Read Kono Gboo Saa Tɛsadonika Ko A 1 Bible Online

Gboo Saa Tɛsadonika Ko A 1 - Kono bible

Gboo Saa Tɛsadonika Ko A 1

¹Nn fan mbe gboo chɛ nyɛn tena, n fan Pɔɔ, Sidasi, ni Timoti. Nn mbe a nyɛn tena wo wan chɔchi mɔɛ chɛ n fan tena pan Tɛsadonika duu ɔ. Wo wɛn mbe kuiɛ dɔndɔya ɔ, wo bɛ mmɔ Fa Yataa a, an fea Mansa Chisɔsi Chasi a. Yataa ni wo dua, a ni faachima be wo ma.

²Tima ɔ tima ko a, wo e wan nn 'na samunɛ ɔ. Nn mbe Yataa fai wan wo gbɛɛ ko a.

³Nn mbe ma samunɛ chɛ‑a tima ɔ tima mmɔ Fa Yataa tena, wo wakoe ɛ ma wan nn yii ma. Nn mbe Yataa wai bɔ tena wo ko a, wo e wai min chɛ tena. Koe min na mu, wo kai faen mu Mansa Chisɔsi a. Nn mbe a wai bɔ tena, koadia ko a, min mbe a ma tena wo e wai chɛ tena wo sɔɛ a. Nn mbe a wai bɔ tena, yiinatɛ ko a, wo gboo ɔ ma fa ni min chɛ koe a mmɔ 'a mansa Chisɔsi Chasi a.

⁴Nn suun ma nyɔɛ nu Chisɔsi Chasi ɔ, nn‑na a ɔ sɔn fan, mbɛ Yataa toen mu wo a kaka. A sin, a‑a a boo sɔ wo wan ma, ma koe a a ta mɔɛ n na.

⁵A mu min na, nn‑na sakana bai chɛndɛ chɛ ɔ yian wo a, a si Chisɔsi Chasi ma. Nn ma a ɔ yian ni dechee nn da n fan dɔ. Chɛɛ Yataa Nyina an bɛɛ ni ka wai chɛ‑a gbasaya wa ɔ. A sin, nn danden fan ni a a, mbɛ nn mbe tea bai n fan fɔ. Wo sin gbu na‑a nn yen fan, mmɔ bɛ ni tima min na, nn ni fɔɛ min nyɔn sima ɔ. Nn‑na chɛ gbɛɛ ma, basan koe an na wo ma.

⁶Wo bea‑a wan nn chen gba fɛ, a basan Mansa Chisɔsi wɛɛ ta a. Wo‑a wo boo si wan a 'a sakana bai chɛ kɔɔ, a ma‑a wɛɛ ko yawaen dɔ bia a wo ma. Chɛ gbɛɛ ɔ, Yataa Nyina gboo ɔ ma fa ni a ma koe a wo bu ɔ ni dia.

⁷Chɛ‑a a ma wan, wo ma‑a tɔmɔsi a mɔɛ n tena. Mɔɛ chɛ nu, Masidonia, ni Akaya chɛnyɛ ɔ, miin kai faen ni Chisɔsi Chasi a.

⁸A sin, Mansa Chisɔsi 'a sakana bai chɛ, ɛ che tena wan kan kɔ kan, a ka wo tena. A ma che ni mɔɛ chɛ n dechee ma, miin mbe Masidonia, a basan Akaya a. Nn fan mbe ee bai dɔ gbɛɛ fɔ to, a si a ma. Koe min na mu, nn ma ta kan kɔ kan, mɔɛ n ban‑da a a min‑da.

⁹Mɔɛ chɛ n gbɛɛ mbe wan bai sa‑a, a si nn bia buɛ ma, wo boo ɔ, nn na‑a wo kɔndɔn‑da tima min na. A yɛ to, a si wo‑a wo kan kɔ sɔ buɛ min dɔ fen chɛ n na, miin ma Yataa a. Wo‑a chɛ ma tea Yataa an fai koe a, min mbe ma‑a nɔ kuɔ fɔ ko a.

¹⁰A sin, a 'a denɛ na koe, a ka banda bu ɔ, wo e a ma kɔn tena wan. A 'a denɛ Chisɔsi, a‑a a ma min na a kɔɔ sɔ, a ka saya ɔ. A 'a den chɛ sin fan‑na mmɔ kun ka, Yataa ma na faatɛ a bɔ mmɔ ma ya ɔ ma.