Read Kono 1 TIMOTI 3 Bible Online

1 TIMOTI 3 - Kono bible

1 TIMOTI 3

¹Tea bai yen ko, ni mɔɛ toen mu ya ɔ sɔ ya a chɔchi ɔ,[2] a‑a wai chɛndɛ an ya ka.

²A mɔɛ chɛ ɛ ma mɔ tandenɛ an na. Musu dɔndɔ gbe an mbe ma a boo ɔ,[3] mɔɛ min kosan a wandi bia‑a, basɔmaya tɔɛ, sonda bia mɔɛ, a sin kosan mɔɛ n kan‑da.

³A ee gbɛ wa min, faagbandia tɔ ma a a, chɛɛ a ni ma mɔɛ a min faa chimaen mu, a ee koɔ yan. A sin, kɔpɔɛ wako ee a faa ɔ kaka.

⁴Ɛ ma mɔɛ an na min kunden mu a 'a chenɛ ma chɛndɛ chɛ, a 'a denɛ n kooenɛ a ye, an sin kanden mu chia ɔ chia a.

⁵A mu min na, ni mɔɛ ma kun ni a wandi gbu ta chenɛ ma, a ee kun a ni che koe ɔ bɛn‑da chɔchi ɔ.

⁶A ni ma mɔɛ an na min kai faen mu Chisɔsi a tima dɔ ko a. Chɛɛ ni tima kundu ko a mu dechee, kɔkɔɛ ɛ a ma‑a wan, a ni dɔpandaya bɔ. A sin, Yataa ee a tɔɔya‑a, yɔ Sitana ma‑a buɛ min dɔ.

⁷A sɔnɛ ma ni kawa mɔɛ chɛ n ye, miin mbe baa kɔ, min mbe a ma, an mbe ee tɔ yama si‑a a kun ma, mbɛ a chɛɛ‑a Sitana 'a gbai a.

⁸Mɔɛ miin bɛɛ ɛ chɔchi ɔ demanɛ chɛ‑a,[4] an ni ma basɔmaya tɔɛ n na. An ma ma nɛnɛn fea ti n na, an ma gbɛ wa min, an sin, kɔpɔɛ koe ma ma an faa ɔ kaka.

⁹An ni an boo a chii tea chɛ ma, Yataa‑a min kɔɔ yian. An yiima, a ni ko, a si an tea chɛ ma.

¹⁰An dɔ ni siman pɛn. Ni an‑na an dɔ siman chɛ ben, mbɛ an‑na a kuu sɔ demanɛ chɛ‑a chɔchi ɔ.

¹¹A musu n[5] bɛɛ sɔnɛ a ni dondan, an ma tɔ ɔ tɛ chɛ, an ni ma basɔmaya tɔɛ n na, an tandenɛ ni ma ko ɔ ko ɔ.

¹²Mɔɛ miin mbe demanɛ chɛ chɔchi ɔ, musu dɔndɔ an mbe ma an boo ɔ. An ni kun an 'na chenɛ bia‑a chɛndɛ chɛ, a basan an 'na denɛ n na.

¹³Deman chɛ mɔɛ chɛ nu, miin mbe an 'na wai chɛ‑a chɛndɛ chɛ, an mbe baa sɔn‑da wan an fandi ko a. An sin mbe kun‑da wan an ni koɔ, an kuiɛ ma sɛenɛ a, a si an 'na danaya ma Chisɔsi Chasi a.

¹⁴N toen mu n ni na i tan sanche. Chɛɛ n mbe gboo chɛ nyɛn tena i tena, min mbe a ma,

¹⁵ni n ma fua ni na‑a, gboo nyɛnden chɛ, ɛ a ɔ yian‑da wan i a, mɔɛ ɛ tachɛ buɛ min dɔ, Yataa 'a mɔɛ n tɛ ɔ. An mu chɔchi an na, Yataa, min mbe ee fa kuɔ fɔ ko a, a waa a, Chisian danaya kuu si tena, ni a kɔɔ sɔ kɔnɛ.

¹⁶Mɔ ɔ mɔ ee che chɛ kɔɔsa bia‑a, mbɛ koe nu, Yataa‑a min dɔ yian mmɔ a, tea mu an na. A na‑a mɔgbuya an dɔ. Yataa Nyina‑a tea be a ma. Maeka n‑na a yen. A wakoe ɔ yian‑da wan dunya a. A sin dunya‑a a kai fa a a. Yataa‑a a ya a sɛ‑a manɛ ɔ.