Read Kono Gboo Kɔdɔsai Ko A 3 Bible Online

Gboo Kɔdɔsai Ko A 3 - Kono bible

Gboo Kɔdɔsai Ko A 3

¹Tima min na Yataa‑a Chasi a yɛ to fɔɛ ɔ, a‑a a ma wan, wo wɛɛ‑a fɔɛ nama ma sɔn. Chɛ an‑na a fɔ, wo to fen chɛ n na, Yataa‑a miin sa tena ɔ bɛn wo ko a banda bu ɔ. Chasi ɛ nɔ wan si ɔ kaina a ma bɛndenɛ, Yataa boo nyima ɔ.

²Wo wo yii sɔ gban fen chɛ n ma banda bu ɔ, fen chɛ nu ma nɛ dunya chɛ ɔ.

³Koe min na mu, wo fa‑a wan. A sin, wo 'a fɔɛ nama, ɛ sa ɔ nun dɔ, Yataa boo ɔ, Chasi ɛ kaina min.

⁴Chasi dɔndɔ gbe, an mbe a ma wo ni ma fɔɛ nama ɔ. A sin, ni a yɛ‑a to dunya chɛ ɔ, wo bɛ an mbe ma‑a a a. A sin mbe ma‑a Yataa 'a manɛ min dɔ, wo wɛɛ, wo e ma‑a an dɔ.

⁵Chɛ an fɛ mu, dunya chɛ ɔ koe nu, miin na di wo ye, wo faa ni fa an ko a. Koe nu, yɔ ko tɛ kan kɔ kan, wo e na to dɛ‑a fuu ɔ, ni ko yama dɔ mende nu. A yɛ to, yiinachii yama, ni dunya ma koe ben koe a mɔɛ ɔ, a basan fenkoya wa a. Chɛ nɛnɛ ɛ wan dechee, yɔ fenɛ fai koe a, min ma Yataa a.

⁶Mmɔ ɛ na‑a wan Yataa 'a faatɛ ɔ yen‑da, a si koe chɛ n gbɛɛ ma.

⁷A saa a, wo ni tachɛ ka wan, koe min na mu, wo ni an koe chɛ n fan ma.

⁸Chɛɛ sanche gbɛ, wo koe chɛ n gbɛɛ boo ka. Koe nu, yɔ faatɛ, ni faagbandia. A yɛ to, toomaya wɛɛ, ni tɔ ɔ tɛ yama chɛ, a basan bai yama sa a.

⁹Wo ma fania fɔ wo nyɔn ye, koe min na mu, wo‑a wo boo bɔ wan wo sɔn kɔma n dɔ.

¹⁰A sin, an sɔn nama chɛ, Yataa wandi an‑na a chɛ wo ɔ. A sin, ɛ a ma tena wan tun tun, wo ni ma yɔ ɛ buɛ min dɔ, wo ni a sɔn chɛndɛ chɛ.

¹¹Chɛ an fɛ mu, sɔn nama chɛ ɔ, tɛ bɔ kan kɔ kan mbe ee Chu mɔɛ n ma, an bɛ mɔɛ n na, miin ma Chu mɔɛ n na. Tɛ bɔ ee chɛ n ma miin na kaminchaen mu, an bɛ chɛ n na, miin na ma kamincha ni. Tɛ bɔ ee chɛ n bɛɛ ma, miin ka‑a chɛnyɛ dɔ mende n dɔ, a ee yɔnɛ n ma, a ee fia ɔ mɔɛ n ma, an bɛ mɔɛ n na, miin mu mansaenɛ a. Chɛɛ Chasi an mu koe a, a sin mbe wan gbɛ wo gbɛɛ 'a fɔɛ ɔ.

¹²Wo gbɛɛ, wo e gbɛ Yataa an na boo ma. A to‑a wan wo a, a sin‑na a boo sɔ wan wo ma, a ta mɔɛ n na. Chɛ an‑na a fɔ, chinchimaya faa ni ma wo ɔ, ni ko chɛndɛ ma faa. A yɛ to, wo ni wo wandi ma yii, wo ni wo ma chima, a sin, wo ni wo faa bia.

