Read Kono Gboo Saa Tɛsadonika Ko A 4 Bible Online

Gboo Saa Tɛsadonika Ko A 4 - Kono bible

Gboo Saa Tɛsadonika Ko A 4

¹A danka a gbɛ, nn suun ma nyɔɛ nu Chasi ɔ, wo‑a a kan fan nn ma, wo e ma fɔɛ min sima ɔ, min mbe Yataa faa chima. Wo sin, tea ko a, wo e tachɛ tena ka wan fɔɛ ɔ. Sanche gbɛ sin, a dinden fan mu wo ma, mbɛ wo ma yɛ to kuu kɔ. Mmɔ ma‑a mɔ dɔndɔɛ a, mmɔ bɛ Mansa Chisɔsi a. An fɛ mu, nn mbe wo faa ma nande tena, wo ni a a tun tachɛ koe a chɛndɛ chɛ.

²Wo wandi‑a a ɔ sɔn fan, Mansa Chisɔsi 'a gbasaya ɔ, nn‑na koe miin fɔ wo ye a ma koe a.

³Yataa toen mu wo ni ma tenchen a wan ko a, wo ni wo boo bɔ ko tɛ kan kɔ kan dɔ.

⁴Wo gbɛɛ ni wo gboo bia basɔmaya ɔ, Yataa chia a.[1]

⁵Wo ma ma koe tɛ mɔɛ n na, yɔ mɔɛ chɛ nu, miin ma Chisɔsi sɔn.

⁶Mbɛ an chia chɛ a, mɔ ɔ mɔ ma ko yama ma a bɔ Chisianɛ a, a ma gbasaya din a ma. Nn‑na chɛ fɔ wan wo ye a kɔma a gbau gbau, mbɛ Mansa Yataa ɛ mɔɛ n tɔɔ‑a wan, miin mbe ko bonda chɛ sima ma‑a.

⁷Yataa ma mmɔ chee ni a ta mɔɛ n na, ma koe a fɔɛ yama an dɔ. Chɛɛ ma koe a mu tenchen a ko a.

⁸Chɛ an‑na a fɔ, mɔ ɔ mɔ min mbe ban‑da kan chɛ ɔ, a ee ma‑a ka ban‑da mɔ gbu an dɔ. Chɛɛ ɛ ma‑a ka a kan kɔ sɔ‑a Yataa an na, min‑na a Nyina bea wo fɛ.

⁹Tima yayi mu, gboo nyɛn koe a wo tena, a fɔ koe a wo ye, mbɛ wo ni to wo bɔ Chisianɛ n na. Yataa wandi‑a wo kan, wo e kun buɛ min dɔ to koe a wo nyɔn na.

¹⁰Wo sin gbu, tea ko a, wo sɔnɛ ɛ ka wan Chisian chɛ n gbɛɛ tena, miin mbe Masidonia chɛnyɛ ɔ. Chɛɛ nn suun ma nyɔɛ nu Chasi ɔ, nn mbe wo disa tena, min mbe a ma, wo gbu ni to an na, a ben chɛ ma.

¹¹Wo a ɔ yen, mbɛ wo e ma‑a fɔɛ min dɔ, sɔnkɔ sɔnkɔ fɔɛ ma. Wo ma wo da chɛ mɔɛ n 'na koe n dɔ. Wo ma wo boo chɛ mɔɛ n ta koe n dɔ, wo ni wo ta to. Wo wai bia wo boo fea a. A kɔma wɛɛ a, nn na‑a a fɔ ka wan wo ye, a ma koe a.

¹²Ni wo‑a chɛ ma, basɔmaya ɛ ma‑a wan wo ma chɛ n tena, miin mu Yataa sɔn bai n na. A sin, wo ee na‑a mɔ ɔ mɔ ya ɔ fɛn‑da fen fen ko a, wo e to‑a min na.

¹³Nn suun ma nyɔɛ nu Chasi ɔ, nn toen mu wo ni tea ɔ sɔn, a si chɛ n ma, miin na‑a an kai fa Chisɔsi a, an mbe e na to fa‑a. Chɛ ɛ a ma‑a wan, wo faa ee yɔn‑da, yɔ mɔɛ chɛ nu, yiinatɛ ee miin dɔ.

¹⁴Mmɔ gbɛɛ danden fan mu chɛ a, mbɛ Chisɔsi fa‑a wan, a‑a a kɔɔ sɔ, a ka saya ɔ. A sin, mmɔ danden fan mu to chɛ a, Yataa ɛ min ma‑a mɔɛ chɛ n na. Mɔɛ chɛ nu, miin na‑a an kai fa Chisɔsi a, aan an fa‑a. Ni Chisɔsi na‑a to, Yataa ɛ a ma‑a wan, an bɛɛ ni na, an bɛ Chisɔsi a.

¹⁵Mansa Chisɔsi ɛ na‑a tee min na, mmɔ wɛn mbe ma‑a fɔɛ a, mmɔ pɛn mbe ee a tan‑da. Mmɔ ee mmɔ kɔɔ sɔ‑a, mɔɛ chɛ n ya ɔ, miin na‑a fa, ta koe a mmɔ ni a tan. Nn mbe ka wo kan‑da min na, Mansa Chisɔsi wandi da a bai an nɛ.

¹⁶Kuiɛ ɛ a fɔ‑a wan mɔɛ n ye, an mbe koe min ma. Chɛ ɛ ma‑a Yataa 'a maeka chenama kuiɛ an na, Yataa 'a buu kuiɛ. A sin, Mansa Chisɔsi wandi ɛ yii‑a wan, a ka banda bu ɔ. Chɛ gbakɔ, mbɛ mɔɛ miin na‑a an kai fa Chisɔsi a, aan an fa‑a, an pɛn mbe an kɔɔ sɔ‑a, an ni yɛ fɔɛ ɔ.

¹⁷Mbɛ a tima chɛ a, mmɔ wɛn mbe ma‑a fɔɛ ɔ, mmɔ bɛ an na, mmɔ gbɛɛ ɛ ya a wan, mmɔ a ni sɔn dugbu ɔ banda a. Chɛ an mbe ma‑a, mmɔ ni Mansa Chisɔsi tan. Chɛ ɛ a ma‑a wan, mmɔ bɛ ni ma kuɔ fɔ ko a.

¹⁸Chɛ ko a gbɛ, wo wo nyɔn faa ma nande bai chɛ n na.