Read Kono Gboo Kɔdɔsai Ko A 1 Bible Online

Gboo Kɔdɔsai Ko A 1 - Kono bible

Gboo Kɔdɔsai Ko A 1

¹N fan Pɔɔ, n fan mbe gboo chɛ nyɛn tena, nn fea mmɔ suun ma nyɔɛ a Chasi ɔ, min mu Timoti a. Chisɔsi Chasi 'a sɔ mɔɛ mu n na. Yataa wandi an dɔn‑da, n ma koe a sɔ mɔɛ chɛ a.

²N mbe gboo chɛ nyɛn tena wo wan tena, wo wan Yataa 'a mɔɛ chɛ nu, Kɔdɔsai duu ɔ. Wo gbɛɛ, wo wɛn danayaen mu, wo maenɛ ɛ mɔ dɔndɔɛ a, wo bɛ Chasi a. Mmɔ Fa Yataa ni wo dua, a ni faachima be wo ma.

³Nn mbe ma samunɛ chɛ‑a tima ɔ tima, nn mbe Yataa wai bɔ wan wo ko a, mmɔ 'a mansa Chisɔsi Chasi fa.

⁴Koe min na mu, nn‑na a a min, wo kai faen mu buɛ min dɔ Chisɔsi Chasi a. A sin to, koadia min nyɔn sima ɛ wo faa ɔ, Yataa 'a mɔɛ gbɛɛ ko a.

⁵Wo e chɛ ma, a mu min na, wo yii na tɛenɛ mu koe chɛ an ma, Yataa‑a min sa tena ɔ bɛn wo ya ɔ banda bu ɔ. Tea bai chɛ, min mu sakana bai chɛndɛ a, a‑a a fo kɛn wo ma tima saa saa ko a, wo‑a a a min fan, ɛ na yiinatɛ min na.

⁶Sakana bai chɛndɛ chɛ ɛ a ma tena wan, ko chɛndɛ sɛsɛ ɛ mɔɛ n tan tena tima ɔ tima ko a dunya gbɛɛ ɔ. A sin, wo wandi wɛɛ tɛ ɔ, ɛ ma tena ka wan. A bia tee saa saa chɛ ma, wo na‑a a a min kɛn, mbɛ wo dan‑da koadia demanɛ a chɛndɛ chɛ, Yataa ɛ min chɛ tea tea ɔ.

⁷Wo‑a a min ka wan Ɛpafasi a, nn bɛ ɛ Yataa 'a wai chɛ min na. A mu mɔɛ an na, min ko a di nn ye, koe min na mu, ɛ Chasi 'a wai chɛ tena nɔ danaya ɔ, nn ko a.

⁸A sin‑na a ɔ yian nn na, Yataa Nyina‑a a ma buɛ min dɔ, koadia ɛ wo faa ɔ.

⁹Chɛ ko a, a bia an tee chɛ ma, nn‑na a a min tee min na, nn ma sɛmbɛ ni samunɛ chɛ koe a wo ko a. Nn mbe samunɛ chɛ tena wan tima ɔ tima ko a, Yataa ni a ma, a toen mu koe miin na, wo ni an dɔ gbɛ chɛndɛ chɛ. A sin, n mbe a ɔ tisa tena, a ni yiimatɛ gbɛɛ be wo ma, a wan Yataa Nyina ɛ min be.

¹⁰Chɛ ɛ a ma‑a wan, wo ni kosan tachɛ‑a fɔɛ ɔ, min mbe nyan Mansa Chisɔsi tena, a faa ni chima a da faenɛ ɔ. Tima ɔ tima, wo e ko chɛndɛ sɛsɛ ma‑a wan. Wo 'a yiimatɛ ma ni mun‑da a si Yataa wakoe ma.

¹¹Nn mbe samunɛ chɛ tena, Yataa ni gbasaya gbɛɛ be wo ma, a 'a gbasaya kamayaen ba ɔ. Wo ni ko gbɛama kan kɔ kan dɔ bia, faabia ɔ, wo bu ɔ diama ɛ.

¹²Nn mbe Yataa wai bɔ tena tima ɔ tima, tɔnɔnɛ chɛ n bɛɛ ma sɔn koe a, a‑a miin be koe fɔ a ta mɔɛ n ma, miin mbe a 'a manɛ kɔɔ. A wan Yataa dɔndɔ gbe, an mbe a gbasaya be wo ma, an ma sɔn koe a.

¹³A‑a mmɔ bɔ wan ko yama pimbi 'a gbasaya boo ɔ, mbɛ a‑a mmɔ don a faa ma denɛ 'a mansaya kɔɔ yɛdɛn.

¹⁴Mmɔ‑a kunka ma sɔn, mmɔ bɔ‑a mmɔ 'a ko yama n dɔ, koe min na mu, a 'a den chɛ, mɔ dɔndɔɛ mu gbɛ mmɔ a.

¹⁵Mmɔ ee Yataa min yen, a bɔ nyɔɛ chɛndɛ chɛndɛ, mɔ gbu na‑a min yen, a mu Chisɔsi Chasi an na. Yataa 'a denɛ mu an na, a sin, gbasaya ɛ wan a boo ɔ fen kɔ fen kun ma, min na dan‑da dunya chɛ ɔ.

