Read Kono Gboo Saa Tɛsadonika Ko A 3 Bible Online

Gboo Saa Tɛsadonika Ko A 3 - Kono bible

Gboo Saa Tɛsadonika Ko A 3

¹Mbɛ a danka a gbɛ, nn ma che ni to nn faa bia‑a. Nn‑na nn yiima ɔ bɛn fan, min mbe a ma, nn ni to nɛ Atɛnsi duu ɔ.

²Mbɛ Timoti sin, nn‑na a sɔ wo tena. Mmɔ suun ma nyɔɛ chɛ, nn bɛ ɛ wai chɛ tena min na Yataa ko a, sakana bai chɛndɛ sa koe a, a si Chasi ma. Nn‑na a ta wo tena, a ni a ma, wo ɔ ni gbɛa, wo ni wo kai fa Chisɔsi a gbau gbau.

³Chɛ an mbe a ma‑a, an ni ko yawaenɛ sa wɛɛ wo ma, wo dɔndɔ wɛɛ ee mun‑da to. Koe min na mu, tɛnɛ ko ma a Yataa wandi tena, mbɛ mmɔ ɛ ko yawaen bonda chɛ n dɔ bia wan.

⁴Koe min na mu, mmɔ bɛ ni wɛ tima min na, nn‑na a fɔ wan wo ye pɔɔ, mbɛ ko yawaen dɔ bia ɛ mmɔ ya ɔ. A sin, yɔ wo wandi‑a a ɔ sɔn gbɛ buɛ min dɔ, a ma‑a ka wan.

⁵N nii ma a ɔ sɔn, wo ni gbɛ buɛ min dɔ. Ni wo ni wan tun sɔ ɔ gban, Chasi ko a. Chɛ ma, ni Sitana kun‑da wan wo ma, wo ni wo kan kɔ sɔ Chasi a. Mbɛ nn 'na wai nyima gbɛɛ, a ma‑a fufafuu a. N ma che ni to chɛ ɔ bia‑a. Chɛ an fɛ mu, n‑na Timoti a na wo tena, a ni a gba bɔ.

⁶Chɛɛ Timoti yɛ‑a sanche gbɛ nɛ, a ka wo tena. A na‑a bai min na, a si koadia ma, ni wo kai fa buɛ Chisɔsi a, buɔdia mu. A ni a fɔ nn ye, mbɛ tima ɔ tima ko a, wo e yii na chii chɛndɛ an chɛ nn na. A sin, nn toen mu nn ni wo yen buɛ min dɔ, wo wɛɛ wo toen mu ka wan nn yen koe a.

⁷Chɛ mu nn ma faachima an na, nn 'na ko yawaen dɔ bia chɛ gbɛɛ ɔ, a basan faamɔnɛ a. Nn suun ma nyɔɛ nu, wo kai fa buɛ chɛ Chisɔsi a, a ma‑a faamanande a nn ma.

⁸A mu fɔɛ nama an na nn tena, wo kai fa buɛ chɛ gban Mansa Chisɔsi a.

⁹Nn mbe tando be tena gba Yataa ma, wo ko a. Koe min na mu, nn 'na buɔdia koo, a chen kɔɔ, wo ko a.

¹⁰Su ɔ tee a, nn mbe samunɛ chɛ tena wo ko a, nn faa gbɛɛ a. Nn mbe a ɔ tisa tena, a ni a ma mmɔ bɛ ni mmɔ nyɔn ye, nn ni wo deman chia dɔ n na, miin nyin wo 'a danaya ko a.

¹¹Mmɔ Fa Yataa wandi, an fea mmɔ 'a mansa Chisɔsi a, an ni chia a ka nn ye, nn ni na wo tena.

¹²Koadia min mbe wo faa ɔ, wo nyɔn ko a, a basan mɔɛ tɔɛ gbɛɛ a, Mansa Chisɔsi ni a ma munda ta‑a. A ni koa yɔ nn ta koadia wo ko a.

¹³Chia chɛ a mu, ɛ wo ɔ gbɛa‑a, min mbe a ma, mmɔ Fa chen kɔɔ, mabɔ ee ma‑a wo ma. Chɛ ɛ ma‑a wan, mmɔ 'a mansa Chisɔsi ɛ na‑a tima min na, an bɛ gbɛɛ chɛ n na, miin mu a ta n na.