Read Kono 2 TIMOTI 1 Bible Online

2 TIMOTI 1 - Kono bible

2 TIMOTI 1

¹N fan Pɔɔ, n fan mbe ka gboo chɛ nyɛn‑da i tena, i wan Timoti. N faa ma denɛ mu gbɛ i a. Chisɔsi Chasi 'a sɔ mɔɛ mu n na, yɔ Yataa toen ni buɛ min dɔ a ni ma. A‑a n sɔ, n ni a ɔ yian mɔɛ n na, mbɛ ni mmɔ ma‑a mɔ dɔndɔɛ a, mmɔ bɛ Chisɔsi Chasi a, an mbe a ma, mmɔ ni kuɔ fɔ fɔɛ ma sɔn. Yataa na‑a a fɔ ka wan. Mmɔ Fa Yataa, an fea mmɔ 'a mansa Chisɔsi Chasi a, an 'na dua ni ma i ma, an 'na chinchimaya ni ma i ma, a basan an 'na faachima a.

³N mbe Yataa wai bɔ tena i ko a, n mbe wai chɛ tena min ye n yiima a koenɛ a fion, yɔ n bemba n ta bemba n ni a ma tee buɛ min dɔ. N mbe samunɛ chɛ tena i ko a su ɔ tee a.

⁴A a ma nyina nin bɛ n na, faayɔn ba min ni i ɔ, mɔ‑a mɔ saa mɔ nyɔn na tima min na. A sin, i yen sɔɛ an mbe n na kaka, min mbe a ma, n bu ɔ ni dia.

⁵Danaya gbau gbau min mbe i ɔ Chisɔsi ko a, a puin‑da n yii ma. Danaya min nyɔn sima ni i mama Doyisi ɔ an fea i de Yunisi a, n danden fan mu a a, mbɛ an mbe i ɔ.

⁶Chɛ an fɛ mu, n mbe a fɔ tena i ye to, mbɛ i ni tachɛ fen chɛ a chɛndɛ chɛ, Yataa‑a boo fenɛ min be i ma, n na‑a n boo bun i ma tima min na i dua koe a.

⁷Koe min na mu, Yataa Nyina min be mmɔ fɛ, a ee a ma mmɔ ni chian. Chɛɛ ɛ gbasaya an chɛ mmɔ ɔ, a basan koadia a, ni mɔɛ e kun buɛ min dɔ i faa ma.

⁸Chɛ an‑na a fɔ, i ma mau mmɔ 'a mansa wakoe ɔ yian koe a mɔɛ n na. N bɛɛ wakoe, i ma mau n ko a, koe min na mu, n mbe pimbi chenɛ a a si Chasi ko a. Chɛɛ Yataa 'a gbasaya ɔ, i wɛɛ i ta mɔnɛ ɔ bia a 'a sakana bai chɛndɛ ko a. A sin mbe a 'a gbasaya be‑a wan i ma.

⁹A‑a mmɔ baun fan, mbɛ a‑a mmɔ chee ma koe a a ta mɔɛ n na. A ma chɛ ma ni mmɔ sɔn chɛndɛ an ko a. Chɛɛ Yataa e na to dunya a dan‑da, a wandi na‑a a ɔ bɛn ka wan, a 'a koadia demanɛ ɔ, a‑a min dɔ yian Chisɔsi Chasi ɔ.

¹⁰Chɛɛ sanche gbɛ, mmɔ baun mɔɛ Chisɔsi Chasi na‑a dunya ɔ, min mbe a ma, mmɔ ni a 'a koadia deman chɛ ɔ yen. Chasi‑a a ma gbasaya ee to saya boo ɔ mmɔ kun ma. Sakana bai chɛndɛ chɛ ɔ, a‑a kuɔ fɔ fɔɛ yian mmɔ a.

¹¹Sakana bai chɛ ko a mu, a‑a n ya sɔ mɔɛ a, n ni kanɛ chɛ, mbɛ n‑na a ɔ yian mɔɛ n na.

¹²A sin, chɛ an fɛ mu n mbe ka mɔnɛ bonda chɛ ɔ bia tena. Chɛɛ mau ee n dɔ, koe min na mu, n‑na a ɔ sɔn fan, n kai faen mu min na. A sin n danden fan mu a a, mbɛ a‑a fenɛ min be n ma,[1] ɛ che wan a kun ma fɛn‑da aan a tee dankama chɛ ni che.

¹³Bea tea bai chɛ n fɛ, n‑na i kan miin na. An ni ma tɔmɔsi a i tena. Koe min na mu, mmɔ ma‑a mɔ dɔndɔɛ a Chisɔsi Chasi a, a sin i ma sɛmbɛ dan koe ma a a, a basan koadia a.

¹⁴Yataa Nyina 'a gbasaya ɔ, min mbe mmɔ fɛ, tea chɛ min been mu i ma, a bia i boo fea a.

¹⁵I‑a a ɔ sɔn fan mbɛ an gbɛɛ, an fɛn mbe Esia chɛnyɛ ɔ, an ka‑a n fɛ, an bɛ Fichɛdɔsi a, ni Amɔchɛnesi.

¹⁶Mansa Chisɔsi ni chinchin Wɔnesifɔyɔsi 'a chenɛ ma, koe min na mu, a ni buɔdia be wan n ma tima sɛsɛ ko a. A ma mau ni n ma, n 'na pimbi chen na sa ko a.

¹⁷Chɛɛ a‑a a fo kɛn Domi duu ɔ, a‑a a ya a kan fan n na a sɔɛ gbɛɛ a, aan a‑a n yen.

¹⁸I sin‑na a ɔ sɔn fan chɛndɛ chɛ, a‑a min chɛ n ko a Ɛfisɔsi duu ɔ. Mansa Yataa ni chinchin a ma tee dankama ma.