¹⁶Yataa‑a a gbu ma, fenɛ tɔɛ gbɛɛ n na dan‑da, banda bu ɔ ni dunya chɛ ɔ, Chasi chɛ an boo ɔ. Mmɔ ɛ fenɛ miin yen, ni mmɔ ee miin yen. A yɛ to, nyina yama n ya ɔ sɔɛ wɛɛ, ni maeka n ya ɔ sɔɛ. Fen kɔ fen, an na dan‑da Chisɔsi boo ɔ wan, a sin fan ko a mu.

¹⁷Chasi ni pɛn fɔɛ ɔ, fen kɔ fen ya ɔ, a sin fan‑na a ma, fen kɔ fen mbe kun dɔndɔɛ kɔɔ, a yɛ to, an mbe wai chɛ kuiɛ dɔndɔya ɔ.

¹⁸Chisɔsi Chasi an mu chɔchi kun ti a. Chɔchi mu a gboo an na. A wan mbe fɔɛ be a 'a mɔɛ n ma. Koe min na mu, Yataa‑a a pɛn kɔɔ sɔ, a ka saya ɔ, min mbe a ma, a ni ma gbasaya tɔɛ a fen kɔ fen kun ma.

¹⁹Yataa sɔnɛ ni wan Chasi ɔ chia ɔ chia a. Yataa wandi sin fan na‑a chɛ ɔ bɛn.

²⁰Yataa‑a a ɔ bɛn fan to, fen kɔ fen dunya chɛ ɔ, ni banda bu ɔ, Chisɔsi‑a a ma, an ma‑a a wan Yataa dia nyɔɛ n na. Yataa‑a chɛ ma wii chɛ an dɔ, Chisɔsi‑a min na bɔn kɔn gbengbandenɛ ma.

²¹A sin, tima dɔndɔ a, wo dɔ nu, wo nii kuiɛ dɔndɔ ɔ Yataa a, wo yiima nii ma nyin a ko a. Wo ni Yataa chɛɛ ma nyɔɛ n fan na, wo 'a yiinachii yama n dɔ, ni ko yama nu, wo ni miin ma.

²²Chɛɛ sanche gbɛ, wo ma‑a gbɛ Yataa dia nyɔɛ n na, min mbe a ma, wo ni ma gbɛ tenchen a ko a, mabɔɛ sima wɛɛ ma na ma wo ma, a chen kɔɔ. A‑a chɛ ma saya chɛ an dɔ, Chasi‑a min chɛ kɔn gbengbandenɛ ma, mɔgbuya gboo ɔ.

²³Chɛɛ, chɛ ɛ ma dechee, ni wo ma sɛmbɛ ni wo kai fa koe a Chasi a. Wo ma yɛ kuu kɔ, wo sin ni sɔ gban. Wo‑a sakana bai chɛndɛ chɛ a min tima min na, wo‑a yiinatɛ min ma sɔn, wo ma dɔn mɔ dɔ gbɛɛ ni wo ka an chia chɛ ma. Yataa‑a n ma a 'a wai chɛ mɔɛ a, an sakana bai chɛ an ko a. Sakana bai chɛ, a ɔ yianden fan mu gbɛ dunya gbɛɛ ɔ.

²⁴Sanche chɛ ɔ, n mbe tɔɔya min gbɛɛ chɛ tena, wo ko a, n bu ɔ diama mu. A sin, n gboo chɛ ɔ, n mbe tɔɔya chɛ a ban‑da wan, Chasi‑a min dɔ bia, a gboo ko a, min mu chɔchi a.

²⁵A sin, wo ko a, Yataa‑a n ma wan a 'a wai chɛ mɔɛ a, basan koe a chɔchi ma. A‑a chɛ ma, min mbe a ma, a 'a sakana bai chɛndɛ chɛ ɔ ni yian wo a chɛndɛ chɛ.

²⁶Bai an nii nɛ, min dɔ nunden ni san wu sɛsɛ ko a, a ka mɔ bemba n ta bemba n na tima ma. Chɛɛ sanche gbɛ, a ɔ yian‑da Yataa 'a mɔɛ n na.

²⁷Yataa toen ni, a ni a ɔ yian mɔɛ chɛ n na, a‑a koe min dɔ nun an ma. An koe ma kawaen ni, a sin dua wa ni, mɔɛ n ko a, miin nii ma Chu mɔ a. An koe ɔ nundenɛ gbu an nɛ, mbɛ Chasi wakoe ɛ wan wo wɛɛ faa ɔ, min mu wo 'a yiinatɛ a, Yataa 'a basɔmaya ma sɔn koe a.

²⁸A wan Chasi chɛ, nn mbe an bakoe ɔ yian mɔ ɔ mɔ a. Nn mbe dasi be tena wan, nn mbe ta‑a mɔɛ gbɛɛ kan‑da nn ta yiimatɛ chia gbɛɛ a. Chɛ ni a ma, nn ni kun a ma‑a, mɔɛ gbɛɛ ni na Yataa chen kɔɔ, an yiima da faenɛ ɛ, a si Chasi ma.

²⁹N mbe wai chɛ tena n sɔɛ gbɛɛ a, chɛ an ko a. Chasi wan sin‑na an gbasaya wa chɛ chɛ n dɔ.