¹³Wo gboo ɔ ma fa, wo faa bia koe a wo nyɔn na. A sin, ni gbonyɛ ma‑a wo dɔndɔ wɛɛ da a, a bɔɛ ko a, a ni a boo bɔ an bai chɛ ɔ. Wo wo bɔɛ n to nɔ, ni an‑na ko yama ma wo a, yɔ Mansa Chisɔsi wɛɛ‑a wo to buɛ min dɔ nɔ, wo 'a ko yama n ko a.

¹⁴Wo ni chɛ gbɛɛ ma wɛɛ, wo koadia sa a kun ma. Koe min na mu, an mbe ko ɔ ko kunɛ a bia, kuiɛ a kanɛ chɛndɛ ɔ.

¹⁵Chasi ɛ faachima min be, a ni ma wo faa ɔ wo nyɔn ko a. Koe min na mu, Yataa‑a wo chee kaina dɔndɔɛ faachima chɛ an ko a, yɔ mɔ gbu sɔna n mbe buɛ min dɔ an nyɔn boo ɔ. A sin nyin wo ni Yataa wai bɔ tima ɔ tima.

¹⁶Sakana bai chɛ, a si Chasi ma, a ni sa wo faa ɔ chɛndɛ chɛ. Wo wo nyɔn kan, wo ni wo nyɔn na si yiimatɛ chia gbɛɛ a. Wo si kan kɔ kan sa, Yataa ɛ tando min dɔ, wo e ta‑a Yataa wai bɔ‑a, wo faa gbɛɛ a.

¹⁷A sin, ni wo ma‑a ko ɔ ko ma‑a, wo da ɔ, ni wo chɛ chɛ wai n dɔ, wo an ma Mansa Chisɔsi tɔɛ ɔ. Ni wo ma‑a chɛ gbɛɛ ma‑a, wo Fa Yataa wai bɔ, Mansa Chisɔsi 'a gbasaya ɔ.

¹⁸Wo wan fuu musu nu, wo don wo chɛɛ n kɔɔ, yɔ a ma biaen mu buɛ min dɔ musu ko a, miin mu mɔ dɔndɔɛ a, an bɛ Mansa Chisɔsi a.

¹⁹Wo wan musu si kai n bɛɛ, wo to wo 'a musu n na, wo ma faa ma gbaa koe ma an na.

²⁰Wo wan denɛ nu, wo kooya be wo woo mɔɛ n ma, chia ɔ chia a. Koe min na mu, chɛ an mu Mansa Chisɔsi faa ma koe a.

²¹Wo wan fa nu, wo ma tɛn wo 'a denɛ n faa n na, an faa ma na yɔn wo ma.

²²Wo wan yɔnɛ nu, chia ɔ chia a, wo kooya be chɛ n ma, miin mu wo ti n na dunya chɛ ma. Wo ma a be dechee an ya kɔɔ wan, mɔ gbu n faa chima koe a dechee. Chɛɛ wo a be wo faa gbɛɛ a, Mansa Chisɔsi ma chianɛ ɛ wo ɔ.

²³A ni ma wai kan kɔ kan na wo boo ɔ, wo a chɛ wo faa gbɛɛ a. Wo a chɛ yɔ wo e ka a chɛ‑a Mansa Chisɔsi an ko a, chɛɛ mɔ gbu an ma.

²⁴Wo e ma‑a ka wai chɛ‑a kun ti min ko a, a mu Chasi an na. A sin ni ma wo yii ma, mbɛ wo e wo 'a tɔnɔnɛ ma sɔn‑da Mansa Chisɔsi an na.

²⁵Chɛɛ ko yama ma mɔɛ, ɛ a 'a pawa ma sɔn‑da wan an koe chɛ ko a, a‑a min ma. A sin, Yataa ee mɔ ɔ mɔ a yɛ‑a a boo kɔ, ɛ ma‑a chɛ ma‑a.