Read Kono FIDEMƆN 1 Bible Online

FIDEMƆN 1 - Kono bible

FIDEMƆN 1

¹N fan Pɔɔ, n fɛn mbe nɛ pimbi chenɛ a Chisɔsi Chasi ko a, n fan mbe gboo chɛ nyɛn tena i tena, i wan Fidemɔn. Nn mbe a nyɛn tena, nn fea Timoti an na, mmɔ suun ma nyɔɛ. Fidemɔn, nn wai chɛ nyɔɛ mu i a, i sin ko a di nn ye.

²Nn mbe a nyɛn tena to, mmɔ suun ma nyɔɛ musuma, Afia wɛɛ, a tena, ni Akipɔsi, mmɔ bɔɛ soya mɔɛ Chasi 'a wai ɔ, a basan chɔchi tɔɛ gbɛɛ a, miin mbe bɛn nɔ i 'a chenɛ a.

³Mmɔ Fa Yataa, an fea Mansa Chisɔsi Chasi a, an ni wo dua, an ni faachima be wo ma.

⁴N mbe Yataa wai bɔ wan tima ɔ tima, ni n‑na samunɛ chɛ i ko a, i wan Fidemɔn.

⁵Koe min na mu, n‑na i 'a koadia ma tɔɛ a min, Yataa 'a mɔɛ n gbɛɛ ko a. A yɛ to, i kai faen mu buɛ min dɔ Mansa Chisɔsi a.

⁶Kuiɛ dɔndɔya chɛ wo e min dɔ, wo bɛ chɛ n na, miin kai faen mu Yataa a, n mbe samunɛ chɛ tena a ni ta ya ɔ ma. Koe min na mu, Yataa‑a fen chɛndɛ min gbɛɛ be mmɔ ma Chasi ɔ, i‑a a ɔ sɔn fan.

⁷I 'a suun ma nyɔncha koadia, a mu buɔdia a n tena, a‑a n faa chima wan. Koe min na mu, n suun ma nyɔɛ Chasi ɔ, i‑a buɔdia be wan Yataa 'a mɔɛ n gbɛɛ ma.

⁸Chɛ ko a, Chasi 'a gbasaya ɔ, n mbe kun fan, n ni i chɛ koe chɛndɛ din i ma, a chɛ koe a.

⁹Chɛɛ i 'a koadia n faa ɔ, a‑a a ma, n mbe i disa tena wan gbɛ. N fan Pɔɔ, n mbe chɛ ma tena wan, chenan kai mu wɛɛ n na,[1] a sin, n mbe to sa ɔ pimbi chenɛ a Chisɔsi Chasi ko a.

¹⁰Chɛ an fɛ mu, n mbe disa chɛ tena Wɔnesimɔsi an ko a. N 'na denɛ mu gbɛ a a Chasi ɔ. Koe min na mu, a‑a a kai fa Chasi a, n boo kɔɔ nɛ pimbi chenɛ a.

¹¹A kɔma a, mɔ a tenden nii ma a a i tena. Chɛɛ sanche chɛ ɔ, a ma gbɔsɔɛ ɛ wan mɔ fea gbɛɛ ma.

¹²N mbe a ma tena wɛɛ gbɛ, a ni yɛ i tena, chɛɛ a 'a koadia koa‑a n faa ma kaka.

¹³A ni wan n yii ma, n ni a bia nɛ ma koe a n baima, min mbe a ma, a ni basan n ma i gba ɔ, tima min na wɛ n mbe pimbi chenɛ a sakana bai chɛndɛ ko a.

¹⁴Chɛɛ n ma to ni, n ni n deman koe din i ma. N mbe to‑a wan a a, i ni a chɛ i wandi faa ma a. Chɛ an fɛ mu, n mbe ee ko ɔ ko ma tena, ni i ma dɔn ni min ma.

¹⁵Dɔndɔ kɔkɔɛ wo tɛ na‑a du Wɔnesimɔsi a, tima kundu ɛnden fan ko a, min mbe a ma, a ni yɛ wo fea ni ma a a, tima ɔ tima ko a.

¹⁶Sanche gbɛ, yɔn dechee ma a a, chɛɛ a benden mu yɔnɛ ma kaka. A mu gbɛ mɔ faa ma suun ma nyɔɛ an na. N toen mu a a kaka, chɛɛ i sin mbe to‑a wan a a, a ben n ma. I 'a yɔnɛ mu a a, a yɛ to, i suun ma nyɔɛ mu a a Mansa Chisɔsi ɔ.

¹⁷Chɛ an fɛ mu, ni i‑a n ya wan i bɔ wai chɛ mɔɛ a, i boo a si Wɔnesimɔsi kɔɔ, yɔ n fan Pɔɔ an nɛ.

¹⁸Ni a na‑a ko ɔ ko kan kɔ kan yɔn fan i ma, ni i 'a kuiɛ kan kɔ kan mbe a ma, n mbe a be‑a wan.

¹⁹N fan Pɔɔ, n fandi gbu boo gba an nɛ. N fan mbe a be tena, n‑na a ɔ sɔn bɛɛ ka boo ɔ boo, mbɛ n fan ta mu i wandi gbu a.

²⁰I dimu, suunɛ, koe chɛ chɛ n ye, Mansa Chisɔsi ko a, buɔdia be n ma Chasi ɔ.

²¹N danden fan mu a a chɛndɛ chɛ, mbɛ ni n‑na chɛ nyɛn, e ee n da a kuiɛ a bea duu ma. A sin gbu, n‑na a ɔ sɔn fan, mbɛ e ben‑da wan chɛ ma, n‑na min fɔ.

²²Ko dɔndɔ to, n yia chenɛ ɔ bɛn. Koe min na mu, ɛ n 'na yiinachii ɔ, mbɛ wo 'a samunɛ a ɛ min‑da wan, n ni bɔ nɛ, n ni na wo tan.

²³Nn fea mu nɛ Ɛpafasi a, pimbi chenɛ a, Chisɔsi Chasi ko a. A ni i kɔndɔn.

²⁴Chɛ n bɛɛ, n bɔɛ wai chɛ mɔɛ Maki, ni Ayisitakɔsi, ni Demasi, a basan Duku a, an mbe i kɔndɔn tena.

²⁵Mansa Chisɔsi Chasi ni wo dua.