Read Kono 2 TIMOTI 4 Bible Online

2 TIMOTI 4 - Kono bible

2 TIMOTI 4

¹Chisɔsi Chasi ɛ ma‑a tima min na a 'a mansaya ɔ, ɛ mɔɛ gbɛɛ gbɛmbo‑a wan, fuɛ n bɛ chɛndɛ ba n na. Chɛ an fɛ mu, Yataa an fea Chasi a, an mbe mɔ yen tena wan. N mbe na tena chɛ an ma din‑da i tena gbau gbau.

²Sakana bai chɛ ɔ yian mɔɛ n na, tee kɔɔ sona kɔɔ, i ma bɛn a ɔ yian koe a. Mɔɛ n yiima mun, an‑na ko yama fɔ an ye, mbɛ i‑a an faa ma nande, e ta‑a i faa bia‑a an na, ni i ma‑a an kan‑da.

³Koe min na mu, tima ɛ che tena wan, mɔɛ n mbe ee an too ma sɔ‑a kan chɛ buɛ chɛndɛ ma. Chɛɛ an mbe bea‑a an fandi faa ma koe an fɛ, mbɛ an‑na kan chɛ mɔ sɛsɛ a sɔn sɔn an 'na tindanɛ, an too faa ma koe ɔ yian koe an na.

⁴An mbe ban‑da wan an too ma sɔ koe a tea ma, mbɛ an‑na an too be tai n ma.

⁵Chɛɛ i tana, sɔ chidi. Ko yawaenɛ ɔ bia, i ni i sɔɛ gbɛɛ chɛ Yataa 'a sakana bai chɛndɛ ɔ yian koe a mɔɛ n na. I 'a wai gbɛɛ chɛ, Yataa 'a wai chɛ mɔɛ ɛ min chɛ.

⁶N tana, n mbe ka gbɛ chia an ma. Tima che‑a gbɛ Yataa boo ɔ n ya koe a fɔɛ chɛ ɔ.

⁷N‑na butuin chɛndɛ chɛ chɛ, n che‑a a danka a. N sin ma ka ni n 'na danaya gbee a.

⁸A ka gbɛ sanche ma, boo ɔ gbasi woo ɛ n ma kɔn tena banda bu ɔ, Mansa Chisɔsi boo ɔ, a wɛn tanden mu kaa a tɛ ɔ. Ɛ a be‑a wan n ma a tee chɛ ma. A sin mbe ee ma‑a n dɔndɔ gbe an na, chɛɛ chɛ n bɛɛ miin ya ɛ chia a, a na tima ma kɔnɛ a.

⁹A ma i ma gbɔsɔɛ a, i ni na n tan sanche.

¹⁰Demasi tana, a ka‑a n fɛ dunya chɛ ko a, a ta‑a Tɛsadonika duu ɔ. Kesensi ta‑a Kadesia chɛnyɛ ɔ, mbɛ Taitɔsi sin ta‑a Damatia chɛnyɛ ɔ.

¹¹Duku dɔndɔ gbe an mbe nɛ n tena. Ni i ma‑a na‑a, wo fea ni na Maki a, a mu min na, ɛ n deman‑da wan n 'na wai a.

¹²Tikikɔsi sin, n mbe ka gbɛ a na‑a na nɔ Ɛfisɔsi duu ɔ.

¹³Ni i ma‑a na‑a, na n 'na doma kai chɛ a, n‑na min to Kapɔsi boo ɔ Towasi duu ɔ. Na n 'na gboo chɛ n bɛɛ a, a bɛbɛɛ miin nyandenɛ ɛ ka soe gboo ma.

¹⁴Adɛsanda, tonkan ti chɛ, a‑a ko yama wa an ma n na. A sin, Mansa Yataa ɛ a pawa‑a wan a chɛ chɛ wai chɛ ko a.

¹⁵I kun ma fɛn a boo ɔ, a mu min na, a ni chɛɛ ma nyɔn ba an na, mmɔ 'a sakana bai ko a.

¹⁶N sɔ saa a kuti ɔ, mɔ ɔ mɔ kan kɔ kan ma a ya a bɔ ni nɔ n ko a. Yataa ni a boo bɔ an sɔn chɛ ɔ.

¹⁷Chɛɛ Mansa Chisɔsi sɔ‑a wan n kɔ gban, a‑a a ma n che‑a a 'a sakana bai fɔ‑a chɛndɛ chɛ. Chɛ‑a a ma wan, mɔɛ miin ma Chu mɔ a, an gbɛɛ‑a a a min. A sin to, a‑a n kun ka wan.

¹⁸Ɛ n kun bɔ‑a wan ko yama kan kɔ kan dɔ, mbɛ a‑a n baun, a ta‑a n na a 'a banda bu ɔ mansaya ɔ. Tando ni ma a tɔɛ ma, kuɔ fɔ ni kuɔ fɔ. A ni ma ka.

¹⁹N mbe Akuida kɔndɔn tena, an fea Pisida a, a basan Wɔnesifɔyɔsi 'a chen na mɔɛ n na.

²⁰Ɛyasitɔsi to‑a Kɔyindi duu ɔ wan, mbɛ n‑na Tɔfimɔsi sin to Midetɔsi duu ɔ, a gbandienɛ ni a tima chɛ a.

²¹A ma i ma gbɔsɔɛ a, i ni na chima na tima ya ɔ. Chɛ n gbɛɛ an‑na i kɔndɔn, Yubusi ni ma, ni Pudensi, ni Dinɔsi, ni bɔɔɛ Kaudia, a basan mɔ suun ma nyɔɛ tɔɛ n na.

²²Mansa Chisɔsi ni tachɛ i a. A 'a dua ni ma wo ma.