Read Kono Gboo Saa Tɛsadonika Ko A 5 Bible Online

Gboo Saa Tɛsadonika Ko A 5 - Kono bible

Gboo Saa Tɛsadonika Ko A 5

¹Nn suun ma nyɔɛ nu Chasi ɔ, gboo nyɛn gbu ee nn ma, a ɔ yian koe a wo a, koe chɛ n gbɛɛ n mbe ma‑a tima min na. Chɛ ma, nn ni a ɔ yian, ni an gbu an mbe ma‑a buɛ min dɔ.

²Koe min na mu, wo wandi gbu‑a a ɔ sɔn fan chɛndɛ chɛ, mbɛ mmɔ 'a mansa na tima ɛ che tena wan. Ɛ ma‑a wan, yɔ kanka ɛ mɔɛ tɛnɛ buɛ min dɔ pimbi ɔ.

³Mɔɛ n mbe ma‑a a fɔ‑a dechee, an dɔ, “A yama ee nɛ,” an dɔ, “koe n dɔ chimaen mu,” a tima chɛ a mu, kasaa ɛ an tan‑da. Ɛ an tɛnɛ‑a wan, yɔ bu ɔ tɛ ɛ musu tɛnɛ buɛ min dɔ. A sin, mɔɛ n kun mbe ee bɔ‑a a ɔ.

⁴Chɛɛ nn suun ma nyɔɛ nu Chasi ɔ, wo tana, wo ee pimbi ɔ. Chɛ an fɛ mu, an tee chɛ ee che wo tɛnɛ‑a yɔ kanka ɛ na buɛ min dɔ.

⁵Wo gbɛɛ mu mɔɛ n fan na, miin mbe manɛ kɔɔ, miin mbe an tee chɛ ko a. Mɔɛ nu ma mmɔ a, miin mbe ee manɛ kɔɔ, miin mbe pimbi pimbi ɔ.

⁶Chɛ ko a, mmɔ ma ma chinɔɛ ɔ, yɔ mɔɛ tɔɛ chɛ nu. Chɛɛ mmɔ ni ma mmɔ ya a tima ɔ tima ko a, mmɔ yiima sienɛ ɛ chidi.

⁷Pimbi ɔ mu, mɔɛ n mbe chinɔ. A yɛ to, pimbi ɔ mu, gbɛ ɛ mɔɛ n bia.

⁸Chɛɛ mmɔ tana, tee kɔɔ mɔɛ mu mmɔ a, mmɔ yiima sien fan mu chidi. Mmɔ kai faenɛ ni ma Yataa a, mmɔ ni to mɔ dɔ mende n na. Chɛ ni mmɔ konde gbain, yɔ a 'a chɛɛ chɛ doma an mbe mmɔ ma. Yiinatɛ ni ma mmɔ ɔ, mbɛ bauncha ɛ wan mmɔ ko a. Chɛ ni ma chɛɛ chɛ banfua a mmɔ kun na.

⁹Yataa ma mmɔ ya ni a ta mɔɛ n na, a ma koe an na, a ni faa tɛ‑a bɔ mmɔ ma, mmɔ ni tɔɔya ɔ bia. Chɛɛ a ma koe mu, mmɔ ni bauncha ma sɔn, a ka mmɔ 'a mansa Chisɔsi Chasi a.

¹⁰A wan fa‑a mmɔ ko a, min mbe a ma, mmɔ bɛ ni ma fɔɛ dɔndɔɛ ɔ. Tima min na ɛ na‑a to, mmɔ ni ma fɔɛ ɔ wan, mmɔ faen fan ni ma, chɛ ɛ ma‑a wan.

¹¹Chɛ ko a, wo e ka a ma‑a buɛ min dɔ sanche, wo ma yɛ to kuu kɔ. Wo wo nyɔn faa ma nande, wo ni basan wo nyɔn ma.

¹²Nn suun ma nyɔɛ nu Chasi ɔ, nn mbe wo disa tena, wo ni basɔmaya da faenɛ be wo ya ɔ sɔɛ n ma, wo bɛ ɛ miin na. An fan mbe wai chɛ tena wo ko a, an mbe koe n dɔ yian wo a, an mbe wo sɔ‑a chia ma, koe n dɔ, a si Mansa Chisɔsi ma.

¹³Wo basɔmaya wa be an ma, wo ni koadia yian an na, an 'na wai ko a, an mbe min chɛ tena. Faachima ni ma wo gbɛɛ tɛ ɔ.

¹⁴Nn suun ma nyɔɛ nu Chasi ɔ, nn mbe wo ɔ tisa tena, wo ni dasi be baa baa tɔɛ n ma. Chiandia koo miin gboo ɔ, wo ni an faa ma nande, mbɛ wo‑a chɛ n deman, miin dɔ ma gbɛ. Wo wo faa bia mɔ ɔ mɔ a.

¹⁵Wo a ɔ yen, mbɛ wo dɔndɔ wɛɛ ma ko yama a yɛ ko yama ko a. Chɛɛ wo a ma wo ma gbɔsɔɛ a, tima ɔ tima ko a, wo ni ko chɛndɛ ma wo nyɔn na, wo ni a ma mɔ dɔ gbɛɛ n bɛɛ a.

¹⁶Wo bu ɔ diama ni ma tima ɔ tima.

¹⁷Wo samunɛ chɛ tima ɔ tima.

¹⁸Wo ma min chɛ‑a mɔ dɔndɔɛ a Chisɔsi Chasi a, Yataa toen mu wo ni chɛ an ma. Ko ɔ ko ni wo tan, wo ni a wai bɔ.

¹⁹Wo ma wo boo sɔ Yataa Nyina ya ɔ, a 'a wai chɛ koe a wo ɔ.

²⁰Yataa ɛ a 'a sakana bai min be mɔɛ n ma, a ɔ yian koe a wo a, wo ma ban an bai chɛ n dɔ.

²¹Chɛɛ wo an gbɛɛ ma fɛn bɛ, min nyin, mbɛ wo‑a wo boo a chii a ma.

²²Min kɔ min sin mu ko yama a, wo ma wo boo chɛ a ɔ.

²³Yataa wandi, min mbe faachima be mmɔ ma, a ni a ma wo ni ma a ko a tenchen chia ɔ chia a. A ni wo kun ma fɛn chia gbɛɛ a. Mabɔ kan kɔ kan ma ma wo ma, wo 'a fɔɛ gbɛɛ ɔ, tima min na mmɔ 'a mansa Chisɔsi Chasi ɛ na‑a.

²⁴Yataa min‑na mmɔ chee a ta mɔɛ n na, ɛ chɛ ma‑a wan. A ee a da a kuiɛ yɔn mmɔ tena.

²⁵Nn suun ma nyɔɛ nu Chasi ɔ, wo samunɛ chɛ nn ko a.

²⁶Mɔɛ chɛ n gbɛɛ, miin kai faen mu Chisɔsi a, wo an kɔndɔn koadia faa a.

²⁷Mansa Chisɔsi ɛ mmɔ yen tena. N mbe na tena chɛ an ma din‑da wo tena gbau gbau. Mbɛ wo ni gboo nyɛnden chɛ kan chɛ n gbɛɛ tena, miin kai faen mu a a.

²⁸Mmɔ 'a mansa Chisɔsi Chasi ni wo dua.