Read Kono GBOO IBU MƆƐ N KO A 13 Bible Online

GBOO IBU MƆƐ N KO A 13 - Kono bible

GBOO IBU MƆƐ N KO A 13

¹Wo to wo nyɔn na tima ɔ tima ko a, yɔ mɔɛ ɛ to buɛ min dɔ a suun ma nyɔɛ n na.

²Wo ma wo boo bɔ ko chɛndɛ ma koe ɔ, sonda n na. Koe min na mu, mɔɛ dɔ n to‑a ko chɛndɛ ma an na, a yiima wɛɛ nii an dɔ, mbɛ an‑na an boo si maeka n kɔɔ.

³Mɔɛ miin mbe sa ɔ pimbi chenɛ a, an bakoe ni ma wo faa ɔ, yɔ wo bɛ an mbe nɔ an na. Ni chɛ n bɛɛ, miin mbe tɔɔya ɔ bia tena. Wo a ma yɔ wo bɛ an mbe an tɔɔya chɛ ɔ bia tena.

⁴Basɔmaya wa ni be fuu ma, wo gbɛɛ tɛ ɔ. A sin, wo ma waa ma basan mɔ dɔ mende n na, wo ee miin na fuu ɔ. Koe min na mu, mɔɛ min mbe koe tɛ, ɛ waa ma basan mɔ dɔ mende n na, Yataa ɛ a mɔɛ chɛ gbɛmbo‑a wan.

⁵Kɔpɔɛ wakoe ma ma wo faa ɔ kaka. Chɛɛ fen kɔ fen min mbe wo boo ɔ, wo bu ɔ ni dia, mbɛ ɛ wo boo ɔ. Koe min na mu, Yataa‑a a fɔ wan a 'a gboo ɔ, a ɔ, “N mbe ee i dɔndɔ gbe to‑a, n sin, n mbe ee i boo ka‑a.”

⁶Chɛ an fɛ mu, mmɔ yii na tɛenɛ ni ma Yataa ma, mbɛ mmɔ‑a a fɔ, mmɔ ɔ, “Mansa Yataa an mbe basan n ma, n mbe ee chian dɔ, mɔ gbu ee ko ɔ ko ma n na.”

⁷Wo ma nyina wo ya ɔ sɔɛ n ma, chɛ nu, miin na‑a Yataa bai sa wo tena. Wo wo yii na chii min na‑a an tan fɔɛ ɔ, mbɛ wo‑a wo kai fa Yataa a, yɔ an ni buɛ min dɔ.

⁸Chisɔsi Chasi ma mun ni a kɔma a, a ee mun bi tee chɛ kɔ, a sin mbe ee mun‑da kuɔ fɔ ko a.

⁹Wo ma dɔn kan sɛsɛ nu, miin kaen mu sakana bai chɛndɛ chɛ ma, an ni wo ka Yataa chia ma. A nyin mmɔ ni faa sɔɛ ma sɔn, koadia demanɛ ɔ, Yataa ɛ min chɛ. Chɛ benden mu bea koe ma sawa n fɛ, miin sien mu daun fenɛ n ma. Mɔɛ miin mbe bea sawa chɛ n fɛ, an nii ma an deman ni.

¹⁰Mɔɛ miin mbe an 'na tɛ mɔ wai chɛ tena Yataa 'a tɛndi ɔ, tea ee an boo ɔ, tɔnɔnɛ ma sɔn koe a yasi ɔ, min bɔ‑a Yataa tena mmɔ ko a.

¹¹Chu n 'na sawa kɔɔ, chɛ an ni ma. Chu n tɛ mɔ wa Yataa a, a ɛ na soe wii an na Yataa 'a tɛndi ɔ, san kɔ san na. Ɛ ta wan a a kaina chɛ, tɛndi chɛ ɔ, min mbe tenchen Yataa ko a. Mbɛ a‑a a be Yataa ma, mɔ gbu n 'na ko yama n ko a. Chɛɛ an soe su n tana, an ni an minda chia kunɛ a wan.

¹²Chɛ an fɛ mu, Chisɔsi wɛɛ nii ma fa ni duu wa chɛ bu ɔ wan. An bɔ‑a wan a a, mbɛ an‑na a fa. Chɛ ma‑a, a 'a mɔɛ n ni ma tenchen Yataa ko a, a wii chɛ 'a gbasaya ɔ.

