ min chɛ n ko a, ɛ a ma‑a wan, n kunɛ ni bɔ a ɔ. A sin to, Chisɔsi Chasi Nyina wɛɛ, ɛ deman chɛ chɛ‑a wan n na.

²⁰A mu min na, ɛ wan n 'na yiinatɛ ɔ, ni n 'na yiinachii, mbɛ n mbe ee na‑a mau‑a ɛnden bɛɛ a. Chɛɛ tima ɔ tima ko a, a bɛbɛɛ sanche, n faa ɛ sɔ‑a wan gban. Chɛ ni a ma, n 'na fɔɛ gbɛɛ ɔ, n ni na basɔmaya a Chisɔsi tena, n ni ma wan fɔɛ chɛ ɔ, chɛ ma, n ni fa wɛɛ.

²¹N mbe fɔɛ min dɔ, basɔmaya be koe a mu Chasi ma, nn fea a, nn ni ma mɔ dɔndɔɛ a. Chɛ an fɛ mu, ni n fa‑a, a nyin kaka. Koe min na mu, nn fea a Chasi a, nn fan mbe ma‑a gbɛ.

²²Chɛɛ n mbe ka gbɛ kɔndɔfii an dɔ, n ma a ɔ sɔn, n mbe fen ma. Ni n ma‑a tun fɔɛ chɛ ɔ, ɛ a ma‑a wan, n ni kun wai chɛndɛ chɛ‑a Chasi ko a.

²³Chɛɛ n gbu toen mu gbɛ n ni fa, nn fea ni ma Chasi a, min mu ko nyima wa a. A ɔ gbɛ n ko a, n faa ma ya koe a ko fea chɛ tɛ ɔ.

²⁴Chɛɛ wo ko a, a nyin kaka, n ni ma tun fɔɛ ɔ.

²⁵N danden fan mu chɛ a. A sin, n ko a, n‑na a ɔ sɔn fan, mbɛ n mbe ma‑a wan fɔɛ chɛ ɔ. N mbe ma‑a wan tun wo gbɛɛ tɛ ɔ, n ni basan wo ma, wo‑a wo kai fa min chɛ Chasi a, a ma ni munda. Chɛ ni a ma, wo bu ɔ ni dia, a chenama ɔ, Chisɔsi Chasi a.

²⁶Chɛ ɛ a ma‑a wan, ni mmɔ bɛ ma‑a tima min na, wo e yonka tɛ‑a wan, a si Chasi ma. Koe min na mu, an mbe che‑a a ma‑a, n ni na wo tena.

²⁷Koe chenama mu gbɛ min na sanche, an nɛ. Wo koe n ma, wo 'a fɔɛ ɔ, yɔ mɔɛ nu miin dan‑da sakana bai chɛndɛ chɛ a, a si Chasi ma. Chɛ an mbe a ma‑a, n ni na wo tena, n ma na wɛɛ wo tena, n mbe wo ma tɔ chɛndɛ a min‑da wan. Mbɛ wo e sɔ ɔ gban, wo yiima a kandenɛ ɛ, wo kuiɛ a kandenɛ ɛ. A sin, wo e wan wo boo si‑a wo nyɔn kɔɔ wo sɔɛ gbɛɛ a, danaya chɛ ko a, min mbe bɔ sakana bai chɛndɛ chɛ ɔ.

²⁸A sin, chian mbe ee wo ɔ, a si ko ɔ ko ma, wo chɛɛ ma nyɔɛ n mbe min ma. Chɛ ɛ wan yɔ gbau an nɛ, an tena, mbɛ an mbe na tena wan kasaa a. Chɛɛ wo tana, a mu bauncha an na wo ko a. A sin, ɛ ka tena Yataa an na.

²⁹Koe min na mu, ɛ wan gbɛ Yataa boo ɔ wo ko a, mbɛ Chasi chɛ wakoe, wo kai fa koe ma dechee a a. Chɛɛ wo gbu, wo e tɔɔya ɔ bia‑a wan a ko a.

³⁰A sin, wo‑a n yen tɔbu min dɔ bia‑a, wo wɛɛ wo e ka an sima ɔ yen tena. A sin, wo e ka tɔbu min dɔ yen tena, an mbe ka tun n bɛɛ ma.