Read Kono GBOO FEAN BƆƐ TƐSADONIKA KO A 1 Bible Online

GBOO FEAN BƆƐ TƐSADONIKA KO A 1 - Kono bible

GBOO FEAN BƆƐ TƐSADONIKA KO A 1

¹Nn fan mbe gboo chɛ nyɛn tena, n fan Pɔɔ, Sidasi, ni Timoti. Nn mbe a nyɛn tena wo wan chɔchi mɔɛ chɛ n fan tena, pan Tɛsadonika duu ɔ. Wo wɛn mbe kuiɛ dɔndɔya ɔ, wo bɛ mmɔ Fa Yataa a, an fea Mansa Chisɔsi Chasi a.

²Mmɔ Fa Yataa, an fea Mansa Chisɔsi Chasi a, an 'na dua ni ma wo ma, a basan an 'na faachima a.

³Nn suun ma nyɔɛ nu Chasi ɔ, nn mbe samunɛ chɛ tena tima ɔ tima wo ko a. A sin nyin fan nn ni a ma ka. Koe min na mu, wo 'a kaifa Chisɔsi a, a ma ɛ munda tena wan kaka. A sin to, koadia ma ɛ munda tena wan wo faa ɔ, wo nyɔn ko a.

⁴Chɛ an fɛ mu, nn bɛɛ, nn mbe koɔ chɔchi tɔɛ chɛ n dɔ, nn kunɛ kɔɔ sɔenɛ a, a si wo ma. A si wo e koe n dɔ bia tena buɛ min dɔ. An mbe a ma tena wɛɛ wo e tɔɔ tena, wo kai faenɛ mu tun Chisɔsi a.

⁵Chɛɛ chɛ gbɛɛ ɛ a ɔ yian tena wan, mbɛ Yataa ɛ tea kaa an na tɛ. Wo e tɔɔya min dɔ yen tena, Yataa 'a mansaya an ko a mu, banda bu ɔ. Wo e ka tɔɔ‑a buɛ min dɔ, an mbe wo ma‑a mɔɛ n na, miin mbe kun an ni don a 'a mansaya kɔɔ.

⁶Yataa ɛ ma‑a an tea kaa chɛ sin na tɛ‑a, ɛ a ma‑a wan mɔɛ chɛ n ni ko yawaenɛ ɔ yen, miin‑na ko yawaenɛ sa wo ma.

⁷Mbɛ wo wɛn sin na‑a an ko yawaen chɛ ɔ bia, Yataa ɛ bauncha be‑a wan wo ma. Ɛ a be‑a wan n bɛɛ ma, a basan nn bɔɛ n bɛɛ a. Ɛ chɛ ma‑a wan, tima min na Yataa ɛ Mansa Chisɔsi yian‑da, a ka banda bu ɔ, an bɛ a 'a maeka wa n na.

⁸Ɛ na‑a wan ta man ba ɔ, an bɛ a 'a maeka n na, mɔɛ chɛ n tɔɔ koe a, miin ban‑da Yataa ɔ. An sin nii ma bea ni sakana bai chɛ fɛ, a si mmɔ 'a mansa Chisɔsi ma.

⁹Yataa ɛ a ma‑a wan, an ni tɔɔya ɔ yen, an ni kasaa kuɔ fɔ ko a. An tɛ duenɛ an mbe ma‑a mmɔ 'a mansa a, an mbe ee ma‑a a 'a manɛ kɔɔ.

¹⁰Chɛ an mbe ma‑a, ɛ na‑a tima min na an tee wa chɛ ma, tando ma sɔn koe a, a basan basɔmaya a. A ma sɔn koe a, a ka a ta mɔɛ chɛ n gbɛɛ a,[1] miin kai faen mu a a. Wo wɛɛ, wo e ma‑a wan an tɛ ɔ. Koe min na mu, wo‑a wo kai fa sakana bai chɛ a, nn‑na min fɔ wo ye.

¹¹Chɛ an fɛ mu, nn mbe samunɛ chɛ wo ko a tima ɔ tima ko a. Nn mbe mmɔ 'a Yataa fai tena, min mbe a ma, wo ni kun ma koe a fɔɛ chɛ ɔ, a‑a wo chee ma koe a min dɔ. A ni a ma, a 'a gbasaya ɔ, wo ni che wo faa ma koe chɛndɛ gbɛɛ ma‑a. A yɛ to, wo kai faenɛ min chɛenɛ ɛ Chisɔsi a, a ni a ma wo ni koe gbɛɛ ma, wo e min ma.

¹²Chia chɛ a mu, mmɔ 'a mansa Chisɔsi tɔɛ ɛ basɔmaya ma sɔn‑da, a ka wo a. A sin, wo wɛɛ, wo e basɔmaya ma sɔn‑da wan, a ka a a. Yataa 'a koadia demanɛ, an fea mmɔ 'a mansa Chisɔsi Chasi a, an mbe a ma‑a chɛ ni ma.