Read Kono Gboo Saa Tɛsadonika Ko A 2 Bible Online

Gboo Saa Tɛsadonika Ko A 2 - Kono bible

Gboo Saa Tɛsadonika Ko A 2

¹Nn suun ma nyɔɛ nu Chasi ɔ, wo wandi a ɔ sɔn fan, mbɛ nn na‑a min chɛ‑a nɛ, mbɛ na yama ma.

²Wo‑a a ɔ sɔn fan, nn‑na tɔɔya min dɔ bia Fiipai duu ɔ, nn mbe na to na‑a wo tena Tɛsadonika. An‑na nn bia buɛ min dɔ, a yama yama boo a. Chɛɛ chɛ gbɛɛ ɔ, Yataa‑a nn sɔɛ don fan a 'a sakana bai chɛndɛ ɔ yian koe a. An 'na chɛɛ ma nyɔncha ma a ma ni, nn ni sɛmbɛ ɛnden bɛɛ a.

³Wo e a ɔ yen tena wan gbɛ, nn ni Yataa bai sa tena buɛ min dɔ. Nn ma saman ni, yiima yama nii nn dɔ, a sin to, nn ma wo bun ni.

⁴Chɛɛ nn mbe koɔ wan, yɔ Yataa toen mu nn ni a 'a sakana bai chɛ fɔ buɛ min dɔ, nn sɔen mu min fɔ koe a. A‑a nn dɔ siman fan, a‑a a yen gbɛ mbɛ ɛ che wan dan‑da nn na. Nn ta wai mu min na, an nɛ, Yataa faa ma koe n ma koe a. Chɛɛ nn mbe ee mɔ gbu n faa ma koe n fan ma. An‑na nn yii ma koe n dɔ sɔn.

⁵Wo‑a a ɔ sɔn fan chɛndɛ chɛ, mbɛ nn ma na ni wo tena wo bun bai n fan na. Nn mbe ee koɔ, min mbe a ma, nn ni tɔnɔnɛ ma sɔn wo a. Nn sii mu Yataa an na.

⁶Nn tando koe nɛnɛ, a ee nn yii ma. Nn ma wo ɔ tisa ni a ma koe a, mɔ dɔ gbɛɛ n bɛɛ a.

⁷Sɔ mɔɛ mu buɛ min dɔ wo a Chasi ko a, nn ni kun fan boo fenɛ n ma kain‑da wo ma. Chɛɛ nn ni tima min na wo tɛ ɔ, nn‑na tima ya wan wo bia koe a. Wo maen fan ni nn tena yɔ denɛ n bɛ an de n na, an mbe bia chɛndɛ min chɛ an na.

⁸Wo ko a dia‑a wan nn ye kaka. Chɛ‑a a ma wan, nn 'na fɔɛ gbu ɔ, nn ma bɛnden ni basan koe a wo ma. Nn ma Yataa 'a sakana bai chɛndɛ chɛ dechee an sa ni wo tena.

⁹Nn suun ma nyɔɛ nu Chasi ɔ, wo wandi gbu‑a a ɔ sɔn fan, mbɛ nn‑na wai chɛ wan nn sɔɛ gbɛɛ a. Tima min na nn ni nɔ, su ɔ tee a nn‑na wai chɛ wan, nn fandi deman koe a. Nn nii ma to ni, nn 'na suunɛ ni ma si ɔ wo kun ma, nn mbe ma Yataa 'a sakana bai chɛndɛ chɛ sa‑a.

¹⁰Wo wandi gbu an mu nn 'na sii n na, ni Yataa wɛɛ. Mbɛ tɔmbɛ kan kɔ kan nii nn ma. Nn tanden fan ni, a yɛ to, nn sɔnɛ a koe n ni wo gbɛɛ tena, wo wɛn kai faen mu Chasi a.

¹¹Wo‑a a ɔ sɔn fan, nn‑na wo bia buɛ min dɔ dɔndɔ dɔndɔɛ a, yɔ fa n bɛ denɛ n na.

¹²Nn‑na wo nande wan, nn‑na wo bu ɔ dia. Nn‑na a ma din fan wo tena, mbɛ wo ni ma fɔɛ ɔ, min na di Yataa ye. A wan mbe wo chee tena, ma koe a a 'a mansaya kɔɔ, manɛ ɔ.

¹³Nn mbe Yataa wai bɔ tena ko dɔndɔ an ko a, tima ɔ tima. Nn na‑a a 'a sakana bai chɛ ɔ yian wo a tima min na, wo‑a wo boo si wan a kɔɔ. Wo ma a ya ni da a bai gbama a. Chɛɛ wo‑a a ya, a wan Yataa 'a sakana bai an na. A gbu sin mu an na. A sin mbe wai tena wo a, wo wɛn kai faen mu Chasi a.

¹⁴Chɛ sin fan fɛ mu, nn suun ma nyɔɛ nu Chasi ɔ, wo na‑a ko yawaenɛ ɔ bia wo chɛnyɛ nyɔɛ n boo ɔ. Wo na‑a bɔ ka chɛ n fan gba ɔ, chɔchi nu Chudia chɛnyɛ ɔ, miin kai faen ni Chisɔsi Chasi a. An bɛɛ na‑a ko yawaenɛ n dɔ bia ka wan, Chu mɔɛ n boo ɔ, an chɛnyɛ nyɔɛ nu.

¹⁵An dɔ n‑na Yataa 'a gbonka chɛ mɔɛ n fa wan suun. Mbɛ an dɔ n sin‑na a ma, an‑na Mansa Chisɔsi wandi wɛɛ fa. Mbɛ sanche gbɛ, an dɔ n‑na ko yawaenɛ si mmɔ a, an gbu‑a nn gbain. Mɔ ɔ mɔ mu an chɛɛ ma nyɔɛ an na. Yataa faa tɛen mu an ma gbeden.

¹⁶Nn ni sakana bai chɛ sa wan, mɔɛ chɛ n tena, miin ma Chu mɔ a. Chɛ an ni a ma, an mbe bauncha ma sɔn Yataa a. An‑na butuin chɛ wan, min mbe a ma, nn ni sɛmbɛ chɛ ma koe a to. Chɛ gbu‑a a ma gbɛ, an 'na ko yama maenɛ da fa‑a gban. A sin, Yataa ɛ a faatɛ a bɔ tena gbɛ an ma, mbɛ a sin ɛ ko ma gbaaenɛ si‑a wan an na.

¹⁷Nn suun ma nyɔɛ nu Chasi ɔ, mmɔ tɛ ka‑a tima kundu min kɔɔ, nn faa gbɛɛ nii ma bɔ ni wo tena. Nn nii wɛɛ nɔ, chɛɛ nn yiima ni wan wo kɔ. Wo sɔɛ‑a nn bia wan kaka, a sin, nn‑na butuin chɛ wan, na koe a to wo kɔndɔn‑da.

¹⁸Nn toen ni, nn ni yɛ wo tena. N fandi gbu, n‑na a chɛ wan gba sɛsɛ na koe a, chɛɛ Sitana ma dɔn ni.

¹⁹Ko dɔ gbɛɛ kan kɔ kan mbe ee to nɔ, min mbe yiinatɛ be nn ma, a ni nn bu ɔ dia, a ben wo ma. Wo wan, nn mbe wo wɛn ya a tɔnɔnɛ a, mbɛ nn‑na nn kunɛ kɔɔ sɔ den, mmɔ 'a mansa Chisɔsi chen kɔɔ, a na tima ma.

²⁰Tea ko a, wo wan mbe a ma‑a nn bu ɔ ni dia, nn kunɛ kɔɔ sɔenɛ ni ma den.