Read Kono TAITƆSI 3 Bible Online

TAITƆSI 3 - Kono bible

TAITƆSI 3

¹A fɔ to an ye an ni don mansa n kɔɔ, a basan ya ɔ sɔɛ n na, an ni kooya be an ma, an ni an ma bɛn ko chɛndɛ ma koe a chia ɔ chia a.

²An ma bai yama sa mɔ ɔ mɔ ma, an ni an boo bɔ koɛ ɔ, an ni ma mɔ ma chimaenɛ n na, miin mbe basɔmaya be mɔ ɔ mɔ ma.

³Mmɔ wandi wɛɛ, tima dɔ a mmɔ wooen ni, mmɔ nii kooya be, mɔɛ n na‑a mmɔ sɔ wan chia yama ma. Mmɔ ni yɔnɛ n fan na, mmɔ faa ma koe n dɔ, a basan dunya ma koe n na. Mmɔ na‑a tima gbɛɛ ya fɔɛ ɔ toomaya an dɔ, mɔɛ n tooenɛ ɛ mmɔ a, mmɔ wɛɛ tooenɛ ɛ mmɔ nyɔn na.

⁴Chɛɛ mmɔ baun mɔɛ Yataa, a‑a ko chɛndɛ ma mmɔ a, a‑a koadia yian mmɔ a.

⁵A‑a mmɔ baun. Chɛ ma bɔ ni mmɔ sɔn chɛndɛ an dɔ, mmɔ 'a teaya ɔ ma. Chɛɛ a 'a chinchimaya ko a, a‑a mmɔ 'a ko yama n ko, a‑a fɔɛ nama be mmɔ ma, a Nyina 'a gbasaya ɔ.

⁶Yataa‑a a ma, mmɔ‑a a Nyina ma sɔn gbama gbama a, Chisɔsi Chasi ɔ, mmɔ baun mɔɛ.

⁷Yataa‑a chɛ ma, min mbe a ma, a ni mmɔ sɔ chia ma kuɔ fɔ fɔɛ ma sɔn koe a. Koe min na mu, a 'a koadia demanɛ ɔ, a‑a mmɔ ya mmɔ tandenɛ n na a tena.

⁸Tea bai an nɛ, n mbe ka min fɔ tena. N toen mu i ni koe chɛ n ma i ma gbɔsɔɛ a, min mbe a ma, mɔɛ miin kai faen mu Yataa a, an ni tachɛ gbee chɛ a. Chɛ ɛ a ma‑a wan, an ni ko chɛndɛ ma bia an boo fea a, min nyin. A sin, tɔnɔnɛ ɛ wan a ɔ, mɔ ɔ mɔ ko a.

⁹Chɛɛ wooya kɔɔsa bia, ni suun ma danɛ, ni ko a fasanɛ, a basan koɛ a Mosisi 'a sawa kun ma, i ma i boo chɛ a ɔ.

¹⁰Mɔɛ chɛ tana, min mbe mɔɛ n na fasan tena, a‑a si gba fea gbe. Ni a ma sɛmbɛ ni, i boo bɔ a ma koe ɔ.

¹¹Koe min na mu, i‑a a ɔ sɔn fan, mbɛ mɔ bonda chɛ ma tan ni, a sin na ko yama maenɛ an mbe a ma konan tena Yataa tena.

¹²Atɛmisi an fea Tikikɔsi a, ni n‑na an dɔndɔ sɔ i tena, a ma i ma gbɔsɔɛ a, i ni n tan pan Nikɔpɔdisi duu ɔ. Koe min na mu, n ma bɛndenɛ mu gbɛ chima tima chɛ bia koe a nɔ.

¹³A ma i ma gbɔsɔɛ a, i ni Senasi deman, dɔya chɛ, an fea Apɔdɔsi a, an 'na tachɛ ɔ. An mbe ta fen kɔ fen na tachɛ chɛ ɔ, a be an ma.

¹⁴A yɛ to, mmɔ 'a mɔɛ n ni an mayan ko chɛndɛ ma bia koe a an boo fea a, min mbe a ma, an ni che an fandi deman‑da ko gbɛa tima a, an ma na ma tataya tɔɛ n na.

¹⁵N mbe nɛ nn bɛ miin gbɛɛ a, an ni i kɔndɔn. Mmɔ koadia nyɔɛ chɛ n gbɛɛ kɔndɔn nɔ, mmɔ bɛ ɛ miin na gbee dɔndɔɛ a danaya ɔ Chisɔsi ko a. Yataa ni wo gbɛɛ dua.