¹³Chɛ an fɛ mu, mmɔ ta a tena kaina chɛ, min mbe chia kunɛ a. Mbɛ mmɔ‑a mmɔ kunɛ don mau ɔ, yɔ a na‑a miin dɔ bia.

¹⁴Chɛ ko a, duu ee ma‑a nɛ mmɔ boo ɔ, dunya chɛ ɔ, min mbe ma‑a kuɔ fɔ ko a. Mmɔ ya ɛ an duu chɛ an ya ɔ, min mbe na tena.

¹⁵Chɛ an fɛ mu, mmɔ tando be Yataa ma, tima ɔ tima ko a. Mmɔ 'a yasi dɔndɔ mu chɛ an na, mmɔ ɛ min be a ma, Chisɔsi 'a gbasaya ɔ. Mɔɛ min mbe a fɔ, a ɔ, ɛ Yataa an ko a, a ɛ chɛ an fɔ.

¹⁶Wo ma nyina ko chɛndɛ ma koe a, a basan wo nyɔn deman koe a. Koe min na mu, koe n fan nɛ miin mu yasi a, Yataa faa chima koe a.

¹⁷Wo kooya be wo ya ɔ sɔɛ n ma, wo ni bea an da a kuiɛ n fɛ. An fan mbe wo kun ma fɛn tena, tima ɔ tima ko a. Koe min na mu, an mbe na‑a wan a ɔ yian‑da Yataa a, an ni wo kun ma fɛn buɛ min dɔ. Ni wo‑a kooya be an ma, an mbe an 'na wai chɛ‑a buɔdia an na. Ni wo ma kooya be ni an ma, an mbe a chɛ‑a faa yɔnɛ an na. A sin mbe ee ma‑a ko a tenden na wo tena.

¹⁸Wo wo boo a chii samunɛ ma, nn ko a. Nn danden fan mu a a, mbɛ nn yiima a koenɛ mu fion. Koe min na mu, nn mbe butuin chɛ tima ɔ tima ko a, tea koe an ma koe a.

¹⁹A sin, n mbe wo ɔ tisa tena n faa gbɛɛ a, samunɛ chɛ koe a n ko a, Yataa ni a ma, n ni na to wo tena.

²⁰Yataa‑a a ma wan, mmɔ 'a mansa Chisɔsi‑a a kɔɔ sɔ, a ka saya ɔ. Mmɔ ɛ wan gbɛ yɔ sa nu, Chisɔsi ɛ miin kun ma fɛn. A‑a a wandi wii a bɔn fan, mmɔ ko a. Chɛ sin ma‑a wan dɔbɛn nama a, min mbe ma‑a kuɔ fɔ ko a. Chisɔsi wii chɛ 'a gbasaya ɔ, Yataa min mbe faa chima be,

²¹a ni basan wo ma chia ɔ chia a, wo toen mu min na, a faa ma koe ma koe a. A sin ni a ma, Chisɔsi Chasi 'a gbasaya ɔ, mmɔ ni ko ɔ ko ma, min mbe a faa chima. A sin, tando ni ma Chasi tɔɛ ma, kuɔ fɔ ni kuɔ fɔ ko a. A ni ma ka.

²²Wo dimu, n suun ma nyɔɛ nu Chasi ɔ, wo wo too ma sɔ bai chɛ n ma. Bai chɛ nu, gboo chɛ ɔ, miin mbe wo faa ma nande. Koe min na mu, gboo kundu mu dechee, n‑na min nyɛn ka wo tena.

²³N toen mu wo ni a ɔ sɔn, mbɛ mmɔ suun ma nyɔɛ Chasi ɔ, Timoti, an‑na a boo ka, a bɔ pimbi chenɛ a. Ni a fua‑a na‑a, nn fea, nn mbe na‑a wan wo tena.

²⁴Wo wo 'a ya ɔ sɔɛ n gbɛɛ kɔndɔn n ye, a basan Yataa 'a mɔɛ n gbɛɛ a. Mmɔ suun ma nyɔɛ nu Chasi ɔ, miin mbe Itadi chɛnyɛ ɔ, an bɛɛ ni wo kɔndɔn.

²⁵Yataa ni wo gbɛɛ dua.